རྒྱལ་སྤྱིའི་འགྲོ་བ་མིའི་ཐོབ་ཐང་དང་ཆོས་ལུགས་ཀྱི་ཚོགས་སྡེ་ཁག་ ༣༥ ཡིས་མཉམ་འབྲེལ་རྒྱལ་ཚོགས་ལ་ཞུ་ཡིག་ཕུལ་ཏེ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང་ཆོས་དད་རང་དབང་ལ་རྡོག་རོལ་ཚབས་ཆེན་གཏོང་བཞིན་པའི་གནས་སྟངས་གླེང་སློང་དགོས་སྐོར་བསྒྲགས་འདུག
ཟླ་འདིའི་ཕྱི་ཚེས་ ༢༣ ཉིན་སུད་སི་ཇེ་ནེ་ཝ་ (Geneva) མཉམ་འབྲེལ་རྒྱལ་ཚོགས་ཀྱི་གྲོས་ཁང་དུ། རྒྱ་ནག་གིས་རྒྱལ་ཚོགས་ལ་ཡོངས་ཁྱབ་རེས་འཁོར་སྙན་ཐོ་ (UPR) ཐེངས་བཞི་པ་སྙན་གསེང་ཞུ་གཏན་ཁེལ་ཡོད་པར་བརྟེན། ཁ་སང་ཕྱི་ཚེས་ ༡༡ ཉིན་འཛམ་གླིང་གི་ཆོས་ལུགས་དང་འགྲོ་བ་མིའི་ཐོབ་ཐང་རྩོད་ལེན་པའི་ཚོགས་སྡེ་ཁག་ ༣༥ ཡིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཙོ་འཛིན་ཨོ་མར་(Omar Zniber) ལགས་ཀྱི་མཚན་ཐོག་ཏུ། ཕྱི་ལོ་ ༢༠༡༨ ལོའི་འགྲོ་བ་མིའི་ཐོབ་ཐང་བསྐྱར་ཞིབ་ལྷན་ཚོགས་སྐབས་ནས་བཟུང་། རྒྱ་ནག་གཞུང་གིས་བོད་མིའི་ཆོས་དད་རང་དབང་ཚུད་པའི་ཆོས་ལུགས་འདྲ་མིན་གྱི་རང་དབང་ལ་རྡོག་རོལ་ཚབས་ཆེན་བཏང་དང་གཏོང་མུས་ཡིན་སྟབས། འཚོག་ལ་ཉེ་བའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་བསྐྱར་ཞིབ་ཀྱི་ཚོགས་འདུའི་སྟེང་། རྒྱ་ནག་གཞུང་གིས་བོད་བརྒྱུད་ནང་པ་རྣམས་གཙོ་བྱས་པའི་ཡུ་གུར་ཁ་ཆེ་བ་དང་། ཡེ་ཤུ་ཆོས་ལུགས་སོགས་ལ་དྲག་གནོན་ཚབས་ཆེན་བྱས་དང་བྱེད་བཞིན་པའི་གནད་དོན་གླེང་དགོས་པའི་ཞུ་ཡིག་ཕུལ་འདུག
ཞུ་ཡིག་དེའི་ནང་དམིགས་བསལ་བོད་ཀྱི་ཆོས་དད་རང་དབང་སྐོར་ལ། རྒྱ་ནག་གཞུང་གིས་བོད་བརྒྱུད་ནང་བསྟན་ཆོས་ལུགས་རྩ་མེད་གཏོང་ཐབས་ཀྱི་སྲིད་ཇུས་རྒྱ་སྐྱེད་བཏང་དང་གཏོང་མུས་ཡིན་ཞིང་། བོད་མི་ཚོས་༧གོང་ས་རྒྱལ་བ་རིན་པོ་ཆེ་མཆོག་ལ་དད་མོས་སོགས་ཀྱི་རྣམ་འགྱུར་བསྟན་པ་ཙམ་ཁྲིམས་འགལ་དུ་ངོས་འཛིན་བྱེད་པ་དང་། ཆོས་ཕྱོགས་བྱེད་སྒོ་སྤེལ་མི་ཆོག་པ། ཆོས་ལུགས་ཀྱི་དབུ་འཁྲིད་བསྐོ་གཞག་བྱེད་པར་རྒྱ་གཞུང་གི་ཆོག་མཆན་འཐོབ་དགོས་སྐོར་གླེང་སློང་བྱས་འདུག
ཡང་ཁ་སང་། རྒྱལ་སྤྱིའི་བོད་དོན་ལས་འགུལ་ཁང་གིས་མཉམ་འབྲེལ་རྒྱལ་ཚོགས་ཀྱིས་རྒྱ་ནག་གི་སྙན་ཐོའི་ནང་བོད་ནང་གི་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་གཙོས་བོད་ཀྱི་གནས་སྟངས་དང་འབྲེལ་བའི་ཚིག་ཐོ་གཏན་འབེབ་ནན་ཏན་ཞུ་དགོས་པའི་འབོད་སྐུལ་ཞུས་ཡོད་ཅིང་། རྒྱལ་སྤྱིའི་བོད་དོན་ལས་འགུལ་ཁང་དང་རྒྱལ་སྤྱིའི་འགྲོ་བ་མིའི་གནའ་འབྲེལ་མཐུན་ཚོགས་གཉིས་ནས། འདས་ལོའི་ཕྱི་ཟླ་ ༧ ནང་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ་བོད་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་ཆགས་ཡོད་པའི་སྙན་ཐོ་ཞིག་རྒྱལ་ཚོགས་ལ་ཕུལ་ཡོད་པ་ལུང་འདྲེན་དང་འབྲེལ། ཚོགས་པ་གཉིས་ནས་མུ་མཐུད་ཉམས་ཞིབ་བྱས་པ་བརྒྱུད། ད་ལྟའི་བོད་ནང་དམ་དྲག་གི་ཛ་དྲག་གནས་སྟངས་ཇེ་སྡུག་ཏུ་ཕྱིན་ཡོད་ཅིང་། རྒྱ་གཞུང་གི་སྲིད་ཇུས་དག་ནི་ཐད་ཀར་བོད་མི་རིགས་ཀྱི་རིག་གཞུང་རྩ་གཏོར་སོགས་ལ་དམིགས་ཡོད་སྐོར་བརྗོད་འདུག
རྒྱལ་སྤྱིའི་བོད་དོན་ལས་འགུལ་ཁང་གིས། འདས་ལོའི་ཕྱི་ཟླ་ ༡༢ ཚེས་ ༡༤ ཉིན་ཡུ་རོབ་གྲོས་ཚོགས་ཀྱིས་གྲོས་ཆོད་ཅིག་གཏན་འབེབ་བྱས་ཏེ། རྒྱ་ནག་གཞུང་གིས་བོད་ནང་བཅའ་སྡོད་སློབ་གྲྭའི་སྲིད་ཇུས་ལག་བསྟར་གྱིས། བོད་ཕྲུག་ས་ཡ་གཅིག་ལྷག་རྒྱ་བསྒྱུར་བྱེད་བཞིན་པར་སེམས་འཚབ་དང་སྦྲགས། རྒྱ་ནག་གཞུང་གིས་བཅའ་སྡོད་སློབ་གྲྭའི་རྒྱ་བསྒྱུར་སྲིད་ཇུས་འཕྲལ་དུ་མཚམས་འཇོག་དགོས་པའི་སྐུལ་མ་བཏང་ཡོད། ཡང་འདས་ལོའི་ཕྱི་ཟླ་ ༡༠ ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཟུར་ཚོགས་ལྷན་ཚོགས་ཤིག་གི་སྟེང་། རྒྱལ་སྤྱིའི་བོད་དོན་ལས་འགུལ་ཁང་གི་འཇར་མན་ཚན་པའི་འགན་འཛིན་ (Kai Müller) ལགས་ཀྱིས། རྒྱ་ནག་གིས་བོད་ནང་འབྲོག་མི་གནས་སྤོར་གྱི་སྲིད་ཇུས་ལག་བསྟར་བྱེད་བཞིན་པ་དང་བོད་མི་ ༡༦ གར་སོང་ཆ་མེད་དུ་གྱུར་བ་སོགས་ཀྱི་གནད་དོན་གླེང་སློང་བྱས་ཏེ། འཚོག་ལ་ཉེ་བའི་རེས་འཁོར་བསྐྱར་ཞིབ་སྙན་ཐོ་སྒྲོག་སྦྱངས་སྐབས་རྒྱ་ནག་ལ་གནད་དོན་དེ་དག་གླེང་དགོས་པའི་འབོད་སྐུལ་ཞུས་ཡོད་སྐོར་སོགས་བརྗོད་འདུག
འདས་ལོར་རྒྱལ་སྤྱིའི་བོད་དོན་ལས་འགུལ་ཁང་དང་རྒྱལ་སྤྱིའི་འགྲོ་བ་མིའི་གནའ་འབྲེལ་མཐུན་ཚོགས་གཉིས་ནས་རྒྱལ་ཚོགས་ལ་ཕུལ་བའི་སྙན་ཐོའི་ནང་། བོད་ནང་བཅའ་སྡོད་སློབ་གྲྭ་བཙུགས་པ་དང་འབྲེལ་ནས། བོད་ཕྲུག་ས་ཡ་གཅིག་ལྷག་རང་རང་གི་བཟའ་མི་དང་ཁ་བྲལ་ཏུ་བཏང་སྟེ་རྒྱ་བསྒྱུར་བྱེད་བཞིན་པ་དང་། བོད་ནང་གི་ཞིང་འབྲོག་མང་ཚོགས་གནས་སྤོར་བྱེད་བཞིན་པ། དེ་བཞིན། ཆོས་ལུགས་ཀྱི་བྱེད་སྒོ་ཁག་ལ་སྔར་ལྷག་གིས་དམ་དྲག་བྱེད་བཞིན་པ་སོགས་ཀྱི་སྐོར་འཁོད་ཡོད་འདུག
ཡང་འདས་ལོར་ཕྱི་ཟླ་ ༨ ནང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་། ཕྱི་ཟླ་ ༡༢ ནང་བོད་ཀྱི་གཞོན་ནུ་ལྷན་ཚོགས་དང་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ། རྒྱལ་སྤྱིའི་བོད་ཀྱི་འབྲེལ་མཐུད། འཚེ་མེད་ཞི་བའི་ཐེབས་རྩ་བཅས་གཞུང་འབྲེལ་མ་ཡིན་པའི་ཚོགས་པ་ལྔས་མཉམ་འབྲེལ་རྒྱལ་ཚོགས་ཀྱི་བསྐྱར་ཞིབ་ལྷན་ཚོགས་ཀྱིས་བོད་ནང་གི་ཆེས་ཛ་དྲག་ཅན་གྱི་དངོས་ཡོད་གནས་སྟངས་ཁག་མངོན་གསལ་དོད་པོའི་ཐོག་ནས་རྒྱ་ནག་ལ་གླེང་སློང་གནང་དགོས་པའི་འབོད་སྐུལ་ཞུས་འདུག
གསར་འགོད་པ། སྐལ་བཟང་སྦྱིན་པ།
