བོད་མིའི་སྒྲིག་འཛུགས་ཀྱི་དང་བླངས་བོད་དོན་ཞུ་གཏུག་ལས་འགུལ་བ་རྣམས་གཙོས་གཞུང་འབྲེལ་མིན་པ་དང་བོད་དོན་རྒྱབ་སྐྱོར་བའི་ཚོགས་སྡེ་ཁག་གིས་རང་རང་གི་གནས་ཡུལ་གཞུང་ལ་འགྲོ་བ་མིའི་ཐོབ་ཐང་བསྐྱར་ཞིབ་ལྷན་ཚོགས་སྐབས་བོད་དོན་གླེང་སློང་དགོས་པའི་ལས་འགུལ་སྤེལ་གྱིན་འདུག
དེ་རིང་ནོར་ཝེ་བོད་དོན་རྒྱབ་སྐྱོར་ཚོགས་པ་དང་ནོར་ཝེ་བོད་རིགས་གཞོན་སྐྱེས་ཚོགས་པ་གཉིས་ནོར་ཝེ་ཕྱི་སྲིད་བློན་ཆེན་ལྷན་ཁང་དུ་བསྐྱོད་དེ། མི་གྲངས་ ༧༠༠༠ ལྷག་གི་མཚན་རྟགས་བསྡུ་རུབ་བྱས་པའི་བོད་དོན་ཞུ་གཏུགས་ཀྱི་སྙན་ཞུ་ཕུལ་ཡོད་པ་དང་། ཞུ་ཡིག་ནང་ཕྱི་ཚེས་ ༢༣ ཉིན་འཚོགས་གཏན་ཁེལ་བའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་བསྐྱར་ཞིབ་ལྷན་ཚོགས་སྐབས་རྒྱ་ནག་གཞུང་ལ་བོད་ཀྱི་འགྲོ་བ་མིའི་ཐོབ་ཐང་གི་གནས་སྟངས་གླེང་སློང་བྱས་ཏེ་བོད་ནང་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་མཚམས་འཇོག་དགོས་པ་སོགས་ཀྱི་འབོད་སྐུལ་ཞུས་ཡོད་འདུག
ཁ་སང་དབྱིན་ཡུལ་དུ་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱི་ཡུ་རོབ་དང་བླངས་བོད་དོན་ཞུ་གཏུག་ལས་འགུལ་བ་རྣམས་དང་བོད་རང་དབང་ཚོགས་པ། དབྱིན་ཡུལ་གཙུག་ལག་སློབ་ཆེན་བོད་རིགས་ཚོགས་པ་བཅས་ཀྱི་ཚོགས་མི་ཚོ་དབྱིན་ཇིའི་ཕྱི་སྲིད་བློན་ཆེན་ལྷན་ཁང་དུ་བསྐྱོད་དེ། མི་གྲངས་ ༧༠༠༠ ལྷག་གིས་མཚན་རྟགས་བརྒྱབ་པའི་བོད་དོན་ཞུ་གཏུགས་ཀྱི་སྙན་ཞུ་ཕུལ་ཡོད་པ་དང་། བོད་དོན་ཞུ་གཏུག་གི་ལས་འགུལ་དེ་ནི་བོད་མིའི་སྒྲིག་འཛུགས་ཀྱི་ཡུ་རོབ་ཀྱི་དང་བླངས་ཞུ་གཏུག་ལས་འགུལ་བ་གཙོ་བྱས་པའི་བོད་མིའི་གཞུང་འབྲེལ་མིན་པའི་ཚོགས་པ་དང་བོད་དོན་རྒྱབ་སྐྱོར་བའི་ཚོགས་པ་ཁྱོན་ ༡༣༠ ལྷག་གིས་སྤེལ་བཞིན་པའི་ལས་འགུལ་ཞིག་རེད་འདུག
ད་རེས་མི་གྲངས་ ༧༠༠༠ ལྷག་གི་མཚན་རྟགས་འཁོད་པའི་ཞུ་གཏུག་ལས་འགུལ་དེ་ནི། ཟླ་འདིའི་ཕྱི་ཚེས་ ༡༤ ཉིན་བོད་མི་རྣམས་གཙོ་བྱས་པའི་བོད་དང་འབྲེལ་བའི་ཚོགས་སྡེ་ཁག་ ༡༣༠ ཡིས་ཇི་ནེ་ཝར་ཡོད་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་གཏན་འཇགས་ཚོགས་མི་རྣམས་ལ་ཕུལ་བའི་ལས་འགུལ་ཞིག་ཡིན་ཞིང་། འགྲོ་བ་མིའི་ཐོབ་ཐང་གི་བསྐྱར་ཞིབ་ལྷན་ཚོགས་མ་འཚོགས་པའི་གོང་དུ་ལས་འགུལ་བ་དག་གིས་རང་རང་གནས་ཡུལ་གྱི་གཞུང་ལ་ཞུ་ཡིག་ཕུལ་ཏེ། ད་ལན་གྱི་བསྐྱར་ཞིབ་ལྷན་ཚོགས་སྟེང་བོད་ནང་གི་འགྲོ་བ་མིའི་ཐོབ་ཐང་གླེང་སློང་གནང་དགོས་པའི་ནན་སྐུལ་ཞུ་བཞིན་ཡོད་འདུག
ཞུ་ཡིག་དེའི་ནང་བོད་ནང་བཅའ་སྡོད་སློབ་གྲྭའི་ལམ་ལུགས་བཙུགས་ཏེ་བོད་ཕྲུག་ས་ཡ་གཅིག་ལྷག་བཟའ་མི་དང་ཁ་བྲལ་གྱིས་རྒྱ་བསྒྱུར་བྱེད་བཞིན་པ་དང་། བོད་ནང་གི་ཞིང་འབྲོག་མང་ཚོགས་གནས་སྤོར་བྱེད་དུ་བཅུག་སྟེ་ས་ཆའི་བདག་དབང་འཕྲོག་བཞིན་པ་དང་སྲོལ་རྒྱུན་གྱི་འཚོ་བའི་གོམས་སྲོལ་བསྒྱུར་བཞིན་པ། དེ་བཞིན། དགོན་སྡེ་ཁག་ལ་སྔར་ལྷག་གིས་དམ་དྲག་བྱས་ཏེ་ཆོས་ལུགས་ཀྱི་བྱེད་སྒོ་སྤེལ་མི་ཆོག་པ་དང་། བོད་ཀྱི་ཁོར་ཡུག་སྲུང་སྐྱོབ་པ་བཙན་གྱིས་བཙོན་འཇུག་བྱེད་བཞིན་པ་སོགས་ཀྱི་དངོས་ཡོད་གནས་སྟངས་རྒྱ་ནག་ལ་གླེང་སློང་བྱས་ཏེ། བོད་ནང་མི་རིགས་རྩ་གཏོར་གྱི་སྲིད་ཇུས་དེ་དག་སྤེལ་མཚམས་འཇོག་དགོས་པའི་འབོད་སྐུལ་ཞུ་ཡི་ཡོད་འདུག
དེ་བཞིན་ཕྱི་ཚེས་ ༡༡ ཉིན་འཛམ་གླིང་གི་ཆོས་ལུགས་དང་འགྲོ་བ་མིའི་ཐོབ་ཐང་རྩོད་ལེན་པའི་ཚོགས་སྡེ་ཁག་ ༣༥ ཡིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཙོ་འཛིན་ཨོ་མར་(Omar Zniber) ལགས་ཀྱི་མཚན་ཐོག་ཏུ། ཕྱི་ལོ་ ༢༠༡༨ ལོའི་འགྲོ་བ་མིའི་ཐོབ་ཐང་བསྐྱར་ཞིབ་ལྷན་ཚོགས་སྐབས་ནས་བཟུང་། རྒྱ་ནག་གཞུང་གིས་བོད་མིའི་ཆོས་དད་རང་དབང་ཚུད་པའི་ཆོས་ལུགས་འདྲ་མིན་གྱི་རང་དབང་ལ་རྡོག་རོལ་ཚབས་ཆེན་བཏང་དང་གཏོང་མུས་ཡིན་སྟབས། འཚོག་ལ་ཉེ་བའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་བསྐྱར་ཞིབ་ཀྱི་ཚོགས་འདུའི་སྟེང་། རྒྱ་ནག་གཞུང་གིས་བོད་བརྒྱུད་ནང་པ་རྣམས་གཙོ་བྱས་པའི་ཡུ་གུར་ཁ་ཆེ་བ་དང་། ཡེ་ཤུ་ཆོས་ལུགས་སོགས་ལ་དྲག་གནོན་ཚབས་ཆེན་བྱས་དང་བྱེད་བཞིན་པའི་གནད་དོན་གླེང་སློང་དགོས་པའི་ཞུ་ཡིག་ཕུལ་འདུག
ད་དུང་ཟླ་འདིའི་ཕྱི་ཚེས་ ༢༡ ཉིན་ཡུ་རོབ་ཏུ་རྟེན་གཞི་བྱས་པའི་བོད་མིའི་ཚོགས་སྡེ་ཁག་གིས་མཉམ་འབྲེལ་རྒྱལ་ཚོགས་ཀྱི་མདུན་དུ་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་རྒྱུ་ཡིན་པའི་གསལ་བསྒྲགས་ཤིག་སྤྱི་ཚོགས་དྲ་ལམ་ཁག་ཏུ་ཁྱབ་སྤེལ་འགྲོ་དང་འགྲོ་བཞིན་པ་རེད་འདུག་ལ། གསལ་བསྒྲགས་དེའི་ནང་བོད་མི་གང་མང་མང་གིས་ལས་འགུལ་ནང་མཉམ་ཞུགས་གནང་སྟེ་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ཚུད་པའི་མི་རིགས་རྩ་གཏོར་གྱི་སྲིད་ཇུས་ལག་བསྟར་བྱས་དང་བྱེད་བཞིན་པའི་གནད་དོན་རྒྱལ་ཚོགས་ནང་གླེང་སློང་ཡོང་ཐབས་གནང་དགོས་པ་སོགས་ཀྱི་འབོད་སྐུལ་ཞུས་འདུག
གསར་འགོད་པ། སྐལ་བཟང་སྦྱིན་པ།
