རྒྱ་ནག་གཞུང་གི་སྒྲིག་ཁྲིམས་ལ་གནོད་འཚེ་བཏང་ཡོད་ལུགས་བཤད་ནས་བོད་རང་སྐྱོང་ལྗོངས་དམར་ཤོག་ཚོགས་པའི་ཚོགས་མི་དང་རང་སྐྱོང་ལྗོངས་སྲིད་གཞུང་གི་མགོ་འཁྲིད་གཞོན་པ་ཝང་ཡུང་ཟེར་བར་ཞིབ་བཤེར་བྱེད་ཀྱི་ཡོད་འདུག
ཞི་ཅིན་ཕིན་གྱིས་རྒྱ་ནག་གི་ཏང་སྲིད་དམག་གསུམ་གྱི་དབང་ཆ་བཟུང་བ་ནས་བཟུང་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བའི་མིང་འོག་ནས་རྒྱ་ནག་དང་། རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག ཡུ་གུར་སོགས་ཀྱི་དཔོན་རིགས་མང་པོ་ཞིག་ལ་ལྐོག་ཟ་རུལ་སུངས་དང་ལྐོག་རྔན་བླངས་བ། དམར་ཤོག་གཞུང་ལ་བློ་སེམས་མི་དཀར་བའི་ལས་ཀ་བྱས་ཡོད་ལུགས་བརྗོད་དེ་ནག་ཉེས་གཡོགས་ཡོད་པ་ལྟར། ཁ་སང་རེས་གཟའ་ཟླ་བའི་ཉིན་རྒྱ་ནག་དབུས་སྒྲིག་ཁྲིམས་ལྟ་ཞིབ་ལྷན་ཁང་(Central Commission for Discipline Inspection) གིས། བོད་རང་སྐྱོང་ལྗོངས་རྒྱ་ནག་དམར་ཤོག་ཚོགས་པའི་ཚོགས་མི་དང་། རང་སྐྱོང་ལྗོངས་སྲིད་གཞུང་གི་མགོ་འཁྲིད་གཞོན་པ་ཝང་ཡུང་(Wang Yong) ཟེར་བ་ཞིག་གིས་རྒྱ་ནག་དམར་ཤོག་གཞུང་གི་ཁྲིམས་སྒྲིག་ལ་གནོད་འཚེ་ཚབས་ཆེན་བཏང་ཡོད་ལུགས་བརྗོད་དེ་ཞིབ་བཤེར་བྱེད་ཀྱིན་ཡོད་པའི་གནས་ཚུལ་བསྒྲགས་འདུག
ཝང་ཡུང་(Wang Yong) ཟེར་བ་དེས་ཕྱི་ལོ་ ༢༠༢༡ ཟླ་ ༤ ནང་བོད་རང་སྐྱོང་ལྗོངས་སྲིད་གཞུང་གི་མགོ་འཁྲིད་གཞོན་པར་བསྐོ་གཞག་བྱས་ཡོད་ཅིང་། ད་ལྟ་རྒྱ་ནག་གཞུང་འབྲེལ་དྲ་ལམ་འགར་ཁོས་རྒྱ་ནག་གཞུང་གིས་ཁྲིམས་སྒྲིག་ལ་གཏོར་བརླག་བཏང་ཡོད་ལུགས་བསྙད་པ་ཙམ་ལས། དོན་དངོས་ནག་ཉེས་ག་རེ་བསགས་ཡོད་མེད་ཐད་གསལ་ཁ་གང་ཡང་མི་འདུག
ཟླ་འདིའི་ཕྱི་ཚེས་ ༢༨ ཉིན་རྒྱ་ནག་གཞུང་འབྲེལ་གྱི་གསར་ལམ་དུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༢༣ ལོ་གཅིག་པུར་གཏན་འབེབས་དོན་ཚན་བརྒྱད་ཟེར་བ་དང་འགལ་བའི་ཉེས་མིང་འོག མི་གྲངས་ ༡༥༣༦༦༢ ལ་ཞིབ་བཤེར་བྱས་ཡོད་པའི་ཁྲོད། མི་གྲངས་ ༡༠༨༦༩༥ ལ་ཉེས་ཆད་བཅད་ཡོད་འདུག་ལ། འདས་པའི་ལོ་ཤས་རིང་རྒྱ་ནག་གཞུང་གིས་ཉེས་མེད་དཔོན་རིགས་རྣམས་ལ་ནག་ཉེས་སྣ་ཚོགས་གཡོགས་ཀྱིན་ཡོད་པ་མ་ཟད། སྟག་རྒན་ཞེས་པའི་མིང་ཐོག་ནས་ཞི་ཅིན་ཕིན་གྱི་བསམ་བློ་དང་མི་མཐུན་པ་རྣམས་འབུར་འཇོམས་བཏང་དང་གཏོང་གིན་ཡོད་པ་རེད།
ཟླ་འདིའི་ཕྱི་ཚེས་ ༢༦ ཉིན་པེ་ཅིང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གསུམ་པས་རྒྱལ་ཁབ་གསར་སྤེལ་དངུལ་ཁང་ཟེར་བའི་མགོ་འཛིན་གཞོན་པ་ཟུར་པ་ཧོ་ཤིང་ཞང་གིས་ལྐོག་རྔན་བླངས་པ་དང་། སྒྲིག་སྲོལ་ལས་འགལ་ཏེ་དངུལ་རྩའི་འཛིན་ཡིག་སྤྲད་པ། ཁྲིམས་འགལ་གྱིས་དངུལ་བུན་བཏང་བ། མངའ་ཁོངས་ཕྱིའི་བཅོལ་དངུལ་སྦས་སྐུང་བྱས་པའི་ནག་ཉེས་གཡོགས་ནས། ཁོ་ལ་ལོ་ཉི་ཤུའི་བཙོན་འཇུག་ཁྲིམས་ཐག་བཅད་ཡོད་འདུག གཞན་ཡང་། ཟླ་འདིའི་ཕྱི་ཚེས་ ༡༠ ཉིན་ཧྲན་ཞི་ཞིང་ཆེན་གྱི་ཞི་ཨན་གྲོང་ཁྱེར་གྱི་འབྲིང་རིམ་མི་མང་ཁྲིམས་ཁང་ཟེར་བས། བོད་རང་སྐྱོང་ལྗོངས་མི་དམངས་སྲིད་གཞུང་ཟེར་བའི་འགན་འཛིན་གཞོན་པ་ཟུར་པ་ཀྲང་ཡུང་ཙེ་ཟེར་བས། ལྐོག་རྔན་རྒྱ་སྒོར་ཁྲི་ ༥༡༨༡ བླངས་པའི་ནག་ཉེས་བཙུགས་ཏེ་མི་ལོ་ ༡༤ ལ་བཙོན་འཇུག་ཁྲིམས་ཐག་དང་། རྒྱ་སྒོར་ས་ཡ་ལྔས་ཆད་པ་བཅད་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
