སེར་བྱེས་སྒྲ་སྒྱུར་སྡེ་ཚན་དང་མཱེ་སོར་བོད་ཀྱི་སྡོད་ཁང་གཉིས་ཀྱི་གོ་སྒྲིག་འོག ཁ་སང་ཕྱི་ཚེས་ ༡ ནས་བདུན་ཕྲག་གཅིག་རིང་རྒྱ་གར་ལྷོ་ཕྱོགས་མེ་སོར་གྲོང་ཁྱེར་དུ་རྟེན་གཞི་བྱས་པའི་ནེག་སིའི་ཚོང་རར་(Nexus Centre City Mall )། སེར་བྱེས་སྒྲ་སྒྱུར་སྡེ་ཚན་གྱི་ལོ་ཙཱ་བ་རྒན་པ་བསྟན་འཛིན་དར་རྒྱས་ལགས་དང་ཐུབ་བསྟན་མཐར་ཕྱིན་ལགས་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ནས་ལྗགས་རྩོམ་མཛད་པའི་དབྱིན་ཡིག་ཕྱག་དེབ་བརྒྱ་ལྷག་འགྲེམས་སྟོན་གནང་གི་ཡོད་པ་དང་བསྟུན། ༧མགོན་པོ་གང་ཉིད་ཀྱི་ཐུགས་སྐྱེད་དམ་བཅའ་བཞིའི་སྐོར་ལ་གོ་རྟོགས་སྤེལ་གྱིན་ཡོད་འདུག
༧གོང་ས་རྒྱལ་བ་རིན་པོ་ཆེ་མཆོག་གི་དབྱིན་ཡིག་གི་ཕྱག་དེབ་འགྲེམས་སྟོན་དེའི་ཁྲོད། བདེ་སྐྱིད་ཀྱི་བསྟན་བཅོས་དང་། ཆོས་ལུགས་ཀྱི་མཚམས་ལས་འདས་པའི་བཟང་སྤྱོད། སྟོང་ལོ་གསར་པའི་རྣམ་གཞག་དང་། Healing for Anger ། Four Noble Truths ། The Book of Joy ། དེ་བཞིན་ Toward a True Kinship of Faiths: How the World’s Religions Can Come Together སོགས་༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་དེབ་བརྒྱ་ལྷག་ཡོད་འདུག
