རྒྱ་གཞུང་གིས་རྩོམ་པ་པོ་གྲགས་ཅན་ཡང་ཧུན་ཅུན་ལ་དུས་འགྱངས་སྲོག་ཁྲིམས་བཅད།

རྒྱ་ནག་པེ་ཅིན་འབྲིང་རིམ་མི་དམངས་ཁྲིམས་ཁང་གིས་ཨོ་གླིང་གི་རྩོམ་པ་པོ་གྲགས་ཅན་ཡང་ཧུན་ཅུན་ (Yang Hengjun) ལ་དུས་འགྱངས་སྲོག་ཁྲིམས་བཅད་འདུག

ཁ་སང་ཕྱི་ཚེས་ ༥ ཉིན་རྒྱ་ནག་པེ་ཅིན་འབྲིང་རིམ་མི་དམངས་ཁྲིམས་ཁང་ཟེར་བས། ཨོ་གླིང་གི་རྩོམ་པ་པོ་གྲགས་ཅན་ཡང་ཧུན་ཅུན་ (Yang Hengjun) གྱིས་སོ་མྱུལ་བྱས་པའི་ཉེས་མིང་འོག་དུས་འགྱངས་སྲོག་ཁྲིམས་བཅད་འདུག རྩོམ་པ་པོ་ཁོང་ནི་ཕྱི་ལོ་ ༢༠༡༩ ལོར་རྒྱ་ནག་ཀཱང་ཀྲུའུ་གནམ་ཐང་ནས་འཛིན་བཟུང་བྱས་ཏེ། ད་བར་རྒྱ་ནག་གཞུང་གིས་རྩོམ་པ་པོ་ཁོང་ལ་ཁྲིམས་ཐག་ཐེངས་གཉིས་བཅད་མྱོང་ཡོད་འདུག

དེའི་ཐད་ཨོ་གླིང་གི་ཕྱི་སྲིད་བློན་ཆེན་པེ་ནི་ཝོང་ (Penny Wong) མཆོག་གིས། སྲོག་ཁྲིམས་ཐག་གཅོད་དེ་ལ་སེམས་འཚབ་བྱུང་ཡོད་སྐོར་དང་། ཨོ་གླིང་གཞུང་གིས་ཐག་གཅོད་དེར་ངོས་ལེན་རྩ་བ་ཉིད་ནས་བྱེད་ཐབས་མེད་པའི་ལངས་ཕྱོགས་བརྟན་པོ་ཡིན་པ་མ་ཟད། ཨོ་གླིང་གཞུང་གིས་རྩོམ་པ་པོ་ཁོང་ལ་དྲང་བདེན་གྱི་ཐག་གཅོད་དང་ཁོའི་བདེ་ཐང་ཐད་གང་ཐུབ་གནང་རྒྱུ་ཡིན་ལ། ཨོ་གླིང་མི་མང་རྣམས་ཀྱིས་ཁོང་དང་ཁོང་གི་ནང་མི་རྣམས་ལྷན་འཛོམས་ཡོང་བའི་རེ་འདོད་ཆེན་པོ་བྱེད་ཀྱི་ཡོད་སྐོར་སོགས་གསུངས་འདུག

སྤྱིར་རྒྱ་ནག་ནང་དུས་འགྱངས་སྲོག་ཁྲིམས་ཀྱི་ཐག་གཅོད་དེ་ལོ་གཉིས་ཀྱི་རྗེས་ནས་སྲོག་ཁྲིམས་ལག་བསྟར་དངོས་སུ་བྱེད་པའམ། ཡང་ན་ཚེ་བཙོན་ཏེ་བཙོན་ཁང་དུ་ལོ་ ༢༥ བསྡད་དགོས་པའི་གནས་སྟངས་ལ་འགྱུར་སྲིད་པ་ཡིན་སྟབས། གནད་དོན་དབྱེ་ཞིབ་པ་མང་པོ་ཞིག་གིས་ཁོང་ལ་ལོ་གཉིས་ཀྱི་རྗེས་ནས་སྲོག་ཁྲིམས་ལག་བསྟར་དངོས་སུ་མ་བྱས་ཚེ། ཚེ་བཙོན་ཆགས་སྲིད་པའི་ཚོད་དཔག་བྱེད་ཀྱི་འདུག

ཕྱི་ལོ་ ༢༠༡༩ ལོའི་མགོ་སྟོད་དུ་རྒྱ་ནག་ནང་དུ་ཡོད་པའི་ཨོ་གླིང་གི་རྩོམ་པ་པོ་གྲགས་ཅན་ཡང་ཧུན་ཅུན་གར་སོང་ཆ་མེད་དུ་གྱུར་ནས་ཟླ་བ་དྲུག་ཙམ་ཕྱིན་རྗེས། ཁོང་གི་ནང་མི་ཚོས་རྩོམ་པ་པོ་ཡང་སོ་མྱུལ་བའི་ཉེས་མིང་འོག ཀཱང་ཀྲུའུ་གནམ་ཐང་ (Guangzhou airport) ནས་འཛིན་བཟུང་བྱས་ཡོད་པ་ཤེས་རྟོགས་བྱུང་ཡོད་པ་རེད། རྩོམ་པ་པོ་ཡང་ཧུན་ཅུན་ནི་རྒྱ་ནག་ནང་སྐྱེས་པའི་ཨོ་གླིང་གི་མི་སེར་ཞིག་ཡིན་འདུག

ཕྱི་ལོ་ ༢༠༢༡ ཟླ་ ༥ པའི་ནང་རྒྱ་ནག་པེ་ཅིན་གྱི་ཁྲིམས་ཁང་ཞིག་གིས་ཡང་ཧུན་ཅུན་ལ་གསང་བའི་ལམ་ནས་ཁྲིམས་བཤེར་བྱས་ཡོད་ཀྱང་། ཁྲིམས་ཀྱི་བཅད་ཁྲ་དང་འབྲེལ་བའི་གནས་ཚུལ་གང་ཡང་ཕྱིར་བསྒྲགས་བྱས་མེད་པ་རེད། ཡིན་ནའང་། རྩོམ་པ་པོ་ཡང་གིས་ཉེས་འཛུགས་དེ་ངོས་ལེན་མ་བྱས་པར་བསྐྱར་དུ་ཁྲིམས་གཏུགས་བྱས་ཡོད་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།