རྒྱ་གཞུང་གིས་བོད་སྡེ་དགེ་རྫོང་ཁོངས་ཀྱི་ཡེ་ན་དགོན་གནས་སྤོར་དགོས་པའི་བཙན་བཀའ་གཏོང་གི་ཡོད་པར་བརྟེན་ས་གནས་མི་མང་གིས་པུས་མོ་སར་བཙུགས་ནས་ངུ་འབོད་གནང་འདུག
རྒྱ་ནག་གཞུང་གིས་འབྲི་ཆུའི་རྒྱུད་དུ་ཆུ་རགས་གསར་རྒྱག་གི་ལས་གཞི་སྤེལ་ཏེ། ས་གནས་མང་ཚོགས་བཙན་གྱིས་ས་གནས་གཞན་དུ་གནས་སྤོར་བྱ་དགོས་པའི་བཙན་བཀའ་གཏོང་གི་ཡོད་པ་ལྟར། ཁ་སང་ཕྱི་ཚེས་ ༢༠ ཉིན་སླར་ཡང་སྡེ་དགེ་རྫོང་ཁོངས་ཀྱི་དབོན་ཐོག་གྲོང་ཚོའི་ཡེ་ན་དགོན་དུ་ས་གནས་ལས་བྱེད་པ་ཡོང་སྟེ། དགོན་པའི་ལས་སྣེ་དང་མི་མང་བཅས་ལ་བཙན་བཀའ་གཏོང་སྐབས། མི་མང་གིས་པུས་མོ་ས་ལ་བཙུགས་ནས་ངུ་འབོད་གནང་འདུག
འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་ནས་བརྙན་ཐུང་མཁོ་སྤྲོད་གནང་བའི་ནང་དུ། ས་གནས་ལས་བྱེད་པ་འགའ་ཡི་མདུན་དུ་ཡེ་ན་དགོན་གྱི་ལས་སྣེ་དང་ས་གནས་མི་མང་རྒན་གཞོན་མང་པོས་ཞུ་སྐུལ་བྱེད་ཀྱི་འདུག་ལ། མཐར་ལས་སྣེ་དང་མི་མང་འུ་ཐུག་ནས་ཚང་མས་པུས་མོ་སར་བཙུགས་ཏེ་ངུ་འབོད་བྱེད་ཀྱི་འདུག ཡིན་ནའང་། དེའི་རྗེས་སུ་གནས་ཚུལ་ག་རེ་བྱུང་ཡོད་མེད་སོགས་ཤེས་རྟོགས་ཐུབ་ཀྱི་མི་འདུག་པས། འདི་ག་གསར་ཁང་ནས་མུ་མཐུད་རྒྱུས་ལོན་བྱེད་བཞིན་པ་ཡིན།
ཟླ་འདིའི་ཕྱི་ཚེས་ ༡༤ ཉིན་སྡེ་དགེ་རྫོང་མི་མང་ཚོགས་ཁང་གི་སྒོ་འགྲམ་དུ། བོད་མི་མང་དག་ཅིག་འདུ་འཛོམས་ཀྱིས་རྒྱ་གཞུང་གི་མགོ་ཁྲིད་རྣམས་ལ། སྡེ་དགེ་རྫོང་གི་དབོན་སྟོད་ཤང་གི་འབྲི་ཆུའི་བཞུར་རྒྱུན་དུ་ཆུ་རགས་གསར་རྒྱག་དང་། ཁུལ་དེའི་དགོན་སྡེ་དྲུག་དང་། འབྲི་ཆུ་ཤར་ནུབ་གཉིས་ཀྱི་སྡེ་ཁག་ ༢༥ ཡས་མས་གནས་སྤོར་ལས་གཞི་ལ་མོས་མཐུན་མེད་པར་བརྟེན། ལས་གཞི་དེ་མཚམས་འཇོག་དགོས་པའི་ངོ་རྒོལ་ལས་འགུལ་ཞིག་སྤེལ་འདུག
འབྲི་བརྒྱུད་ཡེ་ན་དཔལ་བཀྲ་ཤིས་ལྷ་རྩེ་དགོན་ནི་རྒྱ་ནག་གིས་བཅད་བགོས་བྱས་པའི་སི་ཁྲོན་ཞིང་ཆེན་སྡེ་དགེ་རྫོང་ནས་སྤྱི་ལེ་ ༦༠ ཙམ་གྱི་སར་ཡོད་པའི་ཡ་ཆེ་ཡུལ་ཚོ་འབྲི་རྒྱུད་ཡེ་ན་ས་ཁུལ་དུ་ཆགས་ཡོད་ཅིང་། ལོ་རྒྱུས་མང་པོ་ཞིག་ཏུ་ཐོག་མར་བྱ་བྲལ་བ་ས་སེར་བླ་མ་བསོད་ནམས་རྒྱལ་མཚན་མཆོག་གིས་ཕྱི་ལོ་ ༡༢༥༥ ལོར་ཕྱག་བཏབ་ཡོད་ཅིང་། དང་ཐོག་འབྲུག་པ་བཀའ་བརྒྱུད་ཀྱི་དགོན་པ་ཞིག་ཡིན་པའི་བཤད་རྒྱུན་ཡོད་ཀྱང་། ད་ལྟའི་ཆར་ས་སྐྱའི་ཆོས་བརྒྱུད་འཛིན་པའི་དགོན་པ་གཙོ་གྲས་ཤིག་ཡིན་འདུག དགོན་དེར་ནང་རྟེན་གྱི་གཙོ་བོར་ལྷ་ཆེན་རྡོ་རྗེ་འཇིགས་བྱེད་ཀྱི་ཞལ་འབག་བྱིན་ལྡན་ཞིག་དང་། རྒྱལ་ཆེན་སྡེ་བཞི་དང་སློབ་དཔོན་པདྨ་འབྱུང་གནས། སྡེ་དགེའི་རྒྱལ་རབས་ཁག་ཅིག་སོགས་ཀྱི་ལྡེབས་རིས་རྙིང་པ་རྩ་ཆེན་དང་། ཤུལ་བཞག་གནའ་རྫས་རིགས་མང་པོ་ཡོད་འདུག དེ་བཞིན་ལྷ་རྙིང་ཁང་དང་ལྷ་གསར་ཁང་། དབྱར་གནས་ཁང་། ལམ་འབྲས་ལྷ་ཁང་། སྒྲུབ་གནས་རི་ཁྲོད། ཙིའུ་དམག་ཁང་སོགས་ཡོད་པ་དང་། བར་ལམ་དར་ཁྱབ་ཆེན་པོ་བྱུང་སྟེ་སྔོན་བྱོན་མཁས་ཆེན་མང་པོས་ཞབས་ཀྱིས་བཅགས་མྱོང་བ་དང་། འདུས་པ་བརྒྱ་ཕྲག་མང་པོ་བྱོན་ཡོད་འདུག ཡིན་ནའང་། ཕྱི་ལོའི་དུས་རབས་བཅུ་དགུ་པའི་སྨད་ལ་ཉག་དམག་གིས་དགོན་པ་འདི་ལ་གཏོར་སྐྱོན་བཏང་ཡོད་སྟབས། བསྐྱར་གསོ་གནང་ཁག་པོ་བྱུང་སྟེ་མཐར་གཏོར་སྐྱོན་ཐེབས་པའི་དགོན་ཆུང་འགའ་དང་མཉམ་བསྡོངས་ཀྱིས་སླར་གསོ་བྱུང་བའི་ལོ་རྒྱུས་ཡོད་འདུག
ཕྱི་ལོ་ ༡༩༥༧ ཟླ་ ༡༡ ཚེས་ ༡༡ ཉིན་རྒྱ་ནག་གཞུང་གིས་དགོན་དེའི་མཁན་པོ་སོགས་དགེ་འདུན་པ་ཆེ་གྲས་འགའ་འཇུ་བཟུང་བྱས་པ་དང་། ས་ཁྱི་བཞི་རྒོལ་འགུལ་སྐྱོད་སྐབས་ཕྱི་ནང་གི་རྟེན་བརྟེན་པ་དང་། ཆོས་སྤྱོད་ཀྱི་ལས་ལ་ཉམས་རྒུད་ཆེན་པོ་བྱུང་། ཕྱི་ལོ་ ༡༩༧༩ ལོར་དགོན་པ་དེའི་དགེ་འདུན་པ་རྒན་པ་ཚོས་གསང་བའི་ཐོག་ནས་དགོན་པ་བསྐྱར་གསོ་བྱ་རྒྱུའི་བཀའ་མོལ་གནང་བ་བརྒྱུད་ཆོ་ག་ཆོས་སྤྱོད་དབུ་འཛུགས་གནང་ཡོད་འདུག ཕྱི་ལོ་ ༡༩༨༡ ལོར་རྒྱ་ནག་གཞུང་གིས་དགོན་པ་དེ་བསྐྱར་གསོ་ཆོག་པའི་ཆོག་མཆན་སྤྲད་དེ། མཆོག་སྤྲུལ་རྡོ་རྗེ་འཆང་དང་སྒོམ་ཆེན་ངག་སྙན་རྣམ་གཉིས་དབུ་བཞུགས་ཐོག་རིམ་གྱིས་བསྟན་དགོན་ཉམས་པ་སོར་ཆུད་གནང་ཡོད་པ་མ་ཟད། ཕྱི་ལོ་ ༡༩༩༦ ལོར་རྒྱ་ནག་གཞུང་གིས་ཁྲིམས་མཐུན་དེབ་སྐྱེལ་བྱས་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
