སྲིད་སྐྱོང་སྤེན་པ་ཚེ་རིང་མཆོག་གིས་བོད་མི་རྣམས་ཀྱིས་བོད་ཀྱི་ལོ་རྒྱུས་སྐོར་ལ་སློབ་གཉེར་བྱ་དགོས་གལ་ཆེ་སྐོར་སོགས་གསུངས་སོང་།
དེ་རིང་ཕྱི་ཚེས་ ༢༣ ནས་ ༢༥ བར་ཉིན་གྲངས་གསུམ་གྱི་རིང་སྦེལ་ཇམ་གྱི་རྒྱལ་ས་སྦར་སིལ་དུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དགུ་པའི་ (9th International Conference of Tibet Support Groups) སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་དང་། འཛམ་གླིང་རྒྱལ་ཁབ་ ༤༤ ནས་བོད་དོན་རྒྱབ་སྐྱོར་ཚོགས་མི་ ༡༨༠ ལྷག་མཉམ་ཞུགས་གནང་ཡོད་འདུག
སྐབས་དེར་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མི་ཀུ་ལ་སི་པེག་ས་ (Mikulas Peksa) མཆོག་གིས། ཡུ་རོབ་གྲོས་ཚོགས་ནས་མུ་མཐུད་དུ་བོད་དོན་རྒྱབ་སྐྱོར་གནང་རྒྱུ་ཡིན་སྐོར་དང་། སྦེལ་ཇམ་གཞུང་གིས་ཚོགས་འདུ་འདི་ཚོགས་པར་རྒྱབ་སྐྱོར་དང་མཐུན་སྦྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན་སྐོར་སོགས་གསུངས་ཡོད་འདུག
དེ་ནས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་ཡིག་སྒྲོག་སྦྱངས་ཞུས་སོང་། ཡུ་རོབ་གྲོས་ཚོགས་ཀྱི་ཚོགས་གཙོ་ཟུར་པ་འབུམ་རམས་པ་ཧན་སི་གྷར་ཊི་པོ་ཊི་རེན་ (Dr. Hans Gert Pottering) མཆོག་གིས། འདས་ལོར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་པའི་གོ་སྐབས་བྱུང་ལ། སྐབས་དེ་དུས་༧གོང་ས་རྒྱལ་བ་རིན་པོ་ཆེ་མཆོག་ནས་བྱམས་སྙིང་རྗེའི་སྐོར་ལ་བཀའ་སློབ་ལམ་སྟོན་གནང་ཡོད་སྐོར་དང་། འབྱུང་འགྱུར་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་སྐབས་སམ་༧སྐུའི་འཁྲུངས་སྐར་ཉིན། ༧གོང་ས་རྒྱལ་བ་རིན་པོ་ཆེ་མཆོག་དང་སླར་ཡང་མཇལ་ཁ་ཞུ་ཐུབ་རྒྱུའི་རེ་བ་རྒྱག་གི་ཡོད་སྐོར་སོགས་གསུངས་སོང་།
དེ་རྗེས་སྲིད་སྐྱོང་སྤེན་པ་ཚེ་རིང་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་ལམ་སྟོན་གནང་བ་གཞིར་བཟུང་། བོད་མིའི་སྒྲིག་འཛུགས་ཀྱི་ངོས་ནས་དབུ་མའི་ལམ་གྱི་སྲིད་ཇུས་ལ་ཤར་སྐྱོད་བྱེད་བཞིན་ཡོད་པ་དང་། རྒྱལ་སྤྱིའི་སྤྱི་ཚོགས་ལ་བོད་ཀྱི་ལོ་རྒྱུས་ཀྱི་གོ་རྟོགས་སྤེལ་དགོས་པ་མ་ཟད། བོད་མི་རྣམས་ཀྱིས་ཀྱང་རང་འགན་རང་ཁུར་གྱིས་བོད་ཀྱི་ལོ་རྒྱུས་ལ་སློབ་གཉེར་བྱས་ཏེ་འདས་པའི་བྱུང་རབས་ལ་བདག་པོ་རྒྱག་དགོས་གལ་ཆེ་སྐོར་དང་། ང་ཚོའི་ལོ་རྒྱུས་ལ་ང་ཚོས་ལྟ་དགོས་པའི་ཐོག་ནས་ལོ་རྒྱུས་ཟེར་བ་དེ་ངེས་པར་དུ་ཤེས་དགོས་གལ་ཆེ་སྐོར་སོགས་གསུངས་སོང་།
དེ་ནས་བོད་མིའི་སྒྲིག་འཛུགས་ཕྱི་དྲིལ་ལ་ཁུངས་ཀྱི་དང་བླངས་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་དང་། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་དགྲ་ལྷ་ལགས། བོད་དོན་ལས་འགུལ་བ་དང་སྤྱི་ཚོགས་རིག་པའི་འབུམ་རམས་སློབ་དཔོན་རྒྱལ་ལོ་ལགས། སི་ཀོ་ཊ་ལན་ཌིའི་ཧི་མ་ལ་ཡའི་ཁུལ་གྱི་ཞིབ་འཇུག་ལྟེ་གནས་ཁང་ (Scottish Centre for Himalayan Studies) གི་འགན་འཛིན་སྐུ་ཞབས་མར་ཊིན་ (Dr. Martin Mills) ལགས་བཅས་ཀྱིས་ད་ལྟའི་བོད་ནང་གི་གནས་སྟངས་སྐོར་ལ་གཏམ་བཤད་སྤེལ་སོང་།
ཟླ་འདིའི་ཕྱི་ཚེས་ ༢༡ ནས་ཕྱི་ཟླ་ ༣ ཚེས་ ༡ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་སྦེལ་ཇམ་དང་། ནེ་ཐར་ལན་ཌི་ (Netherlands) གཉིས་སུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༢༢ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དེ་བཞིན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་སྦལ་སིལ་གནམ་ཐང་དུ་ཕེབས་སྐབས། སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། དོན་ཁང་གི་དྲུང་ཆེ་འཕྲིན་ལས་དབང་འདུས་ལགས། བོད་རིགས་ཚོགས་པའི་ཚོགས་གཙོ་དཔལ་ལྡན་ཚེ་རིང་ལགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་འདུག་ལ། ཉིན་དེའི་དགོང་མོར་བོད་མིའི་སྒྲིག་འཛུགས་ཀྱིས་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དགུ་པར་མཉམ་ཞུགས་པ་རྣམས་ལ་སྦར་སིལ་གྱི་ཐོན་མགྲོན་ཁང་ (Thon Hotel) དུ་དགོང་མོའི་གསོལ་སྟོན་ཟབ་རྒྱས་ཤིག་གོ་སྒྲིག་གནང་བ་མ་ཟད། སྦེལ་ཇམ་བོད་རིགས་ལྷན་ཚོགས་ཀྱིས་རིག་གཞུང་འཁྲབ་སྟོན་གནང་སོང་།
གསར་འགོད་པ། བསྟན་འཛིན་ཕུར་བུ།
