༸གོང་ས་རྒྱལ་བ་རིན་པོ་ཆེ་མཆོག་གི་སྐུ་ནའི་བབ་དང་བསྟུན་རྒྱ་གར་གྱི་ཕྱི་ལ་ཆིབས་བསྒྱུར་བསྐྱང་རྒྱུ་མཚམས་འཇོག་གནང་རྒྱུ་དང་རྒྱ་གར་ནང་ཁུལ་དུ་ཡང་ཆིབས་བསྒྱུར་ཧ་ཅང་ཉུང་ཤོས་ལས་གནང་འཆར་མི་འདུག
དགའ་ལྡན་ཕོ་བྲང་ཡིག་ཚང་ནས་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཕྲིན་དང་འབྲེལ་བའི་གནས་ཚུལ་གསར་པ་ཞིག་སྤེལ་བའི་ནང་། ༸གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་དྷ་རམ་ས་ལར་སྐུ་བཞུགས་གནང་ཡོད་པའི་སྐབས་སུ། གཟའ་ཟླ་བ་དང་གཟའ་ལྷག་པ། གཟའ་པ་སངས་བཅས་ཀྱི་ཞོགས་པར་མང་ཚོགས་ལ་མཇལ་ཁའི་གོ་སྐབས་གནང་བཞིན་ཡོད་སྟབས། དད་ལྡན་མཇལ་ཞུ་བ་རྣམས་ཀྱིས་མཇལ་ཁའི་སྙན་ཞུ་ཐོ་འགོད་གློག་འཕྲིན་ཁ་བྱང་ ohhdl@dalailama.com དང་། དེ་མིན་དགའ་ལྡན་ཕོ་བྲང་ཡིག་ཚང་གི་སྣེ་ལེན་ལས་བྱེད་བརྒྱུད་ནས་དོ་བདག་གི་འདྲ་པར་གཅིག་དང་རྒྱབ་ལྗོངས་གནས་ཚུལ་མདོར་བསྡུས། མཇལ་ཁའི་ཆེད་འབྱོར་དུས་དང་སྡོད་ཡུན་ཇི་ཙམ་ཡོད་མེད་བཅས་ཁ་གསལ་བྲིས་ཏེ་འབུལ་དགོས་ཀྱི་འདུག
དེ་འབྲེལ་གནས་ཚུལ་ནང་། སྤྱིར་དགའ་ལྡན་ཕོ་བྲང་ཡིག་ཚང་ནས་མཇལ་ཁའི་གོ་སྐབས་གང་ཐུབ་གནང་བཞིན་ཡོད་མོད། དུས་ཡུན་ཐུང་ངུའི་ནང་མཇལ་ཁ་ཞུ་མཁན་ལ་གོ་སྒྲིག་ཞུ་རྒྱུ་ཧ་ཅང་ཁག་པོ་ཡོད་པས་མཇལ་ཁའི་གོ་སྐབས་མ་ཐོབ་པ་ཡང་ཡོད་སྲིད། ཇི་ཙམ་སྙན་ཞུ་སྔ་བ་འབུལ་ཐུབ་པ་དེའི་ཚོད་ཀྱིས་མཇལ་ཁ་འཐོབ་རྒྱུའི་རེ་བ་ཡང་ཆེ་བ་ཡོད། ཅེས་འཁོད་འདུག
ཡང་ཟུར་མཇལ་དང་བཅར་འདྲི་ཞུ་ཕྱོགས་སྐོར་ལ་འགྱུར་བ་གང་ཙམ་ཐེབས་འདུག ༸གོང་ས་རྒྱལ་བ་རིན་པོ་ཆེ་མཆོག་གི་སྐུ་ནའི་བབ་དང་བསྟུན་ཟུར་མཇལ་ཁག་ཇེ་ཉུང་དུ་བཏང་ཟིན་པར་བརྟེན། མཇལ་ཁ་ཞུ་མཁན་ཚོས་གཟའ་ཟླ་བ་དང་གཟའ་ལྷག་པ། གཟའ་པ་སངས་བཅས་ཀྱི་སྔ་དྲོའི་མཇལ་དམངས་ཀྱི་གོ་སྐབས་ཁོ་ན་བཞེས་གལ་ཆེ་བ་དང་། དེའི་ཆེད་དུ་སྔོན་ཚུད་ནས་ཐོ་འགོད་གནང་དགོས་པའི་རེ་སྐུལ་ཡང་གནང་འདུག དེ་བཞིན་གསར་འགོད་པའི་བཅར་འདྲི་ཐེ་བའི་གང་གི་མཛད་རིམ་ལ་ཚད་བཀག་ཡོད་པས། གལ་སྲིད་དགོས་གལ་ཆེ་བ་ཡོད་ན་ལོ་གཅིག་ནང་གསར་འགོད་པའི་བཅར་འདྲིའི་མཛད་རིམ་ཐེངས་གཅིག་གཉིས་གོ་སྒྲིག་ཞུ་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
