༧གོང་ས་མཆོག་ནས་བོད་པའི་གོམས་གཤིས་སུ་ཡོད་པའི་རིག་གཞུང་གིས་འཛམ་གླིང་དུ་ཕན་ཐོགས་ཡོང་གི་ཡོད་པ་དང་འཛམ་གླིང་གི་སྤྱི་ནོར་ཞིག་ཆགས་ཡོད་པའི་བཀའ་བསྩལ་སོང་།
དེ་རིང་བོད་ཟླ་དང་པོའི་ཚེས་ ༡༥ ཆོ་འཕྲུལ་དུས་ཆེན་ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་སེར་སྐྱ་མི་མང་ལ་ཐམས་ཅད་རྣལ་འབྱོར་གྱི་སེམས་བསྐྱེད་དང་། གཟུངས་སྔགས་ཡི་གེ་དྲུག་མའི་བཟླས་ལུང་། སྐྱེས་རབས་ཀྱི་བཀའ་ཆོས་བསྩལ་སོང་།
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་འདིར་འཆར་ཅན་བཞིན་གསུང་རབས་ཀྱི་གསུང་ཆོས་ཞུ་ཡི་ཡོད་པ་རེད། འཛམ་བུ་གླིང་འདིར་རིམ་བཞིན་ཆོས་ལ་དོ་སྣང་བྱེད་མཁན་མང་དུ་འགྲོ་བཞིན་འདུག ཕྱི་དངོས་པོའི་ཡར་རྒྱས་གཅིག་པུར་དམིགས་མཁན་ཚོས་ཀྱང་གཞི་ནས་སེམས་ཀྱི་ཞི་བདེ་དགོས་པ་གལ་ཆེན་པོ་བརྩི་ཡི་འདུག ཆོས་ལུགས་ཚང་མའི་ནང་དཀོན་མཆོག་ལ་དད་པ་བྱེད་དགོས་པ་གསུང་གི་ཡོད། དེས་སེམས་ཀྱི་ཞི་བདེ་ཡོང་བར་ཕན་ཐོགས་ཡོད་ཀྱང་། སེམས་ཁམས་རིག་པ་དང་འབྲེལ་ནས་སེམས་ཀྱི་ཞི་བདེ་བཟོ་བ་དེ་ཕལ་ཆེར་ནང་པའི་ཆོས་དེ་ཟབ་ཤོས་ཆགས་ཡོད། ངོས་རང་གིས་ངོ་ཤེས་ཚན་རིག་པ་མང་པོས་སེམས་ཁམས་རིག་པ་དང་འབྲེལ་ནས་སེམས་ཀྱི་ཞི་བདེའི་ཐོག་དོ་སྣང་བྱེད་མཁན་ཇེ་མང་དུ་འགྲོ་བཞིན་འདུག སངས་རྒྱས་ཀྱི་ཆོས་ནི་སེམས་ཁམས་རིག་པ་དང་འབྲེལ་ནས་སེམས་ཀྱི་ཞི་བདེ་བསྒྲུབ་ཀྱི་ཡོད། ཕྱི་དངོས་པོའི་ཐོག་ཡར་རྒྱས་ཕྱིན་ཏེ་འགྱུར་བ་འགྲོ་བཞིན་ཡོད་ཀྱང་། སེམས་ཁམས་རིག་པའི་ཐོག་ནས་སེམས་ཀྱི་ཞི་བདེ་བསྒྲུབ་པ་དེ་ཚན་རིག་དང་མཐུན་པའི་དངོས་ཡོད་གནས་ཚུལ་ཞིག་ཆགས་ཡོད། བོད་གངས་ཅན་ལྗོངས་སུ་ཡོད་པའི་སངས་རྒྱས་ཀྱི་ཆོས་དེ་སེམས་ཁམས་རིག་པ་དང་འབྲེལ་བའི་སེམས་ཀྱི་ཞི་བདེ་བསྒྲུབ་པར་མ་འདྲ་བ་ཞིག་ཆགས་ཡོད། ངོས་རང་གི་ངོ་ཤེས་ཀྱི་ནང་དུ་ཆོས་དད་ཅན་མང་པོ་ཡོད། ཡིན་ནའང་སེམས་ཀྱི་ཞི་བདེ་བསྒྲུབ་པར་དཀོན་མཆོག་ལ་སྨོན་ལམ་རྒྱག་གི་འདུག སེམས་ཀྱི་ཞི་བདེ་བསྒྲུབ་པར་ནང་པའི་ཆོས་དང་ན་ལེནྡྲའི་ཆོས་བརྒྱུད་ཟབ་ཤོས་ཆགས་ཡོད། དེང་སང་ནུབ་ཕྱོགས་པ་དང་ཚན་རིག་པའི་ནང་དུ་ཆོས་དད་མེད་ཀྱང་སེམས་ཁམས་རིག་པ་དང་འབྲེལ་བའི་སེམས་ཀྱི་ཞི་བདེ་ལ་དོ་སྣང་ཆེ་རུ་འགྲོ་བཞིན་འདུག ཅེས་གསུངས་སོང་།
ཡང་མགོན་པོ་གང་ཉིད་མཆོག་ནས། ཆོས་རྒྱལ་སྲོང་བཙན་སྒམ་པོས་རྒྱ་བཟའ་དང་འཁྲུངས་ས་བསྐྱོན་ཏེ་རྒྱ་ནག་དང་འབྲེལ་བ་ཆེན་པོ་ཡོད་ཀྱང་། ཆོས་ནི་རྒྱ་གར་ནས་དར་བའི་ཆོས་ལུགས་ཐོག་ཐུགས་སྣང་ཆེན་པོ་གནང་འདུག རྗེས་སུ་མཁན་ཆེན་ཞི་བ་འཚོ་བོད་དུ་གདན་ཞུ་གནང་སྟེ། བོད་གངས་ཅན་ལྗོངས་སུ་ཡོད་པའི་ཆོས་དེ་བཅོམ་ལྡན་འདས་ཀྱི་བཀའ་དང་། རྒྱ་གར་མཁས་པའི་གཞུང་གི་དགོངས་པ་མཐུན་པ་ཞིག་ཏུ་འཁྲིད་པ་རེད། བོད་ཀྱི་ཆོས་དང་རིག་གཞུང་ཟེར་དུས་བཅོམ་ལྡན་འདས་ཀྱིས་གསུངས་བཞག་པ་ཀླུ་སྒྲུབ་ཡབ་སྲས་སོགས་ཀྱིས་མར་ལེགས་པར་བཤད་དེ་གཏན་ལ་ཕབ། དེའང་རིག་པའི་ལམ་ནས་དཔྱད་པ་གནང་ཡོད། དེར་བརྟེན་བོད་དུ་ཡོད་པའི་སངས་རྒྱས་པའི་ཆོས་དེ་དད་པ་ཙམ་མིན་པར་རྒྱུ་མཚན་ལ་བསམ་བློ་བཏང་ནས་སེམས་ཀྱི་ཞི་བདེ་དང་སྙིང་རྗེ་སྤེལ་ཡོད། འཛམ་གླིང་གི་ཆོས་ལུགས་ཚང་མས་སྙིང་རྗེ་གསུང་གི་ཡོད་པ་ཡག་པོ་རེད། སྙིང་རྗེའི་དམིགས་པ་རྩལ་ཏུ་བཏོན་པ་དང་རིག་པ་དང་ལྡན་པའི་ཐོག་གསུངས་ཡོད་པ་བོད་གངས་ཅན་གྱི་ལྗོངས་ཀྱི་ཆོས་འདི་ཧ་ཅང་ཡག་པོ་རེད། དེང་སང་ཚན་རིག་པའི་ནང་དམིགས་བསལ་དོ་སྣང་ཡོད་མཁན་གྱིས་ངོས་རང་ལ་ཐུག་ནས་བགྲོ་གླེང་མང་པོ་ཡོང་གི་འདུག གང་ལྟར་བོད་དུ་ཡོད་པའི་སངས་རྒྱས་ཀྱི་ཆོས་དེ་སེམས་ཀྱི་ཞི་བདེ་བསྒྲུབ་པའི་གཙོ་བོ་ཞིག་རེད། ཅེས་གསུངས་སོང་།
ཡང་༧གོང་ས་མཆོག་ནས། རྒྱུ་མཚན་དང་ལྡན་པའི་ན་ལེནྡྲའི་ཆོས་དེ་བོད་ཀྱི་ཐུན་མོང་མ་ཡིན་པའི་རིག་གཞུང་ཞིག་ཆགས་ཡོད། བོད་ཀྱིས་ཆོས་ལ་བདག་པོ་རྒྱག་སྟངས་དེ་ཁ་ནས་བཤད་པ་ཙམ་མིན་པར། ཐོག་མར་སློབ་གཉེར་བྱས་པ་དང་། དེ་ནས་ཡང་ནས་ཡང་དུ་བསམ་པ་དང་སྒོམ་གྱི་ཐོག་དཔྱད་འཇོག་ཟུང་འབྲེལ་བྱས་པའི་བསླབ་བྱ་ཡག་པོ་ཞིག་ཡོད། དེ་ནི་འཛམ་གླིང་གི་སྤྱི་ནོར་རེད་ལབ་ཐུབ་ཀྱི་འདུག ང་ཚོ་བོད་པས་ད་ལྟ་བར་དུ་བདག་པོ་བརྒྱབ་ཡོད་པ་རེད། ད་དུང་བདག་པོ་རྒྱག་རྒྱུ་གལ་ཆེན་པོ་རེད། ཆོས་བདག་པོ་རྒྱག་ཟེར་པ་དེ་ལྷ་ཁང་བཞེངས་པ་དང་། དཔེ་ཆ་བལྟ་རྒྱུ་གཅིག་པོ་མ་རེད། སྙིང་རྗེ་གཙོ་བོ་བྱས་ཏེ་སེམས་ཀྱི་ཞི་བདེ་བསྒྲུབ་རྒྱུ་དེ་རེད། དེ་ནི་དངོས་གནས་དྲང་གནས་རིག་གཞུང་གཙོ་བོ་ཞིག་རེད། ད་ལྟའི་འཛམ་བུ་གླིང་གི་འཁྲུག་ཆ་དོད་པོ་འདིའི་སྟེང་དུ་སེམས་ཀྱི་ཞི་བདེ་གལ་ཆེན་པོ་ཡིན་དུས། ཁོང་ཁྲོ་དང་ང་རྒྱལ་གྱིས་སེམས་ཀྱི་ཞི་བདེ་དཀྲུག་གི་ཡོད་པ་དང་། གཞན་ཕན་གྱི་བློ་ཡག་པོ་ཡོད་ན་སེམས་ཀྱི་ཞི་བདེ་ཡོང་གི་ཡོད། ལུས་བདེ་བོ་ཡོང་གི་ཡོད་པ་མ་ཟད་ཚེ་སྒྲུབ་ཀྱི་མཆོག་ཀྱང་ཡིན། སྤྱི་ཚོགས་ནང་དུ་ཞི་བདེ་ཡོང་གི་ཡོད་པས་ཧ་ཅང་ཡག་པོ་རེད། བོད་ཆོལ་ཁ་གསུམ་ནང་བྱམས་པ་དང་བརྩེ་བའི་ཐོག་ནས་ཕན་ཚུན་ལ་རོགས་རམ་བྱེད་ཀྱི་ཡོད་པ་མིག་དཔེ་ཡག་པོ་ཞིག་འདུག ད་ལྟ་བར་དུ་བོད་པས་ནང་ཆོས་ལ་བདག་པོ་བརྒྱབ་སྟེ་སྤྱི་ཡོངས་ཀྱི་མིག་དཔེ་ཡག་པོ་ཡོད། རྒྱ་མི་གྲོགས་པོ་ཚོས་ཀྱང་བོད་པར་སེམས་བཟང་པོ་དང་གཤིས་ཀ་ཡག་པོ་ཡོད་པར་དགའ་མོས་བྱེད་ཀྱི་འདུག ད་དུང་ཡང་བོད་པ་ཚོས་སྙིང་རྗེ་གལ་ཆེན་པོ་བརྩིས་ནས་སེམས་ཀྱི་ཞི་བདེ་བསྒྲུབ་རྒྱུ་གལ་ཆེན་པོ་རེད། དུས་ཚོད་ལ་འགྱུར་བ་འགྲོ་བཞིན་ཡོད་ཀྱང་། སེམས་ཀྱི་ཞི་བདེ་ལ་འགྱུར་བ་འགྲོ་རྒྱུ་ཡོད་པ་མ་རེད། བོད་པའི་གོམས་གཤིས་ལ་ཡོད་པའི་རིག་གཞུང་དེ་བདག་པོ་ཡག་པོ་རྒྱག་དགོས། ང་ཚོ་བོད་པའི་མི་གཤིས་བཟང་པོ་བྱེད་པའི་རིག་གཞུང་དེས་འཛམ་གླིང་སྤྱི་ལ་ཕན་ཐོགས་ཡོང་རྒྱུ་སེམས་སུ་འཇོག་དགོས། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
