རྒྱ་གཞུང་གིས་བོད་སྡེ་དགེ་དབོན་སྟོད་ཁུལ་དུ་ཆུ་མཛོད་གསར་རྒྱག་གི་ལས་གཞི་དང་འབྲེལ་མི་མང་ལ་དྲག་གནོན་བྱེད་བཞིན་པའི་ཐད་བྱེས་ཀྱི་དཔལ་ས་སྐྱའི་ཁྲི་ཆེན་མཆོག་གིས་ཐུགས་སྨོན་སྐྱབས་འཇུག་མཛད་འདུག
དེ་འབྲེལ་དཔལ་ས་སྐྱའི་སྒྲོལ་མ་ཕོ་བྲང་གིས་སྤེལ་བའི་གསལ་བསྒྲགས་ཤིག་གི་ནང་། ཉེ་ལམ་སྤྱི་ཚོགས་དྲ་རྒྱ་དང་གསར་འགྱུར་བརྒྱུད་ལམ་ཁག་ལས་གནས་ཚུལ་བྱུང་བ་ལྟར་ན། སྡེ་དགེ་དབོན་སྟོད་ཁུལ་གྱི་དགོན་སྡེ་ཁག་དང༌། དད་ལྡན་ཆོས་བརྒྱུད་མི་མང་མང་ཚོགས་མང་པོ་ཞིག་ཆུ་མཛོད་གསར་རྒྱག་གིས་རྐྱེན་པས་ས་གནས་གཞན་དུ་གནས་སྤོ་བྱ་དགོས་པའི་གནས་བབ་གོ་ཐོས་བྱུང་བས། ནམ་རྒྱུན་ནས་ཡང་ཡང་ཞུས་དང་ཞུ་མུས་བཞིན། ། དུས་དང་རྣམ་པ་ཀུན་ཏུ་སྨོན་ལམ་འདེབས་བཞིན་པ་མ་ཟད། ད་ལམ་གྱི་གནད་དོན་འདིའི་ཐོག་ལ་བསམ་དོན་ཐམས་ཅད་ཞི་མཐུན་བདེ་ ལེགས་ཀྱི་ངང་ནས་འགྲུབ་ཐུབ་པའི་ཕྱིར། མཆོག་གསུམ་བསླུ་བ་མེད་པར་གསོལ་འདེབས་དང་དམ་ཅན་ཆོས་སྐྱོང་སྲུང་མར་འཕྲིན་བསྐུལ་རྒྱུན་བསྲིངས་བྱས་དང་བྱེད་མུས་བཅས་དགོངས་འཇགས་ཞུ་ཞེས་འཁོད་འདུག
ཁ་སང་ཕྱི་ཚེས་ ༥ ཉིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། རྒྱ་ནག་གཞུང་གིས་སྡེ་དགེ་དབོན་སྟོད་ཁུལ་གྱི་མི་མང་ལ་དྲག་གནོན་གཏོང་མཚམས་འཇོག་དགོས་པའི་ཞུ་སྐུལ་གནང་འདུག་པ་མ་ཟད། རྒྱ་ནག་གཞུང་གིས་སྡེ་དགེ་དབོན་སྟོད་ཁུལ་དུ་ཆུ་མཛོད་གསར་རྒྱག་བྱེད་རྩིས་ཡོད་པ་དེ་ནི་ཆེད་དུ་ཉེ་འཁྲིས་ཀྱི་བཟོ་གྲྭ་མང་སའི་གྲོང་ཁྱེར་ཁག་ལ་གློག་མཁོ་འདོན་ལ་དམིགས་ཡོད་པ་དང་། དམིགས་བསལ་རྒྱ་གཞུང་གིས་འཆར་གཞི་ལྡན་པའི་ཐོག་ནས་བོད་ཀྱི་ལོ་སར་དང་སྟབས་བསྟུན་ནས་དབོན་སྟོད་ཁུལ་གྱི་མི་མང་གནས་སྦོར་བྱེད་དུ་བཅུག་སྟེ་གནས་ཚུལ་ཕྱིར་མི་གྱར་བའི་ཇུས་ངན་འཐེན་ཡོད་སྐོར་སོགས་བརྗོད་འདུག
ཡང་ཁ་སང་བོད་རང་བཙན་སློབ་ཕྲུག་ཚོགས་པས་སྡེ་དགེ་དབོན་སྟོད་ཁུལ་གྱི་དགོན་པ་དྲུག་དང་གྲོང་ཚོ་གཉིས་ལྷག་གནས་སྤོར་དགོས་པའི་བཙན་བཀའ་བཏང་བ་དང་མི་གྲངས་ ༡༠༠༠ ལྷག་འཛིན་བཟུང་བཀག་ཉར་བྱས་པའི་བྱུང་རིམ་སོགས་གླེང་སློང་དང་སྦྲགས། བོད་ནང་གི་བོད་མི་ཚོས་རང་ཉིད་ཀྱི་ཡོད་ཚད་ཕ་ས་ཕ་ཡུལ་སྲུང་སྐྱོབ་ཀྱི་ཆེད་དུ་བློས་གཏོང་གནང་གི་ཡོད་སྟབས། བཙན་བྱོལ་རང་དབང་ལུང་བའི་ནང་ཡོད་པའི་བོད་མི་ཚོས་རང་རང་གི་རྣམ་དཔྱོད་ལ་བརྟེན་ནས་དངོས་ཤུགས་བརྒྱུད་གསུམ་གྱི་ཐོག་ནས་བོད་ནང་གི་དངོས་ཡོད་གནས་སྟངས་འགྲེལ་བརྗོད་དང་དྲིལ་བསྒྲགས་བྱེད་པའི་འབོད་སྐུལ་ཞུས་འདུག
གསར་འགོད་པ། སྐལ་བཟང་སྦྱིན་པ།
