ཕྱི་ལོ་ ༢༠༢༤-༢༠༢༥ ལོའི་༧གོང་ས་ཏཱ་ལའི་བླ་མའི་སློབ་ཡོན་གསལ་བསྒྲགས་བྱས་འདུག

ཉེ་ལམ་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ཚོགས་པས། ཕྱི་ལོ་ ༢༠༢༤ དང་ ༢༠༢༥ ལོའི་ཏཱ་ལའི་བླ་མའི་གཙུག་ལག་སློབ་གཉེར་བའི་སློབ་ཡོན་གསལ་བསྒྲགས་གནང་ཡོད་པའི་ནང་། འདི་ལོར་ཡུ་རོབ་དང་ཨ་རི། ཨོ་གླིང་། རྒྱ་གར་ཕུད་པའི་ཨེ་ཤ་ཡའི་རྒྱལ་ཁབ་ཏུ་གཙུག་ལག་རབ་འབྱམས་པའི་སློབ་སྦྱོང་བྱེད་མཁན་གྱི་བོད་པའི་སློབ་མ་རྣམས་ལ་སློབ་ཡོན་སྤྲོད་པའི་གསལ་བསྒྲགས་ཤིག་སྤེལ་ཡོད་ཅིང་། དེ་སྔོན་སློབ་ཡོན་ཐོབ་ཟིན་པ་དག་གིས་ཀྱང་བསྐྱར་དུ་སློབ་ཡོན་ཞུ་ཆོག་གི་ཡོད་འདུག

སློབ་ཡོན་དེ་བརྒྱུད་ནས་ཕྱི་རྒྱལ་ཁག་ཏུ་སློབ་གཉེར་བྱེད་མཁན་གྱི་བོད་ཀྱི་སློབ་མ་རྣམས་ལ་ཤེས་ཡོན་གྱི་ཐད་ནས་རོགས་འདེགས་བྱས་ཏེ། བོད་པའི་སྤྱི་ཚོགས་དང་གོ་ལའི་སྤྱི་ཚོགས་སུ་ནུས་པ་གང་ཡོད་ཀྱིས་ཞབས་འདེགས་ཞུ་རྒྱུའི་དམིགས་འབེན་བཟུང་ཡོད་ཅིང་། སློབ་ཡོན་སྤྲོད་པའི་སློབ་ཚན་དེ་དག་གི་ཁོངས་སུ་སྐྱེས་དངོས་ཕྲ་རག་གི་དཔྱད་རིག་(Microbiology) དང་། སྨན་སྦྱོར་རིག་པ་(Pharmacology)། རིམས་ནད་དཔྱད་རིག་(Epidemiology) སོགས་ཚུད་པའི་ཁྲིམས་ལུགས་དང་། ཚོང་དོན་རིག་པ། གློག་ཀླད་ཚན་རིག རྒྱལ་སྤྱིའི་འབྲེལ་ལམ་རིག་པ་སོགས་ཡོད་འདུག

སློབ་ཡོན་དེའི་ཁོངས་སུ་མཉམ་ཞུགས་བྱེད་འདོད་མཁན་རྣམས་ཀྱིས། རང་ཉིད་ལ་ཨ་རི་དང་། ཨོ་གླིང་། ཡུ་རོབ་སོགས་ཀྱི་མཐོ་སློབ་ཁག་ནང་སློབ་འཇུག་ཟིན་པའི་དཔང་ཡིག་དང་། རང་ཉིད་བོད་མི་ཡིན་པའི་ར་སྤྲོད་ཀྱི་ཡིག་ཆ་དེ་(www.dalailamafoundation.org)བརྒྱུད། འདི་ལོའི་ཕྱི་ཟླ་ ༤ ཚེས་ ༢༧ གོང་དུ་བསྐུར་ཟིན་པ་དགོས་ཤིང་། འདི་ལོའི་༧སྐུའི་འཁྲུངས་སྐར་ཉིན་སློབ་ཡོན་དེའི་ཁོངས་སུ་ཚུད་པའི་སློབ་མ་དག་གི་སྒེར་ལ་བརྡ་ལན་གཏང་རྒྱུ་ཡིན་འདུག་ལ། ཕྱི་ལོ་ ༢༠༢༢ ལོར་ཏཱ་ལའི་བླ་མའི་གཙུག་ལག་སློབ་ཐོན་སློབ་ཡོན་ཆེད་སྙན་ཞུ་འབུལ་མཁན་སློབ་མ་གྲངས་ ༧༥ བྱུང་བ་ལས་སློབ་ཕྲུག་གྲངས་ ༤༥ ལ་སློབ་ཡོན་ཐོབ་སྟེ།  ཨ་རི་དང་ཁེ་ན་ཌ། ཡུ་རོབ། ཨེ་ཤ་ཡ་བཅས་ཀྱི་ནང་ཆེས་མཐོའི་གཙུག་ལག་སློབ་ཁང་ཁག་ཏུ་སློབ་གཉེར་བྱས་དང་བྱེད་མུས་ཡིན་འདུག

ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩའི་སློབ་ཡོན་དེ་༧གོང་ས་རྒྱལ་བ་རིན་པོ་ཆེ་མཆོག་གི་མཚན་ཐོག་ནས་འབུལ་གྱི་ཡོད་ཅིང་། སློབ་ཡོན་གྱི་ལས་གཞིའི་དགོས་དམིགས་ནི། བོད་པའི་སློབ་མ་རྣམས་ལ་སློབ་ཡོན་གྱི་མཐུན་རྐྱེན་སྦྱར་ཏེ་གཙུག་ལག་རབ་འབྱམས་པའི་སློབ་ཚན་ལ་ཆེད་སྦྱོང་བྱེད་པ་བརྒྱུད་བོད་མིའི་ནུས་སྟོབས་ཀྱི་རྩ་བ་གོང་སྤེལ་དང་། འགྲོ་བ་མིའི་རིགས་དང་ཤེས་ཡོན་ལ་མཐུན་འགྱུར་གང་ཐུབ་གནང་རྒྱུའི་བརྒྱུད་ལམ་བསྐྲུན་པ་ཞིག་ཡིན་འདུག དེ་ཡང་ད་བར་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ཚོགས་པས་བོད་རིགས་སློབ་མ་ ༢༠༠ ལྷག་ལ་ཨ་སྒོར་ས་ཡ་ ༢་༥ ༼ས་ཡ་གཉིས་དང་ཕྱེད་ཀ་༽ ཙམ་ཁ་གསབ་སློབ་ཡོན་དུ་ཕུལ་ཡོད་པ་མ་ཟད། སློབ་ཡོན་འདི་དག་ནི་སློབ་མ་རང་རང་གི་བདམས་པའི་སློབ་ཚན་ཐོག་རྩེ་ཕུད་སོན་པའི་སློབ་མ་རྣམས་ལ་འབུལ་བཞིན་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། སྐལ་བཟང་སྦྱིན་པ།