ཟླ་འདིའི་ཕྱི་ཚེས་ ༡༣ ཉིན་རྟ་དབང་དགའ་ལྡན་ལྷ་རྩེ་རྣམ་རྒྱལ་དགོན་པའི་གནད་ཡོད་མི་སྣ་ཁག་ཅིག་གིས་༧གོང་ས་མཆོག་ལ་མཇལ་ཁ་ཞུས་པ་དང་བསྟུན་༧གོང་ས་མཆོག་རྟ་དབང་ཁུལ་དུ་ཆིབས་བསྒྱུར་བཀའ་དྲིན་བསྐྱང་གནང་ཡོང་བའི་གསོལ་འདེབས་ཞུས་པར་༧མགོན་པོ་གང་ཉིད་མཆོག་གིས་བཀའ་བཞེས་སྨིན་སྩལ་མཛད་འདུག
ཁ་སང་རྟ་དབང་དགའ་ལྡན་ལྷ་རྩེ་རྣམ་རྒྱལ་དགོན་པའི་མཁན་རིན་པོ་ཆེ་མཆོག་གིས་དབུས་པའི་སྐུ་ཚབ་མི་སྣ་ཁག་ཅིག་ནས་བཞུགས་སྒར་༧རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་པ་དང་འབྲེལ། ༧གོང་ས་མཆོག་འདི་ལོར་མོན་རྟ་དབང་ཁུལ་དུ་ཆིབས་བསྒྱུར་བཀྲིན་མཛད་རྒྱུའི་གསོལ་འདེབས་ཞུས་པར་༧མགོན་པོ་གང་ཉིད་མཆོག་གིས་བཀའ་བཞེས་བཟང་པོ་སྨིན་སྩལ་མཛད་ཡོད་འདུག
ཐེངས་འདིར་ཇི་ལྟར་གསོལ་འདེབས་ཞུས་དོན་བཞིན་༧གོང་ས་རྒྱལ་བ་རིན་པོ་ཆེ་མཆོག་མོན་ཁུལ་དུ་ཆིབས་བསྒྱུར་བསྐྱང་རྒྱུའི་བཀའ་བཞེས་བཟང་པོ་བསྩལ་བ་དང་འབྲེལ། རིང་མིན་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་བཞུགས་སྒར་དུ་ཆེད་བཅར་གྱིས་ཆིབས་བསྒྱུར་གསོལ་འདེབས་ཞུ་རྒྱུ་ཡིན་པ་དང་། འདི་ལོར་༧གོང་ས་མཆོག་བོད་ལུགས་ལྟར་དགུང་གྲངས་ ༩༠ བདག་གིར་བཞེས་ཀྱི་ཡོད་པ་དང་བསྟུན། ཕྱི་ལོ་ ༡༩༥༩ ལོར་༧གོང་ས་མཆོག་རྒྱ་གར་དུ་ཆིབས་བསྒྱུར་མཛད་དེ་རྟ་དབང་དགོན་པར་ཆོས་འབྲེལ་ཐོག་མར་མཛད་རྗེས་མི་ལོ་ཧྲིལ་པོ་ ༦༥ འཁོར་གྱི་ཡོད་པ་དང་བསྟུན། མོན་ཡུལ་ལྷ་སྡེ་མི་སྡེ་ཡོངས་ནས་མགོན་པོ་༧གང་ཉིད་མཆོག་༧སྐུ་ཚེ་མི་འཇིགས་རྡོ་རྗེ་འཆང་གི་ངོ་བོར་བརྟན་ཕྱིར་བརྟན་བཞུགས་རྒྱས་པ་ཞིག་བསྟར་འབུལ་ཞུ་འཆར་དང་། བསྟན་སྲིད་སྤྱིའི་ཆེད་དུ་འཕགས་མཆོག་ཐུགས་རྗེ་ཆེན་པོའི་བཀའ་དབང་ཞིག་བསྩལ་གནང་ཡོང་བའི་གསོལ་འདེབས་ཞུས་དོན་བཞིན་ཞལ་བཞེས་མཛད་ཡོད་པ་མ་ཟད། སྐབས་དེར་མོན་མི་མང་ནས་རྗེས་དྲན་མཚོན་ཆེད་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དགུ་སྟོན་གྱི་མཛད་སྒོ་ཞིག་ཀྱང་གོ་སྒྲིག་ཞུ་འཆར་ཡོད་འདུག
ཡང་ཟླ་འདིའི་ཚེས་ ༡༡ ཉིན་ཁྲིག་རྩེ་རིན་པོ་ཆེ་མཆོག་གིས་དབུས་པའི་ལ་དྭགས་རི་ལྗོངས་ཡར་རྒྱལ་ལྷན་ཚོགས་ཀྱི་སྡེ་དཔོན་ཁག་ཅིག་དང་། དེ་བཞིན་ལྡུམ་ར་བསམ་གཏན་གླིང་དགོན་པའི་སྐུ་ཚབ་དང་ནང་པ་ཚོགས་འདུའི་སྐུ་ཚབ་གཅིག་བཅས་བཞུགས་སྒར་༧རྒྱལ་བའི་ཕོ་བྲང་དུ་ཆེད་བཅར་གྱིས་འདི་ལོའི་དབྱར་ཁར་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་ལྡུམ་རྭ་དང་གླེ་རུ་ཆིབས་བསྒྱུར་མཛད་གནང་ཡོང་བའི་གསོལ་འདེབས་ཞུས་པ་ལྟར་༧མགོན་པོ་གང་ཉིད་མཆོག་ནས་ཐུགས་བརྩེ་བ་ཆེན་པོས་བཀའ་བཞེས་བཟང་པོ་སྩལ་གནང་མཛད་ཡོད་པ་དང་། ད་ལྟའི་ཆར་དུས་ཚེས་གཏན་འཁེལ་བྱུང་མེད་པ་རེད།
དཔལ་ལྡན་དགའ་ལྡན་ཕོ་བྲང་གི་མཛད་འཆར་ལྟར་ན། ཕྱི་ཟླ་ ༤ ཚེས་ ༣ ཉིན་གྱི་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་ལ་སྟོད་པ་སྐྱིད་སྡུག་དང་སྤུ་ཧྲེང་སྐྱིད་སྡུག་ཐུན་མོང་ནས་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་ཞུ་རྒྱུ། ཕྱི་ཟླ་ ༤ ཚེས་ ༡༩ དང་ ༢༠ བཅས་ཉིན་གཉིས་རིང་༧གོང་ས་རྒྱལ་བ་རིན་པོ་ཆེ་མཆོག་ལ་སོག་པོའི་བླ་མའི་དགེ་རྒན་གྱི་གསུང་ཆོས་གོ་སྒྲིག་ཚོགས་པས་ཇི་ལྟར་གསོལ་བ་བཏབ་པ་ལྟར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་དགའ་ལྡན་ལྷ་བརྒྱ་མའི་ཆོས་འབྲེལ་བཀའ་དྲིན་སྩལ་རྒྱུ་རེད་འདུག
གསར་འགོད་པ། དོན་འགྲུབ་བཀྲ་ཤིས། རྩོམ་སྒྲིག་པ། སྐལ་བཟང་སྦྱིན་པ།
