བོད་མིའི་དཔྱ་དངུལ་ཆག་ཡང་གི་དུས་ཚོད་ཕར་འགྱངས་གནང་སོང་།

འདས་ལོ་གཅིག་རིང་བོད་མི་དཔྱ་དངུལ་འབུལ་མཁན་ ༦༦༦༦ གསར་དུ་བྱུང་འདུག

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བཅུ་བའི་ཚོགས་ཐུན་གསུམ་པའི་སྟེང་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་དཔྱ་དངུལ་ཆགས་ཡང་གི་དུས་ཚོད་ཕར་འགྱངས་དང་འབྲེལ་བའི་གཞུང་འབྲེལ་གྲོས་ཆོད་གྲོས་འཆར་ཡིག་ཆ་ཨང་ ༣༠ པ་བསྣམས་ཕེབས་པར་བདེ་སྲུང་བཀའ་བློན་རྒྱ་རི་སྒྲོལ་མཆོག་གི་རྒྱབ་སྐྱོར་དང་ཚོགས་གཙོའི་ལམ་སྟོན་འོག གྲོས་ཆོད་དེའི་ཐོག་སྤྱི་ཡོངས་བགྲོ་གླེང་གནང་སྐབས་གྲོས་ཚོགས་འཐུས་མི་ཉུང་བ་ཞིག་གིས། ད་སྔ་བར་དཔྱ་དངུལ་གསར་དུ་འབུལ་མཁན་མི་གྲངས་ ༦༦༦༦ བྱུང་བར་སྔགས་བརྗོད་དང་འབྲེལ་སྤྱི་མོས་གཏན་འབེབ་གནང་སོང་།

གྲོས་ཆོད་ནང་རྒྱ་བལ་འབྲུག་གསུམ་དང་། ཕྱི་རྒྱལ་ཡུལ་གྲུ་ཁག་ནང་གནས་འཁོད་བོད་རིགས་དཔྱ་དངུལ་ལོ་མང་འབུལ་ཆད་སོང་བ་དང་། གསར་བཟོ་མ་ཐུབ་པ་རྣམས་ལ་དཔྱ་དངུལ་འབུལ་ཆད་ཇི་ཡོད་ཀྱི་བརྒྱ་ཆ་ ༩༠ ཆག་ཡང་གི་དུས་ཚེས་ཕྱི་ལོ་ ༢༠༢༣ ཟླ་ ༤ ཚེས་ ༡ ནས་ ཕྱི་ལོ་ ༢༠༢༤ ཟླ་ ༣ ཚེས་ ༣༡ བར་ཚད་བཟུང་བྱས་པ་དེ་ཉིད་ཕྱི་ལོ་ ༢༠༢༤ ཟླ་ ༩ ཚེས་ ༣༠ བར་ཕར་འགྱངས་གཏོང་ཆོག་པའི་མང་མོས་སམ་སྤྱི་མོས་གྲོས་ཆོད་གྲོས་འཆར་དུ། ཞེས་གསལ་འདུག

ཕྱི་ལོ་ ༢༠༢༣ ཟླ་ ༤ ཚེས་ ༡ ནས་ ༢༠༢༤ ཟླ་ ༣ ཚེས་ ༣༡ བར་རྒྱ་བལ་འབྲུག་གསུམ་དང་། ཕྱི་ལོ་ཡུལ་གྲུ་ཁག་ནང་གནས་སྡོད་བོད་རིགས་དཔྱ་དངུལ་ལོ་མང་འབུལ་ཆད་སོང་བ་དང་། གསར་བཟོ་མ་ཐུབ་རྣམས་ལ་བོད་ཀྱི་ཡུལ་མིའི་ལས་འགན་ལེན་ཐུབ་པའི་གོ་སྐབས་སྤྲོད་ཆེད། དཔྱ་དངུལ་ཇི་ཡོད་ཀྱི་བརྒྱ་ཆ་ ༩༠ བཏང་ཡོད་ཅིང་། འདས་ལོ་གཅིག་གི་ནང་བོད་མི་དཔྱ་དངུལ་གསར་དུ་འབུལ་མཁན་མི་གྲངས་ ༦༦༦༦ བྱུང་ཡོད་འདུག

གྲོས་ཆོད་དེའི་ཐོག་སྤྱི་ཡོངས་བགྲོ་གླེང་གནང་སྐབས། སྤྱི་འཐུས་མང་པོས་ཆ་ཤས་བཞེས་གནང་སོང་བ་དང་། དཔྱ་དངུལ་ཆགས་ཡང་ཟླ་དྲུག་རིང་ཕར་འགྱངས་ཞུ་ཐུབ་པར་ཡི་རངས་དང་། རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་ཏུ་བཞུགས་པའི་བོད་མི་དབྱིངས་ཀྱིས། བཅའ་ཁྲིམས་དོན་ཚན་བཅུ་གསུམ་པའི་ནང་གསེས་དོན་ཚན་ ༤ ནང་ལྟར། བཅའ་ཁྲིམས་ཀྱིས་སྐུལ་བའི་བོད་ཀྱི་ཡུལ་མིའི་ལས་འགན་ཁུར་ཏེ། དཔྱ་དངུལ་དུས་ཐོག་ཏུ་འབུལ་དགོས་པའི་རེ་སྐུལ་ཞུས་སོང་། 

གསར་འགོད་པ། དཔལ་ལྡན། སྐལ་བཟང་སྦྱིན་པ།