རྒྱ་ནག་གཞུང་གིས་པར་དབང་སོགས་ལ་ཁ་གཡར་ནས་མི་ལོ་ ༡༡ རིང་བོད་ཕྱི་ནང་གཉིས་ཀྱི་རྩོམ་པ་པོ་དག་གི་རྩོམ་ཡིག་སྤེལ་སའི་ལུག་ཚང་དཔལ་ཡོན་དྲ་ཚོམས་སྒོ་བརྒྱབ་བཅུག་ཡོད་འདུག
རྒྱ་ནག་གཞུང་གིས་འདས་པའི་ལོ་ཤས་གོང་ནས་བོད་ནང་དུ་བོད་ཡིག་བཀོལ་སྤྱོད་བྱེད་སའི་འཕྲིན་སྟེགས་དང་། དྲ་རྒྱ། དེ་བཞིན་མཉེན་ཆས་སོགས་བཀག་སྡོམ་དང་སྒོ་བརྒྱབ་བཅུག་གི་ཡོད་པ་ལྟར། ཉེ་ལམ་རྒྱ་ནག་གཞུང་གིས་ལུག་ཚང་དཔལ་ཡོན་གྱི་དྲ་རྒྱ་སོགས་སྒོ་བརྒྱབ་འཇུག་ཡོད་པ་མ་ཟད། དྲ་རྒྱ་དེའི་ངོས་ཀྱི་བོད་ཕྱི་ནང་གཉིས་ཀྱི་རྩོམ་པ་པོས་བྲིས་པའི་རྩོམ་ཡིག་རྣམས་ནག་བསུབས་སུ་བཏང་ཡོད་འདུག
གནད་དོན་དེའི་ཐད་ལུག་ཚང་དཔལ་ཡོན་དྲ་རྒྱའི་འབྲེལ་ཡོད་མི་སྣས། འཕྲིན་ཕྲན་གཞུང་ཕྱོགས་ནས་ལུག་ཚང་དཔལ་ཡོན་གྱི་དྲ་སྒོ་ཡོངས་སུ་བཀག་སོང་བས། ངེད་ཀྱིས་ཞུ་འབོད་གནང་ངེས་ཀྱང་རེ་བ་ཆུང་། ལོ་དེ་ཤས་ཀྱི་ནང་དུ་ལུག་ཚང་དཔལ་ཡོན་ལ་རྒྱབ་སྐྱོར་གནང་མཁན་གྱི་ཀློག་པ་པོ་དང་རྩོམ་པ་པོ་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་བརྗོད་འདུག
ཟླ་འདིའི་ཕྱི་ཚེས་ ༢ ཉིན་ལུག་ཚང་དྲ་ཚོམས་ཀྱི་དྲ་བདག་གིས་བརྡ་ཁྱབ་ཅིག་སྤེལ་བའི་ནང་དུ། ཕྱི་ལོ་ ༢༠༢༤ ཟླ་ ༤ ཚེས་ ༢ ཉིན་སྐད་འཕྲིན་གཞུང་ཕྱོགས་ནས་ལུག་ཚང་དྲ་ཚོམས་ཀྱི་ནང་དོན་ཡོངས་རྫོགས་བཀག་སྡོམ་བྱས་ཡོད་པ་དང་། དྲ་ཚོམས་དེའི་ནང་དུ་ཡིག་རིགས་གྲངས་འབོར་ཁྲི་གཅིག་བརྒལ་བ་ཡོད་ལ། དེ་སྔོན་དྲ་ཚོམས་དེའི་ནང་དུ་པར་དབང་རྩོད་གཞི་ཅན་གྱི་བརྩམས་ཆོས་རིགས་སྤེལ་བར་བརྟེན། སྐད་འཕྲིན་གཞུང་ཕྱོགས་ནས་ཀྱང་དྲན་སྐུལ་ཉེན་བརྡ་བཏང་། ཡིན་ནའང་། ང་ཚོས་སྐད་འཕྲིན་གཞུང་ཕྱོགས་ཀྱི་ཆ་རྐྱེན་ལ་བཅོས་སྒྲིག་བྱེད་ཐབས་མེད་སྟབས། ཁོ་ཚོའི་འབྲེལ་ཡོད་པར་དབང་གཏན་འབེབ་དང་འགལ་བ་རེད། ཉེ་ལམ་ནས་ཞུ་གཏུག་བྱེད་མཁན་ཡང་རྒྱུན་དུ་བྱུང་བར་བརྟེན་ལེགས་བཅོས་དང་གཙང་གསུབ་དགོས་པ་རྣམས་བྱས་ཡོད། ལུག་ཚང་དྲ་ཚོམས་ཀྱི་ཆེ་མཐོང་དང་རིན་ཐང་སླར་གསོའི་ཆེད། ཉེ་སྔོན་ང་ཚོས་སྐད་འཕྲིན་གྱི་ཞུ་གཏུག་ཐབས་ལམ་བརྒྱུད་དྲ་ཚོམས་སླར་གསོའི་ལས་དོན་ཐད་སྙན་ཞུ་བརྒྱབ་ཟིན་པ་ཡིན། གལ་སྲིད་དྲ་ཚོམས་སླར་གསོ་ཐུབ་པ་བྱུང་ན། ང་ཚོས་གསར་རྩོམ་པ་རེ་རེའི་ཁེ་དབང་ལ་ནན་ཏན་གྱིས་བརྩི་བཀུར་བྱ་རྒྱུ་ཡིན། གལ་སྲིད་དྲ་ཚོམས་སླར་གསོ་མ་ཐུབ་ཚེ། དེང་སང་སྤུས་ཚད་ལྡན་པའི་བོད་ཡིག་དྲ་ཚོམས་གང་ཙམ་འདུག་པ་རྣམས་ལ་བསམ་བློ་བཏང་སྟེ། སྐད་འཕྲིན་གཞུང་ཕྱོགས་ཀྱི་ཐག་གཅོད་ཡོངས་སུ་དང་ལེན་བྱ་རྒྱུ་ཡིན་པས། རྒྱ་ཆེའི་མང་ཚོགས་ཀྱིས་ཀྱང་གནད་དོན་འདིར་ཚད་བརྒལ་གྱི་ངོས་འཛིན་མི་གནང་བའི་རེ་བ་ཡོད་སྐོར་བརྗོད་འདུག
ཡང་བརྡ་ཁྱབ་ནང་། དུས་རྒྱུན་དུ་པར་དབང་དང་བརྩམས་ཆོས་ཀྱི་ཐོག་མའི་རིན་ཐང་ལ་བརྩི་སྲུང་བྱེད་མཁན་ཞིག་ཡིན་པའི་ཆ་ནས་ང་ཚོས་པར་དབང་དང་གསར་རྩོམ་པའི་བར་གྱི་གལ་ཆེའི་དོན་སྙིང་གསལ་པོ་ཤེས་ཀྱི་ཡོད། དེ་བས་དྲ་ཚོམས་ནང་དུ་ཞུགས་མཁན་རྣམས་ལའང་ཐོག་མའི་བརྩམས་ཆོས་དང་པར་དབང་ལ་སྲུང་སྐྱོབ་ཀྱི་འོས་འགན་ལ་སྲུང་བརྩི་གང་ལེགས་གནང་གནང་རོགས། ཕྱི་ལོ་ ༢༠༡༣ ཟླ་ ༣ ཚེས་ ༩ ནས་ཕྱི་ལོ་ ༢༠༢༤ ཟླ་ ༤ ཚེས་ ༢ བར་འདས་པའི་ལོ་ངོ་ ༡༡ དང་ཉིན་གྲངས་ ༢༥ རིང་ང་ཚོས་ཚ་ཚ་འུར་འུར་གྱིས་བོད་སྐད་ཡིག་དང་རིག་གཞུང་ཐོག་ཐད་གཏོང་བྱེད་པའི་རྩ་ཆེའི་གོ་སྐབས་བསྐྲུན་པ་དང་། ཐོག་མཐའ་བར་གསུམ་དུ་རྒྱབ་སྐྱོར་གནང་བར་བཀའ་དྲིན་ཆེ། ཞེས་བརྗོད་འདུག
ཕྱི་ལོ་ ༢༠༡༣ ལོར་ལུག་ཚང་དཔལ་ཡོན་དེ་དྲ་ཚིགས་ཀྱི་ངོ་བོའི་ཐོག་ནས་དབུ་འབྱེད་བྱས་ཡོད་ཅིང་། དེ་ནས་སྐད་འཕྲིན་གྱི་ངོས་སུ་འཕྲིན་སྟེགས་སུ་བསྒྱུར་ཏེ། འདས་པའི་མི་ལོ་བཅུ་གྲངས་རིང་བོད་ཕྱི་ནང་གཉིས་ཀྱི་རྩོམ་པ་པོས་བྲིས་པའི་རྩོམ་ཡིག་མང་དག་ཅིག་སྤེལ། དེ་བཞིན་དྲ་ཚོམས་དེར་བོད་གཞས་དང་། ཡིག་བསྒྱུར་སོགས་ཀྱིས་མཚོན་པའི་རིག་གནས་ཀྱི་ཚན་པ་འགའ་ཡོད་ཀྱང་། ད་ལན་རྒྱ་ནག་གཞུང་གིས་གློ་བུར་དུ་ལུག་ཚང་དཔལ་ཡོན་དྲ་ཚོམས་སྒོ་བརྒྱབ་པ་དེས། བོད་ཡིག་ལ་དགའ་མོས་བྱེད་མཁན་གྱི་ཀློག་པ་པོ་མང་པོ་ཞིག་གིས་བློ་ཕམ་ཆེན་པོ་བྱེད་ཀྱིན་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
རྩོམ་ཡིག་སྤེལ་སའི་དྲ་ཚིགས་ཡག་པོ་དེ་རྒྱ་གཞུང་གིས་སྒོ་བརྒྱབ་པ་ལ་དཔེ་བློ་ཕམ་བྱུང་།