འདི་ལོའི་ཕྱི་ཟླ་བདུན་པའི་ཟླ་མཇུག་ཡས་མས་ཙམ་ལ་༧གོང་ས་མཆོག་ལ་དྭགས་སུ་ཆིབས་བསྒྱུར་སྐབས་ཟངས་དཀར་དུ་ཕེབས་པའི་ཞལ་བཞེས་ཐོབ་ཡོད་འདུག
ཟླ་འདིའི་ཕྱི་ཚེས་ ༡༠ ཉིན་དཔལ་ལྡན་དགའ་ལྡན་ཕོ་བྲང་གིས་ལ་དྭགས་ཟངས་དཀར་ནང་པ་ཚོགས་པའི་ཚོགས་གཙོ་པ་སངས་ལྷ་དབང་ལགས་ཀྱི་མཚན་ཐོག་ཏུ་བཀའ་ལན་ཞིག་ཕུལ་བའི་ནང་། འདི་ལོའི་ཕྱི་ཟླ་ ༧ ཟླ་མཇུག་ཙམ་ནས་༧གོང་ས་མཆོག་ལ་དྭགས་སུ་ཆིབས་བསྒྱུར་བསྐྱང་གི་ཡོད་པ་དང་བསྟུན། ལ་དྭགས་ཟངས་དཀར་དུ་ཆིབས་བསྒྱུར་བསྐྱང་རྒྱུ་ཡིན་པའི་བཀའ་བཞེས་སྩལ་ཡོད་ཀྱང་། ད་ལྟ་ནས་དུས་ཚེས་སོགས་གཏན་འཁེལ་མེད་པ་འཁོད་འདུག
དེ་འབྲེལ་དགའ་ལྡན་ཕོ་བྲང་གི་བཀའ་ཡིག་ནང་། ༧གོང་ས་རྒྱལ་བ་རིན་པོ་ཆེ་མཆོག་ནས་འདི་ལོར་ལ་དྭགས་མཁར་ཤ་དགོན་པར་དབྱར་ཆོས་ཆེན་མོ་ལ་སོགས་པའི་མཛད་རིམ་མང་དག་ཅིག་བསྐྱངས་གཏན་ཁེལ་ཡོད་པ་དང་བསྟུན། འདི་ལོར་ཟངས་དཀར་དུའང་ཕེབས་པའི་བཀའ་བཞེས་གནང་སོང་། ༧གོང་ས་མཆོག་འདི་ལོའི་ཕྱི་ཟླ་ ༧ ཟླ་མཇུག་ཙམ་ནས་ལ་དྭགས་སུ་ཆིབས་བསྒྱུར་བསྐྱང་རྒྱུའི་འཆར་གཞི་འདིང་གི་ཡོད་པས། ད་ལྟ་ཟངས་དཀར་དུ་ཕེབས་པའི་ཚེས་གྲངས་སོགས་གསལ་ཁ་མེད། ཅེས་བརྗོད་འདུག
ཕྱི་ཟླ་ ༣ ཚེས་ ༡༡ ཉིན་ཁྲིག་རྩེ་རིན་པོ་ཆེ་མཆོག་གིས་དབུས་པའི་ལ་དྭགས་རི་ལྗོངས་ཡར་རྒྱལ་ལྷན་ཚོགས་ཀྱི་སྡེ་དཔོན་ཁག་ཅིག་དང་། དེ་བཞིན་ལྡུམ་ར་བསམ་གཏན་གླིང་དགོན་པའི་སྐུ་ཚབ་དང་ནང་པ་ཚོགས་འདུའི་སྐུ་ཚབ་གཅིག་བཅས་བཞུགས་སྒར་༧རྒྱལ་བའི་ཕོ་བྲང་དུ་ཆེད་བཅར་གྱིས་འདི་ལོའི་དབྱར་ཁར་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་ལྡུམ་རྭ་དང་གླེ་རུ་ཆིབས་བསྒྱུར་མཛད་གནང་ཡོང་བའི་གསོལ་འདེབས་ཞུས་པ་ལྟར་༧མགོན་པོ་གང་ཉིད་མཆོག་ནས་ཐུགས་བརྩེ་བ་ཆེན་པོས་བཀའ་བཞེས་བཟང་པོ་སྩལ་གནང་མཛད་ཡོད་འདུག
ཕྱི་ཟླ་ ༣ ཚེས་ ༡༣ ཉིན་རྟ་དབང་དགའ་ལྡན་ལྷ་རྩེ་རྣམ་རྒྱལ་དགོན་པའི་མཁན་རིན་པོ་ཆེ་མཆོག་གིས་དབུས་པའི་སྐུ་ཚབ་མི་སྣ་ཁག་ཅིག་ནས་བཞུགས་སྒར་༧རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་པ་དང་འབྲེལ། ༧གོང་ས་མཆོག་འདི་ལོར་མོན་རྟ་དབང་ཁུལ་དུ་ཆིབས་བསྒྱུར་བཀྲིན་མཛད་རྒྱུའི་གསོལ་འདེབས་ཞུས་པར་༧མགོན་པོ་གང་ཉིད་མཆོག་གིས་བཀའ་བཞེས་བཟང་པོ་སྨིན་སྩལ་མཛད་ཡོད་འདུག
གསར་འགོད་པ། སྐལ་བཟང་སྦྱིན་པ།
