༧གོང་ས་རྒྱལ་བ་རིན་པོ་ཆེ་མཆོག་ནས་སོག་རིགས་རྣམས་གཙོ་བོར་གྱུར་བའི་དད་ལྡན་དོན་གཉེར་ཅན་རྣམས་ལ་ཆོས་འབྲེལ་མཛད་སྐབས་རྒན་དངོས་གྲུབ་ཚོགས་གཉིས་ཀྱི་བཀའ་དྲིན་རྗེས་སུ་དྲན་པའི་ཐོག་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉམས་ལེན་ཡོང་བར་སྐུལ་མ་གནང་གི་ཡོད་སྐོར་གསུངས་སོང་།
ཟླ་འདིའི་ཕྱི་ཚེས་ ༡༩ དང ༢༠ ཉིན་གཉིས་རིང་སོག་པོའི་བླ་མའི་དགེ་རྒན་གྱི་གསུང་ཆོས་གོ་སྒྲིག་ཚོགས་པས་ཇི་ལྟར་གསོལ་བ་བཏབ་པ་བཞིན། ༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དགའ་ལྡན་ལྷ་བརྒྱ་མའི་ཆོས་འགྲེལ་མཛད་ཡོད་པ་ལྟར། དེ་རིང་རེས་གཟའ་སྤེན་པའི་ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ད་ལན་གཞུང་ཆེན་འཁྲིད་མཁན་སོག་པོ་རྒན་དངོས་གྲུབ་ཚོགས་གཉིས་ལགས་ཀྱི་བཀའ་དྲིན་དྲིན་གཟོའི་སླད་སོག་རིགས་ཚོར་ཆོས་འགྲེལ་མཛད་རྒྱུའི་སྐལ་བ་བྱུང་བར་ཐུགས་མཉེས་པོ་བྱུང་སྐོར་སོགས་གསུངས་སོང་།
དེ་རིང་གསུང་ཆོས་ཀྱི་ཉིན་གཉིས་པར་༧གོང་ས་རྒྱལ་བ་རིན་པོ་ཆེ་མཆོག་ནས། དེང་སྐབས་འཛམ་གླིང་ཡུལ་གྲུ་གཞན་དག་ནས་སངས་རྒྱས་ཀྱི་ཆོས་མཛོད་ཟབ་པ་དང་རྒྱ་ཆེ་བ། གཏིང་ཟབ་པོ་དེར་དོ་སྣང་ཡོད་མཁན་ཡོང་གི་ཡོད། དེ་སྔ་སངས་རྒྱས་ཀྱི་ཆོས་མཛོད་དེར་དོ་སྣང་དེ་འདྲ་ཡོད་མ་རེད། དེང་སྐབས་སློབ་སྦྱོང་བྱེད་པའི་གོ་སྐབས་རག་པའི་སྐབས་འདིར་སངས་རྒྱས་པའི་ཆོས་དེ་དམིགས་བསལ་ཞིག་སྟེ། རྒྱུ་མཚན་གྱི་ཐོག་ནས་བསམ་བློ་གཏང་རྒྱུ་ཡོད་པ་ཞིག་དང་། ཆོས་ཁས་མི་ལེན་མཁན་ཞིག་ཡིན་ནའང་སངས་རྒྱས་ཀྱི་ཆོས་ཀྱི་བསླབ་བྱ་དེས་སེམས་རྒྱུད་འདུལ་རྒྱུ་དང་། སྤྱི་ཚོགས་ཞི་བདེ། འཛམ་གླིང་ཞི་བདེ་ཡོང་རྒྱུར་ཐུན་མོང་མ་ཡིན་པ་ཞིག་ཡིན་པས་དོ་སྣང་གསར་པ་ཞིག་ཡོང་གི་འདུག ངོས་རང་ལ་ཆ་བཞག་ན་ཆུང་དུས་ནས་སེམས་སྐྱེད་དང་། སྟོང་ཉིད་ཀྱི་ལྟ་བའི་སྐོར་ལ་བསམ་བློ་གཏོང་གི་ཡོད། ངོས་རང་གི་མི་ཚེ་ཡར་ལོངས་ཡོང་དུས། ཆུང་དུས་ནས་བསམ་བློ་བཏང་པའི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཡིས་ཁ་ཡོད་ལག་ཡོད་ཀྱིས་ཕན་ཐོགས་ཆེན་པོ་ཡོད་པའི་ཉམས་མྱོང་ཡོང་གི་འདུག་ལ། དེ་དང་འབྲེལ་ནས་ངོས་རང་གི་ངོ་ཤེས་རོགས་པ་ཚོར་སྟོང་ཉིད་ཀྱི་ལྟ་བ་དང་བྱང་ཆུབ་སེམས་ཀྱི་སྐོར་ལ་བཤད་ཡོང་དུས། དོ་སྣང་གསར་པ་བསླེབས་པ་དང་སེམས་ཀྱི་དབུས་ནས་དགའ་མོས་ཤུགས་ཆེན་བྱེད་ཀྱི་འདུག ཅེས་གསུངས་སོང་།
ཡང་༧གོང་ས་རྒྱལ་བ་རིན་པོ་ཆེ་མཆོག་ནས། དེང་སྐབས་བོད་ལ་མཚོན་ན་ཕྱི་ནང་གི་བགེགས་རྐྱེན་མང་པོ་ཞིག་གིས་ཟིན་ཡོད་ཀྱང་། ལོ་ངོ་སྟོང་ཕྲག་གི་གོང་ནས་བོད་མི་ཚོར་ཡོད་པའི་གོམས་གཤིས་བཟང་པོ་སྟེ་སེམས་པ་བཟང་པོ་བྱ་རྒྱུ་དང་། གཞན་ལ་ཕན་སེམས་བྱ་རྒྱུ་དེ་ཡག་པོ་ཞེ་དྲགས་རེད་འདུག་པས། ང་ཚོ་བོད་གཞིས་ལུས་རྒྱ་ཆེ་མི་མང་གིས་དངོས་གནས་དྲང་གནས་མཁན་ཆེན་ཞི་བ་འཚོ་ནས་མར་བརྒྱུད་པའི་ཆོས་བརྒྱུད་དེ་དག་ལ་ལྷག་བསམ་གཡོ་བ་མེད་པ་དང་དད་འདུན་རྩེ་གཅིག་དང་། ཞོར་དུ་ངོས་རང་ལའང་དགའ་མོས་དང་ཡིད་ཆེས་རྩེ་གཅིག་རེད། དེ་བཞིན་རྒྱ་ནག་ནང་དུའང་སངས་རྒྱས་པའི་ཆོས་ལ་དོ་སྣང་ཡོད་མཁན་ཚོས་བོད་ལ་ཡོད་པའི་ཆོས་ཀྱི་གོམས་གཤིས་བཟང་པོ་དེར་དོ་སྣང་གསར་པ་ཞིག་བྱེད་ཀྱི་འདུག ངོས་རང་གིས་བོད་ལ་དཀའ་ངལ་མང་པོ་འཕྲད་པ་རེད་དེ་བོད་ལ་ཡོད་པའི་རྒྱ་ཆེ་གཏིང་ཟབ་པའི་རིག་གཞུང་དེས་འཛམ་གླིང་སྤྱི་ཡོངས་ལ་ཕན་ཐོགས་བསྒྲུབས་ཐུབ་ཡོད་པ་ཞིག་མཐོང་གི་འདུག ཅེས་གསུངས་སོང་།
༧མགོན་པོ་གང་ཉིད་ཀྱིས། བོད་ཀྱི་སངས་རྒྱས་པའི་ཆོས་དེ་སེམས་ཁམས་རིག་པ་དང་འདྲེས་ནས་ཡོད་པས། ཚན་རིག་པ་ཚོས་ཀྱང་དོ་སྣང་གསར་པ་བྱ་རྒྱུ་ཞིག་ཆགས་ཡོང་གི་འདུག ཆོས་དད་མེད་མཁན་ཚོས་ཀྱང་བོད་ཀྱི་ཆོས་ཀྱི་བསམ་བློ་གཏོང་ཐབས་དེ་འཕྲལ་དུ་སེམས་ལ་ཞི་བདེ་ཡོང་ཐབས་དང་། སེམས་ཀྱི་ཞི་བདེ་ལ་བརྟེན་ནས་ལུས་ཀྱི་འཕྲོད་བསྟེན་ཡོང་རྒྱུའི་ཐོག་ལ་དོ་སྣང་གསར་པ་ཞིག་བྱེད་ཀྱི་འདུག ངོས་རང་གིས་ཀྱང་ཉིན་རེར་བཞིན་བྱང་ཆུབ་སེམས་དང་སྟོང་ཉིད་ཀྱི་ལྟ་བ་ཤུགས་ཆེན་པོ་སྒོམ་གྱི་ཡོད་པས། ལུས་ཀྱི་འབྱུང་བ་སྙོམས་པ་དང་སེམས་ལྷོད་ལྷོད་ངང་གཉིད་ཀྱང་ཡག་པོ་ཞིག་ཁུག་གི་འདུག་པས། ཞི་བདེ་ཡོང་རྒྱུར་བསམ་བློ་གཏོང་སྟངས་དེ་གཙོ་བོ་ཞིག་རེད་འདུག ཅེས་དང་། ཚན་རིག་པ་ཚོ་ཆོས་ལ་དོ་སྣང་ཡོད་མ་རེད་དེ། དེང་སང་ཚན་རིག་པའི་ཁོངས་ནས་སངས་རྒྱས་པའི་གཞུང་ནས་སེམས་ཁམས་རིག་པའི་སྐོར་གསུངས་པ་དེར་དམིགས་བསལ་གྱི་དོ་སྣང་བྱས་ནས་ངོས་རང་ལ་ཐུག་ཏུ་ཡོང་མཁན་མང་པོ་ཞིག་འདུག ཅེས་གསུངས་སོང་།
ཡང་མགོན་པོ་གང་ཉིད་ཀྱིས། ང་ཚོ་བོད་དང་སོག་པོའི་བར་ལོ་སྟོང་ཕྲག་གི་དམིགས་བསལ་འབྲེལ་བ་ཡོད་པ་ཞིག་དང་། བོད་ནས་སོག་པོའི་མཁས་པ་མང་པོ་ཞིག་བྱུང་ཡོད་པས། བོད་དང་སོག་པོའི་བར་དམིགས་བསལ་གྱི་འབྲེལ་བ་ཡོད་པ་ཞིག་ཆགས་ཡོད། ངོས་རང་སྒེར་ལ་མཚོན་ནའང་ངོས་ཀྱི་གཞུང་ཆེན་འཁྲིད་མཁན་གཙོ་བོ་རྒན་དངོས་གྲུབ་ཚོགས་གཉིས་སོག་པོ་རེད། དཔེ་བཀའ་དྲིན་ཆེན་པོ་ཡིན་གདའ། ཡོངས་འཛིན་དམ་པ་གཉིས་བཀའ་དྲིན་ཆེན་པོ་རེད་དེ། གཞུང་ཆེན་དེ་དག་རྟགས་གསལ་བཏང་ནས་ཁྲིད་རྒྱུ་དེ་རྒན་དངོས་གྲུབ་ཚོགས་གཉིས་ཀྱིས་གཙོ་བོ་གནང་བ་རེད། དངོས་གནས་དྲང་གནས་བཀའ་དྲིན་ཆེན་པོ་ཡིན། བྱས་ཙང་ངོས་རང་གིས་བཀའ་དྲིན་རྗེས་དྲན་གྱི་དྲིན་ལན་གཟོ་རྒྱུ་དེ། ག་ཚོད་ཐུབ་ཐུབ་ཀྱིས་མི་མང་སྤྱི་དང་ལྷག་པར་སོག་རིགས་ཚོ་ལ་སྐུལ་མ་བྱ་རྒྱུའི་གོ་སྐབས་འདུག་ལ། དེ་ཡང་རྒན་དངོས་གྲུབ་ཚོགས་གཉིས་ཀྱི་བཀའ་དྲིན་རྗེས་སུ་དྲན་པའི་ཐོག་ནས་ཞུ་ཡི་ཡོད། ཆོས་ཞེས་པ་དེ་ཚིག་ཙམ་གྱི་སྐད་ཆ་མ་རེད། སོ་སོའི་སྒོ་གསུམ་གྱི་སྤྱོད་པ་དེའི་ཐོག་ནས་ཆོས་ཕྱོགས་ཀྱི་ལམ་སྟོན་གནང་བཞག་པ་དེར་ཉམས་ལེན་བྱས་ནས། ལུས་བདེ་བ། སེམས་སྐྱིད་པ། ངག་འཇམ་པ་ཡོང་བའི་ཆ་རྐྱེན་ཞིག་ཡོད་པ་རེད་ལ། སོ་སོས་ལག་ལེན་བསྟར་ན་ཚང་ཐུབ་པ་ཞིག་རེད། ཅེས་གསུངས་སོང་།
དགའ་ལྡན་ཕོ་བྲང་གི་དྲ་རྒྱར་སྤེལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། འདི་ལོའི་ཕྱི་ཟླ་ ༥ ཚེས ༡༨ ཉིན་ལ་ཀར་ལུ་རིན་པོ་ཆེ་མཆོག་གིས་ཇི་ལྟར་གསོལ་བ་བཏབ་པ་ལྟར། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མགོན་པོའི་རྗེས་གནང་དང་། ཕྱི་ཟླ་ ༦ ཚེས་ ༣ དང་ ༤ ལ་ཐེག་ཆེན་ཆོས་གླིང་གཙུག་ལག་ཁང་དུ་བོད་རིགས་གཞོན་སྐྱེས་རྣམས་ལ་དབུ་མའི་ལྡེའུ་མིག་གི་ཆོས་འབྲེལ། དེ་བཞིན་ཕྱི་ཟླ་ ༦ ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་ལས་བྱེད་ཟུར་པ་དང་། སྨན་རྩིས་ཁང་། སྐུ་སྲུང་ཟུར་པ་བཅས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
