དེ་རིང་༧གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་སྒྱུར་བསྐྱངས་ཏེ། ལྷ་མོ་ཚོགས་པ་ཁག་ཅིག་དང་བུད་མེད་ལྷན་ཚོགས་ཀྱི་ཚོགས་མི་རྣམས་ལ་མཇལ་ཁ་དང་བཀའ་སློབ་སྩལ་གནང་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། ཆོས་གྲོགས་ཚོར་ཞུ་རྒྱུར། ལྷ་ས་ལ་ཞོ་སྟོན་ཟེར་དུས་ངོས་རང་ལ་གུང་གསེང་རག་རྒྱུའི་དུས་ཚོད་ཡག་ཤོས་དེ་རེད། བྱས་ཙང་ཞོ་སྟོན་རན་གྱི་འདུག་ལབ་དུས། ངོས་རང་ཧེབ་ལངས་ནས་སྡོད་ཀྱི་ཡོད། ཞོ་སྟོན་ལ་རྒྱང་དཀར་བ། ཅུང་པ་བ། སྐྱོར་མོ་ལུང་བ་བཅས་ཉིན་མ་བཞིའི་རིང་ཡོད། ཁོང་ཚོས་རྣམ་ཐར་བཏང་བའི་སྐབས་སུ་ངོས་རང་གིས་རྣམ་ཐར་ལ་ཉན་ནས་བསྡད་དེ་ཚོར་བ་སྐྱིད་སྣང་ཞེ་དྲགས་ཡོང་གི་ཡོད། དེ་རིང་འདིར་ང་ཚོ་ཞོ་སྟོན་གྱི་རྗེས་དྲན་གྱི་གླུ་གར་ཁྱེད་རང་ཚོས་འཁྲབ་པར་ཐུགས་རྗེ་ཆེ་ཞུ་ཡི་ཡིན། ད་ལྟ་བཤད་མ་ཐག་པ་ནང་བཞིན་ངོས་རང་ཆུང་ཆུང་སྐབས་ལྷ་མོའི་རྣམ་ཐར་མང་པོ་གོ་ཡོད་པ་རེད། རྒྱང་དཀར་བའི་རྣམ་ཐར་དེ་གཟི་བརྗིད་ཆེན་པོ་ཡོད་པ་རེད། ངོས་རང་གིས་རྣམ་ཐར་བཏང་ན་འགྲིག་གི་མ་རེད། ཡིན་ནའང་མིས་རྣམ་ཐར་གཏོང་བཞིན་པ་ཨ་མཆོག་གིས་ཉན་སྐབས། ངོས་རང་ཡང་མགོ་ལྕོག་ལྕོག་བྱེད་ཀྱི་ཡོད། དེ་རིང་འདིར་ཞོ་སྟོན་རྗེས་དྲན་གྱིས་ཁྱེད་རང་ཚོས་རྣམ་ཐར་བཏང་ནས་ངོས་རང་ཡང་དགའ་པོ་བྱུང་། ཞེས་གསུངས།
༧མགོན་པོ་གང་ཉིད་ཀྱིས། ང་ཚོ་བཙན་བྱོལ་བ་ཆགས་ནས་སྐྱབས་བཅོལ་དུ་ཡོད་པའི་རིང་། ང་ཚོས་བོད་ཀྱི་ཆོས་དང་རིག་གཞུང་། གོམས་གཤིས་དེ་དག་རྒྱུན་འཛིན་ཐུབ་རྒྱུ་ཞིག་བྱེད་ཀྱི་ཡོད་པ་རེད། བོད་ནང་ལོགས་ལ་བོད་རྒྱ་ཆེ་མི་མང་གིས་ལྷག་བསམ་དང་སྙིང་སྟོབས་འགྲན་ཟླ་བྲལ་བ་རེད། ང་ཚོ་བཙན་བྱོལ་དུ་ཡོད་པར་བརྟེན། ང་ཚོ་རང་དབང་རེད། རང་དབང་ལུང་པའི་ནང་ལོགས་ལ་ང་ཚོ་བཙན་བྱོལ་བ་བོད་པ་ཉུང་ཤས་ཤིག་རེད། ཡིན་ནའང་། བོད་པའི་ལོ་སྟོང་ཕྲག་རིང་གི་གོམས་གཤིས་ཀྱིས་ང་ཚོ་ཟིན་ནས་བསྡད་ཡོད། ཞེ་དྲགས་དགའ་པོ་བྱུང་། གཙོ་ཆེ་ཤོས་བོད་ནང་གི་གཞིས་ལུས་རྒྱ་ཆེ་མི་མང་དེ་དག་དངོས་གནས་དྲང་གནས་ཀྱིས་ལྷག་བསམ་དང་། སྙིང་སྟོབས་ཞུམ་པ་མེད་པ་བྱས་ནས་བསྡད་ཡོད། དེ་དག་ཚང་མ་ལ་བརྟེན་ནས་ང་ཚོ་བོད་ཀྱི་བདེན་པའི་འཐབ་རྩོད་ཏན་ཏན་སེལ་གྱི་རེད། རྒྱ་ནག་ལ་འགྱུར་བ་མང་པོ་ཞིག་འགྲོ་ཡི་འདུག ང་ཚོ་དེར་ཧི་མ་ལ་ཡའི་རི་རྒྱུད་ལ་ཡོད་པའི་མི་རིགས་ཚོས་བོད་ཀྱི་ཆོས་དང་རིག་གཞུང་ལ་དམིགས་བསལ་གྱིས་དོ་སྣང་བྱས་ནས་གཞས་དང་ཞབས་བྲོ་འཁྲབ་རྒྱུ་སོགས་བྱེད་ཀྱི་ཡོད། ཚང་མར་ཐུགས་རྗེ་ཆེ་ཞུ་ཡི་ཡིན། སྐབས་སུ་བབ་པར་ད་ལྟ་དྷ་རམ་ས་ལར་ཞོ་སྟོན་གྱི་མཛད་སྒོའི་ཚོར་བ་ཡོད་བསྡད་པ་ཞིག་ཚོགས་ནས་ཞེ་དྲགས་དགའ་པོ་བྱུང་། ཐུགས་རྗེ་ཆེ་ཞུ་ཡི་ཡིན། ཞེས་གསུངས།
ཡང་༧མགོན་པོ་གང་ཉིད་ཀྱིས། ངོས་རང་ཕལ་ཆེར་ལོ་ ༩༠ ནང་སླེབ་ཀྱི་ཡོད་རེད། ཡིན་ནའང་ངོས་རང་གི་བསམ་བློའི་ནང་ལ་ཕལ་ཆེར་ལོ་བརྒྱ་ལྷག་བསྡད་རྒྱུའི་ཚོད་ཐིགས་པོ་ཞིག་འདུག དེར་བརྟེན། ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང་། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །ཐེག་པ་མཆོག་ལ་ངེས་པར་འབྱུང་གྱུར་བའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག ། ལབ་པ་ནང་བཞིན་ངོས་རང་ལོ་བརྒྱ་དང་བཅུ་གྲངས་ཤིག་ཕལ་ཆེར་སྡོད་ཀྱི་རེད། འདིའི་རིང་འཛམ་གླིང་ནང་འགྱུར་བ་མུ་མཐུད་ནས་མང་པོ་ཞིག་ཡོང་གི་རེད། ཡིན་ནའང་། ང་ཚོ་བོད་རྒྱ་ཆེ་མི་མང་གི་སོ་སོའི་རིག་གཞུང་དང་། ལྷག་བསམ། སྙིང་སྟོབས་ལ་འགྱུར་བ་ཁྱོན་ནས་འགྲོ་ཡི་མ་རེད། གཞིས་ལུས་རྒྱ་ཆེ་མི་མང་། ང་ཚོ་བཙན་བྱོལ་བ། དེ་བཞིན་ཧི་མ་ལ་ཡའི་རི་རྒྱུད་ཀྱི་མི་རིགས་ཚང་མས་ངོས་རང་ལ་དགའ་མོས་བྱེད་ཀྱི་ཡོད། ངོས་རང་གི་ངོས་ནས་ཆ་བཞག་ནའང་། རྒྱ་ཆེ་མི་མང་དེ་དག་གིས་དགའ་མོས་ཤུགས་ཆེན་པོ་བྱེད་ཀྱི་ཡོད་པར་བརྟེན། ལོ་བརྒྱ་དང་བཅུ་གྲངས་ཤིག་སྡོད་ཐུབ་པ་ངོས་རང་གི་བསམ་བློའི་ནང་ལ་ཚོད་ཐིགས་ཀྱི་འདུག དེར་བརྟེན། དེ་རིང་འདིར་ང་ཚོ་བོད་མི་བཙན་བྱོལ་བ་ཚོགས་ཁག་ཅིག་བསླེབས་ནས་གཞས་དང་ཞབས་བྲོ་འཁྲབ་པ་རེད། ཐུགས་རྗེ་ཆེ་ཞུ་ཡི་ཡིན། ཞེས་གསུངས།
ཡང་༧གོང་ས་མཆོག་ནས། ང་ཚོ་བོད་མི་བཙན་བྱོལ་བ་དང་གཞིས་ལུས་རྒྱ་ཆེ་མི་མང་ཡིན་ནའང་། རྒྱ་གར་མཚོན་པའི་བོད་མི་ཡོད་ས་ཚང་མར་ང་ཚོ་བོད་པའི་ཞེན་ཁོག་དང་ལྷག་བསམ། སྙིང་སྟོབས་ཞུམ་པ་མེད་པ་བྱས་ནས་བསྡད་ཡོད་པ་རེད། བོད་རྒྱ་ཆེ་མི་མང་གི་སྙིང་སྟོབས་དང་། དངོས་གནས་དྲང་གནས་ཀྱིས་འབད་བརྩོན་ཞུམ་པ་མེད་པ་བྱས་ཡོད་པར་བརྟེན། ངོས་རང་གི་ངོས་ནས་ཆ་བཞག་ནའང་། རྒྱ་ཆེ་མི་མང་དེ་དག་གི་ལྷག་བསམ་དང་། སྙིང་སྟོབས་དེ་འདྲ་ཡོད་པར་རྗེས་སུ་ཡི་རངས་དང་འབྲེལ་བའི་ཐོག་ནས། ངོས་རང་གི་ངོས་ནས་དེ་དག་མགོ་ཁྲིད་རྒྱུ་དང་། དངོས་ཤུགས་བརྒྱུད་གསུམ་ནས་ཞབས་འདེགས་དང་ཕན་ཐོགས་ག་རེ་བསྒྲུབ་རྒྱུ་ཡོད་པ་དེ་ངོས་རང་གི་ལས་འགན་རེད། འདི་ངོས་ཀྱིས་བྱེད་ཀྱི་རེད། ཁྱེད་རང་ཚོ་ཚང་མ་ལ་ཐུགས་རྗེ་ཆེ་ཞུ་ཡི་ཡིན། ཞེས་གསུངས།
ཡང་ཁོང་གིས། ང་རང་ཚོ་འཛམ་བུ་གླིང་འདིའི་སྒང་ལ་བུད་མེད་ལ་སྐབས་རེ་མཐོང་ཆུང་བྱེད་ཀྱི་ཡོད། ལུང་པ་ཚང་མའི་ནང་ལོགས་ལ་སོ་སོའི་ལུང་པའི་རིག་གཞུང་དང་གོམས་གཤིས་བདག་པོ་རྒྱག་མཁན་གཙོ་བོ་དེ་བུད་མེད་ཚོ་ཆགས་འདུག ང་ཚོ་བོད་པ་ཆ་བཞག་ན། བཙན་བྱོལ་བ་ཉུང་ཤས་མ་གཏོགས་ཡོད་པ་མ་རེད་དེ། བུད་མེད་དེ་དག་སེམས་ཤུགས་ཆེན་པོ་དང་ཧུར་ཐག་འབད་ཐག་བྱེད་མཁན་ཞིག་རེད་འདུག ཞེ་དྲགས་ཡག་པོ་འདུག དེ་རིང་ཁ་སང་འཛམ་བུ་གླིང་འདིའི་སྒང་ལ་བོད་ཀྱི་ཆོས་དང་རིག་གཞུང་ལབ་དུས། འཛམ་གླིང་གང་སར་དོ་སྣང་གསར་པ་བསླེབ་རྒྱུ་ཞིག་དང་། དམིགས་བསལ་གྱིས་འདི་བོད་པའི་རིག་གཞུང་རེད་ཅེས་མཛུབ་མོ་བཙུགས་རྒྱུ་ཡོད་པ་ཆགས་ཀྱི་འདུག འདི་རྒྱ་མི་གུང་ཁྲན་གྱིས་ནག་བསུབ་གཏོང་ཐབས་ཀྱི་འབད་བརྩོན་བྱེད་ཀྱི་ཡོད་རེད་དེ། ནག་བསུབ་བཏང་ཐུབ་མེད་པ་རེད། ང་རང་ཚོ་བོད་པའི་རིག་གཞུང་གོམས་གཤིས་དེ་ལོ་སྟོང་ཕྲག་རིང་ལ་ཡོད་པ་ཞིག་རེད། དེར་བརྟེན། ང་ཚོ་བཙན་བྱོལ་བ་ཉུང་ཤས་རེད་དེ། ཚང་མས་ང་ཚོ་བོད་པའི་ཆོས་དང་རིག་གཞུང་། སྐབས་སུ་བབ་པ་གླུ་གཞས། ང་ཚོ་བོད་པ་རང་ལ་ཡོད་པ་དེ་དག་བདག་པོ་བརྒྱབ་ནས་བསྡད་ཡོད་པ་རེད། ཞེ་དྲགས་ཡག་པོ་རེད་འདུག ཁྱེད་རང་ཚོ་ཚང་མ་ལ་བཀའ་དྲིན་ཆེ་ཞུ་ཡི་ཡིན། རྒྱ་ནག་ལ་འགྱུར་བ་མང་པོ་ཞིག་འགྲོ་ཡི་འདུག་ལ། རིམ་པས་འགྱུར་བ་ཏན་ཏན་ཡོང་གི་རེད། ང་ཚོ་བོད་མིའི་ལྷག་བསམ་དང་སྙིང་སྟོབས་ལ་འགྱུར་བ་འགྲོ་རྒྱུ་ཁྱོན་ནས་མེད། ངོས་རང་གི་ངོས་ནས་ཆ་བཞག་ནའང་། བོད་རྒྱ་ཆེ་མི་མང་གི་ལྷག་བསམ་དང་སྙིང་སྟོབས་མཚོན་ཆེད། ངོས་རང་གི་ངོས་ནས་ག་རེ་བྱ་རྒྱུ་ཡོད་པ་དེ་དག་ད་ལྟ་བར་དུ་བྱས་ཡིན་ལ། ད་དུང་མ་འོངས་པར་ལོ་བརྒྱ་ལྷག་གི་རིང་ལ་ངོས་ནས་སེམས་འཁུར་བླངས་ཏེ་ཧུར་ཐག་བྱེད་ཀྱི་རེད། ཁྱེད་རང་ཚོ་ཚང་མ་བློ་བདེ་པོ་བྱོས། ཧུར་ཐག་གནང་ཤོག ཅེས་བཀའ་སློབ་བསྩལ་གནང་སོང་།
གསར་འགོད་པ། དོན་གྲུབ་བཀྲ་ཤིས་དང་། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
