བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་མ་འོངས་པར་རྒྱལ་ཁབ་གཞན་དག་ཏུའང་རྒྱལ་ཁབ་སོ་སོའི་གནས་བབ་དང་བསྟུན་ནས་ཁྲིམས་འཆར་དང་གྲོས་ཆོད་སོགས་གཞག་ཐུབ་རྒྱུར་མཉམ་རུབ་ཀྱི་ཐོག་ནས་འབད་བརྩོན་གནང་དགོས་སྐོར་སོགས་གསུངས་འདུག
ཁ་སང་ཕྱི་ཚེས་ ༢༣ ཉིན་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཇེ་ཧྥི་མག་ལེ་(Jeff Merkley) ལགས་དང་། སྐུ་ཞབས་ཊོ་ཌི་ཡང་ (Todd Young) ལགས་རྣམ་གཉིས་ནས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་འཆར་ (S.138 Promoting a Resolution to the Tibet-China Dispute Act)་ངོ་སྤྲོད་གནང་བ་ལྟར། གྲོས་ཚོགས་གོང་མའི་ནང་སྤྱི་མོས་རྒྱབ་སྐྱོར་ཐོབ་འདུག བོད་དོན་ཁྲིམས་འཆར་དེར་ཨ་རིའི་གྲོས་ཚོགས་འོག་མའི་ནང་བསྐྱར་དུ་ཁུར་ནས་བསྐྱར་བཅོས་ཚིག་བརྗོད་ལ་མང་མོས་རྒྱབ་སྐྱོར་ཐོབ་རྗེས། ཨ་རིའི་སྲིད་འཛིན་རྗོ་བྷའེ་ཌིན་མཆོག་གིས་མཚན་རྟགས་བཀོད་དེ་ཁྲིམས་སུ་འགྱུར་གྱི་ཡོད་པ་རེད།
དེའི་ཐད་སྐུ་ཞབས་ཇེ་ཧྥི་མག་ལེ་ལགས་ཀྱིས། ཨ་རིའི་གྲོས་ཚོགས་གོང་འོག་གཉིས་ནས་བོད་དོན་ཐད་ཀྱི་ཁྲིམས་འཆར་བཏོན་པ་ནི་རྒྱ་ནག་གཞུང་གིས་བོད་མིའི་གཞི་རྩའི་ཐོབ་ཐང་ལ་རྡོག་རོལ་གཏོང་བཞིན་ཡོད་པའི་སྲིད་ཇུས་ལ་ཐད་ཀར་བརྡ་ལན་གཏོང་བའི་ཆེད་དུ་ཡིན་ལ། ཁྲིམས་འཆར་ནང་ད་ལྟའང་འབྱུང་མུས་ཡིན་པའི་བོད་རྒྱའི་བཀའ་རྙོག་དང་། རྒྱ་ནག་གཞུང་གིས་བོད་དང་བོད་ཀྱི་ལོ་རྒྱུས་ལ་འཁྱོག་བཤད་བྱེད་མུས་ཡིན་པའི་གནད་དོན་ཐད་རྒྱབ་སྐྱོར་མཚོན་བྱེད་ཀྱི་ཁྲིམས་འཆར་ཞིག་ཡིན་སྐོར་སོགས་གསུངས་འདུག
སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་གོང་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་སྤྱི་མོས་རྒྱབ་སྐྱོར་ཐོབ་པ་དང་འབྲེལ་ནས་སྐར་མ་དགུ་དང་སྐར་ཆ་སོ་ལྔ་ཅན་གྱི་གསུང་བཤད་ཅིག་གནང་བའི་ནང་། དེ་རིང་ཞོགས་པར་ཨ་རིའི་གྲོས་ཚོགས་གོང་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེར་སྤྱི་མོས་རྒྱབ་སྐྱོར་ཐོབ་པའི་གནས་ཚུལ་ཞིག་ཐོན་པ་རེད། ད་ལྟ་གྲོས་ཚོགས་འོག་མ་དང་། གོང་མའི་འཛིན་སྐྱོང་དང་ལྷན་ཚོགས་གཉིས་ཀ་ནས་རྒྱབ་སྐྱོར་ཐོབ་ཟིན། གྲོས་ཚོགས་འོག་མའི་ཚིག་བརྗོད་ནང་བསྐྱར་བཅོས་ཐུང་ཐུང་གཉིས་བྱས་ནས་འགྱུར་བ་ཏོག་ཙམ་ཞིག་བཏང་ཡོད་པ་རེད། ནང་དོན་ལ་འགྱུར་བ་གང་ཡང་བཏང་མེད་ནའང་། ཡིག་ཆ་དེ་གཉིས་མཐུན་པོ་བཟོ་སླད་གྲོས་ཚོགས་འོག་མར་བསྐུར་ཏེ། ཡིག་ཆ་གཅིག་གི་ངོ་བོའི་སྒང་ནས་འགྲོ་དགོས་དུས། དེར་ཉིན་གྲངས་ག་ཚོད་འགག་མིན་ད་ལྟ་ཤེས་རྟོགས་ཐུབ་ཀྱི་མ་རེད་དེ། སྲིད་འཛིན་མཆོག་གི་གསོལ་ཅོག་སྟེང་གང་མགྱོགས་འབུལ་ཐུབ་པའི་རེ་བ་ཞུ་ཡི་ཡོད། ཅེས་དང་། ད་བར་ཚང་མས་ཧུར་ཐག་འབད་ཐག་གནང་བ་རེད། འཛིན་སྐྱོང་བཀའ་ཤག་གིས་ལས་ཀ་ག་རེ་བྱས་ནའང་འཕྲལ་ཕུགས་རྒྱང་གསུམ་ལ་བསམ་བློ་གཏོང་གིན་ཡོད་པ་དང་། གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ཡོང་བ་ཞིག་ཡིན་པ་ལས་ཀ་བྱེད་ཀྱིན་བྱེད་ཀྱིན་ཇེ་གསལ་ཇེ་གསལ་དུ་འགྲོ་ཡི་འདུག་པས། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་གཙོ་བོར་གཞི་བཞག་པའི་ཐོག་ནས། ང་ཚོས་ཆབ་སྲིད་དང་། འཛིན་སྐྱོང་། སྤྱི་ཚོགས་བདེ་དོན་སོགས་ཀྱི་ཐད་ལས་ཀ་གཉེར་རྒྱུའི་ཆོད་སེམས་བརྟན་པོ་ཡོད། མང་ཚོགས་ནང་དུའང་ཕན་ཚུན་ལ་རྩོད་མི་དགོས་པར། ཁྲིམས་འཆར་དེ་ཕྱིན་པ་ལ་བརྟེན་ནས་བོད་ཀྱི་ལོ་རྒྱུས་ལ་རྒྱ་ནག་གིས་འཁྱོག་བཤད་བྱེད་ཀྱི་ཡོད་པར་གདོང་ལེན་བྱ་དགོས་པའི་གནས་སྟངས་ཤིག་ཆགས་ཡོད། ད་ལན་གྱི་ཁྲིམས་འཆར་དེ་གཏན་འབེབས་བྱུང་བ་ཡིན་ན། རྒྱལ་ཁབ་གཞན་དག་ཏུའང་རྒྱལ་ཁབ་སོ་སོའི་གནས་བབ་དང་བསྟུན་ནས། ཁྲིམས་དང་། བསྒྲགས་གཏམ། གྲོས་ཆོད་སོགས་གཞག་ཐུབ་རྒྱུར་མཉམ་རུབ་ཀྱིས་འབད་བརྩོན་གནང་དགོས། ཞེས་གསུངས་སོང་།
ཁྲིམས་འཆར་དེའི་ནང་། ཨ་རིའི་གཞུང་འབྲེལ་གྱི་སྲིད་ཇུས་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་གམ་ཁོང་གི་དམིགས་བསལ་སྐུ་ཚབ། དེ་བཞིན་དམངས་གཙོའི་ལམ་ནས་འོས་འདེམས་བྱུང་བའི་བོད་པའི་མགོ་ཁྲིད་དང་། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་དཔོན་རིགས་དབར་སྔོན་འགྲོའི་ཆ་རྐྱེན་གང་ཡང་མེད་པར་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་བར་རྒྱབ་སྐྱོར་གནང་རྒྱུ་དང་། འཛམ་གླིང་རྒྱལ་ཁབ་གཞན་དང་མཉམ་འབྲེལ་གྱི་ཐོག་ནས་བོད་རྒྱའི་དཀའ་རྙོག་སེལ་བར་རམ་འདེགས་གནང་རྒྱུ། རྒྱ་ནག་གཞུང་གིས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག ལོ་རྒྱུས་སོགས་བོད་མི་མང་གི་མངོན་འདོད་བཞིན་སྦྱང་སྤྱོད་བྱེད་དུ་འཇུག་དགོས་པ་དང་། རྒྱ་ནག་གིས་གནའ་ནས་ད་བར་བོད་དེ་རྒྱ་ནག་གི་ཆ་ཤས་ཡིན་ཚུལ་བཤད་པ་དེ་དག་ལོ་རྒྱུས་ཀྱི་ཐོག་ནས་དྲང་བདེན་མིན་པ་གསལ་འདོན་གནང་རྒྱུ། རྒྱ་ནག་གིས་བོད་ཀྱི་ལོ་རྒྱུས་དང་རིག་གཞུང་། དགའ་ལྡན་ཕོ་བྲང་ཚུད་པའི་བོད་ཀྱི་སྒྲིག་འཛུགས་ཁག་གི་སྐོར་ལ་འཁྱོག་བརྗོད་དང་ལོག་འགྲེལ་བྱེད་མཚམས་འཇོག་དགོས་པའི་སྐོར་དང་། དེ་བཞིན་བོད་རང་སྐྱོང་ལྗོངས་ཟེར་བ་དང་བོད་རིགས་རང་སྐྱོང་ཁུལ་ཟེར་བ་ཚང་མ་བོད་ཀྱི་མངའ་ཁོངས་ཡིན་པ་སོགས་གསལ་སྟོན་གནང་ཡོད་འདུག
ཉེ་སྔོན་ཕྱི་ཟླ་ ༤ ཚེས་ ༡༦ ཉིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གིས་ཁྲིམས་འཆར་འདི་ལ་རྒྱབ་སྐྱོར་ཐོབ་ཡོད་པ་རེད། དེ་བཞིན་འདས་ལོའི་ཕྱི་ཟླ་ ༢ ཚེས་ ༨ ཉིན་ཨ་རིའི་གྲོས་ཚོགས་འོག་མའི་འཐུས་མི་དང་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) མཆོག་དང་། གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཇེ་ཧྥི་མག་ལེ་ (Jeff Merkley) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཊོ་ཌི་ཡང་ (Todd Young) མཆོག་བཅས་ཀྱིས་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་ (A Resolution to the Tibet-China Conflict Act [H.R. 533]) བཏོན་ཏེ། ཕྱི་ལོ་ ༢༠༢༤ ཟླ་ ༢ ཚེས་ ༡༥ ཉིན་གྲོས་ཚོགས་འོག་མའི་འཐུས་མི་གྲངས་ ༣༩༢ ཀྱིས་རྒྱབ་སྐྱོར་དང་། འཐུས་མི་གྲངས་ ༢༨ ཀྱིས་འགག་བྱ་གནང་སྟེ་ཚད་མཐོའི་མང་མོས་ཀྱི་ཐོག་ནས་གཏན་འབེབས་གནང་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
