ཨ་རིའི་སྲིད་འཛིན་མཆོག་ནས་ས་ག་ཟླ་བར་ནང་པ་ཡོངས་ལ་འཚམས་འདྲི་གནང་།

ཨ་རིའི་ཕོ་བྲང་དཀར་པོའི་ནང་རྒྱལ་ཁབ་བཅུ་ལྷག་གི་གཞུང་ཚབ་པ་ལྷན་འཛོམས་ཐོག་ནང་པའི་དུས་ཆེན་ཆེ་ཤོས་ས་ག་ཟླ་བ་སྲུང་གཙི་གནང་འདུག

Celebrating Vesak at the White House in Washington D.C. on May 5, 2023.

ཕྱི་ཚེས་ ༢༣ སྟེ་ས་ག་ཟླ་བའི་ཚེས་ ༡༥ ཉིན་ཨ་རིའི་ཕོ་བྲང་དཀར་པོའི་ནང་བདག་ཅག་གི་སྟོན་པ་སྐུ་བལྟམས་པ་དང་། སངས་རྒྱས་པ། མྱ་ངན་ལས་འདས་པའི་ཚུལ་བསྟན་པའི་དུས་ཆེན་གསུམ་འཛོམས་གྱི་དུས་ཆེན་སྲུང་གཙི་གནང་ཡོད་ཅིང་། མཛད་སྒོའི་དེའི་ཐོག་བལ་ཡུལ་དང། རྒྱ་གར། སིངྒ་ལ། བྷང་ལ་དྷེ་ཤི། ཁེམ་བྷོ་ཌི་ཡ། ཨིན་ཌོ་ནེ་ཤི་ཡ། ཐའེ་ལན་ཌི། སིངྒ་པུར། སོག་པོ། ལའོ་སི་བཅས་ཀྱི་གཞུང་ཚབ་ཁང་ཁག་གི་འཐུས་མི་སོགས་ཀྱིས་མཉམ་ཞུགས་གནང་འདུག

དེའི་ཐད་ཨ་རིའི་སྲིད་འཛིན་སྐུ་ཞབས་བྷའེ་ཌན་མཆོག་གིས། ང་དང་ (Jill) གཉིས་ཀྱིས་སངས་རྒྱས་བཅོམ་ལྡན་འདས་ཀྱི་འཁྲུངས་སྐར་དང་སངས་རྒྱས་པ། སྐུ་མྱ་ངན་ལས་འདས་པའི་ཉིན་མོར། ཨ་རི་དང་འཛམ་གླིང་ཡོངས་སུ་ཡོད་པའི་ནང་པ་རྣམས་ལ་འཚམས་འདྲི་ཞུ་ཡི་ཡོད། ཨ་རིའི་ནང་དུ་ཡོད་པའི་ནང་པ་རྣམས་ཀྱིས་ང་ཚོའི་སྤྱི་ཚོགས་དང་རྒྱལ་ཁབ་ནང་དུ་ལེགས་བཅོས་བྱས་ཡོད་པ་དང་། ང་ཚོ་ཚང་མས་གཅིག་སྒྲིལ་གྱིས་འབྱུང་འགྱུར་དོན་ལྡན་གྱི་མི་ཚེ་ཞིག་ཡོང་བར་བྱ་དགོས། ཞེས་གསུངས་འདུག

མཛད་སྒོ་དེའི་ཐོག་ཨ་རིའི་སྲིད་གཞོན་པ་ཀ་མ་ལ་ཧེ་རི་སི་མཆོག་གི་སྐུ་ཟླ་སྐུ་ཞབས་ཨིམ་ཧོབ་ལགས་ཀྱིས། ང་ཚོས་ཕྱི་ལོ་ ༢༠༢༡ ལོར་དུས་ཆེན་འདི་ཕོ་བྲང་དཀར་པོའི་ནང་ཐེངས་དང་པོ་མི་ཉུང་ཤས་ཤིག་ལས་མེད་པའི་ཐོག་ནས་སྲུང་གཙི་ཞུས་ཡོད། དེ་རིང་འདིར་ཕོ་བྲང་དཀར་པོའི་ནང་དུས་ཆེན་སྲུང་གཙི་བྱ་རྒྱུའི་གོ་སྐབས་ཐོབ་པ་རེད། ཤིན་ཏུ་ཡིད་སྨོན་སྐྱེས་དགོས་པ་ཞིག་རེད་ལ། ད་ཆ་དེ་འཕེལ་རྒྱས་འགྲོ་མུས་ཡིན་པའི་ཁར། ལོ་རེ་བཞིན་མཛད་སྒོ་འདིར་མཉམ་ཞུགས་གནང་མཁན་གྱི་སྐུ་ཚབ་ཇེ་མང་དུ་འགྲོ་ཡི་ཡོད་པས། ང་ཚོས་སྤྱི་ཚོགས་འདྲ་མིན་གྱི་མཛེས་སྡུག་དེ་གསལ་སྟོན་བྱེད་ཀྱི་ཡོད། ཅེས་གསུངས་འདུག

President Joe Biden Thursday marked the Buddhist holiday of Vesak, recognizing the contributions of American Buddhists. He said Vesak is a time to reflect on values, including the need to work for peace and justice. Photo by Bonnie Cash/UPI | License Photo

ཡང་ཁོང་གིས། ང་རང་གིས་འཛམ་གླིང་ས་ཆ་འདྲ་མིན་གྱི་མགོ་ཁྲིད་ལ་ཐུག་མྱོང་ཡོད། ཁོ་ཚོ་དང་འབྲེལ་འདྲིས་དམ་ཟབ་ཡོད་པའི་ཚོར་བ་ཡང་བྱུང་། ང་ཚོས་འཁོན་འཛིན་མེད་པ་བཟོ་སླད་གཅིག་སྒྲིལ་བྱ་དགོས། གང་ཡིན་ཟེར་ན། ད་ལྟ་ང་ཚོ་གཅིག་སྒྲིལ་མེད་པར་ཁ་བྲལ་བའི་དཀའ་ངལ་མང་དག་ཅིག་འཕྲད་མུས་ཡིན། རྒྱུན་དུ་ང་ཚོ་ཚང་མ་བདེ་བ་འདོད་མཁན་ཤ་སྟག་ཡིན་པའི་འདུ་ཤེས་དེ་བརྗེད་མི་རུང་བ་ཡིན། ཞེས་གསུངས་འདུག

ཨ་རིའི་རྒྱལ་སྤྱིའི་ནང་པའི་མཐུན་ཚོགས་ཀྱི་འགན་འཛིན་དར་ཐང་རིན་པོ་ཆེའི་སྲས་མོ་ཀུན་བཟང་དབང་མོ་ལགས་ཀྱིས། དེ་རིང་ནི་དུས་ཚིགས་འདི་སྲུང་གཙི་ཞུས་པ་ཐེངས་བཞི་པ་དེ་ཡིན་པ་དང་། ཐེངས་དང་པོའི་སྐབས་ང་ཚོ་མི་ཉུང་ཤས་ལས་མེད་པས། ད་ཆ་འདི་འདྲ་ཞིག་ཏུ་གྱུར་བ་ནི་ཆེས་ཡིད་སྨོན་བྱ་འོས་པ་ཞིག་རེད་ལ། སྐུ་ཞབས་ཨིམ་ཧོབ་ལགས་ཀྱི་བཀའ་དྲིན་ཁོ་ནར་བརྟེན་ནས་ང་ཚོས་ཕོ་བྲང་དཀར་པོའི་ནང་ས་ག་ཟླ་བ་སྲུང་གཙི་བྱུ་རྒྱུའི་གོ་སྐབས་ཤིག་བྱུང་བ་རེད། ཨ་རི་ནི་ཐེག་ཆེན་དང་ཉན་ཐོས། རང་རྒྱལ་སོགས་འཛོམས་པའི་ནང་པའི་དགོན་པ་ ༣༠༠༠ ལྷག་ཡོད་པའི་རྒྱལ་ཁབ་ཅིག་རེད། དེ་དག་གིས་སོ་སོའི་ལྟ་བ་སོགས་རྒྱུད་འཛིན་བྱེད་ཀྱི་ཡོད་པ་རེད། བདག་ཅག་གི་སྟོན་པས་ཆོས་དེ་དྲང་དོན་དང་ངེས་དོན་གཉིས་ཀྱི་ཐོག་ནས་གསུངས་ཡོད་ལ། སྟོན་པས་དེང་སྐབས་འཛམ་གླིང་འདིར་འཕྲད་མུས་ཡིན་པའི་དཀའ་སྡུག་མང་དག་ཅིག་གླེགས་བམ་དེ་དག་ཏུ་གསུངས་ཟིན་པ་རེད། དེ་རིང་འདིར་སྤར་བའི་མཆོད་མེ་འདི་ནི་ད་ཆ་འཛམ་གླིང་ནང་འཕྲད་བཞིན་པའི་དམག་འཁྲུག་དང་དཀའ་ངལ་དེ་དག་ལས་ཞི་འཇམ་ཡོང་བའི་རེ་སྨོན་གྱི་སླད་དུ་ཕུལ་བ་ཡིན། ཞེས་འགྲེལ་བརྗོད་གནང་འདུག

ཨ་རིའི་རྒྱལ་སྤྱིའི་ནང་པའི་མཐུན་ཚོགས་ཀྱི་འགན་འཛིན་དར་ཐང་རིན་པོ་ཆེ་མཆོག་ནས་ཐེངས་དང་པོ་ཕོ་བྲང་དཀར་པོའི་ནང་ས་ག་ཟླ་བ་སྲུང་གཙི་གནང་སྐབས་མར་མེ་ཞལ་འབྱེད་གནང་བཞིན་པ།༢༠༢༡།༠༥།༢༦

ཕྱི་ལོ་ ༢༠༢༡ ཟླ་ ༥ ཚེས་ ༢༦ སྟེ་ས་ག་ཟླ་བའི་ཚེས་ཆེན་ ༡༥ ཉིན་ཨ་མེ་རི་ཀའི་ཕོ་བྲང་དཀར་པོའི་ནང་དུ་ཐེངས་དང་པོ་མར་མེ་མཆོད་འབུལ་གནང་སྟེ་ས་ག་ཟླ་བ་སྲུང་གཙི་གནང་ཡོད་པ་མ་ཟད། སྲིད་འཛིན་མཆོག་ནས་དུས་ཆེན་གྱི་འཚམས་འདྲི་དང་སྦྲགས། ནང་པ་སངས་རྒྱས་པའི་ཆོས་ལུགས་ཀྱིས་སྙིང་རྗེ་དང་གུས་ཞབས། རང་ཤེད་མེད་པ། བཟོད་སྒོམ་གྱི་སྐོར་ལ་དྲན་སྐུལ་བྱེད་ཀྱི་ཡོད་པ་རེད། ཉིན་མོ་འདིར་ཨ་རིའི་ནང་དུ་ཡོད་པའི་ནང་པ་རྣམས་ཀྱིས་ང་ཚོའི་སྤྱི་ཚོགས་དང་རྒྱལ་ཁབ་ནང་དུ་ལེགས་བཅོས་བྱས་ཡོད་པ་དང་། ང་ཚོ་ཚང་མས་གཅིག་སྒྲིལ་གྱིས་འབྱུང་འགྱུར་མི་ཚེ་ལེགས་པོ་ཡོང་བའི་ཆེད་དུ་ལས་ཀ་བྱེད་ཀྱི་ཡོད་པ་རེད། ཅེས་གསུངས་ཡོད་པ་རེད།

ཚེ་རིང་རྣམ་རྒྱལ་གྱིས་བྲིས།

རྩོམ་སྒྲིག་བྱེད་མཁན། པདྨ་མཚོ།