ཟླ་དྲུག་པའི་ནང་༧གོང་ས་རྒྱལ་བ་རིན་པོ་ཆེ་མཆོག་ཞབས་པུས་སྨན་བཅོས་སླད་ཨ་རིར་ཆིབས་བསྒྱུར་བསྐྱང་རྒྱུ་ཡིན་འདུག
དེ་རིང་ཕྱི་ཚེས་ ༣ ཉིན་དགའ་ལྡན་ཕོ་བྲང་ཡིག་ཚང་གིས་གསལ་བསྒྲགས་ཤིག་གནང་བའི་ནང་། ཟླ་འདིའི་ནང་༧གོང་ས་རྒྱལ་བ་རིན་པོ་ཆེ་མཆོག་ཨ་རིར་ཞབས་པུས་སྨན་བཅོས་སླད་ཆེད་ཕེབས་གནང་རྒྱུ་ཡིན་འདུག་པས། ཟླ་འདིའི་ཕྱི་ཚེས་ ༢༠ ནས་བཞུགས་སྒར་དུ་མ་འཁོད་པར་མཇལ་ཁ་ཚུད་པའི་མཛད་འཆར་རྣམས་ཕྱིར་འཐེན་གནང་རྒྱུ་ཡིན་སྐོར་སོགས་འཁོད་འདུག
ཕྱི་ལོ་ ༢༠༡༦ ཟླ་ ༡ ཚེས་ ༡༩ ཉིན་༧གོང་ས་རྒྱལ་བ་རིན་པོ་ཆེ་མཆོག་ཨ་རིའི་དཀྱིལ་ནུབ་མངའ་སྡེ་མེན་ནི་སོ་ཊ་ (Minnesota) ཡི་གྲོང་ཁྱེར་རའོ་ཆ་སི་ཊར་ (Rochester) ནང་ཡོད་པའི་མ་ཡོ་སྨན་དཔྱད་ཁང་ (Mayo Clinic) ཁང་དུ་སྤྱན་ལ་བརྟག་དཔྱད་གནང་དུ་ཕེབས་ཡོད་པ་དང་། ༧མགོན་པོ་གང་ཉིད་ཀྱིས་བཞུགས་སྒར་གྱི་ཉེ་འགྲམ་དུ་ཆགས་པའི་གྷ་གྷལ་གནམ་ཐང་ནས་འདས་པའི་ལོ་ངོ་ ༩ རིང་ལ་ངོས་རང་མ་ཡོ་སྨན་དཔྱད་ཁང་དུ་གཟུགས་པོར་བརྟག་དཔྱད་གཏོང་བར་འགྲོ་བཞིན་ཡོད། གལ་ཏེ་སྨན་པས་ངོས་ལ་ན་ཚ་ཕྲན་བུ་ཡོད་པ་ཤེས་རྟོགས་བྱུང་ན་ཁོ་ཚོས་སྨན་བཅོས་ལེགས་པོ་གནང་གི་རེད། ཅེས་དང་། ཡང་ངོས་ཀྱི་མིག་གཡས་པ་སྐྲངས་འདུག་ཅེས། སྤྱན་ཤེལ་ཕུད་ནས་ཅུང་སྐྲངས་སྦོས་བྱུང་ཡོད་པའི་སྤྱན་གཡས་པ་གསར་འགོད་པར་བསྟན་ཡོད་འདུག
དེ་བཞིན་ཁ་སང་ཕྱི་ཚེས་ ༢ ཉིན་དྷི་ཨེ་ཊི་ལན་ཊིར་ (The Atlantic) གསར་ཁང་གིས་སྤྱི་ཁྱབ་རྩོམ་སྒྲིག་པས་རྩོམ་ཡིག་ཅིག་སྤེལ་ཡོད་པའི་ནང་། ད་ལྟའི་ཨ་རིའི་སྲིད་འཛིན་སྐུ་ཞབས་བྷའེ་ཌིན་མཆོག་ཨ་རིའི་སྲིད་འཛིན་གྱི་འོས་མི་བཞེངས་སྐབས། སྐབས་དེའི་ཨ་རིའི་སྲིད་འཛིན་སྐུ་ཞབས་ཊོམ་མཆོག་གིས་སྣང་མེད་དུ་བཞག་པའི་གནད་དོན་ཞིག་སྟེ། ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་རྒྱུ་ཡིན་པའི་ཁས་ལེན་བྱས་ཡོད་པ་བཞིན། ད་ལན་༧གོང་ས་རྒྱལ་བ་རིན་པོ་ཆེ་མཆོག་ཨ་རིའི་སྲིད་འཛིན་གྱི་འོས་བསྡུའི་ཡོ་ལང་འཚུབ་བཞིན་པའི་སྐབས་ཨ་རིར་ཆེད་ཕེབས་གནང་གི་ཡོད་པས། སྐུ་ཞབས་བྷའེ་ཌིན་མཆོག་གིས་ངེས་པར་དུ་མཇལ་ཁ་ཞུ་དགོས་སྐོར་སོགས་བྲིས་ཡོད་འདུག
གསར་འགོད་པ། དཔལ་ལྡན།
