དེ་རིང་དང་སང་ཉིན་ཉིན་གྲངས་གཉིས་རིང་ལ་༧གོང་ས་རྒྱལ་བ་རིན་པོ་ཆེ་མཆོག་ནས་བོད་རིགས་གཞོན་སྐྱེས་རྣམས་ལ་དབུ་མའི་ལྡེ་མིག་གི་ཆོས་འབྲེལ་བཀའ་དྲིན་བསྩལ་གནང་གི་འདུག
༧གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་ཆུང་ཆུང་སྐབས་སུ་བློ་རྟགས་ཀྱི་སྡོམ་གཉིས་པོ་བློ་ལ་འཛིན་པ་རེད། སྔོན་གྱི་མཁས་གྲུབ་གཉིས་ལྡན་གྱི་དམ་པ་ཚོས་ཡུན་རིང་པོའི་དོན་དག་ལ་དགོངས་པ་བཞེས་ཏེ། བོད་རིགས་ཚོ་བློ་རིག་དང་རྟགས་རིགས་བལྟ་རྒྱུ་ཞིག་དང་། དེ་ཡང་ཆོས་ཀློག་པ་ལྟ་བུ་མིན་པར་བློ་རྟགས་ཀྱི་སྡོམ་དེ་བློ་ལ་འཛིན་གྱི་ཡོད་པ་རེད། ངོས་རང་ལ་ཆ་བཞག་ན། ཆུང་ཆུང་སྐབས་ནས་བློ་རྟགས་ཀྱི་སྡོམ་གཉིས་པོ་ཟིན་ཡོད་པ་རེད། ཉིན་རེར་ཉིན་རེར་སྐྱོར་གྱི་ཡོད། གང་ལྟར་དེས་ག་རེ་མཚོན་གྱི་ཡོད་རེད་ཟེར་ན། ང་ཚོ་བོད་པས་ནང་ཆོས་སློབ་སྦྱོང་བྱ་རྒྱུ་དེ་བླ་མས་བཀའ་ཆོས་གནང་སྟེ་སྐྱབས་སུ་མཆིས་ཟེར་བསྡད་པ་མིན་པར་གཞུང་གལ་ཆེ་བ་དེ་དག་དང་བློ་རྟགས་ཀྱི་སྡོམ་བློ་ལ་ཟིན་ནས་སྐྱོར་གྱི་ཡོད་པ་རེད། སྔོན་གྱི་དགེ་རྒན་ཚོའི་ཕྱག་ལས་ཡག་པོ་ཞེ་དྲགས་རེད་འདུག དོན་དག་སྔོན་ལ་མ་ཤེས་ནའང་ཚིག་འདི་བློ་ལ་ཟིན་ནས་སྐྱོར་རྒྱུ་ཡོད་པ་དང་། རིམ་པས་ག་ལེར་ག་ལེར་དགེ་རྒན་གྱིས་ཚིག་འདི་འགྲེལ་བཤད་བསྐྱོན་པ་སོགས་ཡག་པོ་ཞེ་དྲགས་རེད་འདུག ཅེས་གསུངས།
༧མགོན་པོ་གང་ཉིད་ཀྱིས། ང་ཚོ་བཙན་བྱོལ་བ་ཆགས་ནས་བསྡད་ཡོད་རེད། ཆེ་ས་ནས་བཤད་པ་ཡིན་ན། འཛམ་བུ་གླིང་འདིའི་སྒང་ལ་ནང་ཆོས་ལ་དོ་སྣང་དེ་ཙམ་མེད་པ་དང་། ང་ཚོ་བོད་རིགས་ལ་ཆ་བཞག་ནའང་གཞུང་ཆེན་བལྟ་རྒྱུར་དེ་ཙམ་གྱིས་དོ་སྣང་མེད་པའི་ཟོལ་ཞིག་ཆགས་ཀྱི་ཡོད་པ་རེད། དེ་འདྲའི་དུས་ཚོད་ལ་ང་ཚོ་འདིར་བཙན་བྱོལ་བ་ཉུང་ཤས་ཤིག་ཡོད་པ་དེ་དག་གིས་ང་ཚོས་ལོ་སྟོང་ཕྲག་གི་རིང་ལ་བདག་པོ་བརྒྱབ་པའི་རིགས་ལམ་གྱི་གཞུང་དེ་དག་སློབ་གཉེར་བྱེད་པ་ཙམ་མིན་པར་ཚིག་དེ་དག་བློ་ལ་བཟུང་ནས་སྐྱོར་རྒྱུ་ཡོད་པ་དེ་ཡག་པོ་ཞེ་དྲགས་རེད་འདུག སྔ་མོ་རྒྱ་ནག་ལའང་དཔེ་ཆ་བལྟ་རྒྱུ་ཡག་པོ་ཡོད་ས་རེད། ཝི་ཐི་ནམ་ལའང་ཡོད་ཀྱི་རེད་དེ། ང་རང་ཚོ་བོད་པ་ཚོས་ཆུང་ཆུང་སྐབས་ནས་བློ་རིག་དང་རྟགས་རིགས་བལྟ་རྒྱུ་དང་། བློ་རྟགས་ཀྱི་སྡོམ་བློ་ལ་བཟུང་ནས་མིག་དཔེ་ཡག་པོ་ཞེ་དྲགས་རེད་འདུག ངོས་རང་ལ་ཆ་བཞག་ནའང་། ཆུང་ཆུང་སྐབས་ནས་བློ་རྟགས་ཀྱི་སྡོམ་ཉིན་ལྟར་སྐྱོར་གྱི་ཡོད། བློ་རིག་གི་སྡོམ་དང་རྟགས་རིགས་ཀྱི་སྡོམ་གྱིས་ང་ཚོའི་བློའི་རིགས་དེ་གང་འདྲ་ཡིན་མིན་དང་། བློའི་གཏན་ཚིགས་ཀྱི་རིག་པ་བཀོལ་ནས་འགྲོ་དགོས་པ་དེ་དག་རྟགས་རིགས་ཡག་པོ་ཞེ་དྲགས་རེད་འདུག ང་ཚོ་ཆུང་ཆུང་སྐབས་ནས་བློ་རྟགས་ཀྱི་སྡོམ་བློ་ལ་བཟུང་ནས་ཉིན་ལྟར་སྐྱོར་གྱི་ཡོད། དེས་ག་རེ་མཚོན་གྱི་ཡོད་རེད་ཟེར་ན་བོད་ཀྱི་ཆོས་ཀྱི་རིག་གཞུང་བདག་པོ་རྒྱག་སྟངས་དེ་འདོན་པ་བཏོན་པ་དང་སྨོན་ལམ་རྒྱག་པ་གཅིག་པུ་མིན་པར་གཞུང་དེ་དག་བློ་ལ་བཟུང་ནས་བལྟ་རྒྱུ་དེ། དངོས་གནས་དྲང་གནས་ང་ཚོ་བོད་པའི་མིག་ལྟོས་ཡག་པོ་ཞེ་དྲགས་རེད་འདུག ཅེས་གསུངས།
ཡང་༧མགོན་པོ་གང་ཉིད་ཀྱིས། ངོས་རང་ལ་ཆ་བཞག་ནའང་། ཏཱ་ལའི་བླ་མ་རེད་ཟེར་ནས་བཞུགས་ཁྲིའི་སྒང་ལ་སྡོད་ཀྱི་ཡོད་རེད་དེ། དཔེ་ཆ་སྐྱོར་དུས་བློ་རིག་གི་སྡོམ་དང་རྟགས་རིགས་ཀྱི་སྡོམ་དེ་དག་ཧུར་ཐག་འབད་ཐག་སྐྱོར་གྱི་ཡོད། ཕན་ཐོགས་ཆེན་པོ་དང་ཡག་པོ་འདུག དེ་དུས་དོན་དག་གང་ཡང་ཤེས་ཀྱི་མེད། དོ་སྣང་ཡང་མེད་པ་རེད། དེང་སང་འཛམ་བུ་གླིང་འདིའི་སྒང་ལ་ནང་ཆོས་ཀྱི་སེམས་ཁམས་རིག་པའི་འགྲོ་སྟངས་དེ་དག་ལ་དོ་སྣང་གསར་པ་བསླེབས་ཡོང་དུས། ཆུང་ཆུང་སྐབས་ནས་བློ་རིག་དང་རྟགས་རིགས་བློ་ལ་འཛིན་པ་དང་ཉིན་ལྟར་བཏོན་པ་དེ་དངོས་གནས་དྲང་གནས་ཀྱིས་ཕན་ཐོགས་ཡོད་པ་དང་དགོས་པ་རྒྱུ་མཚན་ཡོད་པ་ཞིག་མཐོང་གི་འདུག ང་ཚོ་བོད་ལ་དེ་འདྲའི་སྲོལ་ཡོད་པ་དེ་ཡག་པོ་ཞེ་དྲགས་རེད་འདུག ཆུང་ཆུང་སྐབས་སུ་དོན་དག་གང་ཡང་ཤེས་ཀྱི་མེད་རེད་དེ་ཚིག་དེ་དག་བཟུང་ནས་རིམ་པས་དོན་དག་དེ་དག་ལ་བསམ་བློ་གཏོང་དུས་དངོས་གནས་དྲང་གནས་ཀྱིས་བློའི་འགྲོ་སྟངས་དང་གཏན་ཚིགས་རིག་པའི་འགྲོ་སྟངས་དེ་དག་བློ་རིག་དང་རྟགས་རིགས་ཀྱི་སྡོམ་གཉིས་པོའི་ཐོག་ནས་ཡག་པོ་ཞེ་དྲགས་ཤེས་ཀྱི་འདུག ངོས་རང་ཆུང་ཆུང་སྐབས་ནས་བློ་རྟགས་ཀྱི་སྡོམ་དེ་འཛིན་གྱི་ཡོད། ཆུང་ཆུང་སྐབས་དོ་སྣང་གང་ཡང་མེད་པ་རེད། ག་ལེར་ག་ལེར་དཔེ་ཆ་ལྟ་དུས་ཆུང་ཆུང་སྐབས་ནས་འཛིན་པ་དེ་དག་གོ་བ་ལེན་རྒྱུར་ཕན་ཐོགས་ཡོད་པ་ཞིག་རེད་འདུག ཅེས་གསུངས།
ཡང་༧མགོན་པོ་གང་ཉིད་ཀྱིས། ངོས་རང་ཆུང་ཆུང་སྐབས་སྐུ་འབུམ་གྱི་ཚོགས་ཆེན་ལ་འགྲོ་དུས་རོགས་པ་དེ་ཚོས་ཨ་ར་པ་ཙ་བགྲངས་པ་གསལ་པོ་ཞེ་དྲགས་དྲན་གྱི་འདུག ཆུང་ཆུང་སྐབས་ནས་གོམས་འདྲིས་ཡོད་པ་ཞིག་ཆགས་ཀྱི་ཡོད་པ་རེད། ཨ་ར་པ་ཙ་རྗེ་བཙུན་འཇམ་དཔལ་དབྱངས་ཀྱི་གཟུངས་སྔགས་རེད། ངོས་རང་ལ་ཆ་བཞག་ནའང་སྐལ་བ་བཟང་པོ་ཡིན་བསམ་གྱི་འདུག ཆུང་ཆུང་སྐབས་ནས་ཨ་ར་པ་ཙ་བགྲང་གི་ཡོད། ང་ཚོ་བོད་པ་ལ་ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་ཡག་པོ་འདུག ཁྱེད་རང་ཚོ་སློབ་ཕྲུག་ཚོས་ཤེས་རབ་ཆེ་བ་དང་གསལ་བ། མྱུར་བ་དེ་དག་དོ་སྣང་བྱེད་ན་སློབ་ཚན་ག་རེ་བསླབ་པ་ཡིན་རུང་མགྱོགས་པོ་ཤེས་པ་ཙམ་དུ་མ་ཟད། ཚིག་རེ་རེའི་དོན་དག་ཟབ་པོ་བསམ་བློ་གཏོང་ཐུབ་པ་ཞིག་དང་། དེ་ཡིན་ན་དེ་ཡིན་དགོས་ཀྱི་རེད་ཟེར་བའི་བསམ་བློ་དེ་གལ་ཆེན་པོ་ཞེ་དྲགས་རེད། ང་རང་ཚོ་བོད་པའི་སློབ་གྲྭར་ཆོས་རབ་ཏུ་རྣམ་འབྱེད་ཀྱི་ཤེས་རབ་གོང་ནས་གོང་དུ་འཕེལ་རྒྱུ་དང་། ཨ་ར་པ་ཙ་བགྲངས་ནས་རྗེ་བཙུན་འཇམ་དཔལ་དབྱངས་ལ་གསོལ་བ་བཏབ་ན། ང་ཚོའི་བློ་གྲོས་ཆེ་བ་དང་གསལ་བ། མྱུར་བ། ཟབ་པ་སོགས་ཡག་པོ་ཞེ་དྲགས་ཡོང་ཐུབ་ཀྱི་རེད། ཁྱེད་རང་ཚོས་རྗེ་བཙུན་འཇམ་དཔལ་དབྱངས་ལ་གསོལ་བ་བཏབ། ཨ་ར་པ་ཙ་ཡག་པོ་བགྲོངས། ཧུར་ཐག་བྱོས་ཤོག་ཨ། ཞེས་གསུངས་སོང་།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
