གཞུང་ཆེན་རིས་མེད་བགྲོ་གླེང་ཚོགས་འདུ་ཐེངས་བདུན་པའི་ཐོག་ཁམས་སྤྲུལ་རིན་པོ་ཆེ་མཆོག་ནས་བོད་ཀྱི་ཆོས་བརྒྱུད་ཁག་ལ་ལྟ་སྒོམ་སྤྱོད་གསུམ་གྱི་ཁྱད་ཆོས་ཐུན་མོང་མ་ཡིན་པ་ཡོད་དུས། རང་རྒྱལ་གཞན་ཕམ་གྱི་བློ་ཡོངས་སུ་དོར་སྟེ་བགྲོ་གླེང་གནང་དགོས་སྐོར་གསུངས་འདུག
དེ་རིང་ཕྱི་ཚེས་ ༣ ནས་ཉིན་གྲངས་བཞི་རིང་ཧི་མ་ཅལ་མངའ་སྡེའི་ཀང་ར་རྫོང་བཀྲ་ཤིས་ལྗོངས་ཁམས་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་དུ། བོད་མིའི་སྒྲིག་འཛུགས་ཆོས་རིག་ལས་ཁུངས་དང་ཁམས་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་གཉིས་ཀྱི་གོ་སྒྲིག་འོག གཞུང་ཆེན་རིས་མེད་བགྲོ་གླེང་ཚོགས་འདུ་ཐེངས་བདུན་པ་འཚོག་བཞིན་ཡོད་ཅིང་། ཐེངས་འདིའི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་སྐྱབས་རྗེ་ཁམས་སྤྲུལ་དཔལ་ལྡན་ངེས་དོན་ཉི་མ་འཇིགས་མེད་མཆོག་དང་། དམིགས་བསལ་སྐུ་མགྲོན་ཆོས་རིག་ལས་ཁུངས་ཀྱི་དྲུང་འཕར་ཀུན་དགའ་རྒྱལ་མཚན་ལགས། སྤྲུལ་སྐུ་སྤོབས་པ་རབ་འབྱམས་མཆོག དོན་རྒྱལ་དགའ་ཚལ་གླིང་གི་རྗེ་བཙུན་མ་བསྟན་འཛིན་དཔལ་མོ་མཆོག ཆོས་བརྒྱུད་ཁག་ནས་བགྲོ་གླེང་གནང་མཁན་དགེ་འདུན་པ་དང་བཙུན་མ་གྲངས་ ༡༨ དང་། ཕྱོགས་མཐའ་ཁག་གི་དགོན་སྡེ་གྲངས་ ༣༢ ནས་ཚོགས་བཅར་བ་གྲངས་ ༢༥༠ ལྷག དགོན་པ་དེའི་གྲྭ་མང་འདུས་སྡེ་བཅས་གདན་འཛོམས་བྱུང་ཡོད་འདུག
ཆོས་རིག་ལས་ཁུངས་ཀྱི་དྲུང་འཕར་ཀུན་དགའ་རྒྱལ་མཚན་ལགས་ཀྱིས། བཙན་བྱོལ་བོད་མིའི་ཆོས་ཚོགས་ཐེངས་ ༡༡ པའི་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་ཕེབས་པའི་དགོངས་དོན་བཞིན། བཤད་སྒྲུབ་བསྟན་པ་གོང་འཕེལ་གྱི་ཚོགས་འདུ་འཚོག་མགོ་བཙུགས་པ་དང་བསྟུན། ཕྱི་ལོ་ ༢༠༡༥ ནས་བཟུང་ཆོས་བརྒྱུད་རིས་མེད་ཐོག་བསྐོར་བ་བརྒྱབ་སྟེ་བགྲོ་གླེང་ཚོགས་འདུ་འཚོག་པའི་ལམ་སྲོལ་ཞིག་ཆགས་པ་རེད། ད་ལན་བཀའ་བརྒྱུད་ཆོས་བརྒྱུད་ཀྱི་ཁོངས་ཁམས་པ་སྒར་དུ་འཚོགས་པའི་གོ་སྐབས་ཐོབ་ཡོད། བགྲོ་གླེང་ཚོགས་འདུ་འདིའི་བརྒྱུད་ནས་སྤྱིར་སངས་རྒྱས་ཀྱི་བསྟན་པ་གོང་དུ་འཕེལ་བ་དང་། ལྷག་པར་བོད་ནང་སོ་སོའི་ཆོས་བརྒྱུད་ཀྱི་བཤད་སྒྲུབ་བསྟན་པ་གོང་སྤེལ་གཏོང་བ་མ་གཏོགས། ཆོས་བརྒྱུད་ཕན་ཚུན་བར་འབྲེལ་བ་ཞེ་དྲགས་ཡོང་གི་མེད་པ་རེད། འདིར་གཡུང་དྲུང་བོན་དང་བཅས་པའི་རིས་མེད་ཆོས་བརྒྱུད་ཁག་ས་གནས་གཅིག་ཏུ་གདན་འཛོམས་ཏེ་བགྲོ་གླེང་གནང་བའི་གོ་སྐབས་ཐོབ་ཡོད་པས། ཆོས་བརྒྱུད་ཕན་ཚུན་བར་གྱི་དམ་ཚིག་དང་། འབྲེལ་ལམ་དམ་ཟབ་ཡོང་བའི་དགེ་མཚན་ཆེན་པོ་ཡོད། ཅེས་བརྗོད་སོང་།
སྐྱབས་རྗེ་ཁམས་སྤྲུལ་དཔལ་ལྡན་ངེས་དོན་ཉི་མ་འཇིགས་མེད་མཆོག་གིས། སྔོན་གྱི་དུས་སུ་རྒྱ་གར་འཕགས་པའི་ཡུལ་དུ་སྟོན་པ་ཐུགས་རྗེ་ཅན་དེ་ཉིད་ཀྱིས་ཆོས་ཀྱི་འཁོར་ལོ་བདེན་པ་བཞི་བསྐོར་བ་ནས་བཟུང་། རྒྱ་གར་གྱི་པཎ་གྲུབ་གྲངས་ལས་འདས་བ་བྱུང་ནས་མདོ་སྔགས་ཀྱི་བསྟན་པ་རྒྱ་ཆེན་དར་རྒྱས་བྱུང་བ་དང་། རིམ་བཞིན་བོད་གངས་ཅན་གྱི་ལྗོངས་ཀྱི་ལོ་ཙཱ་བ་དང་མཁས་གྲུབ་སོགས་ཀྱི་འཆད་རྩོད་རྩོམ་གསུམ་བརྟེན་ནས་བསྟན་པ་རིན་པོ་ཆེ་ཉི་མ་བཞིན་དུ་ཤར་བ་རེད། བར་ལམ་དུས་ཀྱི་འཕོ་འགྱུར་དབང་གིས་བོད་ནང་གི་རྒྱལ་བའི་མདོ་སྔགས་ཀྱི་བསྟན་པར་ཉམས་ཆག་བྱུང་ཡོད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་འཕྲིན་ལས་དང་། རིས་སུ་མ་ཆད་པའི་བསྟན་འཛིན་གྱི་སྐྱེས་བུ་བླ་མ་དགེ་བའི་བཤེས་གཉེན་སོགས་ཀྱིས་དཀའ་བ་དང་དུ་བླངས་ཞིང་། ངལ་བ་ཁྱད་དུ་བསད་དེ་བཤད་སྒྲུབ་ཀྱི་བསྟན་པའི་ཐོག་ཐོས་བསམ་སྒོམ་གསུམ་གནང་བར་བསྟུན། ད་ལྟའི་ཆར་བསྟན་པ་གོང་དུ་སྤེལ་ཏེ་ང་ཚོས་མཐོང་ཆོས་སུ་གྱུར་བ་ཞིག་ཏུ་ཆགས་ཡོད་པ་རེད། མ་འོངས་པའི་རྒྱལ་བའི་བསྟན་པ་ཅི་འདྲ་ཆགས་རྒྱུ་དེའང་ད་ལྟའི་རང་རིགས་རྣམས་ཀྱི་འགན་འཁུར་ཆགས་ཡོད། ཅེས་གསུངས་སོང་།
ཡང་ཁོང་གིས། རྒྱལ་བའི་ལུང་རྟོགས་ཀྱི་བསྟན་པ་དེ་བཤད་སྒྲུབ་གཉིས་ཀྱི་ཐོག་ནས་འཛིན་སྐྱོང་སྤེལ་གསུམ་བྱ་རྒྱུར་ཐུགས་བསམ་བཞེས་རྒྱུ་གལ་ཆེན་པོ་རེད། དེང་སྐབས་དུས་ཀྱི་དབང་དུ་ཕྱེ་ན་དུས་སྙིགས་མར་ཁེལ་ཡོད་པར་བརྟེན། སངས་རྒྱས་ཀྱི་བསྟན་པ་སྤེལ་བར་ཆགས་སྡང་ཕྱོགས་རིས་དང་། འཇིག་རྟེན་ཆོས་བརྒྱད་ཀྱི་དབང་དུ་མ་སོང་པར། འཛམ་བུ་གླིང་གི་འགྲོ་བར་ཕན་པ་རྒྱ་ཆེན་པོ་འབྱུང་བའི་ཆེད་དུ། བཤད་སྒྲུབ་སོགས་ཀྱི་སྒོ་ནས་གཅེས་སྤྲས་བྱེད་པའི་གསོལ་བ་འདེབས་རྒྱུ་ཡིན། སྐབས་སུ་བབ་པའི་གཞུང་ཆེན་རིས་མེད་བགྲོ་གླེང་གི་བརྗོད་གཞི་ནི་ཚད་མའི་སྐོར་རེད་ལ། འདི་ཡང་སློབ་དཔོན་ཕྱོགས་གླང་དང་། སློབ་དཔོན་ཆོས་གྲགས་སོགས་ཀྱི་ཐུན་མོང་མ་ཡིན་པའི་གཞུང་ཞིག་ཆགས་ཡོད། སངས་རྒྱས་ཀྱི་བསྟན་པའང་ཧ་ཅང་ཟབ་ཞིང་རྒྱ་ཆེ་བ་ཞིག་ཡིན་པས། དེ་ཡང་གོ་ཐོས་ཙམ་དང་འོལ་ཚོད་ཀྱི་རྗེས་སུ་མི་འབྲངས་བར་ཐོས་བསམ་དཔྱིས་ཕྱིན་པ་བྱས་ཏེ། སྒྲོ་འདོགས་བཅད་ནས་བསྟན་པར་དག་ཐེར་བྱ་རྒྱུ་གལ་ཆེན་པོ་ཆགས་ཡོད། བོད་བརྒྱུད་ནང་བསྟན་གྱིས་ནང་པ་སངས་རྒྱས་པའི་བསྟན་པ་སྤྱིའི་ངོ་བོ་ཉམས་སུ་ལེན་བཞིན་ཡོད་ཀྱང་། རིས་མེད་ཀྱི་ཆོས་བརྒྱུད་ཁག་ལ་ལྟ་སྒོམ་སྤྱོད་གསུམ་གྱི་ཁྱད་ཆོས་ཐུན་མོང་མ་ཡིན་པ་ཡོད་དུས། བློ་གྲོས་ཀྱི་སྒོ་ཡོངས་སུ་ཕྱེ་བའི་ཐོག་རང་རྒྱལ་གཞན་ཕམ་གྱི་བསམ་པ་ཡོངས་སུ་དོར་སྟེ། བགྲོ་གླེང་སྐབས་ཆོས་བརྒྱུད་ཕན་ཚུན་བར་གྱི་ལྟ་གྲུབ་ལ་བགྲོ་གླེང་ལྷུག་པོ་གནང་དགོས། ཞེས་གསུངས་སོང་།
གཞུང་ཆེན་རིས་མེད་བགྲོ་གླེང་ཚོགས་འདུ་ནི་ཕྱི་ལོ་ ༢༠༡༡ ལོར་བཙན་བྱོལ་བོད་མིའི་ཆོས་ཚོགས་ཐེངས་ ༡༡ ཐོག ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན། ཕྱི་ལོ་ ༢༠༡༣ ལོའི་བཤད་སྒྲུབ་བསྟན་པ་གོང་སྤེལ་ལྷན་ཚོགས་སྐབས་གྲོས་ཆོད་དུ་བཞག་འདུག ཕྱི་ལོ་ ༢༠༡༥ ལོར་དཔལ་ལྡན་རྒྱུད་སྟོད་གྲྭ་ཚང་དུ་གཞུང་ཆེན་རིས་མེད་བགྲོ་གླེང་ཐེངས་དང་པོ་འཚོགས་ཡོད་ཅིང་། ཕྱི་ལོ་ ༢༠༡༦ ལོར་བཀའ་བརྒྱུད་ཀྱི་གདན་ས་དཔལ་སྤུངས་ཤེས་རབ་གླིང་དུ་ཚོགས་ཐེངས་གཉིས་པ་འཚོགས་ཡོད་པ་དང་། ཕྱི་ལོ་ ༢༠༡༨ ལོར་དཔལ་ལྡན་ས་སྐྱའི་མཐོ་སློབ་ཏུ་ཚོགས་ཐེངས་གསུམ་པ་འཚོགས། ཕྱི་ལོ་ ༢༠༡༩ ལོར་གཡུང་དྲུང་བོན་གྱི་གདན་ས་དཔལ་གཤེན་བསྟན་སྨན་རི་གླིང་དུ་ཚོགས་ཐེངས་བཞི་བ་འཚོགས། ཕྱི་ལོ་ ༢༠༢༠ ལོར་སྔ་འགྱུར་རྙིང་མའི་གདན་ས་ཐེག་ཆེན་རྣམ་གྲོལ་བཤད་སྒྲུབ་དར་རྒྱས་གླིང་དུ་ཚོགས་ཐེངས་ལྔ་བ་འཚོགས། ཕྱི་ལོ་ ༢༠༢༣ ལོར་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་ཚོགས་ཐེངས་དྲུག་པ་བཅས་འཚོགས་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
