ཡུ་རོབ་མཐུན་ཚོགས་ཀྱི་སྐུ་ཚབ་ཚོགས་ཆུང་གིས་བོད་ཀྱི་བཅའ་སྡོད་སློབ་གྲྭ་དང་དགོན་པ། བཙོན་ཁང་སོགས་སུ་གཟིགས་སྐོར་གནང་གྲུབ་རྗེས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་མཚམས་འཇོག་དགོས་པའི་འབོད་སྐུལ་གནང་འདུག
ཟླ་འདིའི་ཕྱི་ཚེས་ ༡༣ ནས་ ༡༥ བར་ཉིན་གྲངས་གསུམ་རིང་ཡུ་རོབ་མཐུན་ཚོགས་ཀྱི་སྐུ་ཚབ་ཚོགས་ཆུང་ཞིག་བོད་ནང་དུ་གཞུང་འབྲེལ་སྐོར་སྐྱོད་དུ་ཕྱིན་ཡོད་པ་དང་། ཕྱི་ཚེས་ ༡༦ ཉིན་རྒྱ་ནག་གི་གྲོང་ཁྱེར་ཁྲུང་ཆིན་ (Chongqing) དུ་ཡུ་རོབ་མཐུན་ཚོགས་དང་རྒྱ་ནག་བར་གྱི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་གྲོས་མོལ་ཐེངས་ ༣༩ པ་གནང་སྟེ། ཕྱི་ཚེས་ ༡༧ ཉིན་ཡུ་རོབ་མཐུན་ཚོགས་ཀྱིས་བསྒྲགས་གཏམ་ཞིག་སྤེལ་ཏེ། རྒྱ་ནག་གཞུང་གིས་བོད་ནང་གི་བོད་མིའི་ཆོས་དང་རིག་གཞུང་། མི་རིགས་ཀྱི་ངོ་བོ་སྲུང་སྐྱོབ་བྱ་དགོས་པའི་འབོད་སྐུལ་གནང་ཡོད་པ་དང་སྦྲགས། རྒྱལ་སྤྱིའི་ཚོགས་སྡེ་ཁག་གི་ཚོགས་མི་གང་མང་བོད་ནང་དུ་ཆེད་གཏོང་དགོས་པའི་རེ་འདུན་བཏོན་ཡོད་འདུག
ཁ་སང་ཕྱི་ཚེས་ ༡༨ ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལིན་ཅན་ (Lin Jian) གྱིས། རྒྱ་ནག་གཞུང་གིས་ཡུ་རོབ་མཐུན་ཚོགས་དང་ལྷན་དུ་འདྲ་མཉམ་གྱི་གནད་དོན་ཐོག་ལ་མཉམ་འབྲེལ་བྱ་འདོད་ཡོད་ཀྱང་། རྒྱ་གཞུང་གིས་འགྲོ་བ་མིའི་ཐོབ་ཐང་གི་གནད་དོན་དེ་ཆབ་སྲིད་ཀྱི་ལག་ཆར་བེད་སྤྱོད་བྱེད་པར་མཐའ་གཅིག་ཏུ་དགག་པ་ཡོད་སྐོར་དང་། རྒྱལ་ཁབ་གཉིས་ཀྱིས་གྲོས་མོལ་བྱ་རྒྱུར་ཡིད་ཆེས་ཡོད་པ་མ་ཟད། རྒྱ་གཞུང་གིས་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་ནས་རྒྱལ་ཁབ་གཞན་དང་ལྷན་དུ་མཉམ་འབྲེལ་བྱ་འདོད་ཡོད་སྐོར་དང་། ཡུ་རོབ་མཐུན་ཚོགས་ཀྱིས་འགྲོ་བ་མིའི་ཐོབ་ཐང་གི་གནད་དོན་ལ་ཁ་གཡར་ནས་རྒྱ་ནག་གི་ནང་སྲིད་གནད་དོན་ཐད་ཐེ་ཇུས་བྱེད་མཚམས་འཇོག་དགོས་སྐོར་སོགས་བརྗོད་འདུག
ཡུ་རོབ་མཐུན་ཚོགས་ཀྱི་བསྒྲགས་གཏམ་དེའི་ནང་། ཡུ་རོབ་མཐུན་ཚོགས་ཀྱི་ངོས་ནས་རྒྱ་ནག་ནང་གི་གཞི་རྩའི་རང་དབང་ལ་དམ་དྲག་དང་། ངལ་རྩོལ་བའི་ཐོབ་ཐང་། བཙན་གྱིས་ངལ་རྩོལ་ལ་བཅུག་པ། ཁྲིམས་ལུགས་ཀྱི་རང་དབང་མེད་པ་སོགས་ཀྱི་གནད་དོན་ཐད་སེམས་འཚབ་ཡོད་པ་ནན་བརྗོད་གནང་ཡོད་འདུག་ལ། རྒྱ་ནག་ནང་གི་སྨྲ་བརྗོད་རང་དབང་དང་། ཆོས་དད་རང་མོས། བུད་མེད་དང་ཨེལ་ཇི་བྷི་ཊི་ (LGBT) མི་སྡེའི་ཐོབ་ཐང་སོགས་ཀྱི་གནད་དོན་ཐོག་གླེང་སློང་གནང་ཡོད་སྐོར་དང་། བོད་མི་དང་ཡུ་གུར་བ་སོགས་གྲངས་ཉུང་མི་རིགས་ཀྱི་ཆེས་ཞན་པའི་འགྲོ་བ་མིའི་ཐོབ་ཐང་དང་ཆོས་དད་རང་དབང་གི་གནས་སྟངས་སྐོར། དེ་བཞིན་རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་གནང་ཕྱོགས་དང་ཆོས་ལུགས་ཀྱི་མགོ་ཁྲིད་འདེམས་ཕྱོགས་ཐད་ཐེ་ཇུས་བྱ་ཆོག་གི་མེད་སྐོར་སོགས་ནན་བརྗོད་གནང་འདུག
ད་དུང་བསྒྲགས་གཏམ་ནང་། ཧོང་ཀོང་གི་བདེ་འཇགས་ཁྲིམས་གསར་ལག་བསྟར་འོག་ཁུལ་དེའི་འགྲོ་བ་མིའི་ཐོབ་ཐང་དང་རང་དབང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པ་དང་། ཡུ་རོབ་མཐུན་ཚོགས་ནས་བོད་དང་ཤར་ཊུར་ཀི་སི་ཐན། རྒྱ་ནག ཧོང་ཀོང་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པར་སེམས་འཚབ་ཡོད་པ་དང་། རྒྱ་ནག་གིས་མང་ཚོགས་ཀྱི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཚམས་འཇོག་དགོས་པ་དང་། ཁྲིམས་འགལ་གྱིས་འཛིན་བཟུང་བཀག་ཉར་དང་། བཙན་དབང་གིས་གར་སོང་ཆ་མེད་དུ་གཏོང་བ། སྡུག་སྦྱོང་མནར་གཏོང་བའི་གནད་དོན་ཐད་སེམས་འཚབ་ཡོད་སྐོར་སོགས་གསལ་འདུག
རྒྱ་ནག་གཞུང་གིས་བོད་མི་ཆབ་སྲིད་བཙོན་པ་དང་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་དང་བཀྲ་ཤིས་རྡོ་རྗེ་ལགས། འགྲོ་བ་མིའི་ཐོབ་ཐང་རྩོད་ལེན་པ་ཡས་ཝིན་ཧྲིན་ (Yu Wensheng) དང་ཞུ་ཡན་ (Xu Yan) སོགས་ཚུད་པའི་རྒྱ་ནག་གི་བཙོན་འཇུག་འོག་ཡོད་པའི་ཆབ་སྲིད་བཙོན་པ་རྣམས་འཕྲལ་དུ་ཀློད་གྲོལ་གཏོང་དགོས་སྐོར་དང་། ད་ལན་ཡུ་རོབ་མཐུན་ཚོགས་ཀྱི་སྐུ་ཚབ་ཚོགས་ཆུང་གིས་བོད་ཀྱི་རྒྱལ་ས་ལྷ་ས་དང་ཉིང་ཁྲི་རུ་སྐོར་སྐྱོད་གནང་སྟེ། རྒྱ་ནག་གི་བཅའ་སྡོད་སློབ་གྲྭ་དང་དགོན་སྡེ་ཁག གཞིས་སྤོས་བྱས་པའི་ཞིང་འབྲོག་གི་ཁྱིམ་ཚང་ཁག་ཅིག དེ་བཞིན་བཙོན་ཁང་སོགས་ལ་སྐོར་སྐྱོད་གནང་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
