༧གོང་ས་རྒྱལ་བ་རིན་པོ་ཆེ་མཆོག་གི་ཞབས་པུས་སྨན་བཅོས་སླད་ལྡི་ལི་ནས་སུད་སི་དང་དེ་ནས་ཨ་རིར་ཆིབས་བསྒྱུར་བསྐྱང་རྒྱུ་ཡིན་པ་རེད།
དེ་རིང་སྔ་དྲོའི་ཆུ་ཚོད་ ༨།༤༠ ཙམ་ལ་༸གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་རྒྱལ་བའི་ཕོ་བྲང་ནས་ལྡི་ལིར་ཆིབས་ཐོན་མཛད་དེ་ཞབས་སོར་བདེ་བར་འཁོད་ཡོད་པ་དང་། སང་ཉིན་ལྡི་ལི་ནས་སུད་སིའི་ཛུ་རིག་ཏུ་ཕེབས་ཏེ་ཉིན་གཅིག་སྐུ་ངལ་གསོས་རྗེས། ཨ་རིའི་ནེའུ་ཡོག་ཏུ་ཆིབས་ཐོན་མཛད་རྒྱུ་ཡིན་འདུག
ཆིབས་བསྒྱུར་མཛད་སྐབས་སྲིད་སྐྱོང་སྤེན་པ་ཚེ་རིང་མཆོག་གི་དབུས་པའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། དྷ་ས་ཁུལ་གྱི་སེར་སྐྱ་མི་མང་བཅས་ནས་ཕེབས་སྐྱེལ་ཞུས་སོང་ལ། བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་གཞུང་ཁོངས་མ་ཡིན་པའི་ཚོགས་སྐྱིད་ཁག དེ་བཞིན་དགོན་པ་གྲྭ་ཚང་དང་སློབ་གྲྭ་ཁག་སོགས་ནས་ཞབས་རིམ་རྒྱ་ཆེན་གསོག་སྒྲུབ་ཞུ་ཡི་འདུག
སྨན་པའི་ལམ་སྟོན་ལྟར་ན་ཞབས་པུས་སྨན་བཅོས་གྲུབ་རྗེས་བདུན་ཕྲག་གསུམ་ཙམ་ནས་ཞབས་གོམ་བསྐྱོན་གནང་ཐུབ་ཀྱི་ཡོད་འདུག་ལ། སྐུ་ངལ་ཡག་པོ་གསོ་གནང་ཆེད་ད་ལྟའིི་ཆར་ཨ་རིའི་ནང་མཛད་འཆར་དམིགས་བསལ་གོ་སྒྲིག་གནང་མེད་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
