ཉི་མ་རྡོ་རྗེ་ལགས་སུ་ཁེ་ན་ཌའི་སྤྱི་དམངས་གཟེངས་རྟགས་ཐོབ་འདུག  

ཁེ་ན་ཌའི་ནང་གནས་སྡོད་འཛུགས་སྐྲུན་འཆར་འགོད་པ་བོད་མི་ཉི་མ་རྡོ་རྗེ་ལགས་སུ་ཡུལ་དེའི་སྤྱི་དམངས་གཟེངས་རྟགས་མཐོ་ཤོས་གཉིས་པ་(Order of Canada)ཞེས་པ་ཐོབ་འདུག

ལོ་ལྟར་ཁེ་ན་ཌའི་ནང་སྤྱི་ཚོགས་ཞབས་ཕྱི་སྒྲུབ་མཁན་གཟེངས་སུ་ཐོན་པ་རྣམས་ལ་ཆེ་བསྟོད་ཀྱི་གཟེངས་རྟགས་ཕུལ་སྲོལ་ཡོད་པ་ལྟར། ཟླ་འདིའི་ཕྱི་ཚེས་ ༢༧ ཉིན་འདི་ལོའི་ཁེ་ན་ཌ་རྒྱལ་ཡོངས་ཀྱི་སྤྱི་དམངས་གཟེངས་རྟགས་(Order of Canada) ཐོབ་མཁན་སྨན་པ་དང་སྒྱུ་རྩལ་བ། ལས་འགུལ་བ། དཔལ་འབྱོར་རིག་པ་བ་སོགས་མི་གྲངས་ ༨༣ གྱི་མཚན་གཞུང་གསལ་བསྒྲགས་གནང་ཡོད་པ་དང་། དེའི་ཁྲོད་དུ་འཛུགས་སྐྲུན་འཆར་འགོད་པ་བོད་མི་ཉི་མ་རྡོ་རྗེ་ལགས་ཀྱང་ཚུད་ཡོད་འདུག ཁོང་ནི་ཕྱི་ལོ་ ༢༠༡༡ ལོར་རྒྱ་གར་བྱང་ཤར་ཁུལ་ནས་བོད་མི་གཅིག་སྟོང་ཙམ་ཁེ་ན་ཌར་གནས་སྤོར་གྱི་ལས་གཞིའི་ཐོག་འགན་ལེན་མཁན་གཙོ་བོའི་གྲས་ཤིག་ཡིན་འདུག

གཟེངས་རྟགས་དེ་ཐོབ་པའི་གསལ་བསྒྲགས་གནང་རྗེས་ཁོང་གིས། གཟེངས་རྟགས་འདི་འདྲ་ཞིག་ཐོབ་པ་བརྒྱུད། མ་འོངས་པའི་བོད་པའི་སྤྱི་ཚོགས་སུ་སྐྱེས་འཚར་བྱེད་མུས་ཡིན་པའི་གཞོན་སྐྱེས་རྣམས་ལ་མིག་དཔེ་ཞིག་དང་། བོད་ཀྱི་གཞོན་སྐྱེས་ཚོས་སྤྱི་ཚོགས་འདྲ་མིན་དུ་ལས་དོན་གཉེར་བའི་སེམས་འདུན་འཕར་མ་ཞིག་སྟེར་ཐུབ་པའི་རེ་བ་བྱེད་ཀྱི་ཡོད་སྐོར་དང་། བོད་ནང་གི་བོད་མི་རྣམས་ཀྱི་དཀའ་སྡུག་དང་། གནས་སྟངས་སོགས་ཀྱི་ཐད་ལ་བསམ་གཞིག་དང་། བོད་དང་བོད་མིའི་ངོ་བོ་དང་མཚན་མཐོང་མི་བརླག་པའི་ཆེད་དུ་མུ་མཐུད་དུ་སྤྱི་ཚོགས་ཞབས་ཕྱིའི་ལས་དོན་སོགས་ཀྱི་ཐོག་འབད་འབུངས་གནང་རྒྱུ་ཡིན་སྐོར་སོགས་བརྗོད་འདུག

ཕྱི་ལོ་ ༡༩༨༡ ལོར་ཉི་མ་རྡོ་རྗེ་ལགས་རྒྱ་གར་ནས་ཁེ་ན་ཌར་གནས་སྤོར་གནང་སྟེ། ཁེ་ན་ཌའི་ཁེལ་གྷ་རི་(Calgary) མཐོ་རིམ་སློབ་གཉེར་ཁང་གི་སློབ་ཕྲུག་མཐུན་ཚོགས་ཀྱི་ཚོགས་གཙོ་གནང་། སློབ་མཐར་ཕྱིན་རྗེས་བཟོ་ལས་འཆར་འགོད་ཐོག་སློབ་གཉེར་གནང་ནས་བཟོ་ལས་འཆར་འགོད་པ་རྣམས་ལ་བཟོ་ལས་སྦྱོང་བརྡར་བྱ་སའི་ལས་ཁུངས་ཤིག་བཙུགས། ཁོང་ལ་ཁེ་ན་ཌའི་ཞི་བདེའི་གཟེངས་རྟགས་(Canada Peace Medal) དང་སྨྲ་བརྗོད་རང་དབང་གི་གཟེངས་རྟགས་(Calgary Freedom of Expression Award)། ཕྱི་ལོ་ ༢༠༡༨ ལོར་ཁེ་ན་ཌའི་ཨེལ་བྷི་ཊ་(Alberta) ཁུལ་གྱི་བཟོ་རིག་འཆར་འགོད་དང་ས་ཁམས་ཚན་རིག་སྡེ་ཚན་གྱི་ཚོགས་གཙོར་འདེམས་ཐོན་བྱུང་། དེ་བཞིན་ཁོང་གིས་ཨ་རི་དང་། དབྱིན་ཡུལ། སུད་སི་སོགས་ཀྱི་སྐུ་ཚབ་དོན་གཅོད་ཁང་ནང་ཕྱག་ལས་གནང་མྱོང་ཡོད་འདུག ཕྱི་ལོ་ ༡༩༨༧ ལོར་བོད་ནང་དུ་ཕྱིན་ནས་བོད་ནང་གི་གནས་སྟངས་སོགས་རྒྱུས་ལོན་གནང་ཡོད་པ་རེད།

ཁེ་ན་ཌའི་སྤྱི་དམངས་གཟེངས་རྟགས་དེ་ནི་ཡུལ་དེའི་སྤྱི་ཚོགས་ཞབས་འདེགས་དང་གཟེངས་སུ་ཐོན་པའི་མི་རྣམས་ལ་སྤྲད་སྲོལ་ཡོད་ཅིང་། གཟེངས་རྟགས་དེ་ཕྱི་ལོ་ ༡༩༦༧ ལོར་ཐོག་མར་སྤྲད་མགོ་བཙུགས་པ་ནས་ད་བར་ཡུལ་དེའི་སྤྱི་ཚོགས་ཞབས་འདེགས་ཀྱི་སླད་དུ་ཕྱག་ལས་གཟེངས་སུ་ཐོན་པ་གནང་མཁན་གྱི་མི་གྲངས་ ༧༦༠༠ ཙམ་ལ་གཟེངས་རྟགས་དེ་ཐོབ་ཡོད་ཅིང་། གཟེངས་རྟགས་དེ་ནི་ཁེ་ན་ཌ་རྒྱལ་ཡོངས་ཀྱི་སྤྱི་དམངས་གཟེངས་རྟགས་མཐོ་ཤོས་གཉིས་པ་དེ་ཡིན་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།