༧སྐུའི་གསུང་སྒྱུར་བ་དང་བོད་རིག་པའི་མཁས་དབང་ཇའེ་ཧྥི་རེ་ཧོབ་ཀིན་སི་ལགས་དགུང་གྲངས་ ༨༣ སྟེང་འདས་གྲོངས་སུ་ཕྱིན།
ཟླ་འདིའི་ཕྱི་ཚེས་ ༢ ཉིན་༧སྐུའི་གསུང་སྒྱུར་བ་དང་ཨ་རིའི་བོད་རིག་པ་བ་སྐུ་ཞབས་ཇའེ་ཧྥི་རེ་ཧོབ་ཀིན་སི་ (Jeffrey Hopkins) ལགས་དགུང་གྲངས་ ༨༣ སྟེང་ཁེ་ན་ཌའི་བན་ཁོའུ་བཱར་གྲོང་ཁྱེར་དུ་འདས་གྲོངས་སུ་ཕྱིན་པར་བརྟེན། དཔལ་ལྡན་འབྲས་སྤུངས་དགོན་མང་གྲྭ་ཚང་གི་གཙོ་བྱས་པའི་ཤར་ནུབ་གཉིས་ཀྱི་བོད་རིག་པ་དང་འབྲེལ་བའི་ཚོགས་སྡེ་དང་མི་སྒེར་མཁས་དབང་མང་པོས་དྲ་ལམ་ནས་ཁོང་ལ་མྱ་ངན་རྗེས་དྲན་ཞུ་བཞིན་འདུག
སྐུ་ཞབས་ཇའེ་ཧྥི་རེ་ཧོབ་ཀིན་སི་ལགས་འདས་གྲོངས་སུ་ཕྱིན་པ་དང་འབྲེལ། དེ་རིང་འབྲས་སྤུངས་དགོན་མང་གྲྭ་ཚང་གིས་མཆོད་འབུལ་སྨོན་ལམ་འཚོགས་ཏེ་དམ་པ་ཁོང་ལ་རྗེས་དྲན་མྱ་ངན་ཞུས་ཡོད་པ་མ་ཟད། དགོན་མང་གྲྭ་ཚང་གིས་ཁོང་གི་ཤུལ་ལུས་ནང་མི་ལྟོས་བཅས་ཡོངས་ལ་མྱ་ངན་ཞུ་ཡིག་ཅིག་ཕུལ་བ་དང་འབྲེལ་བའི་ནང་། སྐུ་ཞབས་ཇའེ་ཧྥི་རེ་ཧོབ་ཀིན་སི་ (Jeffrey Hopkins) ལགས་ཀྱིས་ཕྱི་ལོ་ ༡༩༧༣ ནས་འདས་པའི་ལོ་ངོ་ ༣༢ རིང་ནུབ་ཕྱོགས་སུ་བོད་ཀྱི་སྐད་ཡིག་རིག་གཞུང་སློབ་ཁྲིད་གནང་ཡོད་ཅིང་། ཕྱི་ལོ་ ༡༩༧༩ ནས་ ༡༩༨༩ བར་༧སྐུའི་གསུང་སྒྱུར་བའི་ཕྱག་ལས་གནང་ཡོད་པ་སོགས་འཁོད་འདུག་ལ། ཕྱི་ལོ་ ༡༩༧༩ ལོར་༧གོང་ས་མཆོག་ཨ་རིར་ཐོག་མར་ཕེབས་སྐབས་ཁོང་གིས་སྐད་སྒྱུར་གྱི་ལམ་ནས་༧གོང་ས་མཆོག་ལ་ཞབས་འདེགས་ཞུས་ཡོད།
སྐུ་ཞབས་ཇའེ་ཧྥི་རེ་ཧོབ་ཀིན་སི་ (Jeffrey Hopkins) ལགས་ནི་བྱང་ཨ་རིའི་ཁུལ་གྱི་སློབ་གསོའི་སྡེ་ཁག་ཏུ་བོད་བརྒྱུད་ནང་བསྟན་སློབ་ཁྲིད་གནང་མཁན་གྱི་མི་སྣ་ཆེས་ཤུགས་རྐྱེན་ཆེ་བ་ཞིག་ཡིན་པ་དང་། ཁོང་གིས་ཐོག་མར་ཕྱི་ལོ་ ༡༩༧༣ ལོར་ཨ་རིའི་ཝར་ཇེན་ནེ་ཡ་གཙུག་ལག་སློབ་ཆེན་དུ་ལྷོ་ཨེ་ཤ་ཡའི་སློབ་ཚན་གསར་འཛུགས་གནང་སྟེ། སློབ་ཆེན་དེར་ལོ་ངོ་ ༣༢ རིང་བོད་ཀྱི་ནང་ཆོས་དང་སྐད་ཡིག་སློབ་ཁྲིད་གནང་། ཕྱི་ལོ་ ༡༩༧༥ ལོར་ཁོང་གིས་བོད་བརྒྱུད་ནང་བསྟན་འབུམ་རམས་པའི་སློབ་གཉེར་ལས་རིམ་གསར་བཟོ་བྱས་ཏེ། བྱང་ཨ་རིའི་ཁུལ་གྱི་སློབ་གསོའི་སྡེ་ཁག་ཏུ་དར་ཁྱབ་ཧ་ཅང་ཤུགས་ཆེན་བྱུང་མྱོང་ལ། ཁོང་གིས་ཕྱི་ལོ་ ༡༩༧༣ ནས་བོད་ཀྱི་སྐད་ཡིག་རིག་གཞུང་དང་འབྲེལ་ཞིང་དམིགས་བསལ་བོད་བརྒྱུད་ནང་བསྟན་དང་འབྲེལ་བའི་དཔེ་དེབ་ཁྱོན་ ༥༠ ལྷག་ཡིག་སྒྱུར་དང་རྩོམ་སྒྲིག་གནང་ཁར། ཤོག་ངོས་ ༩༠༠ བདག་ཉིད་ཅན་གྱི་བོད་ཡིག་དང་ལེགས་སྦྱར། དབྱིན་ཡིག་བཅས་སྐད་ཡིག་གསུམ་ལྡན་གྱི་ནང་པའི་ཐ་སྙད་ཡིག་སྒྱུར་བྱས་པའི་ཚིག་མཛོད་ཅིག་ཀྱང་ཕྱོགས་བསྒྲིགས་གནང་ཡོད།
ཁོང་གིས་ཡིག་སྒྱུར་གནང་བའི་ཁྲོད་ནང་པའི་མཁས་བའི་དབང་པོ་སློབ་དཔོན་མགོན་པོ་ཀླུ་སྒྲུབ་དང་དཔལ་ལྡན་ཟླ་བ་གྲགས་པ། རི་བོ་དགེ་ལུགས་པའི་ཤིང་རྟའི་སྲོལ་འབྱེད་རྗེ་ཙོང་ཁ་བའི་གསུང་འབུམ་དང་། ༧གོང་ས་མཆོག་གི་གསུང་སྒྱུར་བ་གནང་སྐབས། ཁོང་གིས་༧གོང་ས་མཆོག་གི་བཀའ་སློབ་གསུང་ཆོས་ཀྱི་ཕྱག་དེབ་ ༡༦ ཡིག་སྒྱུར་དང་རྩོམ་སྒྲིག་གནང་འདུག་ལ། དེ་བཞིན་བརྩམས་ཆོས་ཁག་གི་ཁྲོད་དུ། ཆེས་གྲགས་ཆེ་བ་ནི་སྟོང་ཉིད་ཀྱི་སྒོམ་ཞེས་འབུམ་རམས་པའི་ཆེད་རྩོམ་དེ་ཡིན་པ་དང་། དེ་ནི་ལྕང་སྐྱ་རོལ་པའི་རྡོ་རྗེའི་གྲུབ་མཐའི་ནང་གསེས་ཤིག་ཡིན་ཞིང་། ཁོང་གིས་༧ཀུན་མཁྱེན་གྱི་གཞུང་ལུགས་མང་པོ་དང་རྙིང་མའི་སྔགས་ཉམས་ལེན་བྱེད་ཚུལ། དཔལ་རྒྱལ་བ་ཇོ་ནང་པའི་གཞན་སྟོང་སྙིང་པོ། དགེ་འདུན་ཆོས་འཕེལ་གྱི་འདོད་པའི་བསྟན་བཅོས་སོགས་ཡིག་སྒྱུར་གནང་མྱོང་འདུག
ཇའེ་ཧྥི་རེ་ཧོབ་ཀིན་སི་ནི་ཕྱི་ལོ་ ༡༩༤༠ ལོར་ཨ་རིའི་མངའ་སྡེ་ (Rhode Island) རུ་སྐྱེས་པའི་ཨ་རིའི་བོད་རིག་པ་བ་ཞིག་ཡིན། ཁོང་གིས་ཝར་ཇིན་ནེ་ཡའི་གཙུག་ལག་སློབ་གྲྭ་ཆེན་མོར་བོད་རིག་པ་དང་ནང་ཆོས་རིག་པའི་སློབ་དཔོན་ཆེན་མོའི་མཚན་གནས་བཞེས་ཏེ། ཕྱི་ལོ་ ༡༩༧༣ ལོ་ནས་བཟུང་ལོ་ངོ་བཅུ་ཕྲག་གསུམ་ལྷག་གི་རིང་ལ་སློབ་ཁྲིད་གནང་ཡོད་པ་མ་ཟད། བོད་མིའི་རང་དབང་འཐབ་རྩོད་ཐོག་རྒྱབ་སྐྱོར་ཤུགས་ཆེན་གནང་མཁན་ཞིག་ཀྱང་ཡིན་པ་རེད།
གསར་འགོད་པ། སྐལ་བཟང་སྦྱིན་པ།
