འཛུགས་སྐྲུན་ཆེད་མཁས་པ་ཉི་མ་རྡོ་རྗེ་ལགས་སུ་འཚམས་འདྲི་གནང་།

ཁེ་ན་ཌ་རྒྱལ་ཡོངས་ཀྱི་སྤྱི་དམངས་གཟེངས་རྟགས་(Order of Canada) ཞེས་པ་དེ་ཡུལ་དེའི་ནང་གནས་བཞུགས་བོད་མི་འཛུགས་སྐྲུན་ཆེད་མཁས་པ་ཉི་མ་རྡོ་རྗེ་ལགས་སུ་ཐོབ་པར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་འཚམས་འདྲི་གནང་བ་དང་སྦྲགས་མ་འོངས་པའི་ལས་དོན་ལམ་ལྷོངས་ཡོང་བའི་སྨོན་འདུན་གནང་འདུག

ཉེ་ལམ་སྨན་པ་དང་སྒྱུ་རྩལ་བ། ལས་འགུལ་བ། དཔལ་འབྱོར་རིག་པ་བ་སོགས་མི་གྲངས་ ༨༣ གྱི་མཚན་གཞུང་གསལ་བསྒྲགས་གནང་ཡོད་པ་དང་། དེའི་ཁྲོད་དུ་འཛུགས་སྐྲུན་ཆེད་མཁས་པ་བོད་མི་ཉི་མ་རྡོ་རྗེ་ལགས་ཀྱང་ཚུད་ཡོད་པ་ལྟར། ཁ་སང་ཕྱི་ཚེས་ ༣ ཉིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཁོང་ལ་འཚམས་འདྲིའི་འཕྲིན་ཡིག་ཅིག་ཕུལ་ཏེ། ཁོང་གི་མ་འོངས་པའི་ལས་དོན་ལམ་ལྷོངས་ཡོང་བའི་སྨོན་འདུན་ཞུས་འདུག

ཁ་སང་ཕྱི་ཚེས་ ༣ ཉིན་སྲིད་སྐྱོང་མཆོག་གིས་གནང་བའི་འཚམས་འཕྲིན་ནང་། ཁྱེད་ལ་ཁེ་ན་ཌའི་ནང་སྙན་གྲགས་ཆེ་བའི་སྤྱི་དམངས་ཀྱི་གཟེངས་རྟགས་དེ་ཐོབ་པར། ངས་བོད་མིའི་སྒྲིག་འཛུགས་ཀྱི་ཚབ་ཞུས་ནས་འཚམས་འདྲི་ཞུ་ཡི་ཡོད་ལ། ཆེ་མཐོང་དེ་ནི་ཁྱེད་ཀྱིས་ཤེས་རིག་གི་གོ་སྐབས་གོང་འཕེལ་དུ་བཏང་བའི་བྱས་རྗེས་དང་། ཁལ་ཀར་རི་མཐོ་སློབ་ཀྱི་ཤུ་ལིག་སིའི་བཟོ་བཀོད་སློབ་གླིང་དུ་ཉམས་གསོག་ལས་གཞི་བརྒྱུད་ཁེ་ན་ཌའི་གཞོན་སྐྱེས་གྲངས་ལས་འདས་པ་ཞིག་གི་མི་ཚེའི་ཁ་ཕྱོགས་བསྒྱུར་ཡོད་པ་མ་ཟད། ཁྱེད་ཀྱིས་བོད་ཀྱི་སྤྱི་ཚོགས་ལ་ཞབས་ཕྱི་བསྒྲུབ་རྒྱུའི་ཆོད་སེམས་བརྟན་པོ་ཡོད་པ་མཚོན་གྱི་ཡོད། ཅེས་གསུངས་འདུག

ཡང་སྲིད་སྐྱོང་མཆོག་གིས། ཁྱེད་ཀྱི་བོད་དོན་ལས་གཞི་ (Project Tibet Society) ཚོགས་པའི་ཚོགས་གཙོ་གནང་སྐབས་བོད་མི་སྟོང་ཕྲག་གཅིག་ལྷག་ཁེ་ན་ཌར་གནས་སྤོར་བྱས་ཏེ་རོགས་འདེགས་བླ་མེད་གནང་ཡོད་པའི་ཁར།  ཁྱེད་ཀྱི་ལམ་སྟོན་འོག་བོད་མི་ཚོའི་འཚོ་བ་ཇེ་ལེགས་སུ་གཏོང་ཐབས་ལ་འབད་དེ། བཙན་བྱོལ་བོད་ཀྱི་སྤྱི་ཚོགས་དང་རིག་གཞུང་རྒྱུན་འཛིན་གྱི་ཐད་ལ་ནུས་པ་ཤུགས་ཆེན་ཐོན་པ་མ་ཟད། བོད་དོན་ཞུ་གཏུག་ཀྱང་ལན་མང་གནང་ནས་ཕན་ཐོགས་བྱུང་ཡོད། ཅེས་དང་། ཁྱེད་ཀྱིས་ད་བར་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་དང་བོད་དོན་ཐད་ལ་ཞབས་འདེགས་རླབས་ཆེན་བསྒྲུབས་ཡོད་པས། ཁྱེད་ནི་བོད་དོན་འཐབ་རྩོད་ཁྲོད་ཀྱི་མགོ་ཁྲིད་ཀྱི་ནུས་པ་ཡང་དག་ཅིག་གི་དཔེ་མཚོན་ལྟ་བུ་ཞིག་ཏུ་གྱུར་ཡོད་པས། བོད་ཀྱི་མི་རབས་གསར་པ་ཚོ་ཁྱེད་ཀྱི་རྗེས་སུ་འབྲངས་ཐུབ་ཚེ། ཁྱེད་ཀྱི་བྱས་རྗེས་ལ་སྔར་མེད་ཀྱི་ཟིལ་མདངས་འཚེར་བའི་གདེང་ཚོད་ཡོད། ཅེས་གསུངས་འདུག

ཕྱི་ལོ་ ༡༩༨༡ ལོར་ཉི་མ་རྡོ་རྗེ་ལགས་རྒྱ་གར་ནས་ཁེ་ན་ཌར་གནས་སྤོར་གནང་སྟེ། ཁེ་ན་ཌའི་ཁེལ་གྷ་རི་(Calgary) མཐོ་རིམ་སློབ་གཉེར་ཁང་གི་སློབ་ཕྲུག་མཐུན་ཚོགས་ཀྱི་ཚོགས་གཙོ་གནང་། སློབ་མཐར་ཕྱིན་རྗེས་བཟོ་ལས་འཆར་འགོད་ཐོག་སློབ་གཉེར་གནང་ནས་བཟོ་ལས་འཆར་འགོད་པ་རྣམས་ལ་བཟོ་ལས་སྦྱོང་བརྡར་བྱ་སའི་ལས་ཁུངས་ཤིག་བཙུགས། ཁོང་ལ་ཁེ་ན་ཌའི་ཞི་བདེའི་གཟེངས་རྟགས་(Canada Peace Medal) དང་སྨྲ་བརྗོད་རང་དབང་གི་གཟེངས་རྟགས་(Calgary Freedom of Expression Award)། ཕྱི་ལོ་ ༢༠༡༨ ལོར་ཁེ་ན་ཌའི་ཨེལ་བྷི་ཊ་(Alberta) ཁུལ་གྱི་བཟོ་རིག་འཆར་འགོད་དང་ས་ཁམས་ཚན་རིག་སྡེ་ཚན་གྱི་ཚོགས་གཙོར་འདེམས་ཐོན་བྱུང་། དེ་བཞིན་ཁོང་གིས་ཨ་རི་དང་། དབྱིན་ཡུལ། སུད་སི་སོགས་ཀྱི་སྐུ་ཚབ་དོན་གཅོད་ཁང་ནང་ཕྱག་ལས་གནང་མྱོང་ཡོད་ལ། ཕྱི་ལོ་ ༡༩༨༧ ལོར་བོད་དུ་ཕེབས་ཏེ་བོད་ནང་གི་གནས་སྟངས་སོགས་རྒྱུས་ལོན་གནང་ཡོད་པ་རེད།

ཁེ་ན་ཌའི་སྤྱི་དམངས་གཟེངས་རྟགས་དེ་ནི་ཡུལ་དེའི་སྤྱི་ཚོགས་ཞབས་འདེགས་དང་གཟེངས་སུ་ཐོན་པའི་བྱས་རྗེས་ཅན་རྣམས་ལ་སྤྲད་སྲོལ་ཡོད་ཅིང་། གཟེངས་རྟགས་དེ་ཕྱི་ལོ་ ༡༩༦༧ ལོར་ཐོག་མར་སྤྲད་མགོ་བཙུགས་པ་ནས་ད་བར་ཡུལ་དེའི་སྤྱི་ཚོགས་ཞབས་འདེགས་ཀྱི་སླད་དུ་ཕྱག་ལས་གཟེངས་སུ་ཐོན་པ་གནང་མཁན་གྱི་མི་གྲངས་ ༧༦༠༠ ཙམ་ལ་གཟེངས་རྟགས་དེ་ཐོབ་ཡོད་ཅིང་། གཟེངས་རྟགས་དེ་ནི་ཁེ་ན་ཌ་རྒྱལ་ཡོངས་ཀྱི་སྤྱི་དམངས་གཟེངས་རྟགས་མཐོ་ཤོས་གཉིས་པ་དེ་ཡིན་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།