བདུན་ཕྲག་གཅིག་ལྷག་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ལ་དྭགས་གླེ་བྱང་གཉིས་ཀྱི་ནང་གཞུང་འབྲེལ་སྐོར་སྐྱོད་ཐེངས་གཉིས་པ་དབུ་འཛུགས་གནང་འདུག
ཟླ་འདིའི་ཕྱི་ཚེས་ ༨ ནས་ ༡༦ བར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། རྒྱ་གར་བྱང་རྒྱུད་དུ་ཆགས་པའི་ལ་དྭགས་གླེ་བྱང་གཉིས་ཀྱི་གཞིས་ཆགས་ཁག་ནང་གཞུང་འབྲེལ་སྐོར་སྐྱོད་དབུ་འཛུགས་གནང་ཡོད་པ་དང་། སྲིད་སྐྱོང་མཆོག་ནས་འཛིན་སྐྱོང་གི་ཐུགས་འགན་བཞེས་རྗེས་རྒྱ་གར་རྒྱལ་ཡོངས་ཀྱི་བོད་མིའི་གཞིས་ཆགས་ཁག་ཚང་མའི་ནང་སྐོར་སྐྱོད་ཐེངས་གཉིས་གནང་རྒྱུ་ཡིན་པའི་ཞལ་བཞེས་གནང་ཡོད་པ་ལྟར། ད་ལན་ལ་དྭགས་སུ་སྐོར་སྐྱོད་ཐེངས་གཉིས་པ་དེ་ཡིན་འདུག
དེ་རིང་ཉིན་རྒྱབ་ནས་ལ་སྤྱི་ལས་ཁུངས་དང་། ས་གནས་འཕྲོད་བསྟེན་སྨན་ཁང་། གླེ་བྱང་གཉིས་ཀྱི་རང་བདེན་ཚོསག་ཆུང་ལས་ཁུངས། ལ་དྭགས་མཉམ་འབྲེལ་ལས་ཁུངས། ས་གནས་ཁྲིམས་ཞིབ་ཁང་། ལ་དྭགས་ལྕོང་ལམ་ས་འགྲོ་ཕན་སྨན་རྩིས་ཁང་སོགས་སུ་འཚམས་གཟིགས་གནང་ཡོད་ཅིང་། སང་ཉིན་ཕྱི་ཚེས་ ༩ ཉིན་ཕོ་བྲང་དགེ་འཕེལ་གླིང་དང་། ཀརྨ་སྒྲུབ་རྒྱུད་ཆིས་གླིང་དགོན། སྨན་ལྷ་སློབ་གྲྭ། ལ་དྭགས་བོད་ཁྱིམ། བོད་ཁྱིམ་རྒན་གསོ་ཁང་། ཨག་གླིང་བོད་ཁྱིམ་སློབ་གྲྭ་སོགས་སུ་འཚམས་གཟིགས་དང་གསུང་བཤད་གནང་རྒྱུ་ཡིན་འདུག
ཟླ་འདིའི་ཕྱི་ཚེས་ ༡༡ ཉིན་ནས་ལ་དྭགས་བྱང་ཐང་ཁུལ་དུ་ཕེབས་ཐོན་གནང་སྟེ། བྱང་ཐང་ཉི་མ་དང་སུམ་མདོ། བཀག་གཞུང་། རྒོད་ཡུལ། ཧན་ལེ། བྱང་ཐང་ཆུ་དམར། ས་སྨད་སོགས་ཀྱི་སློབ་གྲྭ་དང་སྨན་ཁང་། དགོན་པ་སོགས་ལ་གཟིགས་སྐོར་དང་། ཞིང་འབྲོག་མང་ཚོགས་ཀྱི་འཚོ་བའི་གནས་བབ་ལ་གཟིགས་ཞིབ་གནང་རྒྱུ་ཡིན་འདུག
ཟླ་འདིའི་ཕྱི་ཚེས་ ༡༧ ཉི་ལ་དྭགས་ཀྱི་རྒྱལ་ས་སླེ་མཁའ་ལམ་བརྒྱུད་ལྡི་ལིར་ཕེབས་རྒྱུ་དང་། དེ་ནས་ཟླ་འདིའི་ཕྱི་ཚེས་ ༡༨ ནས་ཟླ་ ༨ པའི་ཚེས་ ༤ བར་ཨ་རིར་གཞུང་འབྲེལ་ཕྱོགས་ཕེབས་གནང་སྟེ། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་བ་སོགས་གནང་རྒྱུ་ཡིན་འདུག
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
