སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྗེས་དྲན་གྱི་ཉིན་མོ་སྲུང་གཙི་ཞུས་སོང་།

དེ་རིང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གི་བཙོན་འོག་ནས་འདས་གྲོངས་སུ་ཕྱིན་པའི་ཉིན་མོ་དང་བསྟུན། ཁོང་གི་ཚ་མོ་ཉི་མ་ལྷ་མོའི་བདེན་དོན་གླེང་བའི་གཏམ་ཞེས་པའི་དཔེ་དེབ་ཅིག་དབུ་འབྱེད་གནང་སོང་།

དེ་རིང་སྔ་དྲོའི་ཆུ་ཚོད་ ༡༠ པའི་ཐོག་གངས་སྐྱིད་བོད་ཀྱི་དཔེ་མཛོད་ཁང་དུ། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གི་བཙོན་འོག་ནས་འདས་གྲོངས་སུ་ཕྱིན་པའི་ཉིན་མོ་དང་བསྟུན། ཁོང་གི་ཚ་མོ་ཉི་མ་ལྷ་མོའི་བདེན་དོན་གླེང་བའི་གཏམ་ཞེས་པའི་དཔེ་དེབ་ཅིག་དབུ་འབྱེད་གནང་སོང་། དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་བདེ་སྲུང་་བཀའ་བློན་རྒྱ་རི་སྒྲོལ་མ་མཆོག་དང་། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས། རྩོམ་པ་པོ་རྡོ་རྗེ་རིན་ཆེན་ལགས། གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་དང་ཉམས་ཞིབ་པ། སློབ་གཉེར་བ་བཅས་འཛོམས་འདུག

འདི་གའི་གསར་འགོད་པས་ཉི་མ་ལྷ་མོའི་བདེན་དོན་གླེང་བའི་གཏམ་ཞེས་པའི་དཔེ་དེབ་སྐོར་ལ་རྩོམ་པ་པོ་རྡོ་རྗེ་རིན་ཆེན་ལགས་སུ་དྲིས་པར་ཁོང་གིས། ཉི་མ་ལྷ་མོའི་བདེན་དོན་གླེང་བའི་གཏམ་གྱི་དཔེ་དེབ་འདི་ནི་ཕྱི་ལོ་ ༢༠༡༩ ལོར་འབྲི་མགོ་བཙུགས་པ་ཞིག་ཡིན། ང་རང་སློབ་གྲྭའི་དགེ་རྒན་ཞིག་ཡིན་པར་བརྟེན། དབྱར་ཁའི་གུང་སེང་ཉིན་ ༢༠ དང་དགུན་ཁའི་གུང་སེང་ཉིན་ ༥༠ བེད་སྤྱོད་བཏང་སྟེ་བྲིས་པ་ཞིག་ཡིན། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱ་གཞུང་བཙོན་ཁང་ནས་འདས་གྲོངས་སུ་ཕྱིན་ནས་ལོ་ ༩ འཁོར་བའི་ཉིན་མོ་དཔེ་དེབ་དབུ་འབྱེད་བྱེད་ཐུབ་བྱུང་བ་རེད།

དཔེ་དེབ་ཀྱི་ནང་དོན་དང་དགེ་མཚན་གཙོ་བོ་ནི་སྤྱིར་རིན་པོ་ཆེ་མཆོག་གི་སྐོར་ལ་སྐབས་ཐོག་གི་གནས་ཚུལ་འདྲ་མིན་བྱུང་བ་ཐོན་ཡོད་ཀྱང་། དེབ་འདིའི་ནང་རིན་པོ་ཆེ་མཆོག་གི་མགོ་ཁྱིམ་རྒྱུད་ནས་བཟུང་བར་དུ་མཛད་པ་སྐྱོང་སྟངས་དང་། མ་ཉེས་ཁ་གཡོགས་ཀྱིས་འཇུ་བཟུང་བཙོན་འཇུག་བྱེད་སྟངས། བཙོན་བཅུག་གི་ལོ་ ༡༣ རིང་ཁོང་གི་གཉེན་ཉེ་དང་། སློབ་ཕྲུག ས་གནས་མི་མང་བཅས་ཀྱིས་ཐུག་འཕྲད་དང་ཞུ་གཏུགས་བྱས་པའི་རིམ་པ། དེ་བཞིན་རིན་པོ་ཆེ་མཆོག་སྐུ་གྲོངས་རྗེས་ཀྱང་རྒྱ་གཞུང་གིས་སྐུ་གདུང་མ་སྤྲད་པའི་བར་གྱི་གསལ་ཁ་མེད་པའི་གནས་ཚུལ་མང་པོ་ཞིག་བང་རིམ་དང་ལྡན་པའི་ཐོག་ཁ་བསྐང་བྱས་ཡོད། དེབ་འདི་ནི་དོན་ཚན་ ༥༣ དང་ཤོག་གྲངས་ ༣༤༥ ཅན་གྱི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྐོར་གྱི་གནས་ཚུལ་ཆ་ཚང་ཡོད་པ་ཞིག་ཡིན།

དེབ་འདི་ནི་རིན་པོ་ཆེ་མཆོག་སྐུ་གྲོངས་བའི་ལོ་གཅིག་གི་རྗེས་སུ་ཁོང་གི་ཚ་མོ་རྒྱ་གར་སླེབས་ཏེ། ས་གནས་ས་ཐོག་གི་གནས་ཚུལ་ཆ་ཚང་བཤད་པ་ཡིན་པས་དོན་སྙིང་ལྡན་པ་ཞིག་ཆགས་ཡོད་ལ་། རིན་པོ་ཆེ་མཆོག་སྐུ་གྲོངས་སྐབས་ཉི་མ་ལྷ་མོས་མ་ཉེས་ཁ་གཡོགས་བྱས་པའི་གནས་ཚུལ་རྣམས་བཤད་དགོས་ས་ཞིག་ཏུ་བཤད་རྒྱུ་ཡིན་པའི་དམ་བཅའ་བཞག་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་སུ་སྙན་སེང་ཞུས་ཡོད་པ་མ་ཟད། ཨེ་ཤ་ཡའི་རྒྱལ་ཁབ་ཁག་དང་དམངས་གཙོའི་རྒྱལ་ཁབ་ཁག་གི་གནད་ཡོད་མི་སྣ་ཁག་ལ་ཐུག་འཕྲད་ཀྱིས་བསྟན་འཛིན་བདེ་ལེགས་རིན་པོ་ཆེ་མཆོག་ལ་མ་ཉེས་ཁ་གཡོགས་བྱས་པ་བོད་མི་གཅིག་མཚུངས་ཀྱི་གནད་དོན་ཞིག་ཡིན་པ་ཁྱབ་བསྒྲགས་བྱས་ཡོད། ཅེས་འགྲེལ་བརྗོད་གནང་བྱུང་།

ཡང་གསར་འགོད་པས་བདེན་དོན་གླེང་བའི་གཏམ་གྱི་གལ་གནད་སྐོར་ཆབ་སྲིད་བཙོན་ཟུར་ཚེ་རིང་རྡོ་རྗེ་ལགས་སུ་དྲིས་པར་ཁོང་གིས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གིས་བཙོན་འཇུག་ལོ་ ༡༣ བྱས་པའི་རིང་། ཁོང་གི་ཚ་མོ་ཉི་མ་ལྷ་མོས་ཞུ་གཏུགས་སོགས་ཅི་ཙམ་བྱས་ཀྱང་སྐུ་སྲོག་སྐྱོབ་པའི་ཕན་འབྲས་ཅི་ཡང་ཐོན་མེད་པ་མ་ཟད།  མཐའ་མ་རྒྱ་གཞུང་གི་བཙོན་ཁང་ནས་སྐུའི་གདུང་ཐལ་ཙམ་ཡང་སྤྲད་ཡོད་པ་མ་རེད། དེ་དུས་འུ་ཐུག་ཐབས་ཟད་ཀྱི་ཐོག་ཁོང་མོས་རང་སྲོག་བཅད་ཐབས་བྱས་མྱོང་ཡོད་པ་དང་། རྒྱ་གཞུང་གི་དམག་མིས་ཞུ་གཏུགས་བྱེད་མཁན་མི་མང་གི་ཁྲོད་མེ་མདའ་བརྒྱབ་པ་སོགས་ཀྱི་ཛ་དྲག་གི་གནས་སྟངས་རིགས་དེབ་འདིའི་ནང་འཁོད་ཡོད། དེ་རིང་ཉིན་མོ་འདི་དང་འབྲེལ་བའི་ཐོག་བོད་མི་ཚང་མས་བསམ་བློ་གཏོང་དགོས་པ་ཞིག་ཡིན་པ་མ་ཟད། དེབ་འདིས་བཙན་བྱོལ་དུ་ཡོད་པའི་གཞོན་སྐྱེས་རྣམས་ཀྱི་མ་འོངས་བའི་ལས་དོན་བྱེད་ཕྱོགས་ལ་ཕན་ཐོགས་རྒྱུ་རེད། ཅེས་འགྲེལ་བརྗོད་གནང་བྱུང་།

བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ནི་བླ་མ་ཚད་ལྡན་ཞིག་རེད། ཁོང་ནི་བོད་ཀྱི་རྒྱལ་གཅེས་དཔའ་བོ་ཞིག་རེད་ཅེས་གསུངས་ཡོད་པ་རེད། དེ་ལས་ལྷག་པ་ང་ཚོས་ཤེས་དགོས་པ་ཡོད་པ་མ་རེད། དེ་བཞིན་ཚ་མོ་ཉི་མ་ལྷ་མོས་རིན་པོ་ཆེ་མཆོག་གི་མཛད་རྗེས་དང་དཀའ་སྡུག་གི་བརྒྱུད་རིམ་རྒྱལ་སྤྱིའི་སྡིངས་ཆའི་ཐོག་སླེབས་ཆེད་དུ། རྒྱ་གར་དུ་བཙན་བྱོལ་ལ་སླེབས་ནས་༧གོང་ས་མཆོག་ལ་ཐེངས་གསུམ་མཇལ་ཁ་ཞུས་རྗེས། འཛམ་གླིང་རྒྱལ་ཁབ་མང་པོའི་ནང་དུ་བོད་དོན་ཆེད་དཀའ་ལས་མང་པོ་རྒྱག་བཞིན་འདུག ཅེས་བརྗོད་སོང་།

དེ་བཞིན་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། དེ་རིང་ནི་རྒྱ་གཞུང་གི་སྲིད་ཇུས་ངན་པ་དང་གདུག་རྩུབ་ཀྱི་འོག་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གྲོངས་པའི་ཉིན་མོ་རེད། ཉིན་མོ་འདིར་ང་ཚོས་རིན་པོ་ཆེ་མཆོག་གི་གཙོས་བོད་ནང་གི་རྒྱལ་ཁབ་དང་མི་རིགས་ཀྱི་ཆེད་རང་སྲོག་བློས་གཏོང་མཁན་དང་ད་ལྟ་མནར་གཅོད་མྱོང་བཞིན་པ་ཚང་མ་སྙིང་ནས་དྲན་དགོས་ལ། དོན་གྱི་ཐོག་ནས་ཀྱང་ཁོང་རྣམ་པའི་སྐུ་ལས་བསྐྱོན་པ་དེ་ཆུད་ཟོས་སུ་མི་གཏོང་རྒྱུ་ང་ཚོའི་ལས་འགན་ཆགས་ཡོད་ལ། ༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཀྱི་སྐལ་བ་བཟང་པོའི་དུས་འདིར། བོད་མི་ཡོངས་ཀྱི་མཐུན་སྒྲིལ་བྱས་ཏེ་རང་ཉིད་ཀྱི་རྒྱལ་ཁབ་ཀྱི་རྩ་དོན་ཆེད་དུ་ནུས་པ་མཉམ་སྤུངས་བྱ་རྒྱུ་གལ་ཆེན་པོ་རེད། ཅེས་གསུངས་སོང་།

ཉི་མ་ལྷ་མོའི་བདེན་དོན་གླེང་བའི་གཏམ་ཞེས་པའི་དཔེ་དེབ་ནང་དུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་མ་ཉེས་ཁ་གཡོགས་ཀྱིས་བཙོན་འཇུག་བྱས་ཏེ། ལོ་ ༡༣ རིང་ཁོང་གི་གཉེན་ཉེ་སོགས་ཀྱིས་ཞུ་གཏུགས་བྱས་པའི་བརྒྱུད་རིམ་དང་། ཁོང་བཙོན་ཁང་ནས་སྐུ་གྲོངས་རྗེས་ཀྱང་རྒྱ་གཞུང་གིས་སྐུ་གདུང་མ་སྤྲད་པའི་བར་གྱི་གནས་ཚུལ་གསལ་ཁ་བཏོན་ཡོད་འདུག

གསར་འགོད་པ། བྱམས་པ་ཚེ་རིང་། སྐལ་བཟང་སྦྱིན་པས་རྩོམ་སྒྲིག་བྱས།