༧གོང་ས་མཆོག་གིས་ཡུ་རོབ་གྲོས་ཚོགས་དང་ལྷན་ཚོགས་ཀྱི་ཚོགས་གཙོ་གཉིས་ཀྱི་ཡུ་རོབ་མཉམ་འབྲེལ་དེ་གཞན་གྱིས་མིག་དཔེ་ལྟ་སའི་དཔེ་མཚོན་དུ་གནས་ཐུབ་པའི་མ་འོངས་བྱ་བ་ལམ་ལྷོང་ཡོང་བའི་ཐུགས་སྨོན་མཛད་འདུག
དེ་རིང་ཨ་རིའི་གྲོང་ཁྱེར་ནིའུ་ཡོག་ནས་༧གོང་ས་རྒྱལ་བ་རིན་པོ་ཆེ་མཆོག་གིས་ལྕམ་རོ་བྷར་ཊ་མེཊ་སོ་ལ་ (Roberta Metsola) དང་ལྕམ་ཨུར་སུ་ལ་ཝོན་དེར་ལེ་ཡེན་ (Ursula von der Leyen) གཉིས་ཡུ་རོབ་གྲོས་ཚོགས་ཀྱི་ཚོགས་གཙོ་དང་ཡུ་རོབ་ལྷན་ཚོགས་ཀྱི་ཚོགས་གཙོར་བསྐྱར་དུ་འོས་འདེམས་བྱུང་བར་འཚམས་འདྲིའི་གསུང་འཕྲིན་སྩལ་གནང་འདུག
༧མགོན་པོ་གང་ཉིད་མཆོག་གིས། འདས་པའི་ལོ་ངོ་དྲུག་ཅུ་ལྷག་གི་རིང་ཡུ་རོབ་མཉམ་འབྲེལ་གྱི་དགོངས་པས་ཚོགས་མི་རྒྱལ་ཁབ་ཁག་དང་ས་ཁུལ་དེའི་ནང་ཞི་བདེ་སྲུང་སྐྱོབ་བྱས་ཡོད་པར་བརྟེན། ༧མགོན་པོ་གང་ཉིད་མཆོག་གིས་ཡུ་རོབ་མཉམ་འབྲེལ་མཐུན་ཚོགས་ཀྱི་དགོངས་པ་ལ་བསྔགས་བརྗོད་མཛད་པ་དང་བསྟུན། འཛམ་གླིང་དམག་ཆེན་གཉིས་པའི་རྗེས་སུ་བྱུང་བའི་འབྲེལ་ལམ་བསྐྱར་གསོ་དང་མཉམ་ལས་ཀྱི་དགོངས་པའི་ཐོག་ནས་ཡུ་རོབ་མཉམ་འབྲེལ་མཐུན་ཚོགས་ཀྱིས་རྒྱལ་ཁབ་སོ་སོའི་ས་གནས་ཀྱི་ཁེ་ཕན་ལས་སྤྱིའི་བདེ་དོན་གལ་ཆེ་བར་བརྩིས་ཡོད་པ་མ་ཟད། དེས་འཛམ་གླིང་ནང་ཕན་ཚུན་གཅིག་རྟེན་ཇེ་ཆེར་འགྲོ་བཞིན་པ་དང་དཀའ་ངལ་ཅན་དུ་གྱུར་སྐབས་ཤེས་རབ་དང་བསམ་བློ་སྨིན་པའི་རྣམ་པ་མཚོན་གྱི་ཡོད་ཅེས་གསུངས།
གསར་འགོད་པ། སྐལ་བཟང་སྦྱིན་པ།
