རྒྱ་ནག་བཅིངས་གྲོལ་དམག་མི་ཟེར་བས་ཐའེ་ཝན་གྱི་མངའ་ཁོངས་སུ་དམག་དོན་གནམ་གྲུ་ ༡༨ དང་མཚོ་གྲུ་ ༩ སྡེབ་གཏོང་བྱས་ཏེ་དམག་དོན་གྱི་ལས་དོན་སྤེལ་ཡོད་འདུག
Taiwan reports Chinese military activity near its territory, detects 18 PLA aircraft, nine naval vessels. Photo Credit:X@MoNDefense
ཉེ་ལམ་རྒྱ་ནག་བཅིངས་གྲོལ་དམག་མི་ཟེར་བས་ཐའེ་ཝན་མཚོ་འགག་ཁུལ་དུ་སུན་གཙེར་ཡང་ཡང་བཟོ་མུས་ཡིན་པའི་སྐབས་འདིར། ཁ་སང་ཕྱི་ཚེས་༨ ཀྱི་ཕྱི་དྲོ་ནས་དེ་རིང་བར་རྒྱ་ནག་གིས་ཐའེ་ཝན་གྱི་རྒྱལ་སྲུང་མངའ་ཁུལ་དུ་དམག་དོན་གནམ་གྲུ་ ༡༨ དང་དམག་དོན་མཚོ་གྲུ་ ༩ སྡེབ་གཏོང་བྱས་ཏེ། རྒྱ་ནག་བཅིངས་གྲོལ་དམག་མི་ཟེར་བས་གནམ་མཚོ་གཉིས་ནས་ཐའེ་ཝན་མི་དམངས་ལ་འཇིགས་སྐུལ་བྱས་ཡོད་སྟབས། ཐའེ་ཝན་དམག་དོན་བདེ་སྲུང་ཚན་པས་ཀྱང་གནམ་མཚོ་གཉིས་སུ་དམག་མི་མངགས་ནས་རྒོལ་ལན་བསློགས་ཡོད་འདུག
ཐའེ་ཝན་བདེ་སྲུང་བློན་ཆེན་ལས་ཁུངས་ཀྱིས། དེ་རིང་རེས་གཟའ་པ་སངས་ཉིན། རྒྱ་ནག་བཅིངས་གྲོལ་དམག་མི་ཟེར་བའི་དམག་དོན་གནམ་གྲུ་ ༡༨ དང་མཚོ་གྲུ་ ༩ ཐའེ་ཝན་མཚོ་འགག་གི་དཀྱིལ་ཐིག་བརྒལ་ནས་ཐའེ་ཝན་གྱི་ཤར་ལྷོ་དང་ལྷོ་ནུབ་ཀྱི་མཁའ་སྲུང་ས་མཚམས་སུ་འཛུལ་ཡོད་པས། ཐའེ་ཝན་རྒྱལ་སྲུང་ལྷན་ཁང་གིས་གནས་ཚུལ་དེར་ལྟ་ཞིབ་བྱས་ཏེ། རྒྱ་ནག་གཞུང་གིས་ཚད་ལས་འདས་པའི་བྱེད་སྟངས་ལ་སྐྱོན་བརྗོད་བྱེད་ཀྱི་ཡོད། ཅེས་བསྒྲགས་འདུག་ལ། རྒྱ་ནག་གིས་ཐའེ་ཝན་གྱི་ས་ཁོངས་སུ་ཁྲིམས་མཐུན་མིན་པའི་ཐོག་ནས་དམག་དོན་གྱི་ལས་འགུལ་སྤེལ་ཡོད་སྟབས། ཐའེ་ཝན་དམག་དོན་བདེ་སྲུང་ཚན་པས་དམག་མི་མངགས་ནས་རྒྱ་ནག་གིས་མཚོ་འགག་ཁུལ་དུ་དམག་དོན་ལས་དོན་སྤེལ་བར་འགོག་རྒོལ་བྱས་འདུག
འདས་པའི་ལོ་ཤས་ནང་རྒྱ་ནག་གིས་ཐའེ་ཝན་གྱི་མཁའ་ཁུལ་དང་མཚོ་ཁུལ་དུ་དམག་དོན་གྱི་གནམ་གྲུ་དང་འཐབ་འཁྲུག་གྲུ་གཟིངས་མངག་གཏོང་བྱས་ཏེ་ཡང་ཡང་དྲག་ཤུགས་ངོམ་གི་ཡོད་ཅིང་། ཟླ་འདིའི་ཚེས་ ༨ ཉིན་གཅིག་པུར་ཐའེ་ཝན་གྱི་མཁའ་ཁུལ་དུ་གནམ་གྲུ་ ༢༧ དང་མཚོ་གྲུ་ ༨ མངགས་གཏོང་བྱས་པའི་ཁྲོད། དམག་དོན་གནམ་གྲུ་ ༡༨ ཙམ་གྱིས་རྒྱལ་ཁབ་གཉིས་ཀྱི་ས་ཐིག་ལས་བརྒལ་ནས། ཐའེ་ཝན་གྱི་མཁའ་དབྱིངས་སུ་དམག་དོན་ལས་འགུལ་མང་དག་ཅིག་སྤེལ་ཡོད་པ་རེད། དེ་བཞིན་ཕྱི་ཟླ་ ༧ ཚེས་ ༣༠ ཉིན་རྒྱ་ནག་གི་དམག་དོན་གནམ་གྲུ་ ༡༤ དང་མཚོ་གྲུ་ ༩ ཐའེ་ཝན་ས་ཁོངས་སུ་འཛུལ་ནས་ཡུལ་དེའི་ནུབ་རྒྱུད་དུ་དམག་དོན་ལས་དོན་སྤེལ་ནས། རྒྱ་ནག་བཅིངས་གྲོལ་དམག་མི་ཟེར་བས་དུས་ནས་དུས་སུ་ཐའེ་ཝན་མངའ་ཁུལ་དུ་སུན་གཙེར་ཡང་ཡང་བཟོ་ཡི་ཡོད་པ་རེད།
གནད་དོན་དབྱེ་ཞིབ་པ་རྣམས་ཀྱིས། རྒྱ་ནག་གིས་མི་གྲངས་ས་ཡ་ ༢༣ ལྷག་ལས་མེད་པའི་ཐའེ་ཝན་མཚོ་འགག་ཏུ་སྟོབས་ཤུགས་རྒྱ་སྐྱེད་ཐུབ་ཚེ། ནུབ་ཞི་བདེ་རྒྱ་མཚོའི་ཁུལ་དུ་སྟབས་བདེ་བོའི་ཐོག་ནས་འགུལ་སྐྱོད་བྱེད་ཐུབ་པ་མ་ཟད། ནུབ་ཞི་བདེ་རྒྱ་མཚོའི་ཁུལ་དུ་ཡོད་པའི་གྷུ་ཝམ (Guam ) མཚོ་གླིང་དང་ཨ་རིའི་ཧཱ་ཝའེ་( Hawaii) མངའ་སྡེར་ཡོད་པའི་ཨ་རིའི་དམག་སྒར་ལ་འཇིགས་སྐུལ་བྱེད་སྲིད་སྐོར་བརྗོད་ཀྱི་འདུག
རྒྱ་ནག་གིས་ཐའེ་ཝན་མཚོ་འགག་ཁུལ་དུ་དྲག་པོའི་དམག་དོན་གྱི་ལས་འགུལ་མང་པོ་ཞིག་སྤེལ་མུས་ཡིན་པར། ཨ་རི་དང་། ཨོ་གླིང་། ཉི་ཧོང་བཅས་ཀྱིས་རྒྱ་ནག་གཞུང་གིས་ཐའེ་ཝན་གཞུང་མང་གཉིས་ཀྱི་བདེ་འཇགས་ལ་གནོད་པའི་དམག་དོན་ལས་འགུལ་སྤེལ་མཚམས་འཇོག་དགོས་པའི་ཉེན་བརྡ་གཏོང་མུས་ཡིན་ལ། ཨ་རིའི་མཐུན་ཕྱོགས་རྒྱལ་ཁབ་དེ་གཉིས་ཀྱིས་ཨ་རི་དང་མཉམ་དུ་ཐའེ་ཝན་གྱི་མཚོ་འགག་བདེ་འཇགས་ཡོང་བར་མཉམ་ལས་བྱ་རྒྱུ་ཡིན་སྐོར་གསལ་བསྒྲགས་བྱས་ཡོད་ལ། ལྷག་པར་ཕྱི་ལོ་ ༢༠༢༠ ལོ་ཙམ་ནས་རྒྱ་གར་གྱིས་ཁོ་ཝ་ཊི་ (Quad) ནང་འཛུལ་ཞུགས་བྱས་ཏེ། ཨེ་ཤ་ཡའི་ཁུལ་དུ་རྒྱ་ནག་གཞུང་གི་དབང་ཤུགས་ལ་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་སྲུང་བྱེད་ཐབས་ཀྱི་མཉམ་འབྲེལ་དམག་སྦྱོང་སྤེལ་གྱིན་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
