རྒྱ་གར་དང་ཉི་ཧོང་གཉིས་ཀྱིས་རྒྱ་ནག་ལ་ཁ་གཏད་གཅོག་རྒྱུ་ཡིན་འདུག

རྒྱ་གར་དང་ཉི་ཧོང་གཉིས་ཀྱིས་དམག་དོན་མཉམ་ལས་བྱས་ཏེ་རྒྱ་ནག་གིས་རྒྱ་གར་ཞི་བདེ་རྒྱ་མཚོ་ཁུལ་དུ་དབང་ཤུགས་སྐྱེད་པར་འགོག་རྒོལ་ནན་མོ་བྱ་རྒྱུ་ཡིན་འདུག

Defence Minister Rajnath Singh and External Affairs Minister S. Jaishankar with Japanese Defence Minister Minoru Kihara and Foreign Minister Yoko Kamikawa . photo :ARGUS

ཁ་སང་རེས་གཟའ་མིག་དམར་ཉིན་རྒྱ་གར་ཕྱི་སྲིད་བློན་ཆེན་སྐུ་ཞབས་ཇའེ་ཤང་ཁར (Subrahmanyam Jaishankar) ལགས་དང་བདེ་སྲུང་བློན་ཆེན་ར་ཇི་ན་ཐི་ (Rajnath Singh) གཉིས་ཀྱིས་ཉི་ཧོང་གི་ཕྱི་སྲིད་བློན་ཆེན་ཡོ་གོ (Kamikawa Yoko)དང་རྒྱལ་སྲུང་བློན་ཆེན་ཀི་ཧ་རཱ་ (kihara minoru)གཉིས་དང་ཐུག་འཕྲད་བྱས་ཏེ། རྒྱ་ནག་གཞུང་གིས་རྒྱ་གར་ཞི་བདེ་རྒྱ་མཚོ་ཁུལ་དུ་དཔལ་འབྱོར་དང་དམག་དོན་གྱི་ནུས་པ་རྒྱ་སྐྱེད་བྱེད་བཞིན་པ་འགོག་རྒོལ་སླད། ཕྱོགས་གཉིས་ཀྱིས་ཐབས་ཇུས་ལྡན་པའི་མཉམ་ལས་ཀྱི་ནུས་པ་སྔར་ལས་གོང་མཐོར་གཏོང་དགོས་པའི་ཐད་ལ་གྲོས་མཐུན་བྱུང་འདུག་ལ། ཉི་ཧོང་གི་བློན་ཆེན་གཉིས་ཀྱིས་རྒྱ་གར་གྱི་སྲིད་བློན་མུ་དྷི་མཆོག་ལའང་མཇལ་འཕྲད་བྱས་ཡོད་པའི་གནས་ཚུལ་འཐོན་མུས་ཡིན་འདུག

གནད་དོན་དེའི་ཐད་རྒྱ་གར་དང་ཉི་ཧོང་གཉིས་ཀྱིས་མཉམ་འབྲེལ་བསྒྲགས་གཏམ་ཞིག་སྤེལ་བའི་ནང་། ཉི་ཧོང་གི་མཐའ་སྲུང་དམག་མི་དང་རྒྱ་གར་གྱི་མཚོ་དམག་གཉིས་མཉམ་འབྲེལ་གྱི་ཐོག་ནས། མ་འོངས་པར་ཕྱོགས་གཉིས་ཀྱི་ས་ཁུལ་དུ་དམག་དོན་མཚོ་གྲུ་ཞིག་གསོ་བྱེད་རེས་དང་། དམག་འབྲེལ་དམག་དོན་སྤེལ་རྒྱུ། དེ་བཞིན་རྒྱལ་ཁབ་གཉིས་ཀྱིས་མཉམ་ལས་དང་མཐུན་སྒྲིལ་གྱི་ཐོག་ནས་རྒྱ་ནག་གི་སུན་གཙེར་ལ་འགོག་རྒོལ་དང་ས་མཐའ་བརྟན་སྲུང་། ལྷག་པར་རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་བརླིང་ཡོང་བར་མཉམ་ལས་བྱ་རྒྱུ་ཡིན་སྐོར་དང་། རྒྱ་གར་དང་ཉི་ཧོང་གཉིས་ཀྱིས་ཐབས་ཇུས་རང་བཞིན་ལྡན་པའི་མཉམ་ལས་ཀྱི་ཐོག་ནས་ཞི་བདེ་རྒྱ་མཚོའི་ཁུལ་དུ་གུ་ཡངས་དང་ཞི་བདེ། བདེ་འཇགས་ཡོང་ཐབས་ལ་སྔར་ལས་ལྷག་པའི་མཉམ་ལས་བྱ་རྒྱུ་ཡིན་པའི་གྲོས་མཐུན་བྱུང་བ་དང་འབྲེལ། རྒྱ་གར་ཕྱི་སྲིད་བློན་ཆེན་སྐུ་ཞབས་ཇའེ་ཤང་ཀར་ལགས་ཀྱིས། ཕྱོགས་གཉིས་ཀྱིས་ངེས་གཏན་དང་ཚོད་དཔག་དཀའ་བའི་དེང་གི་འཇིག་རྟེན་དུ་མདུན་སྐྱོད་བྱས་ཡོད་སྟབས། བློ་བཀལ་ཆོག་པའི་འཐབ་གྲོགས་སྟེ་གཅིག་མཐུན་གྱི་ལྟ་ཚུལ་ཅན་ཞིག་དགོས་པ་ནི་ཆེས་གནད་འགག་ཅིག་རེད། ཅེས་བརྗོད་འདུག

འདས་ལོའི་ཕྱི་ཟླ་ ༡ ནང་ཉི་ཧོང་དང་རྒྱ་གར་གཉིས་ཀྱིས་རྒྱ་ནག་ལ་ཁ་གཏད་གཅོག་སླད། ཟླ་དེའི་ཕྱི་ཚེས་ ༡༦ ནས་ ༢༦ བར་ཉིན་གྲངས་བཅུ་གཅིག་རིང་ཉི་ཧོང་གི་རྒྱལ་ས་ཊོག་ཡོའི་བྱང་ཤར་ཁུལ་དུ་ཡོད་པའི་ (Ibaraki) ས་ཁུལ་གྱི་མཁའ་དམག་ལྟེ་གནས་སུ་ (Hyakuri Air Base) མཁའ་ལམ་དམག་སྦྱོང་ཐེངས་དང་པོ་དེ་སྤེལ་ཡོད་ཅིང་། སྤྱིར་བཏང་ཕྱི་ལོ་ ༢༠༡༩ ཟླ་ ༡༡ ནང་རྒྱ་གར་གྱི་རྒྱལ་ས་ལྡི་ལིར་རྒྱ་གར་གྱི་ཕྱི་སྲིད་བློན་ཆེན་དང་ཉི་ཧོང་གི་རྒྱལ་སྲུང་བློན་ཆེན་གཉིས་ཐུག་འཕྲད་ཀྱིས་རྒྱལ་སྲུང་སྐོར་ལ་ཚོགས་འདུ་འཚོགས་ཏེ། ཉི་ཧོང་དང་རྒྱ་གར་གཉིས་ཟུང་འབྲེལ་གྱིས་དམག་སྦྱོང་བྱ་འཆར་ཡོད་ཀྱང་། ཏོག་དབྱིབས་གཉན་རིམས་རྐྱེན་གྱིས་འགྲོ་འོང་བཀག་སྡོམ་དང་ཁྱིམ་སྡོད་སྒོ་རྒྱ་བསྡམས་པར་བརྟེན། དམག་སྦྱོང་བྱེད་མ་ཐུབ་པར་ཕྱིར་འགྱངས་བཏང་ཡོད་འདུག

འདས་པའི་ལོ་ཤས་གོང་ཉི་ཧོང་དུ་ཨ་རི་དང་ཨོ་གླིང་། ཉི་ཧོང་། རྒྱ་གར་བཅས་ལས་གྲུབ་པའི་རྒྱལ་ཁབ་བཞིའི་ལྷན་ཚོགས་ (Quad Summit) དེ་བསྡུས་ཡོད་ཅིང་། ལྷན་ཚོགས་ཐོག་ཨ་རིས་ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་དུ་རྒྱ་ནག་གི་དཔལ་འབྱོར་དང་ཆབ་སྲིད་ཀྱི་ཤུགས་རྐྱེན་ལ་ཁ་གཏད་གཅོག་ཆེད། རྒྱ་གར་ཞི་བདེ་རྒྱ་མཚོའི་ཁུལ་གྱི་ཚོང་འབྲེལ་ལས་འཆར་ (Indo-Pacific Economic Framework for Prosperity) ཟེར་བ་ཞིག་མགོ་འཛུགས་བྱས་ཏེ། ད་ལྟའི་ཆར་ཚོང་དོན་མཉམ་ལས་དེའི་ནང་རྒྱ་གར་དང་། ཉི་ཧོང་། ལྷོ་ཀོ་རི་ཡ། ཨོ་གླིང་། ཝི་ཐི་ནམ། ཐའེ་ལེན་ཌི། སིང་གྷ་པུར་ཚུད་པའི་ཨེ་ཤ་ཡའི་རྒྱལ་ཁབ་ ༡༣ མཉམ་ཞུགས་བྱས་ཏེ། ཕྱོགས་ཡོངས་ནས་ཞི་བདེ་རྒྱ་མཚོའི་ཁུལ་དུ་རྒྱ་ནག་གི་ཚོང་དོན་དང་དམག་དོན་གྱི་ནུས་པ་སྐྱེད་པར་འགོག་རྒོལ་བྱེད་མུས་ཡིན་ཡང་། འདས་པའི་ལོ་ཤས་རིང་རྒྱ་ནག་གཞུང་གིས་ཞི་བདེ་རྒྱ་མཚོའི་ཁུལ་དུ་ཆགས་པའི་ཨེ་ཤ་ཡའི་མཚོ་གླིང་རྒྱལ་ཁབ་མང་དག་ཅིག་ཏུ་ཚོང་དོན་འབྲེལ་ལམ་དང་ཨ་སྒོར་ཐེར་འབུམ་མང་པོ་མ་འཇོག་བྱས་ཏེ། ཨེ་ཤ་ཡའི་མཚོ་འགག་ཁུལ་དུ་དམག་དོན་དང་ཚོང་གི་དབང་ཤུགས་སྐྱེད་ཐབས་བྱེད་མུས་ཡིན་པ་རེད།

འདས་པའི་མི་ལོ་བཅུ་ཕྲག་འགའ་ཡི་གོང་ནས་རྒྱལ་ཁབ་མང་དག་ཅིག་གིས་རྒྱ་གར་ཞི་བདེ་རྒྱ་མཚོ་ཁུལ་བདག་བཟུང་ཆེད་རྣོ་ངར་རང་བཞིན་གྱི་འཐབ་འཛིང་དང་ཁུལ་དེར་སྲིད་འབྱོར་གཉིས་ཀྱི་ཐོག་ནས་དབང་ཤུགས་སྐྱེད་ཐབས་ལ་འབད་འབུངས་བྱས་ཡོད་དེ། རྒྱ་གར་ཞི་བདེ་རྒྱ་མཚོ་ཁུལ་(Indo-Pacific region) ནི་འཛམ་གླིང་གི་མི་འབོར་མང་ཤོས་དང་ཨེ་ཤ་ཡ། ཨ་ཧྥེ་རི་ཁ། ཨོ་གླིང་། ཨ་རི་བཅས་ཀྱི་ཚོང་དོན་གྱི་ལྟེ་གནས་ཆེ་ཤོས་ཡིན་ཞིང་། དེས་འཛམ་གླིང་གི་མི་འབོར་གྱི་བརྒྱ་ཆ་ ༦༠ དང་འཛམ་གླིང་གི་ཐོན་ཁུངས་བརྒྱ་ཆ་གསུམ་ནས་གཉིས་ཟིན་ཡོད་པ་མ་ཟད། ཁུལ་དེ་ནི་འཛམ་གླིང་གི་མི་འབོར་དང་ཚོང་གི་འདུ་འཛི་རྒོད་པའི་རྒྱ་གར་དང་། རྒྱ་ནག ཉི་ཧོང་། ཨོ་གླིང་། ཨིན་ཌོ་ནེ་ཤི་ཡ་བཅས་ཀྱི་གཞིས་ཁྱིམ་དུ་གྱུར་ཡོད། རྒྱ་ནག་གཞུང་གིས་རྒྱ་གར་ཞི་བདེ་རྒྱ་མཚོའི་ཁུལ་དུ་དམག་དོན་དང་ཚོང་གི་དབང་ཤུགས་སྐྱེད་ཐུབ་ཚེ། དེས་འཛམ་གླིང་གི་ཚོང་གི་རྒྱལ་ཁབ་ཆེ་ཤོས་ཁག་དང་། ལྷག་པར་ཨ་རི་དང་ཨ་ཧྥེ་རི་ཁ་གླིང་ཕྲན་བཅས་སུ་སྲིད་འབྱོར་གཉིས་ཀྱི་དབང་ཤུགས་སྐྱེད་ཧ་ཅང་སླ་བས། ད་བར་རྒྱ་གར་དང་། ཉི་ཧོང་གཙོས་རྒྱལ་ཁབ་ཁག་གིས་རྒྱ་གར་བདེ་རྒྱ་མཚོའི་ཁུལ་དུ་རྒྱ་ནག་གི་དབང་ཤུགས་སྐྱེད་པར་འགོག་རྒོལ་ནན་མོ་བྱེད་མུས་ཡིན།

རྒྱ་གར་ཞི་བདེ་རྒྱ་མཚོ་ཁུལ་ནི་དབྱིན་ཇི་བཙན་རྒྱལ་རིང་ལུགས་ཀྱིས་རྒྱ་གར་བདག་བཟུང་བྱེད་སྐབས། ལོ་རྒྱུས་དང་དམག་དོན་གཉིས་ཀྱི་ཐོག་ནས་རྩོད་གཞི་ཧ་ཅང་ཆེ་བའི་ས་ཚིགས་ཤིག་ཡིན་འདུག་ལ། དུས་དེར་དབྱིན་ཇི་བཙན་རྒྱལ་རིང་ལུགས་དང་ཌ་ཆི་(Dutch) ཕྱོགས་ཁག་གཉིས་ཀྱིས་བདག་བཟུང་བྱས། ཕྱི་ལོ་ ༢༠༡༥ ཙམ་ནས་ཁུལ་དེར་རྒྱ་གར་ཞི་བདེ་རྒྱ་མཚོ་བཏགས་ཏེ་བརྟན་བརླིང་དང་བདེ་འཇགས་སྲུང་སྐྱོབ་བྱེད་མགོ་བཙུགས། ཉེ་ལམ་ཁུལ་དེར་རྒྱ་གར་དང་། ཨ་རི། ཉི་ཧོང་། ཨོ་གླིང་། དེ་བཞིན་ཨེ་ཤ་ཡའི་ལྷོ་ཤར་རྒྱལ་ཁབ་ཁག་གི་མཐུན་ཚོགས་(ASEAN) སོགས་ཀྱིས་འགེབ་སྲུང་བྱེད་མུས་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།