ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་༧གོང་ས་མཆོག་རྒྱ་གར་ཏུ་བཙན་བྱོལ་ཕེབས་སྐབས་ཀྱི་མོན་རྟ་དབང་གི་བཞུགས་གནས་སུ་ཕོ་བྲང་ཞིག་གསར་བཞེངས་བྱས་ཡོད་ཅེས་གསུངས་འདུག
ཟླ་འདིའི་ཕྱི་ཚེས་ ༧ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མོན་ཡུལ་དད་ལྡན་མི་མང་ཡོངས་ནས་ཇི་ལྟར་གསོལ་འདེབས་ཞུས་པ་བཞིན་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་པ་ལྟར། དེ་རིང་སྔ་དྲོ་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རུ་ན་ཌལ་མངའ་སྡེ་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་སུ་དམིགས་བསལ་མཇལ་ཁ་དང་བཀའ་སློབ་བསྩལ་ཡོད་ཅིང་། སྐབས་དེར་༧མགོན་པོ་གང་ཉིད་མཆོག་ཨ་རུ་ན་ཅལ་མངའ་སྡེ་རུ་ཆིབས་བསྒྱུར་བསྐྱང་རྒྱུའི་ཞལ་བཞེས་མཛད་ཡོད་པ་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་ཀྱིས་གསུངས་བྱུང་།
༧གོང་ས་མཆོག་གི་མཇལ་བཅར་སྐོར་ལ་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ནས་འདི་གའི་གསར་འགོད་པར། ཐེངས་འདིའི་སྐོར་སྐྱོད་རིང་ང་རང་ཧ་ཅང་སྐྱིད་པོ་བྱུང་། དེ་རིང་ཞོགས་པར་ང་ཚོ་མཇལ་བཅར་བ་མང་པོར་༧གོང་ས་རྒྱལ་བ་རིན་པོ་མཆོག་གི་བྱིན་རླབས་ཐོབ་པའི་སྐལ་བ་བྱུང་། ༧གོང་ས་མཆོག་གི་འཕྲོད་བཞེས་ཡག་པོ་མཐོང་དུས་ཧ་ཅང་དགའ་བོ་བྱུང་ལ། མགོན་པོ་མཆོག་གི་སྐུ་ཚེ་ཞབས་པད་བརྟན་པའི་གསོལ་འདེབས་ཞུས་ཡོད། ༧གོང་ས་རྒྱལ་བ་རིན་པོ་མཆོག་ནི་ཨ་རུ་ན་ཅལ་མངའ་སྡེ་དང་། དམིགས་བསལ་མོན་ཡུལ་མི་མང་བར་འབྲེལ་ལམ་ཡག་པོ་ཡོད། ངས་མི་མང་གི་ཚབ་བྱས་ཏེ་༧གོང་ས་རྒྱལ་བ་རིན་པོ་ཆེ་མཆོག་ཨ་རུ་ན་ཅལ་མངའ་སྡེའི་ནང་དུ་གདན་འདྲེན་ཞུས་པར། ༧གོང་ས་མཆོག་ནས་ཐུགས་བརྩེ་བའི་ཐོག་ཞལ་བཞེས་གནང་སོང་། དེ་ནི་ཨ་རུ་ན་ཅལ་མངའ་སྡེའི་མི་མང་ཡོངས་ལ་མཚོན་ན་གཏམ་བཟང་གི་གསར་འགྱུར་ཞིག་ཆགས་ཡོད། ༧གོང་ས་མཆོག་གི་འཕྲོད་བཞེས་གང་ལེགས་བྱུང་ཚེ། ༧མགོན་པོ་མཆོག་ཨ་རུ་ན་ཅལ་མངའ་སྡེའི་ནང་ཆིབས་བསྒྱུར་བསྐྱང་རྒྱུ་རེད། ཅེས་འགྲེལ་བརྗོད་གནང་བྱུང་།
ཡང་ཁོང་གིས། ༧རྒྱལ་དབང་སྐུ་ཕྲེང་དྲུག་པ་ནི་མོན་རྟ་དབང་ནས་སྐུ་འཁྲུངས་ཡོད་པ་དང་། ༧རྒྱལ་དབང་སྐུ་ཕྲེང་བཅུ་བཞི་བ་མཆོག་ནི་བོད་ནས་རྒྱ་གར་དུ་བཙན་བྱོལ་ལ་ཕེབས་སྐབས་མོན་རྟ་དབང་ནས་བཞུགས་ཡོད་པས། ༧གོང་ས་རྒྱལ་བ་རིན་པོ་ཆེ་མཆོག་དང་མོན་ཡུལ་མི་མང་གཉིས་ཀྱི་བར་དུ་དམིགས་བསལ་འབྲེལ་ལམ་ཞིག་ཡོོད་པ་རེད། ཐེངས་འདིར་༧མགོན་པོ་གང་ཉིད་མཆོག་ལ་བརྟན་བཞུགས་བསྟར་འབུལ་ཆེད་ཨ་རུ་ན་ཅལ་མངའ་སྡེའི་མི་མང་གྲངས་ ༡༠༠༠ ལྷག་ཡོང་ཡོད། དེ་བཞིན་ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ཏུ་བཙན་བྱོལ་ལ་ཕེབས་སྐབས། མོན་རྟ་དབང་གི་བཞུགས་གནས་སུ་ཕོ་བྲང་གསར་བ་ཞིག་འཛུགས་སྐྲུན་བྱས་ཡོད་པས། མོན་རྟ་དབང་མི་མང་ཡོངས་ཀྱིས་དགའ་ལྡན་ཕོ་བྲང་ཡིག་ཚང་དུ་ཕུལ་ཡོད། ཅེས་འགྲེལ་བརྗོད་གནང་བྱུང་།
ཟླ་འདིའི་ཕྱི་ཚེས་ ༥ ཉིན་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་གྷ་གྷལ་གནམ་ཐང་བརྒྱུད་དྷ་སར་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་ཆེད་འབྱོར་ཡོད་པ་དང་། སྐབས་དེར་བོད་མིའི་སྒྲིག་འཛུགས་དང་གཞུང་ཁོངས་མིན་པའི་ཚོགས་སྡེ་ཁག་ནས་ཕེབས་བསུ་ཞུས་ཡོད་པ་མ་ཟད། ཉིན་རྒྱབ་ཏུ་རྒྱུད་སྟོད་དགོན་པར་མཆོད་མཇལ་ཞུས་ཡོད་ཅིང་། ད་ལན་བློན་ཆེན་ཁོང་ཉིན་གྲངས་ ༣ རིང་བཞུགས་སྒར་དྷ་རམ་ས་ལར་བཞུགས་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
