༧གོང་ས་རྒྱལ་བ་རིན་པོ་ཆེ་མཆོག་གིས་མི་མང་ཚང་མ་འཕགས་པ་སྤྱན་རས་གཟིགས་ཀྱི་རྗེས་སུ་བཟུང་སྟེ་འཕྲད་ལ་ཉེ་བའི་འདོད་དོན་ཐམས་ཅད་བདེ་བླག་ཏུ་འགྲུབ་པའི་སྐྱབས་འཇུག་ཞུ་ཡི་ཡོད་པའི་བཀའ་སློབ་བསྩལ།
དེ་རིང་ཕྱི་ཚེས་ ༧ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མོན་ཡུལ་གྱི་དད་ལྡན་མི་མང་ཡོངས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་སོང་། སྐབས་དེར་༧མགོན་པོ་གང་ཉིད་མཆོག་གིས། ང་ཚོ་བོད་ནས་ཁ་བྲལ་ནས་བཙན་བྱོལ་བ་ཆགས་པ་རེད། རྒྱ་གར་ནང་འགྲོ་དོན་རྒྱ་ཆེན་པོ་བྱས་ནས་བསྡད་པ་རེད། དེ་རིང་སྐབས་སུ་བབས་པ་མོན་པ་ལྷ་ལྡན་མི་རིགས་ཡོངས་ནས་བཞུགས་སྒར་དུ་ཆེད་དུ་བརྟན་བཞུགས་འབུལ་གྱི་ཡོད་པ་རེད། ངོས་རང་བོད་ནས་མོན་ཡུལ་བརྒྱུད་རྒྱ་གར་དུ་ཡོང་དུས། མོན་པ་ཚོས་དངོས་གནས་དྲང་གནས་དད་པ་ཆེན་པོ་བྱས་ཏེ། ངོས་རང་གི་ལྷམ་མགོར་མགོ་ཐུག་པ་སོགས་བྱས་སོང་། ང་ཚོ་བཙན་བྱོལ་དུ་ཐོག་མར་ཡོང་སྐབས་མོན་ལ་འབྱོར་བ་རེད། མོན་པ་ཚོས་དད་འདུན་ཆེན་པོ་བྱས་ཏེ་སེམས་འགུལ་ཐེབས་པ་ཞིག་བྱུང་། དེ་རིང་མོན་པ་ཚོས་བརྟན་བཞུགས་ཕུལ་གྱི་ཡོད་པ་རེད། ཁྱེད་རང་ཚོ་གཞིས་བྱེས་མི་མང་ཚང་མ་འཕགས་པ་སྤྱན་རས་གཟིགས་ཀྱི་རྗེས་སུ་བཟུང་སྟེ། འཕྲད་ལ་ཉེ་བའི་འདོད་དོན་ཐམས་ཅད་བདེ་བླག་ཏུ་འགྲུབ་པའི་སྐྱབས་འཇུག་ཞུ་ཡི་ཡོད། ཅེས་གསུངས་སོང་།
དགའ་ལྡན་ཕོ་བྲང་གི་མཛད་འཆར་ལྟར་ན། ཕྱི་ཟླ་ ༩ ཚེས་ ༡༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་ལྷོ་ཤར་ཨེ་ཤ་ཡའི་དད་ལྡན་ཆོས་ཞུ་བ་རྣམས་ཀྱིས་ཇི་ལྟར་གསོལ་བ་བཏབ་པ་ལྟར་ཟླ་ ༩ ཚེས་ ༡༢ ཉིན་གྱི་ཞོགས་པ་ཐེག་ཆེན་ཆོས་གླིང་གཙུག་ལག་ཁང་དུ་ཆོས་འབྲེལ་བཀའ་དྲིན་སྩལ་རྒྱུ་དང་། ཕྱི་ཟླ་ ༩ ཚེས་ ༡༨ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བོད་ཀྱི་བུད་མེད་ལྷན་ཚོགས་དང་། བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག ཌལ་ཧོར་སློབ་ཟུར་བཅས་ནས་བརྟན་བཞུགས་བསྟར་འབུལ་ཞུ་རྒྱུ། ༧གོང་ས་རྒྱལ་བ་རིན་པོ་ཆེ་མཆོག་ལ་ཐའེ་ཝན་གྱི་དད་ལྡན་ཆོས་ཞུ་བ་རྣམས་ཀྱིས་ཇི་ལྟར་གསོལ་བ་བཏབ་པ་ལྟར་ཕྱི་ཟླ་ ༩ ཚེས་ ༣༠ ནས་ཕྱི་ཟླ་ ༡༠ ཚེས་ ༡ བར་ཉིན་གཉིས་རིང་སྤྱོད་འཇུག་ཆེན་མོའི་ལེའུ་བརྒྱད་པའི་ཆོས་འབྲེལ་བཀའ་དྲིན་སྩལ་རྒྱུ་དང་། ཕྱི་ཟླ་ ༡༠ ཚེས་ ༢ ཉིན་བརྟན་བཞུགས་བསྟར་འབུལ་ཞུ་རྒྱུ་ཡིན། ཞེས་འཁོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
