༧གོང་ས་མཆོག་ནས་ཆོས་ཞེས་པ་ནི་ཚིག་ཙམ་མིན་པར་ལག་ལེན་ཐོག་ནས་ཉམས་ལེན་བྱེད་ཐུབ་ཚེ་འདྲ་འདྲ་ནང་ནས་མ་འདྲ་བ་ཞིག་ཆགས་ཀྱི་རེད་ཅེས་གསུངས།
དེ་རིང་ཕྱི་ཚེས་ ༢༦ ཉིན་བཞུགས་སྒར་རྒྱལ་བའི་ཕོ་བྲང་དུ། ༸གོང་ས་རྒྱལ་བ་རིན་པོ་ཆེ་མཆོག་ནས་ཐའེ་ཝན་གཙོས་པའི་ནང་པའི་བཙུན་མ་གྲངས་ ༤༠ ལྷག་ལ་དགེ་ཚུལ་གྱི་སྡོམ་པ་འབོག་ཆོག་མཛད་འདུག དེ་བཞིན་ཁ་སང་ཕྱི་ཚེས་ ༢༥ ཉིན་༸གོང་ས་རྒྱལ་བ་རིན་པོ་ཆེ་མཆོག་ནས་ཐའེ་ཝན་གཙོས་པའི་ནང་པའི་རྗེས་འབྲང་པ་གྲངས་ ༣༠ ལ་དགེ་ཚུལ་གྱི་སྡོམ་པ་འབོག་ཆོག་མཛད་ཡོད་འདུག
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། སྔོན་མ་ཆོས་ཚོགས་ཤིག་གི་སྐབས་སུ་སྟོན་པ་བཅོམ་ལྡན་འདས་ཀྱིས་ངོས་རང་ཡར་ཤོག་གསུངས་སོང་། ངོས་ཀྱང་བཅོམ་ལྡན་འདས་ཀྱི་འཁྲིས་སུ་བཅར་བ་ཡིན། བཅོམ་ལྡན་འདས་ལ་ཕུལ་རྒྱུ་གང་ཡང་མི་འདུག ཅོ་ཀོ་ལེ་ཀྲི་གཉིས་ཕུལ་བ་ཡིན། བཅོམ་ལྡན་འདས་ཀྱིས་ཧ་ཅང་མཉེས་པ་གནང་བྱུང་། ངོས་ཀྱི་སེམས་ནང་རང་ཉིད་བསྟན་པའི་རྗེས་སུ་འཛིན་མཁན་ཞིག་རེད་བསམ་བྱུང་། བོད་ནང་རྒྱ་གཞུང་གིས་དབང་བསྒྱུར་བྱས་ཏེ། ང་ཚོ་བཙན་བྱོལ་བ་ཆགས་པ་རེད། ཕྱོགས་གཅིག་ནས་བལྟས་ཚེ་སྐྱབས་མེད་མགོན་མེད་ཆགས་ཡོད་ཀྱང་། ཕྱོགས་གཞན་ནས་བལྟས་ཚེ་རང་དབང་ལྡན་པའི་ཐོག་ནས་སྟོན་པའི་ཞབས་འདེགས་བསྒྲུབ་མཁན་ཆགས་ཡོད་པས། ང་ཚོ་བསོད་ནམས་ཆེན་པོ་རེད། ད་ལྟ་བར་དུ་ཚང་མས་ཧུར་ཐག་བྱས་སོང་། ད་དུང་ཡང་ཧུར་ཐག་བྱ་རྒྱུ་གལ་ཆེན་པོ་རེད། ཆོས་ཞེས་པ་ནི་ཁ་དང་ཚིག་ཙམ་མིན་པར་ལག་ལེན་དང་ཉམས་ལེན་གྱི་ཐོག་ནས་བྱེད་ཐུབ་ཚེ་འདྲ་འདྲ་ནང་ནས་མ་འདྲ་བ་ཞིག་ཆགས་ཀྱི་རེད། ཅེས་གསུངས་སོང་།
དེ་བཞིན་ཕྱི་ཚེས་ ༢༤ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་ཧི་མ་ཅལ་མངའ་སྡེའི་ཀངྒ་རཱ་རྫོང་གི་རྫོང་དཔོན་སྐུ་ཞབས་ཧེམ་རཱཇ་བེ་ར་བཱ་ (Hemraj Bairwa) ལགས་དང་། རྫོང་དཔོན་གཞོན་པ་སྐུ་ཞབས་སོ་རབ་ཇ་སལ་ (Saurabh Jassal) ལགས། སྐུ་ཞབས་ཧ་རིཤི་གྷ་ཇུ་(Dr. Harrish Gajju) ལགས། སྐུ་ཞབས་སཱན་ཇེ་ཝ་བྷོ་ཊ་(Sanjeev Bhott) ལགས་བཅས་ནས་མཇལ་བཅར་ཞུས་འདུག་ལ། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། རྒྱ་གར་ནི་གཏན་སྡོད་ཀྱི་ཕ་ཡུལ་ཡིན་པའི་ཚོར་སྣང་དང་། དྷ་རམ་ས་ལ་ནི་འཛམ་གླིང་གི་ཡུལ་སྐོར་ཡོང་སའི་མཛེས་སྡུག་ལྡན་པའི་ས་ཆ་ཞིག་ཡིན་པར་བསྔགས་བརྗོད། དྷོ་ལ་དྷར་ནི་བོད་ནང་གི་རི་བོར་འདྲ་བ་མ་ཟད། པོང་མཚེའུ་ཡིས་བོད་ནང་གི་ལྷ་མོ་བླ་མཚོ་དྲན་གསོ་གཏོང་བའི་སྐོར་གསུངས་འདུག
མཛད་འཆར་ལྟར་ན། ཐའེ་ཝན་གྱི་དད་ལྡན་ཆོས་ཞུ་བ་རྣམས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་ལ་ཇི་ལྟར་གསོལ་བ་བཏབ་པ་ལྟར། ཟླ་འདིའི་ཕྱི་ཚེས་ ༣༠ ཉིན་གྱི་སྔ་དྲོ་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་ཆོས་འབྲེལ་བཀའ་དྲིན་སྩལ་རྒྱུ་དང་། ཕྱི་ཟླ་ ༡༠ པའི་ཚེས་ ༡ ཉིན་གྱི་སྔ་དྲོ་ཐའེ་ཝན་གྱི་དད་ལྡན་མི་མང་གིས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་།
