སྲིད་སྐྱོང་མཆོག་གིས་ཐའེ་ཝན་གྱི་སྲིད་འཛིན་ཟུར་པ་ལྕམ་ཚའེ་ཡེ་ཝན་དང་མཇལ་འཕྲད་གནང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཡུ་རོབ་ཀྱི་རྒྱལ་ཁབ་ཁག་བཞིའི་ནང་གི་གནད་ཡོད་མི་སྣ་ཁག་ཅིག་ལ་མཇལ་འཕྲད་གནང་ཡོད་འདུག

ཕྱི་ཟླ་ ༡༠ ཚེས་ ༦ ནས་ ༡༥ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་སུད་སི་དང་། ནི་ཐར་ལེན་ཌི།   ལུ་ཛམ་བྷོར་གྷ། ཅེཀ་སྤྱི་མཐུན་རྒྱལ་ཁབ་བཅས་སུ་གཞུང་འབྲེལ་སྐོར་སྐྱོད་གནང་བཞིན་ཡོད་པ་ལྟར།  ཁ་སང་ཕྱི་ཚེས་ ༡༣ ཉིན་སྲིད་སྐྱོང་མཆོག་གིས་ཅེཀ་བོད་དོན་རྒྱབ་སྐྱོར་ཚོགས་པའི་སྐུ་ཚབ་མི་སྣ་དང་། པོ་ཏ་ལ་ཧི་མ་ལ་ཡ་ལྟེ་གནས་ཁང་གི་ལྕམ་ཛུ་རྫ་ནཱ་(Zuzana)ལགས།  རླུང་རྟ་ཚོགས་པའི་ལྕམ་ཨེ་ཌི་ཏ་(Edita Kleckerová) ལགས་བཅས་སུ་མཇལ་འཕྲད་གནང་ཡོད་པ་མ་ཟད། ཨ་རིའི་རླུང་འཕྲིན་ཁང་གི་གསར་འགོད་པ་ལཱིམ་སི་ཁོ་ཌི་དང་ཇེ་སི་ཁཱ་ཇེ་རི་ཌི་གཉིས་ཀྱི་ལྷན་དུ་རྒྱ་ནག་གིས་རྒྱལ་ཁོངས་ལས་བརྒལ་བའི་དྲག་གནོན་དང་། བོད་དང་ཅེཀ་སྤྱི་མཐུན་རྒྱལ་ཁབ་གཉིས་བར་གྱི་འབྲེལ་ལམ་སྐོར་ལ་བཅར་འདྲི་གནང་ཡོད་འདུག

ཕྱི་དྲོ་ཅེཀ་སྤྱི་མཐུན་རྒྱལ་ཁབ་ཀྱི་ཉིས་སྟོང་ཞི་བདེ་གླེང་སྟེགས་ཐེངས་ ༢༨ པའི་གཟེངས་རྟགས་མཛད་སྒོ་འཚོགས་ཡོད་ཅིང་།  ཚོགས་ཐོག་ཏུ་སྲིད་སྐྱོང་མཆོག་གིས་ཐའེ་ཝན་གྱི་སྲིད་འཛིན་ཟུར་པ་ལྕམ་ཚའེ་ཡེ་ཝན་མཆོག་དང་། ཨར་ཇེན་ཌི་ནའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ཧྥར་ནན་ཌོ་ཨེ་གྷི་ལེ་སི་ (Fernando Iglesias) ལགས། ཅེག་སྤྱི་མཐུན་རྒྱལ་ཁབ་ཏུ་ཡོད་པའི་ཨར་ཇེན་ཌི་ནའི་གཞུང་ཚབ་ཁི་་ལོ་ཌོ་ཇ་བིར་ (Claudio Javier Rozencwaig) ལགས་སོགས་དང་མཇལ་འཕྲད་གནང་འདུག

ཟླ་འདིའི་ཕྱི་ཚེས་ ༡༢ ཉིན་ལུ་ཛམ་བྷོར་གྷ་རྒྱལ་ཁབ་དུ་སྲིད་སྐྱོང་མཆོག་གིས་ཁྲིམས་དོན་བློན་ཆེན་ཟུར་བ་དང་གྲོས་ཚོགས་འཐུས་མི་སྐུ་ཞབས་སཱམ་ཌིན་སིན་ལགས། གྲོས་ཚོགས་འཐུས་མི་ཌེ་ཇུ་ནཱ་བྷེར་ནཱར་ཌི་ལགས་གཉིས་ལ་མཇལ་འཕྲད་གནང་ཡོད་འདུག ཟླ་འདིའི་ཕྱི་ཚེས་ ༡༠ ཉིན་ལུ་ཛམ་བྷོར་གྷ་གནམ་ཐང་དུ་སྲིད་སྐྱོང་མཆོག་ཕེབས་འབྱོར་བྱུང་བར་ས་གནས་བོད་མི་རྣམས་ཀྱིས་ཕེབས་བསུ་ཞུས་ཡོད་ཅིང་། ཉིན་གུང་ཡུ་རོབ་གྲོས་ཚོགས་འཐུས་མི་ཟུར་པ་དང་ཡུ་རོབ་རྩིས་ཞིབ་ཚོགས་པའི་ཚོགས་མི་ལྕམ་ལཱི་མ་ཨན་ཌི་ཀེ་ནེ་(Laima Andrikiene) ལགས་ཀྱིས་སྲིད་སྐྱོང་མཆོག་ལ་གུང་ཚིགས་མགྲོན་འབོད་ཞུས་པ་དང་།  སྐབས་དེར་ལྕམ་ལའི་མ་ལགས་ཀྱིས་ལི་ཐུ་ནེ་ཡཱའི་ལོ་རྒྱུས་དང་སྦྲགས་ནས། མ་འོངས་བར་བོད་མི་རྣམས་ལའང་བདེ་སྐྱིད་ཀྱི་ཉི་མ་འཆར་ངེས་པ་དང་། ཁོང་མོས་བོད་དོན་ཐོག་མུ་མཐུད་རྒྱབ་སྐྱོར་བྱ་རྒྱུ་ཡིན་པའི་ཞལ་བཞེས་གནང་འདུག  དེ་བཞིན་སྲིད་སྐྱོང་སྤེན་པ་ཚེ་རིང་མཆོག་ནས་བོད་ཀྱི་རང་དབང་འཐབ་རྩོད་ཆེད་སྐུ་ལས་བསྐྱོན་པར་བསྔགས་བརྗོད་དང་བསྟུན། ༧གོང་ས་མཆོག་གི་སྐུའི་གོ་སྟོན་ལ་ཁོང་མོར་མགྲོན་འབོད་གནང་ཡོད་འདུག

ཉིན་དེའི་དགོང་མོ་ལུ་ཛམ་བྷོར་གྷ་བོད་དོན་རྒྱབ་སྐྱོར་ཚོགས་པའི་ (Les Amis du Tibet) ཚོགས་པའི་ཚོགས་གཙོ་ཕི་རི་བྷུ་མན་ (Pierre Baumann) ལགས་གཙོས་ཚོགས་མི་རྣམས་ལ་ཐུག་འཕྲད་གནང་ཡོད་པ་མ་ཟད། ཚོགས་པ་དེའི་གོ་སྒྲིག་འོག  སྲིད་སྐྱོང་མཆོག་གི་བོད་དོན་འཐབ་རྩོད་སྐོར་གྱི་གཏམ་བཤད་གནང་ཡོད་ཅིང་། སྐབས་དེར་སྲིད་སྐྱོང་མཆོག་ནས་བོད་ཀྱི་མཐོ་སྒང་གི་ཁོར་ཡུག་དང་། ས་ཁམས་ཆབ་སྲིད་ཀྱི་གལ་གནད་གཙོ་བོར་གྱུར་བའི་བོད་ཀྱི་ཆོས་དང་རིག་གཞུང་གི་གལ་གནད་སྐོར་དང་། རྒྱ་གཞུང་གིས་བོད་ཙམ་མ་ཡིན་པར་འཛམ་གླིང་སྤྱི་ལ་དྲག་གནོན་བྱེད་བཞིན་ཡོད་པས། གནད་དོན་དེ་རིགས་དོ་ནན་བྱ་དགོས་པའི་གལ་གནད་སྐོར་ནས་གསུངས་ཡོད་པ་མ་ཟད། ཚོགས་བཅར་བའི་དྲི་བར་ལན་འདེབས་གསལ་བཤད་གནང་འདུག

ཕྱི་ཟླ་ ༡༠ ཚེས་ ༩ ཉིན་ནི་ཌར་ལེན་ཌི་གྲོས་ཚོགས་ཁང་དུ།  སྲིད་སྐྱོང་མཆོག་གིས་ནི་ཌར་ལེན་ཌི་ཕྱི་འབྲེལ་ལས་དོན་ཚོགས་ཆུང་གི་སྐུ་ཞབས་ཇེ་སི་ཀ་ལ་ཝེར་ (Jesse Klaver) ལགས་གཙོས་པའི་ཚོགས་མི་རྣམས་དང་མཇལ་འཕྲད་གནང་ཡོད་ཅིང་། དེ་ནས་ནི་ཌར་ལེན་ཌི་འགྲོ་བ་མིའི་ཐོབ་ཐང་གི་གཞུང་ཚབ་སྐུ་ཞབས་ཝིམ་གྷི་རིཊ་ (Wim Geert) ལགས་དང་མཇལ་འཕྲད་གནང་སྟེ། བོད་ནང་གི་ཛ་དྲག་གནས་སྟངས་དང་། ལྷག་པར་ཁམས་སྡེ་དགེ་ཁུལ་ནས་ཉེ་ལམ་རྒྱ་ནག་གཞུང་གིས་བོད་མི་འཛིན་བཟུང་བཙོན་འཇུག་བྱས་པ་རྣམས་གློད་བཀྲོལ་ཡོང་ཐབས་ཐད་ཞུ་གཏུག་གནང་འདུག བསམ་མཛོད་བསྟི་གནས་ཁང་གི་ཆབ་སྲིད་ངེས་སྟོན་པ་ཧན་ཊེན་བྲོག་ (Han ten Broek) ལགས་དང་། ལས་འཆར་འགན་འཛིན་གཞོན་པ་བྷི་རེན་ཌི་ཀྭག་ (Berend Kwak) ལགས། སློབ་གཉེར་བ་སོགས་ཀྱི་མཉམ་དུ་འཛམ་གླིང་གི་ཡང་རྩེ་བོད་མཐོ་སྒང་གི་གལ་གནད་སྐོར་བགྲོ་གླེང་གནང་འདུག དེ་བཞིན་ནི་ཌར་ལེན་ཌིའི་གྲོང་ཁྱེར་ཧེག་ཏུ་ཡོད་པའི་ཡུ་གུར་དང་། ལྷོ་སོག ཧོང་ཀོང་བཅས་ཀྱི་གཞུང་ཁོངས་མིན་པའི་ཚོགས་པ། རྒྱལ་སྤྱིའི་བོད་རང་བཙན་སློབ་ཕྲུག་ཚོགས་པ། བོད་རིགས་ཚོགས་པའི་ཚོགས་མི་དང་ལྷན་མཇལ་མོལ་གནང་ཡོད་འདུག

དེ་བཞིན་ཕྱི་ཚེས་ ༨ ཉིན་སུད་སུ་ཛུ་རིག་གྲོང་ཁྱེར་དུ། ཕྱི་ལོ་ ༢༠༢༤ ལོའི་ཛུ་རིག་གློག་བརྙན་དུས་སྟོན་འཚོགས་ཡོད་ཅིང་། ༧གོང་ས་རྒྱལ་བ་རིན་པོ་ཆེ་མཆོག་གི་མཛད་རྣམ་དངོས་བྱུང་གློག་བརྙན་བདེ་སྐྱིད་ཀྱི་ཤེས་རབ་ཞེས་པ་ཐོག་མར་གཟིགས་འབུལ་ཞུས་ཡོད་པ་དང་།  དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག ༧སྐུའི་གཅུང་མོ་ཨ་མ་རྗེ་བཙུན་པདྨ་མཆོག ཨ་རིའི་ཧོ་ལི་ཝིར་ཌི་གློག་བརྙན་འཁྲབ་སྟོན་པ་གྲགས་ཅན་བོད་དོན་རྒྱབ་སྐྱོར་བ་རི་ཆར་ཌི་གྷར་(Richard Gere) ལགས་དང་། སུད་སིའི་གློག་བརྙན་འཁྲབ་ཁྲིད་པ་བྷར་བྷ་རཱ་མི་ལིར་( Barbara Miller)ལགས་སོགས་མཉམ་ཞུགས་གནང་ཡོད་འདུག སྲིད་སྐྱོང་མཆོག་ནས་སེམས་ཀྱི་རང་དབང་དང་འགྲོ་བ་མིའི་གཅིག་གྱུར་ཡིན་པའི་སྐོར་གསུངས་བཤད་གནང་འདུག

གསར་འགོད་པ། བྱམས་པ་ཚེ་རིང་།