བོད་ཕྲུག་ཁྱིམ་སྡེ་དབུ་བརྙེས་ནས་མི་ལོ་ ༦༤ འཁོར་བའི་དུས་དྲན་སྲུང་གཙི་ཞུས།

སྐྱབས་རྗེ་ཟམ་གདོང་རིན་པོ་ཆེ་མཆོག་ནས་རྗེས་དྲན་ཉིན་མོ་ནི་འདས་པའི་ལོ་གྲངས་ནང་སྐྱོན་དང་ཡོན་ཏན་གཉིས་ལ་བསྐྱར་ཞིབ་བྱེད་པའི་དུས་ཚིགས་ཁྱད་པར་བ་ཞིག་ཆགས་ཡོད་ཅེས་གསུངས།

དེ་རིང་དྷ་སྟེང་བོད་ཁྱིམ་སློབ་གྲྭར་བོད་ཕྲུག་ཁྱིམ་སྡེ་དབུ་བརྙེས་ཏེ་མི་ལོ་ ༦༤ འཁོར་བའི་དུས་དྲན་སྲུང་གཙི་ཞུས་པ་དང་། སྐབས་དེར་སྐུ་མགྲོན་གཙོ་བོ་བཀའ་ཟུར་ཟམ་གདོང་རིན་པོ་ཆེ་མཆོག་དང་། བོད་མིའི་སྒྲིག་འཛུགས་ཀྱི་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་ཕྲུག་ཁྱིམ་སྡེའི་སྤྱི་ཁྱབ་གཙོ་འཛིན་བསོད་ནམས་སྲི་ཆོས་ལགས། བོད་མིའི་སྒྲིག་འཛུགས་ཀྱི་དྲུང་ཆེ་རྣམ་པ། སློབ་ཕྲུག་དང་མི་མང་སོགས་འཛོམས་འདུག

ཐོག་མར་བོད་ཁྱིམ་སྤྱི་ཁྱབ་གཙོ་འཛིན་བསོད་ནམས་སྲི་ཆོས་ལགས་ཀྱིས་བོད་ཕྲུག་ཁྱིམ་སྡེའི་ལས་སྡོམ་སྙན་སྒྲོན་གནང་གྲུབ་མཚམས། བོད་མིའི་སྒྲིག་འཛུགས་ཀྱི་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས། རྒྱ་ནག་གཞུང་གིས་བོད་ནང་དུ་ཡོད་པའི་བོད་པའི་སློབ་གྲྭ་ཁག་རྩ་མེད་ཀྱིས། བོད་པའི་སྐད་ཡིག་དང་རིག་གཞུང་རྩ་མེད་དང་རྒྱ་སྒྱུར་གྱི་སྲིད་བྱུས་ངན་པ་སྤེལ་དང་སྤེལ་མུས་ཡིན་པས། བཙན་བྱོལ་དུ་ཡོད་པའི་བོད་པའི་སློབ་ཕྲུག་རྣམས་ནས་གནད་དོན་དེ་དག་དྲན་པའི་ཐོག་ནས་བོད་ཀྱི་སྐད་དང་རིག་གཞུང་ལ་སྦྱང་བརྩོན་གྱིས་མི་ཉམས་རྒྱུན་འཛིན་དང་ཉམས་པ་སླར་གསོའི་ཐད་འབད་དགོས་པ་ནི་ཤིན་ཏུ་གལ་ཆེན་པོ་ཡིན་ལ། ལྷག་དོན་དུ་ལོ་མང་ནས་བུ་ཕྲུག་ཁྱིམ་སྡེའི་ནང་དུ་སྐུ་ལས་ཚད་མེད་བསྐྱོན་མཁན་གྱི་སྐུའི་གཅེན་མོ་ཚེ་རིང་སྒྲོལ་མ་ལགས་དང་ཨ་མ་རྗེ་བཙུན་པདྨ་ལགས་གཙོས་པའི་དགེ་ལས་ཡོངས་ལ་བོད་མིའི་སྒྲིག་འཛུགས་ཀྱི་ངོས་ནས་རྗེས་སུ་ཡི་རངས་དང་བསྔགས་བརྗོད་ཡོད། ཅེས་སོགས་གསུངས་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། སློབ་གྲྭ་ནི་སློབ་མའི་སློབ་སྦྱོང་དང་རྣམ་དཔྱོད་གོང་འཕེལ་གཏོང་ས་ཞིག་ཡིན་པས། ཕ་མ་ཚོས་རང་ཉིད་ཀྱི་བུ་ཕྲུག་གི་ཤེས་བྱ་ཡར་ཐོན་ཡོད་པ་ཆགས་རྒྱུའི་རེ་བ་དང་འདུན་པ་བཅངས་ཏེ་ཕྲུ་གུ་སློབ་གྲྭ་གཏོང་བཞིན་ཡོད། དོན་དངོས་སུ་དེ་ལྟ་བུ་རེ་བའི་ས་བོན་ལ་འབྲས་བུ་བཟང་པོ་ཞིག་སྨིན་ནས་སློབ་མ་ཚོ་འདུན་ལམ་གསར་སྐྲུན་གནང་མཁན་དགེ་རྒན་རྣམ་པ་ཡིན། སྤྱིར་མི་རིགས་དང་སྤྱི་ཚོགས་ཀྱི་གནས་བབ་ལ་རེག་ལས་ཞིང་། ང་ཚོས་དུས་རྒྱུན་དུ་ཕྲུ་གུ་ཚོར་མ་འོངས་བོད་ཀྱི་སོན་རྩ་ཁྱོད་ཚོ་རེད་ཅེས་བརྗོད་བཞིན་པ་ལྟར། སློབ་མ་ནི་མི་རིགས་ཤིག་གི་རེ་བ་བཅོལ་ས་ཞིག་ཡིན་པས། དགེ་རྒན་གྱི་ལས་གནས་དང་བྱ་བཞག་རང་ག་བ་ཞིག་མ་ཡིན་པར་ཀུན་གྱིས་བརྩེ་དུང་བྱ་ཡུལ་རླབས་ཆེན་ཞིག་ཡིན་པར་སོང་། དགེ་རྒན་ལ་གུས་འདུད་ཞུ་ཆེད་དགེ་རྒན་གྱི་ཉིན་མོར་སྲུང་གཙི་བྱེད་བཞིན་ཡོད། ལྷག་པར་དུ་བོད་མིའི་སྲོལ་རྒྱུན་གྱི་ལམ་སྲོལ་དུ་དགེ་རྒན་ལ་ཆེ་མཐོང་དང་གུས་བཀུར་བྱེད་བཞིན་ཡོདཔ་མ་ཟད། དགེ་རྒན་ལ་བསྟོད་པའི་ཆེ་བསྟོད་ཀྱི་སྙན་ཚིག་ཀྱང་ཧ་ཅང་མང་པོ་མཐོང་རྒྱུ་ཡོད། དེར་བརྟེན། དགེ་རྒན་རྣམས་ཀྱིས་རང་ཉིད་ཀྱི་འགན་འཁྲི་དང་རླབས་ཆེན་བྱ་བཞག་བཅས་མཐོང་ཆུང་མ་བཏང་པར་བརྩི་མཐོང་དང་གདེང་འཇོག་ཆེན་པོས་སློབ་ཕྲུག་གི་བློ་རིག་ཆོག་དམན་ལ་གཞི་སྟེ། གང་ལ་གང་འདོད་ཀྱིས་ཐབས་ཤེས་སྣ་ཚོགས་ཐོག་ནས་ཉེ་རིང་མེད་པར་ཕ་མ་གཅིག་གི་བུ་ཕྲུག་ལྟར། སློབ་ཕྲུག་གི་ཡར་ཐོན་འཇགས་ཐབས་སུ་ཤེས་ཡོན་ལ་སྤྲོ་སྣང་ཡོང་བའི་འཛིན་སྐྱོང་གནང་དགོས་རྒྱུ་ཧ་ཅང་གལ་ཆེན་ཡིན། ཞེས་གསུངས་སོང་།

སློབ་དཔོན་ཟམ་གདོང་རིན་པོ་ཆེ་མཆོག་ནས། མི་སུ་ཞིག་ཡིན་ཡང་སོ་སོའི་སྐྱེས་ཚེས་དེ་རྗེས་དྲན་བྱེད་བཞིན་ཡོད། སྒྲིག་འཛུགས་དང་ཚོགས་སྡེ་ཁག་གི་ནང་དུ་དབུ་འཛུགས་ཀྱི་དུས་ཆེན་དེ་ལོ་གྲངས་རེ་རེ་བཞིན་རྗེས་དྲན་གནང་བཞིན་ཡོད། ལྷག་པར་དུ་བོད་ཕྲུག་ཁྱིམ་སྡེ་དབུ་བརྙེས་པའི་དུས་ཚོད་ཕྱི་ཟླ་ ༡༠ ཚེས་ ༢༢ ཉིན་འཁེལ་ཡོད་དུས། འདས་བའི་ལོ་མང་པོའི་རིང་ལོ་ལྟར་རྗེས་དྲན་གནང་བཞིན་ཡོད་པ་དང་། རྗེས་དྲན་ཉིན་མོར་ཕུན་སུམ་ཚོགས་པའི་མཛད་སྒོ་ཞིག་འཚོག་བཞིན་ཡོད་པ་ཡོངས་གྲགས་རེད། ང་ཚོས་ངེས་པར་དུ་བསམ་ཤེས་བྱེད་དགོས་པ་ཞིག་ལ་མགོ་བཙུགས་བྱེད་པའི་ཉིན་མོར་རྗེས་དྲན་བྱེད་དགོས་པའི་དགོས་པ་དང་དམིགས་ཡུལ་གཙོ་བོ་ག་རེ་ཡིན་པ་མཁྱེན་དགོས་པ་གལ་ཆེན་པོ་རེད། དེའི་དགོས་པ་དང་དམིགས་ཡུལ་གཙོ་བོ་དེ་གཞུང་ལུགས་ཀྱི་སྐད་བཞིན་བཤད་ན་དབུ་བརྙེས་པའི་ཉིན་མོ་ནས་བཟུང་ད་ལྟ་བར་འདས་བའི་ལོ་གྲངས་ནང་དུ་གྲུབ་འབྲས་གང་ཐོན་ཡོད་མེད་དང་། དཀའ་ངལ་གང་འཕྲད་ཡོད་མེད། གྲུབ་འབྲས་མ་ཐོན་པ་དང་ནོར་འཁྲུལ་གང་བྱུང་ཡོད་མེད། སྐྱོན་དང་ཡོན་ཏན་གཉིས་ལ་བསྐྱར་ཞིབ་བྱེད་པའི་དུས་ཚིགས་ཁྱད་པ་ཞིག་འཁེལ་གྱི་ཡོད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ།