རྒྱལ་ཁབ་ ༡༥ ཡིས་བོད་དོན་དང་འབྲེལ་བའི་མཉམ་འབྲེལ་བསྒྲགས་གཏམ་སྤེལ།

རྒྱལ་ཚོགས་ཀྱི་ཚོགས་མི་རྒྱལ་ཁབ་ ༡༥ ཡིས་རྒྱ་ནག་གིས་བོད་དང་ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་སེམས་འཚབ་ཡོད་པའི་མཉམ་འབྲེལ་བསྒྲགས་གཏམ་ཞིག་སྤེལ་འདུག

James Martin Larsen, Australia’s Ambassador and Permanent Representative to the United Nations, delivers a joint statement on human rights abuses in Tibet and East Turkistan. Photo source: UN Web TV

མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ ༡༥ ཡིས་རྒྱ་ནག་གཞུང་གིས་བོད་དང་ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ཐད་སེམས་འཚབ་ཡོད་པའི་མཉམ་འབྲེལ་བསྒྲགས་གཏམ་སྤེལ་ཡོད་པ་དང་འབྲེལ། རྒྱ་ནག་ཕྱི་སྲིད་ལྷན་ཁང་གིས་ཨོ་གླིང་གཙོ་བྱས་པའི་རྒྱལ་ཁབ་དེ་དག་ལ་སྐྱོན་བརྗོད་བྱས་འདུག

ཟླ་འདིའི་ཕྱི་ཚེས་ ༣ ནས་ཕྱི་ཟླ་ ༡༡ ཚེས་ ༢༢ བར་ཨ་རིའི་གྲོང་ཁྱེར་ནེའུ་ཡོག་ཏུ་མཉམ་འབྲེལ་རྒྱལ་ཚོགས་ཀྱི་དཔལ་འབྱོར་དང་སྤྱི་ཚོགས། རིག་གཞུང་ཐོབ་ཐང་ཚོགས་ཆུང་གི་བསྐྱར་ཞིབ་ཚོགས་ཆེན་ཐེངས་ ༧༩ པ་འཚོག་མུས་ཡིན་པ་ལྟར། ཕྱི་ཚེས་ ༢༢ ཉིན་ཚོགས་ཆེན་སྟེང་རྒྱལ་སྤྱིའི་ཁྲོད་ཀྱི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་ཐོག་བསྐྱར་ཞིབ་གནང་ཡོད་ཅིང་། སྐབས་དེར་ཨ་རི་དང་ཨོ་གླིང་། ཉི་ཧོང་། ཁེ་ན་ཌ། དབྱིན་ཡུལ་སོགས་མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ ༡༥ ཡིས། རྒྱ་ནག་གཞུང་གིས་བོད་དང་ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནད་དོན་ཐད་སེམས་འཚབ་ཡོད་པའི་མཉམ་འབྲེལ་བསྒྲགས་གཏམ་ཞིག་སྤེལ་ཡོད་འདུག

ཨོ་གླིང་གི་སྐུ་ཚབ་དང་མཉམ་འབྲེལ་རྒྱལ་ཚོགས་ཀྱི་གཏན་འཇགས་ཚོགས་མི་ཇེམ་སི་ (James Larsen) ལགས་ཀྱིས་ཚོགས་མི་རྒྱལ་ཁབ་ ༡༥ ཡི་ཚབ་བྱས་ཏེ་བསྒྲགས་གཏམ་ཞིག་སྤེལ་ཡོད་པའི་ནང་། རྒྱ་ནག་གིས་བོད་དང་ཤར་ཊུར་ཀི་སི་ཐན་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་དང་གཏོང་མུས་ཡིན་པ་མ་ཟད། བོད་མི་དང་ཡུ་གུར་ཁ་ཆེ་བ་རྣམས་ཀྱི་ཆོས་དད་རང་དབང་དང་རིག་གཞུང་། སྐད་ཡིག་སོགས་ཀྱི་ཐོབ་ཐང་ལ་དྲག་གནོན་ཤུགས་ཆེན་བྱེད་བཞིན་པར་བློ་འཚབ་ཡོད་པ་གསལ་འདོན་དང་། རྒྱ་ནག་གིས་ཁུལ་དེའི་མི་མང་བཙན་གྱིས་འཛིན་བཟུང་བཀག་ཉར་བྱེད་པ། འགྲོ་སྐྱོད་རང་དབང་ལ་ཚོད་འཛིན་དང་། བཙན་དབང་གིས་ངལ་རྩོལ་སྒྱུར་བཀོད་ཁང་དུ་བཅུག་པ། བོད་ཕྲུག་རྣམས་ཕ་མ་དང་ཁ་བྲལ་དུ་བཏང་སྟེ་བཅའ་སྡོད་སློབ་གྲྭར་བཅུག་པ་སོགས་ཀྱི་གནས་སྟངས་ཐེར་འདོན་བྱས་ཏེ། རྒྱ་ནག་གཞུང་གིས་བོད་དང་ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་རྣམས་མཚམས་འཇོག་དགོས་པ་དང་། རྒྱལ་ཚོགས་ཀྱི་ཁྲིམས་དང་རྩ་འཛིན་ཁག་ལག་བསྟར་བྱེད་པའི་ཐོག་ནས་ཁྲིམས་འགལ་གྱིས་འཛིན་བཟུང་བྱས་པའི་བོད་མི་དང་ཡུ་གུར་བ་རྣམས་འཕྲལ་དུ་ཀློད་གྲོལ་གཏོང་དགོས་པའི་དགོས་འདུན་བཏོན་འདུག

རྒྱ་གཞུང་གིས་བོད་དང་ཤར་ཊུར་ཀི་སི་ཐན་གཙོས་པའི་གྲངས་ཉུང་མི་རིགས་རྣམས་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་ཐོག་དམ་དྲག་ཤུགས་ཆེན་བྱས་དང་བྱེད་མུས་ཡིན་ཞིང་། རྒྱ་ནག་གཞུང་གིས་བོད་པའི་བྱིས་པ་རྣམས་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲད་པ་བརྒྱུད་བོད་མིའི་ངོ་བོ་རྩ་མེད་བཟོ་ཐབས་ཀྱི་སྲིད་ཇུས་འདྲ་མིན་ལག་བསྟར་བྱེད་བཞིན་པར་བློ་འཚབ་ཡོད་པ་གསལ་སྟོན་དང་། རྒྱ་ནག་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་གྲོས་མཐུན་དང་རྩ་ཁྲིམས་ལ་བརྩི་བཀུར་དང་། མཉམ་འབྲེལ་རྒྱལ་ཚོགས་ཀྱི་རྟོག་ཞིབ་མི་སྣ་དབུས་པའི་ཨ་རི་དང་ནུབ་ཕྱོགས་རྒྱལ་ཁབ་ཁག་གི་རྟོག་ཞིབ་པ་དང་གསར་འགོད་པ་རྣམས་ལ་ཆ་རྐྱེན་གང་ཡང་མེད་པར་བོད་དང་ཤར་ཊུར་ཀི་སི་ཐན་ནང་དུ་བསྐྱོད་ཆོག་པའི་ཐོབ་ཐང་སྤྲོད་དགོས་ལ། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གིས་བོད་དང་ཤར་ཊུར་ཀི་སི་ཐན་ནང་གི་གནས་སྟངས་དང་འབྲེལ་བའི་ལམ་སྟོན་རྣམས་ལག་བསྟར་བྱ་དགོས་པའི་ནན་སྐུལ་ཞུས་འདུག

སྐབས་དེར་རྒྱ་ནག་གཞུང་གིས། མཉམ་འབྲེལ་རྒྱལ་ཚོགས་ཀྱི་ལྷན་ཚོགས་དེའི་ཐོག་འཛམ་གླིང་རྒྱལ་ཁབ་ ༡༥ ཡིས་བོད་དང་ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཞན་པོ་ཡོད་པའི་གནད་དོན་ལ་ངོས་ལེན་རྩ་བ་ནས་མེད་པ་དང་། གནད་དོན་དེ་དག་ནི་རྒྱ་ནག་གི་ནང་སྲིད་ཀྱི་གནད་དོན་ཡིན་པར་བརྟེན། ནུབ་ཕྱོགས་རྒྱལ་ཁབ་ཁག་གིས་གནད་དོན་དེ་འགྲོ་བ་མིའི་ཐོབ་ཐང་གི་ངོ་བོར་བསྒྱུར་ན་འགྲིག་གི་མེད་པའི་ཉེན་བརྡ་བཏང་ཡོད་འདུག་ལ། དེ་འབྲེལ་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལིན་ཅེན་ (Lin Jian) གྱིས། བོད་དང་ཤར་ཊུར་ཀི་སི་ཐན་དང་འབྲེལ་བའི་གནད་དོན་དེ་དག་རྒྱ་ནག་གི་ནང་སྲིད་གནད་དོན་ཞིག་ཡིན་ཚུལ་དང་། ཨོ་གླིང་ནི་དུས་ཡུན་རིང་པོའི་མི་རིགས་དབྱེ་འབྱེད་ཀྱི་ལྟ་བ་དང་ཞེ་སྡང་ལྡན་པའི་ལམ་ལུགས་ཀྱིས་བཙན་བྱོལ་བ་དང་གནས་སྤོ་བ་རྣམས་ཀྱི་ཐོབ་ཐང་གཏོར་བཤིག་ཚབས་ཆེན་བཏང་ཡོད་ལ། གདོད་མའི་མི་མང་གི་འཚོ་བའི་གནས་སྟངས་ཉེན་ཚབས་ཅན་དུ་བསྒྱུར་ཡོད། ཅེས་དང་། ཨོ་གླིང་གི་དམག་མིས་མཚོ་ཐོག་ནས་དམག་དོན་ལས་འགུལ་སྤེལ་སྐབས་ཨབ་གྷ་ནི་སི་ཐན་དང་རྒྱལ་ཁབ་གཞན་གྱི་ནང་དུ་ནག་ཉེས་བསགས་ཡོད་པ་མ་ཟད། ནུབ་ཕྱོགས་རྒྱལ་ཁབ་ཁག་གིས་རྒྱལ་ཁབ་སོ་སོའི་ནང་དུ་འགྲོ་བ་མིའི་ཐོབ་ཐང་གི་གནད་དོན་ཚབས་ཆེན་འབྱུང་མུས་ཡིན་པའི་ཐད་སྣང་མེད་གཏོང་སྟེ། རྒྱལ་ཁབ་གཞན་གྱི་ནང་སྲིད་ལ་ཐེ་གཏོགས་བྱེད་ཀྱི་ཡོད་སྐོར་སོགས་བརྗོད་འདུག

གསར་འགོད་པ། བསྟན་འཛིན་ཕུར་བུ།