རྒྱ་གར་ཧིན་རྡུའི་ཆོས་ལུགས་ཀྱི་མར་མེའི་དུས་ཆེན་ལ་བོད་མིའི་སྒྲིག་འཛུགས་དང་བོད་མི་མང་སྤྱི་འཐུས་ཚོགས་གཙོ། དེ་བཞིན་དྷ་ས་ས་གནས་མགོ་འཛིན་དང་བོད་མི་མང་པོས་འཚམས་འདྲི་གནང་འདུག
དེ་རིང་ཕྱི་ཚེས་ ༣༡ ནས་རྒྱ་གར་གྱི་མར་མེའི་དུས་ཆེན་ (Diwali) ཡིན་པ་དང་བསྟུན། བོད་མིའི་སྒྲིག་འཛུགས་ཀྱི་ངོས་ནས་མར་མེའི་དུས་ཆེན་ལ་འཚམས་འདྲི་དང་། ཁ་སང་ཕྱི་ཚེས ༣༠ ཉིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྒེར་གྱི་སྤྱི་ཚོགས་དྲ་རྒྱ་ཨེག་སི་ (X) སྟེང་། ཧིན་རྡུའི་ཆོས་ལུགས་ཀྱི་མར་མེའི་དུས་ཆེན་ (Diwali) གྱི་ཉིན་མོར་རྒྱ་གར་གྱི་སྤུན་མཆེད་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ་བ་དང་། དུས་ཆེན་འདི་ལ་ཁྱེད་ཚོའི་མི་ཚེ་ལ་འོད་སྣང་དང་། བདེ་སྐྱིད་བྱུང་བའི་སྨོན་འདུན་ཡོད། བཀྲ་ཤིས་པའི་ལོ་གསར་ལ་དགའ་བསུ་ཞུ། ཞེས་གསུངས་འདུག
དེ་བཞིན། དེ་རིང་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས་ངོ་དེབ་སྟེང་། ང་ཚོས་མར་མེ་སྤར་ནས་དགའ་སྟོན་སྲུང་གཙི་བྱེད་སྐབས། ཁྱིམ་མི་རྣམས་ཀྱི་འབྲེལ་ལམ་ཇེ་བརྟན་དུ་གྱུར་ནས་མི་ཚེ་དོན་དང་ལྡན་པ་བྱུང་། ངས་དྷ་རམ་ས་ལར་བཞུགས་པའི་བོད་མི་ཡོངས་ཀྱི་ཚབ་ཞུས་ཏེ། རྒྱ་གར་གྱི་སྤུན་ཟླ་ཕོ་མོ་ཡོངས་ལ་མར་མེའི་དུས་ཆེན་གྱི་ཉིན་མོར་འཚམས་འདྲི་ཞུ། ཞེས་བཀོད་འདུག་ལ། གཞན་ཡང་འཛམ་གླིང་ཡུལ་གྲུ་གང་སར་བཞུགས་པའི་བོད་མི་མང་པོས་སྒེར་གྱི་སྤྱི་ཚོགས་བརྒྱུད་ལམ་ཁག་ཏུ་རྒྱ་གར་འཕགས་ཡུལ་གྱི་སྤུན་ཟླ་ཡོངས་ལ་མར་མེ་དུས་ཆེན་ན་འཚམས་འདྲིའི་ཤིག་ཚིག་མང་པོ་སྤེལ་དང་སྤེལ་མུས་རེད་འདུག
ལོ་ལྟར་རྒྱ་གར་ནང་མར་མེའི་དུས་ཆེན་སྲུང་གཙི་ཞུ་སྲོལ་ཡོད་པ་ལྟར། ཟླ་འདིའི་ཕྱི་ཚེས་ ༣༡ ཉིན་ནས་རྒྱ་གར་རྒྱལ་ཡོངས་སུ་མར་མེའི་དུས་ཆེན་ཡིན་པ་དང་། སྐབས་དེར་རྒྱ་གར་གྱི་ས་ཕྱོགས་གང་སར་མཆོད་མེ་དང་གློག་ཁྲ་སྤར་བ། དེ་བཞིན་རྒྱུན་རིང་ནས་གོམས་སྲོལ་དུ་གྱུར་བའི་ཤོག་སྦག་ཕོན་ཆེན་བཀད་དེ་སྲུང་གཙི་ཞུ་ཡི་ཡོད་པ་མ་ཟད། དུས་ཆེན་དེས་མུན་པ་ལས་འོད་སྣང་དང་། ངན་པ་ལས་བཟང་པོ། མ་རིག་པ་ལས་རིག་པ་བཅས་རྣམ་པར་རྒྱལ་བ་མཚོན་གྱི་ཡོད།
མར་མེའི་དུས་ཆེན་ནི་རྒྱ་གར་གྱི་ཧིན་རྡུའི་ཆོས་ལུགས་དང་། གཅེར་བུ་བའི་ཆོས་ལུགས་དང་། སིག་ཆོས་ལུགས་ཀྱི་རྗེས་འབྲང་བ་སོགས་ཀྱིས་སྲུང་གཙི་ཞུ་ཡི་ཡོད་ཀྱང་། ཆོས་ལུགས་དེ་དག་ལ་མར་མེའི་དུས་ཆེན་གྱི་བྱུང་རིམ་མི་འདྲ་བ་ཡོད། དེ་ཡང་། རྒྱ་གར་ལྷོ་ཕྱོགས་ཁུལ་དུ་མར་མེའི་དུས་ཆེན་དེ་ཧིན་རྡུའི་ལྷ་ཀི་རི་ཤི་ནཱ་ (Lord Krishna) ཡིས་འདྲེ་ན་ར་ཀ་བསད་དེ་རྒྱལ་ཁ་ཐོབ་པའི་དུས་ཚིགས་ལ་ངོས་འཛིན་གྱིས་དུས་ཆེན་སྲུང་གཙི་ཞུ་ཡི་ཡོད་པ་དང་། འདྲེ་ན་ར་ཀས་བུད་མེད་ལ་སྡུག་སྦྱོང་མནར་གཅོད་བཙོན་འཇུག་གཏོང་གི་ཡོད་པས་ཡིན། རྒྱ་གར་བྱང་ཕྱོགས་ཁུལ་དུ་ཧིན་རྡུའི་ཆོས་ལུགས་པ་རྣམས་ཀྱིས། ཨ་ཡོ་དྷ་ཡའི་རྒྱལ་སྲས་ར་མ་དང་། ཁོང་གི་བཟའ་མོ་སི་ཏ། ཁོང་གི་གཅེན་པོ་ལ་སི་མན་ལོ་ངོ་ ༡༤ རིང་བཙན་བྱོལ་དུ་བསྡད་དེ་ཕྱིར་ཨ་ཡོ་ཌ་ཡར་ལོག་པའི་དུས་ལ་ངོས་འཛིན་གྱིས་མར་མེའི་དུས་ཆེན་སྲུང་གཙི་ཞུ་ཡི་ཡོད།
དེ་བཞིན་སིག་ཆོས་ལུགས་པ་རྣམས་ཀྱིས་གྷུ་ཧཱ་ལི་འོར་བཙོན་ཁང་ (Gwalior Prison) ནས་སིག་གི་ཆོས་དཔོན་དྲུག་པ་གྷུ་རུ་ཧར་གྷོ་བྷིན་ཌི་ (Guru Hargobind) དང་། ཧིན་རྡུའི་རྒྱལ་པོ་ ༥༢ ཀློད་གྲོལ་བཏང་བའི་དུས་དྲན་དུ་སྲུང་གཙི་ཞུ་ཡི་ཡོད་པ་མ་ཟད། མར་མེའི་དུས་ཆེན་དེ་རང་དབང་འཐབ་རྩོད་ཀྱི་ལོ་རྒྱུས་ཤིག་ལ་ངོས་འཛིན་གྱི་འདུག གཞན་ཡང་། གཅེར་བུ་བའི་ཆོས་ལུགས་ཉམས་ལེན་བྱེད་མཁན་གྱིས་མར་མེ་དུས་ཆེན་དེ་སྒོམ་སྒྲུབ་བྱེད་པའི་དུས་ཤིག་ཡིན་པ་མ་ཟད། སྐབས་དེར་ཁོང་ཚོས་སྨྱུང་གནས་དང་། ཁ་འདོན། གཅེར་བུ་བའི་གསུང་རབ་ཐོག་སློབ་སྦྱོང་བྱེད་ཀྱི་ཡོད་འདུག་ལ། མར་མེ་སྤར་བ་དང་མ་ཧ་ཝི་རའི་འཁོར་བ་ལས་ཐར་བར་འདོད་པའི་གསུང་རབ་དྲན་པར་བྱེད་ཀྱི་ཡོད་ཅིང་། མར་མེ་དུས་ཆེན་ནི་མ་ཧ་ཝི་རའི་རྣམ་ཤེས་ལ་རང་དབང་ཐོབ་པའི་དུས་དྲན་ལའང་སྲུང་གཙི་ཞུ་བཞིན་འདུག
གསར་འགོད་པ། བསྟན་འཛིན་ཕུར་བུ།
