དེ་རིང་ཞོགས་པར་༧གོང་ས་རྒྱལ་བ་རིན་པོ་ཆེ་མཆོག་ནས་བོད་ཀྱི་དཔེ་མཛོད་ཁང་གི་དབུ་ལས་ཡོངས་ལ་མཇལ་ཁ་དང་བཀའ་སློབ་བསྩལ་འདུག
བོད་ཀྱི་དཔེ་མཛོད་ཁང་དབུ་བརྙེས་ནས་ལོ་ངོ་ ༥༤ འཁོར་བའི་དུས་དྲན་དང་བསྟུན། དེ་རིང་ཞོགས་པར་བཞུགས་སྒར་རྒྱལ་བའི་ཕོ་བྲང་དུ། དཔེ་མཛོད་ཁང་གི་དབུ་ལས་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་སྐབས། ཐོས་བསམ་སྒོམ་གསུམ་གྱི་ཤེས་རབ་དེ་དག་ཉམས་ལེན་བྱས་ནས་དངོས་གནས་དྲང་གནས་ཉམས་ལེན་རྡོ་རུས་ཐུག་པ་ཡོད། བློ་བདེ་པོ་བྱས་ནས་བཞུགས་ཞེས་གསུངས་འདུག
༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་སློབ་བསྩལ་སྐབས། ངོས་རང་ལ་ཡིད་ཆེས་དང་དགའ་མོས་བྱེད་ཀྱི་འདུག བོད་ཙམ་མིན་པའི་ཧི་མ་ལ་ཡའི་རི་རྒྱུད་ཀྱི་མི་རིགས་ཚང་མས་ངོས་རང་ལ་དགའ་པོ་ཞེ་དྲགས་བྱེད་ཀྱི་འདུག ངོས་རང་ལ་ཆ་བཞག་ན། ཞོགས་པར་ལངས་བ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསྒོམ་རྒྱུ། དེ་ནས་ལྷ་ཡི་རྣལ་འབྱོར་ཉིན་ལྟར་བྱེད་ཀྱི་ཡོད། བྱས་ཙང་དེའི་ལག་རྗེས་ནི་ངོས་རང་དགེ་སློང་སེར་པོ་ཞིག་གིས་བསླབ་པ་གསུམ་གྱི་ཉམས་ལེན་དང་། ཐོས་བསམ་སྒོམ་གསུམ་གྱི་ཤེས་རབ་དེ་དག་ཉམས་ལེན་བྱས་ནས་དངོས་གནས་དྲང་གནས་ཉམས་ལེན་སྡུག་རུས་ཐེག་པོ་ཡོད། ཡག་ཐག་ཆོད་ཡོད། བློ་བདེ་པོ་བྱས་ནས་བཞུགས་ཨ། ཞེས་སོགས་གསུངས་འདུག
བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་འདི་གའི་གསར་འགོད་པར། ང་ཚོ་དཔེ་མཛོད་ཁང་དབུ་བརྙེས་ནས་ལོ་ངོ་ ༥༠ འཁོར་ནས་ལོ་གསུམ་དང་བཞི་ཕྱིན་ཚར་བ་རེད། སྤྱིར་བཏང་ནས་ངས་གཅིག་བྱས་ཡོད་ཟེར་རྒྱུར་དགའ་པོ་མེད། སྐབས་དེ་དུས་ཏོག་དབྱིབས་རིམས་ནད་ཁྱབ་གདལ་ཕྱིན་པ་སོགས་ལ་བརྟེན་ནས་མཛད་སྒོ་དམིགས་བསལ་འཚོགས་ཐུབ་མ་སོང་། འོན་ཀྱང་། ང་ཚོ་ལས་བྱེད་ཚང་མའི་ཚེ་འདི་ཕྱི་གཉིས་ཀྱི་སྐྱབས་གནས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་རྒྱུ་གལ་ཆེན་པོར་རྩིས་ནས་མཇལ་ཁར་བཅར་བ་ཡིན། ཞེས་དང་། ཕྱི་ལོ་ ༡༩༧༠ ལོར་བོད་ཀྱི་དཔེ་མཛོད་ཁང་དབུ་བརྙེས་ནས་མི་ལོ་ ༥༤ རིང་ལ་ལས་དོན་ཐོག་ཧུར་ཐག་འབད་ཐག་གནང་གི་ཡོད་པ་དང་། ཕྱི་རྒྱལ་སློབ་ཕྲུག་ ༢༠༠ ཙམ་འཆར་ཅན་འཛིན་གྲྭར་ཡོང་སྟེ་བོད་ཀྱི་སྐད་ཡིག་དང་ནང་ཆོས་སྦྱོང་གི་ཡོད་པ། ལོ་རེར་དེབ་གྲངས་ ༤༠ དང་ ༥༠ ཙམ་དཔེ་སྐྲུན་གནང་གི་ཡོད་པ་སོགས་སྙན་གསེང་ཞུས་ཡོད་འདུག
གསར་འགོད་པ། དོན་གྲུབ་བཀྲ་ཤིས། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
