༧གོང་ས་མཆོག་གིས་མི་ཚེ་གང་བོར་རང་ཉིད་དྲང་པོ་དྲང་བཞག་གིས་གཞན་ལ་དགྲ་མི་བཟོ་བ་དང་ཀུན་ལ་མཛའ་བརྩེ་ལྡན་པ་བྱུང་ན་སྐྱེས་པའི་སྐྱེས་གོ་ཆོད་པ་རེད་གསུངས།
དེ་རིང་ཕྱི་ཚེས་ ༦ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་ཁུ་ནུའི་སྟོད་སྨད་ཀྱི་དད་ལྡན་སེར་སྐྱ་མང་ཚོགས་ ༢༠༠༠ ཙམ་ནས་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་སོང་བ་དང་སྐབས་དེར་༧མགོན་པོ་གང་ཉིད་མཆོག་གིས། དེ་རིང་ཁུ་ནུ་ནང་པའི་དགོན་སྡེ་ཁག་དང་ཡུལ་མི་ཐུན་མོང་ནས་ཇི་ལྟར་གསོལ་བ་བཏབ་པ་ལྟར། སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་གནང་བར་བཀའ་དྲིན་ཆེ་ཞུ་རྒྱུ་ཡིན།
དྷ་རམ་ས་ལ་ནི་འཛམ་གླིང་གི་ནང་ཆོས་ལ་དགའ་པོ་ཡོད་མཁན་ཚོ་དགའ་སྤྲོའི་ངང་འཛོམས་སའི་གནས་ཤིག་ཆགས་ཡོད། ངོས་ལ་ཆ་བཞག་ན། མདོ་སྨད་ནས་ལྷ་སར་ཡོང་བ་དང་ལྷ་སར་དཔེ་ཆ་གང་འཚམ་བལྟས་པ་ཡིན། ལྷག་དོན་འཁྱམ་ར་ཆེན་མོའི་ནང་ངོས་ནས་དམ་བཅའ་བཞག་པ་ཡིན། དེ་འདྲ་བའི་སྐལ་བཟང་མངོན་དུ་གྱུར་ཐུབ་པའི་མི་ཞིག་མཐའ་མར་བཙན་བྱོལ་བ་ཆགས་ནས་བསྡད་ཡོད།
ང་ཚོ་ཚང་མར་ཧ་ལས་པའི་དད་པ་དང་དམ་ཚིག་གཡོ་བ་མེད་པ་རེད། ངོས་མདོ་སྨད་ནས་ལྷ་སར་ཡོང་བ་དང་ལྷ་སར་དཔེ་ཆ་གང་འཚམ་བལྟས་པ་ཡིན། སྟག་བྲག་རྡོ་རྗེ་འཆང་གི་སྐུ་མདུན་ནས་དབང་ལུང་མན་ངག་མང་པོ་ཞུས་ཡིན། གླིང་རིན་པོ་ཆེས་ཞོགས་པ་དང་དགོང་མོའི་ཆུ་ཚོད་གཅིག་འཆར་ཅན་དུ་དཔེ་ཁྲིད་གནང་གི་རེད། དཔེ་མི་སྲིད་པའི་བཀའ་དྲིན་ཆེན་པོ་ཡིན། དེ་ནས་སྐྱབས་རྗེ་ཁྲི་བྱང་རིན་པོ་ཆེ་དང་དེ་མཚུངས་ཀྱི་མཚན་ཞབས་པ་རྣམ་པ་བཀའ་དྲིན་ཆེན་པོ་ཞེ་དྲགས་ཡིན། ཞེས་གསུངས།
༧རྒྱལ་དབང་མཆོག་གིས། དུས་ཚོད་ལ་འགྱུར་བ་ཕྱིན་ནས་ད་ལྟ་ང་ཚོ་བཙན་བྱོལ་བ་ཆགས་བསྡད་ཡོད། འོན་ཀྱང་། དངོས་ཡོད་གནས་ཚུལ་ལ་བཙན་བྱོལ་བ་ཆགས་ནས་བསྡད་པའི་རིང་གོ་སྐབས་ཡག་པོ་ཞེ་དྲགས་བྱུང་འདུག ང་ཚོ་བཙན་བྱོལ་བ་མ་ཆགས་པར་དེ་སྔའི་ལུགས་སྲོལ་འཁྱེར་ནས་བསྡད་པ་ཡིན་ན། ངོས་སྒེར་ལ་ཆ་བཞག་ན་དཔེ་ཆ་ལྟ་རྒྱུ་སོགས་ཞེ་དྲགས་མེད་པར་གཞུང་གི་མཛད་སྒོ་སོགས་ཀྱི་སྟེང་རྫིག་པོ་བྱས་ནས་སྡོད་རྒྱུ་མ་གཏོགས་མེད། ང་ཚོ་བཙན་བྱོལ་བ་ཆགས་པ་དེ་ང་རང་སྒེར་ལ་མཚོན་ན་གོ་སྐབས་ཡག་པོ་རེད་འདུག གཙོ་ཆེ་ཤོས་ནི་བྱེས་འབྱོར་དང་གཞིས་ལུས་རྒྱ་ཆེ་མི་མང་ལ་དད་པ་དང་ཞེན་ཁོག་རྩེ་གཅིག་ཏུ་ཡོད་པས་ཡག་པོ་ཞེ་དྲགས་རེད། ངོས་ཀྱིས་ཀྱང་ལྷག་བསམ་གཡོ་བ་མེད་པར་ཧུར་ཐག་འབད་ཐག་བྱས་པ་ཡིན། ཚང་མས་དགའ་པོའང་བྱེད་ཀྱིན་འདུག
ང་ཚོ་བཙན་བྱོལ་བ་ཆགས་ཏེ་ཕྱོགས་གཅིག་ནས་སོ་སོའི་ལུང་པར་ཁ་བྲལ་ནས་བསྡད་ཡོད། ཕྱོགས་གཅིག་ནས་གོ་སྐབས་བཟང་པོ་ཞེ་དྲགས་བྱུང་བ་རེད། ངོས་ལ་དགའ་མོས་བྱེད་མཁན་ཧི་མ་ལ་ཡའི་རི་བརྒྱུད་ཀྱི་བོད་པ་གཅིག་པོ་མ་རེད། ཡུལ་མི་ཚོ་ཨ་ཅང་ཅང་། ཕྱི་རྒྱལ་ཡུལ་གྲུ་ཁག་གི་ནང་དུ་དགའ་མོས་བྱེད་མཁན་ཇེ་མང་དུ་འགྲོ་བཞིན་འདུག དེ་དག་ཐམས་ཅད་ཀྱིས་ངོས་ནས་ཆོས་བཤད་བྱས་པ་གནད་འགག་མཐོང་བ་མ་རེད། གལ་ཆེ་ཤོས་ནི་མི་ཆོས་གཙང་མ་རེད། མི་ཚེ་སྐྱེལ་བར་དཔེ་ཆའི་ནང་གསུངས་པའི་སྐྱེ་བ་སྔ་ཕྱི་སོགས་ཀྱི་སྐད་ཆ་རིང་པོ་མི་དགོས་པར། འཕྲལ་དུ་སྐྱག་རྫུན་མི་བཤད་རྒྱུ་དང་། ག་ཚོད་ཐུབ་ཐུབ་ཀྱིས་མི་བཟང་པོ་དང་གཞན་ལ་ཕན་སེམས་བསྐྲུན་རྒྱུ་ནི་ངོས་ཀྱི་འགན་རེད་ལ་དམིགས་ཡུལ་ཡང་དེ་ལྟར་འཛིན་གྱི་ཡོད།
འཛམ་གླིང་འདིའི་སྟེང་ངོས་ལ་ནང་པ་ཙམ་མིན་པར་ཆོས་དད་མེད་མཁན་ཚོས་དགའ་པོ་ཞེ་དྲགས་བྱེད་ཀྱི་འདུག དེར་བརྟེན། ཕྱོགས་གཅིག་ནས་བཙན་བྱོལ་བ་བྱས་ནས་བསྡད་ཡོད་ཀྱང་། ཕྱོགས་གཅིག་ནས་མི་རིགས་མང་པོར་ཐུག་སྟེ། སེམས་ཞི་ཞིང་དུལ་བའི་སེམས་ཀྱི་བསླབ་བྱ་བྱས་པ་རེད། འཛམ་གླིང་གི་མི་ཞིག་ཡིན་ཕྱིན། མཛའ་བརྩེའི་འདུ་ཤེས་ཀྱི་ཐོག་ནས་ཀུན་ལ་ཕན་ཐོགས་ཡོད་པ་ཞིག་བྱུང་ན། དངོས་གནས་དྲང་གནས་འཛམ་གླིང་ནང་སྐྱེས་པའི་སྐྱེས་གོ་ཆོད་པ་རེད།
གཞན་ང་ཚོ་འཛམ་གླིང་འདིའི་ནང་སྐྱེས་པའི་མི་ཞིག་རེད་དེ། ཁྱོད་དང་ང་ཞེས་ཆགས་སྡང་གི་སྐད་ཆ་བཤད་ནས་སྡོད་པ་ནི་ཐབས་སྐྱོ་བོ་ཞེ་དྲགས་རེད། སྐྱེ་བ་སྔ་ཕྱིའི་སྐད་ཆ་མེད་པར་ཚེ་འདིར་འཛམ་གླིང་ནང་མི་གཅིག་གྱུར་གྱི་འདུ་ཤེས་ཐོག་ནས་ཀུན་ལ་ཕན་སེམས་དང་བརྩེ་བ་ལྡན་པ་བྱུང་ན་ཡག་པོ་རེད། ཆོས་ཁས་ལེན་མིན་ལ་མ་ལྟོས་པར་ངོས་ནས་དམིགས་ཡུལ་དེ་འཛིན་གྱི་ཡོད། འཛམ་གླིང་ནང་སྐྱེས་པའི་མི་ཞིག་ཡིན་ཕྱིན། མི་ཚེ་གང་བོར་རང་ཉིད་དྲང་པོ་དྲང་བཞག་གིས། གཞན་ལ་དགྲ་མི་བཟོ་བ་དང་ཀུན་ལ་མཛའ་བརྩེ་ལྡན་པ་བྱུང་ན་ཡག་པོ་རེད། ངོས་ནས་ཀྱང་འཛམ་གླིང་ནང་ཕན་གང་འཚམ་ཐོགས་ཀྱི་འདུག་ལ། གཙོ་བོ་ཆོས་ལྡན་གྱི་གྲོགས་པོ་ཚོས་སྤྱི་སེམས་འཁུར་ནས་ཧུར་ཐག་གནང་བ་རེད། ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
གསར་འགོད་པ། སྐལ་བཟང་སྦྱིན་པ།
