རྒྱ་ནག་རྒྱལ་ཡོངས་སྐྱེས་པའི་རྐང་སྤོལ་རུ་ཁག་གི་སློབ་སྟོན་པ་ཟུར་བར་མི་ལོ་ཉི་ཤུའི་བཙོན་འཇུག་ཁྲིམས་ཐག་བཅད། 

རྒྱ་ནག་རྒྱལ་ཡོངས་སྐྱེས་པའི་རྐང་སྤོལ་རུ་ཁག་གི་སློབ་སྟོན་པ་ཟུར་བ་ལི་ཐའེ་ཟེར་བས་ཨ་སྒོར་ས་ཡ་ ༡༠ ལྷག་གཡོ་ལེན་བྱས་པའི་ཉེས་མིང་འོག་མི་ལོ་ཉི་ཤུའི་བཙོན་འཇུག་ཁྲིམས་ཐག་བཅད་འདུག

དེ་རིང་རྒྱ་ནག་ཧུའུ་པེ་ཞིང་ཆེན་གྱི་ཤན་ནིང་གྲོང་ཁྱེར་གྱི་མི་དམངས་ཆེས་མཐོའི་ཁྲིམས་ཁང་(People’s Court of Xianning) གིས་རྒྱ་ནག་རྐང་སྤོལ་རུ་ཁག་གི་ཆེས་མཐོའི་སློབ་སྟོན་པ་ལི་ཐའེ་( Li Tie) ཡིས་ཨ་སྒོར་ས་ཡ་ ༡༠ ལྷག་ལྐོག་ལེན་བྱས་ཡོད་པའི་ནག་ཉེས་གཡོགས་ནས། ཁོ་ལ་མི་ལོ་ཉི་ཤུ་ཡི་བཙོན་འཇུག་ཁྲིམས་ཆད་དང་། ཆབ་སྲིད་ཀྱི་ཁེ་དབང་ཟེར་བ་སོགས་འཕྲོག་ཡོད་པའི་གནས་ཚུལ་ཐོན་འདུག

རྒྱལ་སྤྱིའི་གསར་ལམ་ཁག་ཏུ་ཁོས་ཨ་སྒོར་ས་ཡ་བཅུ་ལྷག་ལས་གཡོ་ལེན་བྱས་མེད་པའི་གནས་ཚུལ་ལས་ཐོན་མེད་ནའང་། རྒྱ་ནག་གོ་ལའི་དུས་བབ་ཀྱིས་རྒྱ་ནག་གི་རྐང་སྤོལ་རྩེད་འགྲན་པ་དང་རྐང་སྤོལ་སློབ་སྟོན་པ་ལི་ཐའེ་ཟེར་བས་ཕྱི་ལོ་ ༢༠༡༩ ནས་ ༢༠༢༡ བར་རྒྱ་ནག་སྐྱེས་པའི་རྐང་སྤོལ་རུ་ཁག་གི་སློབ་སྟོན་པ་བྱེད་སྐབས་ཉུང་མཐར་ཡང་ཨ་སྒོར་ས་ཡ་ ༧།༠༤ གཡོ་ལེན་དང་། པེ་ཅིན་ཉིན་རེའི་གསར་ཤོག་གིས། ཁོས་ཕྱི་ལོ་  ༢༠༡༩ ནས་ ༢༠༢༡ བར་རྒྱ་ནག་གི་སྐྱེས་པའི་རྐང་རྩེད་སྤོ་ལོའི་རུ་ཁག་གི་སློབ་སྟོན་པའི་གོ་གནས་བེད་སྤྱད་ནས་ཁྲིམས་འགལ་ཐོག་ཨ་སྒོར་ས་ཡ་ ༥༠།༨༩ ལྷག་དང་། ཕྱི་ལོ་ ༢༠༡༥ ནས་ ༢༠༡༩ བར་ཧི་པེ་ཧྭ་ཞ་ཧྥོ་ཅུན་(Hebei Huaxia Fortune Soccer Club) རྐང་རྩེད་སྤོ་ལོའི་རུ་ཁག་དང་ཝུའུ་ཧན་ཛཱ་ལིལ་(Wuhan Zall Club) རྐང་རྩེད་སྤོ་ལོའི་རུ་ཁག་ནང་ལས་ཀ་བྱེད་སྐབས་ཀྱང་རྩེད་འགྲན་ལ་རྒྱལ་ཁ་ཐོབ་ཆེད་ཨ་སྒོར་ས་ཡ་ ༣༩།༠༥ ལྷག་བླངས་ཡོད་པ་ཤེས་རྟོགས་བྱུང་ཡོད་པ་མ་ཟད། ཕྱི་ལོ་ ༢༠༡༧ ནས་ ༢༠༡༩ བར་ཝུའུ་ཧན་( Wuhan club) རུ་ཁག་གི་སློབ་སྟོན་པ་བྱེད་སྐབས། ཧུའུ་པེ་རུ་ཁག་ནས་རྩེད་མོ་བ་བརྗེ་ལེན (player transfers) ཆེད་ཨ་སྒོར་ས་ཡ་ ༢༦།༧༥ ལྷག་བླངས་ཡོད་སྐོར་སོགས་བསྒྲགས་འདུག

གཞན་ཡང་། འདི་ལོའི་ཕྱི་ཟླ་  ༣ ནང་རྒྱ་ནག་རྒྱལ་ཡོངས་རྐང་རྩེད་སྤོ་ལོའི་མཐུན་ཚོགས་ (Chinese Football Association) ཀྱི་འགན་འཛིན་ཟུར་པ་ཁྲིན་ཞེ་ཡོན་ (Chen Xuyuan) གྱིས་རྒྱ་སྒོར་ས་ཡ་ ༨༡།༠༣ གྱི་ལྐོག་རྔན་བླངས་པའི་ནག་ཉེས་འོག་ཚེ་བཙོན་གྱི་ཁྲིམས་ཐག་བཅད་དེ། མི་ཚེ་གང་བོར་ཆབ་སྲིད་ཀྱི་དབང་ཆ་མེད་པར་བཟོས་པ་མ་ཟད། མི་སྒེར་གྱི་རྒྱུ་ནོར་ཚང་མ་གཞུང་བཞེས་བཏང་ཡོད་འདུག་ལ། དེ་བཞིན་བདུན་སྔ་མའི་ནང་རྒྱ་ནག་ཧུའུ་པེ་ཁྲིམས་ཁང་གིས་རྒྱ་ནག་རྒྱལ་ཡོངས་རྐང་རྩེད་སྤོ་ལོ་མཐུན་ཚོགས་ཀྱི་དྲུང་ཆེ་ལེའུ་ཡེ་ (Liu Yi) ཡིས་དངུལ་སྒོར་གཡོ་ལེན་དང་ལྐོག་བཟའ་བྱས་པའི་ཉེས་མིང་གཡོགས་ནས་མི་ལོ་བཅུ་གཅིག་གི་བཙོན་འཇུག་ཁྲིམས་ཆད་དང་རྒྱ་སྒོར་ས་ཡ་ ༣།༦ གི་ཉེས་ཆད་བཅད་ཡོད། རྒྱ་ནག་རྒྱལ་ཡོངས་རྩེད་འགྲན་གཟུ་དཔང་དོ་དམ་(CFA’s referees management office) ཚན་པའི་འགན་འཛིན་ཟུར་བ་ཁྲན་ཧཱ་ (Tan Hai) ཡིས་དངུལ་སྒོར་ལྐོག་བཟའ་བྱས་པའི་ཉེས་མིང་འོག་མི་ལོ་དྲུག་དང་ཕྱེད་ཀའི་བཙོན་འཇུག་ཁྲིམས་ཐག་དང་། ཨ་སྒོར་འབུམ་ཉི་ཤུ་ལྷག་གི་དངུལ་ཆད་བཅད་འདུག

སྤྱིར་རྒྱ་ནག་གཞུང་གིས་འདས་པའི་ལོ་ཤས་རིང་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བ་ཞིག་གི་འོག་ནས། རྒྱ་ནག་གཞུང་ལ་ལྟ་བ་དང་ལངས་ཕྱོགས་འཛིན་མཁན་མཐོ་རིམ་དཔོན་རིགས་མང་དག་ཅིག་ལ་ནག་ཉེས་འདྲ་མིན་གཡོགས་ནས་བཙོན་འཇུག་ཁྲིམས་ཐག་དང་ཏང་གི་སྐྱིད་སྡུག་ནས་ཕྱིར་ཕུད་གཏོང་གིན་ཡོད་པ་ལྟར། རྒྱ་ནག་གཞུང་གིས་རྒྱ་ནག་དབུས་དམག་སྲིད་ལྷན་ཁང་གི་དམག་ཇུས་ཚན་པའི་འགན་འཛིན་མེའོ་ཧྭ་ཡིས་སྒྲིག་འགལ་ཚབས་ཆེན་བྱས་པའི་ཉེས་མིང་གཡོགས་ཏེ་ལས་གནས་ནས་ཕྱིར་ཕུད་བཏང་སྟེ་ཞིབ་བཤེར་བྱེད་མུས་དང་། འོད་སྣང་ཉིན་རེའི་ཚགས་པར་ཁང་(Guangming Daily) གི་རྩོམ་སྒྲིག་པ་ཟུར་པ་སྐུ་ཞབས་དོང་ཡུ་ཡུ་ལགས་ལ་ལོ་བདུན་གྱི་ཁྲིམས་ཐག་བཅད། དེ་བཞིན་བོད་རང་སྐྱོང་ལྗོངས་དམར་ཤོག་ཚོགས་པའི་རྒྱུན་ལས་ཟུར་པ་དང་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་འགན་འཛིན་གཞོན་པ་ཧྲི་ཁུ་པེ་ཡིས། སྒྲིག་འགལ་ཚབས་ཆེན་བྱས་པའི་དོགས་གཞིའི་འོག་ཞིབ་བཤེར་བྱེད་མུས་ཡིན་པ་སོགས། འདས་པའི་ཟླ་གཉིས་མ་ཟིན་ཙམ་གྱི་ནང་རྒྱ་ནག་གཞུང་གིས་ཉུང་མཐར་རྒྱ་ནག་གི་དཔོན་རིགས་བདུན་ལ་ཞིབ་དཔྱོད་དང་ཁྲིམས་ཐག་བཅད་ཡོད་པ་རེད།

ལི་ཐའེ་ཟེར་བ་ནི་རྒྱ་ནག་ཧྲན་ཡང་ཁུལ་གྱི་རྒྱ་རིགས་དཀྱུས་མའི་ཁྱིམ་ཚང་ཞིག་གི་བུར་སྐྱེས། ཆུང་དུས་རྐང་སྤོལ་ལ་དགའ་ཞེན་ཆེ་བས་རྒྱ་ནག་ལེའུ་ཉིང་(Liaoning Football Academy)རྐང་སྤོལ་སློབ་གྲྭར་ཞུགས་ནས། སློབ་གྲྭ་དེའི་རྐང་སྤོལ་རུ་ཁག་ནས་ཆེས་ཐོག་མའི་ཆེད་ལས་རང་བཞིན་ཅན་གྱི་རྐང་སྤོལ་རྩེད་འགྲན་གྱི་སྟེགས་བུར་བསྙེགས། ཕྱི་ལོ་ ༢༠༠༢ ནས་ ༢༠༠༦ བར་དབྱིན་ཡུལ་གྱི་ཨེ་ཝིར་ཊོན་ (Everton) རུ་ཁག་ཏུ་ཞུགས་ནས་ལྒང་ལི་ ༣༤ ལྡུག ཕྱི་ལོ་ ༢༠༠༦ ནས་ ༢༠༠༨ བར་དབྱིན་ཡུལ་གྱི་ཤེ་ཧྥུ་ཊི་མཉམ་འབྲེལ་རུ་ཁག་(Sheffield United) དང་། ཕྱི་ལོ་ ༢༠༠༨ ལོར་རྒྱ་ནག་ཁྲིན་འདུ་རུ་ཁག་ཏུ་ཞུགས། ཁོང་ནི་རྒྱ་ནག་རྒྱལ་ཡོངས་ཀྱི་རྐང་སྤོལ་རུ་ཁག་གི་སློབ་སྟོན་པ་གཞོན་པ་ཟུར་བ་དང་། རྒྱ་ནག་གི་རྐང་སྤོལ་རུ་ཁག་ཅིག་གི་སློབ་སྟོན་པ་ཟུར་བའང་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།