རྒྱ་གཞུང་གིས་༧སྐུའི་ཡང་སྲིད་ཐད་གྲ་སྒྲིག་བྱེད་བཞིན་འདུག་ཟེར།

རྒྱ་གཞུང་གིས་བོད་ཀྱི་རིག་གཞུང་འགྲེམས་སྟོན་བྱས་ཏེ་༧གོང་ས་མཆོག་གི་ཡང་སྲིད་ཀྱི་བདག་དབང་ཐད་གྲ་སྒྲིག་དང་དྲིལ་བསྒྲགས་བྱེད་བཞིན་འདུག་ཟེར།

དེ་རིང་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༣ ཉིན་རྒྱ་ནག་གི་རྒྱལ་ས་པེ་ཅིན་དུ་རྟེན་གཞི་བྱས་ཡོད་པའི་ཀྲུང་གོའི་བོད་རིག་པའི་ཞིབ་འཇུག་ལྟེ་གནས་ཁང་དུ། བོད་བརྒྱུད་ནང་བསྟན་གྱི་ཡང་སྲིད་སྐོར་གྱི་འགྲེམས་སྟོན་ཞིག་བྱས་ཡོད་ཅིང་། འགྲེམས་སྟོན་དེའི་ཐོག་རྒྱ་ནག་གི་ཆེས་མཐོའི་དཔོན་རིགས་བཞི་པ་དང་མི་དམངས་སྲིད་གྲོས་ཚོགས་ཆེན་གྱི་ཚོགས་གཙོ་ཝང་ཧུའུ་ཉིང་དང་། རྒྱ་ནག་རྒྱལ་ཁབ་ཀྱི་ཆེས་མཐོའི་སློབ་སྟོན་པའི་མགོ་ཁྲིད་ཁག་ཅིག་བཅས་མཉམ་ཞུགས་བྱས་ཡོད་འདུག  བོད་ཀྱི་རིག་གཞུང་འགྲེམས་སྟོན་ཟེར་བའི་ནང་༧རྒྱལ་དབང་སྐུ་ཕྲེང་རིམ་བྱོན་གྱི་ཡང་སྲིད་གཙོས་བོད་ཀྱི་བསྟན་བདག་བླ་ཆེན་རྣམ་པའི་ཡང་སྲིད་ངོས་འཛིན་ཞུ་ཕྱོགས་ཐད་ལོ་རྒྱུས་ཐོག་ནས་རྒྱ་ནག་གཞུང་ལ་བདག་དབང་ཡོད་པ་གསལ་བཤད་བྱས་ཡོད་པ་མ་ཟད།  བོད་ནི་གནའ་སྔ་མོ་ནས་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་ལུགས་བཤད་འདུག

ཝང་ཧུའུ་ཉིང་གཙོས་རྒྱ་ནག་གི་སྲིད་གྲོས་མགོ་ཁྲིད་ཚོས་རྒྱ་ནག་རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ་སྲུང་སྐྱོབ་བྱེད་དགོས་པ་དང་། རྒྱ་ནག་ནང་གི་མི་རིགས་ཚང་མས་རྒྱལ་ཁབ་ཀྱི་འདུ་ཤེས་བརྟན་པོ་འཛིན་རྒྱུ་དང་། རྒྱ་ནག་དམར་ཤོག་ཚོགས་པ་དང་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ནུས་པ་འཛུགས་སྐྲུན་བྱ་རྒྱུ་གལ་ཆེན་ཡིན་ལུགས་སོགས་བཤད་འདུག

དེའི་སྐོར་ལ་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་ཐོག་ཉམས་ཞིབ་པ་ཞིན་ལུའུ་ལིང་ (Xinlu Liang) གྱིས། རྒྱ་ནག་གི་ཆེས་མཐོའི་ཆབ་སྲིད་སློབ་སྟོན་པས་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་སྐོར་ལ་འགྲེམས་སྟོན་བྱེད་དགོས་པའི་དམིགས་ཡུལ་གཙོ་བོ་ནི། སང་ལོ་དགུང་ལོ་ ༩༠ ཕེབས་བཞིན་པའི་བཙན་བྱོལ་དུ་བཞུགས་པའི་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་ཡང་སྲིད་ཀྱི་གནད་དོན་ལ་རྒྱ་ནག་གཞུང་གིས་གདོང་ལེན་གྱི་གྲ་སྒྲིག་ཆེད་ཡིན་པ་རེད། ཅེས་དང་། ༧གོང་ས་མཆོག་ནས་༧སྐུའི་ཡང་སྲིད་ཀྱི་གནས་བབ་དེ་ལོ་རྗེས་མའི་ཕྱི་ཟླ་ ༧ ནང་གསལ་བསྒྲགས་བྱེད་སྲིད་སྐོར་བརྗོད་ཡོད་ཅེས་བཤད་འདུག

ད་ལན་ཝང་ཧུའུ་ཉིང་གིས། འདས་པའི་ལོ་བཞི་བཅུའི་རིང་ཀྲུང་གོ་བོད་རིག་པའི་ཞིབ་འཇུག་ཁང་གིས་བོད་རང་སྐྱོང་ལྗོངས་དང་། བོད་རིགས་འདུས་སྡོད་ཀྱི་ཞིང་ཆེན་ཁག་གཞན་བཞིའི་ས་ཁུལ་གྱི་ཆབ་སྲིད་དང་། དཔལ་འབྱོར། རིག་གནས། ཆོས་ལུགས་སོགས་ལ་ཉམས་ཞིབ་བྱས་པའི་རྒྱ་ནག་གི་ཁྱད་ཆོས་ལྡན་པའི་བོད་རིག་པའི་གསར་གཏོད་ལྡན་པའི་འགྲེམས་སྟོན་ལ་ལྟ་ཞིབ་བྱས་ཡོད་འདུག

ཧོང་ཀོང་ཚན་རིག་ལག་རྩལ་གཙུག་ལག་སློབ་གཉེར་ཁང་གི་རྒྱ་ནག་གི་གྲངས་ཉུང་མི་རིགས་སྐོར་ལ་ཉམས་ཞིབ་བྱེད་མཁན་བྷར་རི་སུ་ཌི་མན་ (Barry Sautman) ལགས་ཀྱིས། བོད་ཀྱི་རིག་གཞུང་འགྲེམས་སྟོན་ཁང་ཟེར་བ་དེ་རྒྱ་ནག་ནང་གི་བོད་རིག་པ་སློབ་སྦྱོང་བྱེད་སའི་སྒྲིག་འཛུགས་ཆེ་ཤོས་ཤིག་རེད།  ཝང་ཧུའུ་ཉིང་ནི་སྤྱི་ཚོགས་ཚན་རིག་པ་ཞིག་རེད། ཁོ་རང་ཞིབ་འཇུག་ཁང་དུ་ལྟ་སྐོར་དུ་ཡོང་དོན་ནི་ཞིབ་འཇུག་ཁང་གི་ཞིབ་འཇུག་གྲུབ་འབྲས་ལ་རྒྱུས་ལོན་བྱེད་ཆེད་དང་།  ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ངོས་འཛིན་གནང་ཕྱོགས་ཐད་བོད་དང་འབྲེལ་ཡོད་ཀྱི་རྒྱ་ནག་གི་ལས་ཁུངས་ཁག་ཏུ་གྲ་སྒྲིག་ཞིབ་ཚགས་བྱེད་ཆེད་ཡིན་པ་རེད། ཅེས་བརྗོད་འདུག

ད་དུང་ཉམས་ཞིབ་པ་བྷར་རི་སུ་ཌི་མན་ (Barry Sautman) ལགས་ཀྱིས། ཝང་ཧུའུ་ཉིང་གིས་སྣེ་འཁྲིད་པའི་དབུས་བོད་སྐྱོར་ལས་དོན་ཟེར་བའི་སྡེ་ཁག་བོད་ནང་བསྐྱོད་དེ་ལས་དོན་ལག་བསྟར་ཤུགས་ཆེན་བྱེད་བཞིན་ཡོད་ཅིང་། འདི་ལོའི་ཕྱི་ཟླ་ ༨ ནང་ཝང་ཧུའུ་ཉིང་རྒྱ་ནག་གི་མགོ་ཁྲིད་ཞི་ཅིན་ཕིན་དང་མཉམ་དུ་བོད་ཀྱི་དཀར་མཛེས་དང་རྔ་བ་སོགས་བོད་རིགས་རྒྱ་ཆེ་འདུས་སྡོད་ཀྱི་ས་ཁུལ་ཁག་ཏུ་སྐོར་སྐྱོད་བྱས་པ་ནི་ལས་འགུལ་ཆེན་པོ་ཞིག་རེད། ཅེས་དང་། རྒྱ་ནག་དབུས་གཞུང་གི་དཔོན་རིགས་ཚོ་བོད་ཀྱི་གནད་དོན་ཐད་སེམས་འཁུར་ཆེ་བས། ད་རེས་ཝང་ཧུའུ་ཉིང་གིས་ཀྱང་བོད་ཀྱི་ཐོག་རྒྱུས་ལོན་ཞིབ་ཚགས་བྱེད་པའི་དམིགས་ཡུལ་གཙོ་བོ་བཟུང་ཡོད། ཅེས་བརྗོད་འདུག

དེ་བཞིན་འདི་ལོའི་ཕྱི་ཟླ་ ༦ པའི་ནང་ཀྲུང་གོ་བོད་རིག་པ་ཞིབ་འཇུག་ཁང་གི་ཆོས་ལུགས་སྡེ་ཚན་གྱི་འགན་འཛིན་གཞོན་པ་ལྷ་བྱམས་རྒྱལ་གྱིས། ༧གོང་ས་རྒྱལ་བ་རིན་པོ་ཆེ་མཆོག་རྒྱ་ནག་གི་ཕྱི་ལོགས་སུ་བཞུགས་ཡོད་ཀྱང་། ༧སྐུའི་ཡང་སྲིད་དེ་རྒྱ་ནག་གི་ཁྲིམས་དབང་འོག་ཏུ་གནས་ཡོད་པས།  རྒྱ་ནག་གཞུང་གིས་བོད་བརྒྱུད་ནང་བསྟན་ལ་དོ་དམ་བྱེད་པར་སྲོལ་རྒྱུན་གྱི་འགྲོ་ལུགས་ཤིག་ཆགས་ཡོད་ལུགས་སྤེལ་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།