༧གོང་ས་རྒྱལ་བ་རིན་པོ་ཆེ་མཆོག་ནས་ང་ཚོས་རྐྱེན་ངན་གྲོགས་སུ་ཤར་རྒྱུའི་བསམ་བློ་ཞིག་བཏང་བ་ཡིན་ན་ཕན་ཐོགས་ཡོད་པ་རེད་ལ། རྐྱེན་ངན་བྱུང་སྐབས་སེམས་ཤུགས་ཆག་ནས་མ་བསྡད་པར་སེམས་ཤུགས་སྐྱེད་དགོས་རེད་ཅེས་བོད་ནང་ས་ཡོམ་གོད་ཆག་ཆེན་པོ་བྱུང་བར་ཐུགས་སྨོན་མཛད་འདུག
དེ་རིང་ཕྱི་ཚེས་ ༩ ཉིན་གྱི་སྔ་དྲོའི་ཆུ་ཚོད་ ༩ པའི་ཐོག་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་བྱེས་ཀྱི་གདན་ས་ཆེན་མོ་བཀྲ་ཤིས་ལྷུན་པོ་དགོན་དུ། ༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག བོད་ཀྱི་སྟོད་དིང་རི་གཙོས་གཞིས་ཀ་རྩེ་ཁུལ་དུ་ས་ཡོམ་བརྒྱབ་སྟེ་མི་རྒྱུ་གཉིས་ལ་གོད་ཆག་ཆེན་པོ་བྱུང་བར་མཆོད་འབུལ་སྨོན་ལམ་འཚོགས་གནང་ཡོད་པ་དང་། དེ་བཞིན་བཙན་བྱོལ་ནང་གི་བླ་ཆེན་རྣམ་པ་ཁག་ཅིག་དང་དགོན་པ་གྲྭ་ཚང་ཁག་ནས་ཐུགས་སྨོན་དང་མཆོད་འབུལ་གནང་བཞིན་འདུག་ལ། བོད་མིའི་སྒྲིག་འཛུགས་དང་ཚོགས་སྡེ་སོགས་ནས་ཀྱང་གདུང་སེམས་མཉམ་སྐྱེད་དང་མཆོད་འབུལ་སྨོན་ལམ་གནང་བཞིན་འདུག
དེ་རིང་མཆོད་འབུལ་སྨོན་ལམ་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས་ཐུགས་སྨོན་གནང་བའི་ནང་། ཆོས་དད་མེད་མཁན་ཞིག་ལ་ལས་ངན་འཁོར་དུས། སེམས་ཕམ་ནས་བསྡད་རྒྱུ་མ་གཏོགས་བྱེད་ཡ་ཡོད་མ་རེད། ང་ཚོ་ཆོས་ལ་དད་པ་ཡོད་མཁན་ཞིག་གི་ངོས་ནས་ལས་ངན་སྨིན་ཡོང་དུས། དེ་སྔོན་ཆད་ཀྱི་སྡིག་པ་དག་རྒྱུ་དང་། ཕྱིན་ཆད་དངོས་གནས་དྲང་གནས་དགེ་བའི་ལས་གོང་ནས་གོང་དུ་འཕེལ་རྒྱུའི་མཐུན་པའི་རྐྱེན་ཞིག་ཏུ་ཆགས་རྒྱུ་འདུག དཔེར་ན། ང་ཚོར་རྐྱེན་འདས་ཞེ་དྲགས་ཡོང་དུས་རྐྱེན་ངན་དེ་དག་རྒྱུ་མཚན་དུ་བྱས་ཏེ། སོ་སོའི་ངོས་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་དེ་དག་གཟབ་གཟབ་བྱས་ནས་བསྒོམ་རྒྱུ་ཞིག་ཡོང་གི་འདུག བྱས་ཙང་། ད་ལྟ་བོད་ནང་ས་ཡོམ་གྱི་རྐྱེན་པས་རྐྱེན་ངན་མང་པོ་ཞིག་ཡོང་བསྡད་པ་དེ། བྱང་ཆུབ་ཀྱི་ལམ་དུ་བསྒྱུར་ཐུབ་རྒྱུ་དེ་སོ་སོའི་ལག་པར་ཡོད་རེད་ལ། དེ་བསམ་བློ་གཏོང་གི་ཡོད་ན། དངོས་གནས་དྲང་གནས་འབྲས་བུ་ངན་པ་ཞིག་སྨིན་པ་རེད་དེ། དེས་རྐྱེན་བྱས་ནས་དགེ་བའི་བློ་སྐྱེས་ཡ་དང་སེམས་བྱུང་སྐྱེས་རྒྱུར་ཕན་ཐོགས་ཡོང་བསྡད་པ་ཞིག་རེད་འདུག དཔེར་ན། ངོས་རང་གིས་བོད་ལ་ས་ཡོམ་བརྒྱབ་ནས་རྐྱེན་ངན་མང་པོ་ཞིག་ལ་འཕྲད་པ་པར་ནང་མཐོང་ཡོང་དུས། དེས་བྱང་ཆུབ་སེམས་དང་སྟོང་ཉིད་ཀྱི་ལྟ་བ་བསྒོམ་རྒྱུ། འཕགས་པ་སྤྱན་རས་གཟིགས་ལ་གསོལ་བ་འདེབས་རྒྱུའི་སེམས་བྱུང་གོང་ནས་གོང་དུ་འཕེལ་ཡོང་གི་འདུག ཅེས་གསུངས་འདུག
ཡང་༧རྒྱལ་བ་ཡིད་བཞིན་ནོར་བུ་མཆོག་ནས་ད་ལྟ་ལྷག་བསྡད་པ་རྣམས་ཀྱིས་སེམས་ཤུགས་སྐྱེད་ནས། བོད་གངས་ཅན་གྱི་ལྗོངས་འདི་འཕགས་པ་སྤྱན་རས་གཟིགས་ཀྱི་གདུལ་ཞིང་ཡིན་པས། སོ་སོའི་རྐྱེན་ངན་མང་པོ་ཞིག་ལས་དབང་གིས་བྱུང་བ་རེད་དེ། དེ་དག་གི་རྐྱེན་ངན་གྲོགས་སུ་ཤར་རྒྱུ་ཞིག་གི་སེམས་ཤུགས་སྐྱེད་ནས། དད་པའི་བློ་ཡག་པོ་ཞིག་མུ་མཐུད་ནས་སྦྱང་རྒྱུ་དེ་ཧ་ཅང་གལ་ཆེན་པོ་རེད། བོད་ལ་ས་ཡོམ་བརྒྱབ་ནས་ཁང་པ་མང་པོ་ཞིག་རལ་དུ་གྱུར་བ་མཐོང་སོང་། སེམས་སྐྱོ་བ་ཞིག་འདུག་སྟེ། རྐྱེན་ངན་ལས་ངན་ཟློག་ཏུ་མེད་པ་ཆགས་ཀྱི་ཡོད་དུས། ང་ཚོས་རྐྱེན་ངན་གྲོགས་སུ་ཤར་རྒྱུའི་བསམ་བློ་ཞིག་བཏང་བ་ཡིན་ན་ཕན་ཐོགས་ཡོད་རེད། ཅེས་དང་། རྐྱེན་ངན་བྱུང་སྐབས་སེམས་ཤུགས་ཆག་ནས་མ་བསྡད་པར་སེམས་ཤུགས་སྐྱེད་དགོས་རེད། དེ་ཡང་འབྱུང་བ་འཁྲུག་པ་ཡིན་དུས་མི་ལའང་ཁག་བཞག་ས་ཞིག་མེད་པས། ས་ཡོམ་གྱི་རིགས་རྣམས་རྐྱེན་ངན་གྱིས་ཡོང་བ་ཞིག་རེད་མ་གཏོགས། མིའི་ཆབ་སྲིད་ཀྱི་སྲིད་ཇུས་ཤིག་མིན་པ་ཡིན་དུས། དེའང་བསམ་བློ་གཏོང་སྟངས་ཀྱི་ཐད་ནས་དགེ་མཚན་འདུག ཅེས་གསུངས་འདུག
༧དཔལ་རྒྱལ་དབང་ཀརྨ་པ་ཨུ་རྒྱན་འཕྲིན་ལས་རྡོ་རྗེ་མཆོག་གིས་བརྙན་ལམ་ནས་ཐུགས་སྨོན་གནང་བའི་ནང་། བོད་ལྗོངས་གཞིས་ཀ་རྩེའི་ཁོངས་ཀྱི་དིང་རི་རྫོང་ཁོངས་ལ་ས་ཡོམ་གྱི་འཇིགས་པ་ཆེན་པོ་བྱུང་ནས། རང་རིགས་སྤུན་ཟླ་མང་པོ་འདས་གྲོངས་སུ་གྱུར་བ་དང་། རྨས་སྐྱོན་བྱུང་བ་དེ་འདྲའང་མང་པོ་ཞིག་འདུག དེ་འདྲ་བའི་གནས་ཚུལ་སྐྱོ་བོ་དེ་གོ་ཡོང་དུས་སེམས་ལ་མ་བཟོད་པ་ཆེན་པོ་ཡོང་གི་འདུག ང་ལྟ་བུའི་བོད་ཀྱི་ཕྱི་ལོགས་སུ་ཡོད་པའི་སྤུན་ཟླ་མང་པོ་ཞིག་གིས་གནས་ཚུལ་དེའི་ཐད་ལ་སེམས་ཁུར་དང་བསྔོ་བ་སྨོན་ལམ་རྒྱག་གི་ཡོད། ངས་སྤྱི་ཚོགས་དྲ་ལམ་ནས་སྤུན་ཟླ་མང་པོ་ཞིག་གིས་དིང་རི་ས་ཁུལ་དུ་རྒྱབ་སྐྱོར་བྱ་རྒྱུ་དང་། རོགས་རམ་བྱེད་མུས་ཡིན་པའི་གནས་ཚུལ་མང་པོ་ཞིག་མཐོང་བྱུང་། ང་ཚོ་ཤ་རུས་གཅིག་ལས་མཆེད་པའི་མི་རིགས་ཤིག་ཡིན་དུས། དངོས་གནས་སེམས་འགུལ་བ་ཞིག་འདུག་ལ། སྐྱིད་ན་སྐྱིད་མཉམ་དང་སྡུག་ན་སྡུག་མཉམ་གྱི་གནས་སྟངས་དེ་མངོན་སུམ་དུ་མཐོང་ཡོང་དུས། དངོས་གནས་སེམས་ནང་ཚོར་སྣང་མི་འདྲ་བ་ཞིག་བྱུང་གི་འདུག དེ་འདྲ་ཡིན་དུས་སྤྱིར་ད་ལན་གྱི་གནས་སྟངས་དེ་ཛ་དྲག་དང་ཐབས་སྐྱོ་བོ་ཞིག་ཆགས་ཀྱི་ཡོད་རེད་དེ། ད་ལན་སྤུན་ཟླ་ཚང་མས་དམ་ཚིག་རྡོག་རྩ་གཅིག་སྒྲིལ་དང་། ཁྱིམ་ཚང་གཅིག་དང་ནང་མི་གཅིག་ཡིན་པའི་ཚོར་སྣང་ཞིག་སྤྲད་བྱུང་བས། དེ་ནི་སེམས་འགུལ་ཐེབས་པ་ཞིག་བྱུང་། ངས་འདས་གྲོངས་སུ་གྱུར་བའི་སྤུན་ཟླ་ཚོའི་ཆེད་དུ་བསྔོ་སྨོན་དང་། རྨས་སྐྱོན་ཕོག་པ་རྣམས་རྨས་སྐྱོན་ལས་མྱུར་དུ་གྲོལ་རྒྱུ། དེ་བཞིན་མུ་མཐུད་ས་གནས་སྲིད་གཞུང་དང་རིམ་པ་ཁག་གི་དབུ་ཁྲིད། བོད་རིགས་སྤུན་ཟླ་ཚང་མས་་དིང་རི་ས་ཁུལ་དུ་རྒྱབ་སྐྱོར་དང་རོགས་རམ་གནང་རོགས་ཞུ་ཡི་ཡོད། ཅེས་གསུངས་འདུག
༧ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་གིས་བརྙན་ལམ་ནས་ཐུགས་སྨོན་གསུང་འཕྲིན་བསྩལ་བའི་ནང་། བློ་ཕམ་ཆེ་བའི་གནས་ཚུལ་ཞིག་ལ་ང་རང་ཚོའི་ཕ་ཡུལ་བོད་གངས་ཅན་གྱི་ལྗོངས་སྟོད་ཕྱོགས་ཀྱི་ས་ཁུལ་མང་པོ་ཞིག་ལ་གློ་བུར་དུ་ས་ཡོམ་བརྒྱབ་ནས་མི་མང་པོ་ལ་སྲོག་སྐྱོན་དང་་གོད་ཆག་ཆེན་པོ་དེ་འདྲ་བྱུང་ཡོད་ས་རེད། དེ་ཚོ་ཚང་མར་གདུང་སེམས་མཉམ་སྐྱེད་ཞུ་བ་དང་ཆབས་ཅིག་ཏུ་ཁ་སང་གནས་ཚུལ་གོ་མ་ཐག་ཏུ་ཤི་བོ་རྣམས་ལ་འཕོ་བ་དང་། ཤུལ་ལུས་གསོན་པོ་ཚོར་སེམས་གསོ་ལམ་སེང་བྱས་པ་ཡིན། ཞེས་དང་། ཚང་མ་བློ་ཕམ་ཡོང་བ་དེ་སྨྲོས་མི་དགོས་པ་ཞིག་རེད་དེ། བློ་ཕམ་བྱས་ནས་ཕན་པ་མེད་པས་ཚང་མ་སེམས་ཤུགས་སྐྱེད་པས། སོ་སོའི་ལས་ལ་བཟོ་ཐབས་མེད་ལ། ས་ཡོམ་ཁྲོད་འདས་གྲོངས་སུ་ཕྱིན་པ་རྣམས་ལ་མགྱོགས་ནས་མྱུར་དུ་དལ་འབྱོར་མི་ལུས་འཐོབ་པ་དང་། རབ་བྱུང་ན་སངས་རྒྱས་ཀྱི་གོ་འཕང་ཐོབ་ཐུབ་པ་དང་། ཤུལ་ལུས་རྣམས་ལ་བགེགས་བར་ཆད་སེལ་ཞིང་བསམ་དོན་ལྷུན་གྱིས་འགྲུབ་པའི་ཐུགས་སྨོན་མཛད་འདུག
དེ་བཞིན་༧སྐྱབས་རྗེ་ཀིརྟི་རིན་པོ་ཆེ་མཆོག་གིས་ཐུགས་སྨོན་གསུང་འཕྲིན་བསྩལ་བའི་ནང་། ཁ་སང་ཕྱི་ཟླ་དང་པོའི་ཚེས་བདུན་གྱི་ཞོགས་པར་བོད་ནང་དུ་ས་ཡོམ་གྱི་འབྱུང་བའི་གནོད་པ་ཤུགས་ཆེན་བྱུང་བའི་དབང་གིས་མི་རྒྱུ་གཉིས་ལ་གནོད་སྐྱོན་ཚབས་ཆེན་ཐེབས་འདུག་པར་བརྟེན། རྡོར་གདན་ཀིརྟིའི་སྒར་བསམ་ཡས་གླིང་གི་སྨོན་ལམ་ཆེན་མོ་འདིའི་ཐོག་ནས་གདུང་སེམས་མཉམ་བསྐྱེད་ཀྱིས་ཐུགས་གསོ་ཞུ་བ་དང་ཆབས་ཅིག ཕྱི་མའི་ལྔ་ལམ་དུ་གྱུར་པ་རྣམས་དལ་རྟེན་རིམ་བརྒྱུད་བླ་མེད་རྫོགས་བྱང་མྱུར་དུ་ཐོབ་པ་དང་། རྨས་སྐྱོན་ཕོག་པ་རྣམས་ཀྱི་ནད་གཞི་མྱུར་དྭངས། སྣོད་བཅུད་ཀྱི་རྒུད་པ་ཐམས་ཅད་མྱུར་དུ་སེལ་བའི་ཐུགས་སྨོན་སྐྱབས་འཇུག་བརྩེ་བས་གཟིགས་པ་དང་འབྲེལ། བདེན་ཚིག་སྨོན་ལམ་ཚད་མེད་ཡོན་ཏན་མ་དམིགས་བསལ་གསུང་གནང་ཡོང་བར་མཁྱེན། ཞེས་གསུངས་འདུག
༧རྒྱལ་བ་སྨན་རིའི་ཁྲི་འཛིན་སོ་བཞི་པ་མཆོག་གིས་ཐུགས་སྨོན་གསུང་འཕྲིན་བསྩལ་བའི་ནང་། རང་བྱུང་འབྱུང་བའི་འཇིག་པ་ནི་སུ་ཞིག་གིས་ཀྱང་སྔོན་དཔག་མི་ཐུབ་ཅིང་བཟློག་པར་ནུས་པ་ཞིག་མིན། དེས་ན་འཇིག་རྟེན་གྱི་ཁམས་འདིར་ཆེས་འཇིགས་སུ་རུང་པའི་གོད་ཆག་ཚབས་ཆེ་ཤོས་ནི་འབྱུང་བའི་འཇིག་པ་དག་ལས་འབྱུང་བར་ངེས། དེ་ལྟར་ན་ད་ལམ་བོད་གངས་ཅན་ལྗོངས་ཀྱི་སའི་ཆར་ལ་སྟོད་དིང་རི་རྫོང་གཙོས་པའི་དེའི་ཉེ་འཁོར་གྱི་ས་གནས་མང་པོ་ཞིག་ལ་ཕྱི་ལོ་༢༠༢༥ ཟླ་ ༠༡ ཚེས་ ༧ ཉིན་ས་ཡོམ་ཆེན་པོ་ཞིག་བྱུང་བའི་འོག རང་རིགས་སྤུན་ཟླ་བརྒྱ་ཕྲག་ལྷག་འདས་གྲོངས་དང་བཅུ་ཕྲག་མང་པོར་རྨས་སྐྱོན། མཁར་ཁང་བརྒྱ་ཕྲག་བརྒལ་བ་གཏོར་བཤིག མདོར་ན་མི་རྒྱུ་ཟོག་གསུམ་ལ་ཤིན་ཏུ་ནས་ཡིད་སྐྱོ་བའི་གནོད་འཚེ་ཚབས་ཆེན་བྱུང་བར། འདི་ག་གཡུང་དྲུང་བོན་གྱི་༧གདན་ས་སྨན་རིའི་དགོན་དང་། བཙུན་དགོན་རཏྣ་སྨན་གླིང་བཅས་དགེ་བཙུན་མང་ཚོགས་ནས་འདས་གསོན་རྣམས་ཀྱི་ཆེད་དུ་བསྔོ་སྨོན་དང་ཚེ་སྒྲུབ་བར་ཆད་ལམ་སེལ་བཅས་ཞུས་དང་ཞུ་བཞིན་པར་མ་ཟད། ངོས་ནས་ཀྱང་ཚེ་འདས་རྣམས་བར་དོའི་འཇིགས་པ་ལས་བྲལ་ཏེ། མངོན་མཐོ་ལྷ་མིའི་དལ་རྟེན་རིམ་བརྒྱུད། མཐར་ཐུག་རྫོགས་བྱང་རིན་པོ་ཆེ་མྱུར་དུ་ཐོབ་པའི་ཐེག་པ་ཆེན་པོའི་བསྔོ་སྨོན་ཞུ་བ་དང་འབྲེལ། རྨས་སྐྱོན་ཕོག་པ་རྣམས་མྱུར་དུ་དྲག་བསྐྱེད་དང་། རྗེས་ལུས་ནང་མི་གཉེན་ཉེ་བཅས་ལ་ཐུགས་གསོའི་འཚམས་འདྲི་དང་། ལུས་སེམས་སྡུག་བསྔལ་གྱིས་མནར་བ་ཁྱེད་རྣམས་མྱུར་ནས་མྱུར་དུ། སྔར་བཞིན་ཞི་བདེ་དང་ཚེ་རིང་ནད་མེད། བར་ཆད་མཐའ་དག་ཞི་ཕྱིར། སྐྱབས་དང་མགོན་དུ་གྱུར་བའི་ཡུལ་མཆོག་དམ་པ་རྣམས་ལ་གསོལ་བ་ཕུར་ཚུགས་སུ་འདེབས་བཞིན་ཡོད། ཅེས་གསུངས་འདུག
ཇོ་ནང་རྒྱལ་ཚབ་རིན་པོ་ཆེ་མཆོག་ནས་ཐུགས་སྨོན་གསུང་འཕྲིན་བསྩལ་བའི་ནང་། བོད་གངས་རིའི་ལྗོངས་ཀྱི་སྟོད་དིང་རི་སོགས་ཀྱི་ས་གནས་ཁ་ཤས་ལ་ས་ཡོམ་གྱི་གོད་ཆག་ཆེན་པོ་བྱུང་འདུག་པར་ཐུགས་གསོ་ཞུ་ཡི་ཡོད། དེ་ལྟ་བུའི་གོད་ཆག་བྱུང་བ་དེར་ཧ་ཅང་གིས་བློ་ཕམ་དང་ཡིད་སྐྱོ་བོ་བྱུང་། ཡིན་ནའང་། ང་རང་ཚོ་ནང་པ་སངས་རྒྱས་པས་གསུངས་པ་ནང་བཞིན་སྔོན་གྱི་ལས་ལ་ཟློག་པ་མེད་པ་རེད། དེ་འདྲ་ཡིན་དུས་ས་ཡོམ་གོད་ཆག་བྱུང་བ་དེ་ལས་ཀྱིས་འཁོར་བ་ཞིག་ཡིན་པ་རེད། མདོར་ན་ཤི་བོ་རྣམས་ལ་བསྔོ་སྨོན་དང་ཤུལ་ལྷག་རྣམས་ལ་མ་འོངས་པར་རྐྱེན་ངན་བར་ཆད་ཐམས་ཅད་ཞི་ནས་བསམ་དོན་ཆོས་བཞིན་འགྲུབ་པའི་སྨོན་འདུན་ཞུ་ཡི་ཡོད། ཅེས་དང་། དེ་རིང་ཞོགས་པར་རིན་པོ་ཆེ་མཆོག་ནས་བལ་ཡུལ་གྱི་གནས་ཁྱད་པར་བ་མཆོད་རྟེན་རྣམ་གསུམ་གྱི་ཡ་གྱལ་འཕགས་པ་ཤིང་ཀུན་གྱི་མཆོད་རྟེན་ལ་སྐོར་བ་གནང་སྟེ་མཆོད་མེ་བསྒྲོན། ཐུགས་སྨོན་མཛད་འདུག་ལ། གནས་མཆོག་རྡོ་རྗེ་གདན་དུ་འཚོག་བཞིན་པའི་ཇོ་ནང་སྨོན་ལམ་ཆེན་མོའི་ཐོག་ལའང་ས་ཡོམ་གོད་ཆག་བྱུང་བར་བསྔོ་སྨོན་སྐྱབས་འཇུག་གནང་ཡོད་འདུག་ལ། མ་འོངས་པར་བོད་ཙམ་མ་ཟད། འཛམ་གླིང་སྤྱི་ཡོངས་ནང་འདི་ལྟ་བུའི་གོད་ཆག་མི་ཡོང་བར་ཐུགས་སྨོན་མཛད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
