ཨ་རུ་ན་ཅལ་ནང་༧གོང་ས་མཆོག་གི་མཚན་ཐོག་ནས་ལས་གཞི་གཉིས་དབུ་འབྱེད་གནང་།

ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་བོད་ནས་རྒྱ་གར་ནང་བཙན་བྱོལ་དུ་ཕེབས་པའི་ལོ་རྒྱུས་རྗེས་དྲན་ཞུ་བའི་༧གོང་ས་ཏཱ་ལའི་བླ་མ་མཆོག་གི་ཤུལ་བཞག་ཕེབས་ལམ་དང་རང་བྱུང་ཁོར་ཡུག་སྲུང་སྐྱོབ་ཏུ་དམིགས་པའི་༧གོང་ས་ཏཱ་ལའི་བླ་མ་སྐྱེ་དངོས་སྣ་མང་སྤྱི་གླིང་ཞེས་པའི་ལས་གཞི་གཉིས་ཀྱི་རྨང་རྡོ་དབུ་འབྱེད་གནང་འདུག

རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཟླ་འདིའི་ཕྱི་ཚེས་ ༡༨ ཉིན་རྒྱ་གར་ཨ་རུ་ན་ཅལ་མངའ་སྡེའི་ནུབ་ཁ་མིང་ (Kameng) རྫོང་ནང་གི་ (Khellong) ཁུལ་དུ། ༧གོང་ས་རྒྱལ་བ་རིན་པོ་ཆེ་མཆོག་གི་མཚན་གནས་རྗེས་དྲན་ཞུ་ཆེད། ༧གོང་ས་ཏཱ་ལའི་བླ་མ་མཆོག་གི་ཤུལ་བཞག་ཕེབས་ལམ་ (His Holiness the Dalai Lama Heritage Trekking Trail) ཞེས་པ་དང་། ༧གོང་ས་ཏཱ་ལའི་བླ་མ་སྐྱེ་དངོས་སྣ་མང་སྤྱི་གླིང་ (His Holiness the Dalai Lama Biodiversity Park) ཞེས་པའི་ལས་གཞི་གཉིས་ཀྱི་རྨང་རྡོ་དབུ་འབྱེད་གནང་ཡོད་འདུག

སྐབས་དེར་ཨ་རུ་ན་ཅལ་མངའ་སྡེའི་ཤིང་ནགས་དང་ཁོར་ཡུག་བློན་ཆེན་ (Wangki Lowang) ལགས་དང་། གྲོས་ཚོགས་འཐུས་མི་བསྟན་འཛིན་ཉི་མ་ (Tenzin Nyima Glow) ལགས། གྲོས་ཚོགས་འོག་མའི་འཐུས་མི་དང་བོད་དོན་རྒྱབ་སྐྱོར་བ་ (Tseten Chombay) ལགས། དེ་བཞིན་ནུབ་ཁ་མིང་རྫོང་གི་ (ZPZ Zilla Parishad) ཚོགས་གཙོ་ཀརྨ་རྡོ་རྗེ་ (Karma Dorjee Thongdok) ལགས་དང་། ཤིང་ནགས་དང་རི་སྐྱེས་སྲོག་ཆགས། སྐྱེ་དངོས་རིགས་ཀྱི་སྲུང་སྐྱོབ་པ་དྷ་མོ་དྷར་ (Dr. Damodar) ལགས་སོགས་གནད་ཡོད་མི་སྣ་ཁག་ཅིག་མཉམ་ཞུགས་གནང་ཡོད་འདུག

དེ་འབྲེལ་ཨ་རུ་ན་ཅལ་མངའ་སྡེའི་ཤིང་ནགས་དང་ཁོར་ཡུག་གི་བློན་ཆེན་ (Wangki Lowang) ལགས་ཀྱིས་གསར་འགོད་པར། གྲོས་ཚོགས་འོག་མའི་འཐུས་མི་ (Tseten Chombay) ལགས་དང་། གྲོས་ཚོགས་འཐུས་མི་བསྟན་འཛིན་ཉི་མ་ལགས་སོགས་དང་མཉམ་དུ་དེ་སྔ་༧གོང་ས་རྒྱལ་བ་རིན་པོ་ཆེ་མཆོག་བོད་ནས་རྒྱ་གར་དུ་བཙན་བྱོལ་དུ་ཕེབས་སྐབས་ཀྱི་ཤུལ་བཞག་ཕེབས་ལམ་དང་། ༧གོང་ས་ཏཱ་ལའི་བླ་མ་སྐྱེ་དངོས་སྣ་མང་སྤྱི་གླིང་གི་ལས་གཞི་གཉིས་ཀྱི་རྨང་རྡོ་དབུ་འབྱེད་ཞུ་ཐུབ་པ་བྱུང་བ་སྐལ་བ་བཟང་པོ་བྱུང་། ལས་གཞི་འདིས་ཨ་རུ་ན་ཅལ་གྱི་ལོ་རྒྱུས་ཀྱི་ཤུལ་བཞག་ལ་གུས་བརྩི་དང་། ཐུན་མོང་མ་ཡིན་པའི་སྐྱེ་དངོས་རིགས་སྲུང་སྐྱོབ་ཡོང་ཐབས་བྱ་རྒྱུར་དམིགས་ཡོད་ལ། ཚང་མས་མཉམ་རུབ་ཀྱིས་ནུབ་ཁ་མིང་དུ་ཁོར་ཡུག་སྲུང་སྐྱོབ་དང་། ཡུལ་སྐོར་སྤྲོ་འཆམ་གྱི་ལྟེ་གནས་ཤིག་བསྐྲུན་རྒྱུར་འབད་བརྩོན་བྱེད་ཀྱི་ཡིན། ཞེས་སོགས་གསུངས་འདུག གཞན་ཡང་། རྒྱ་གར་གྱི་གྲོས་ཚོགས་འོག་མའི་འཐུས་མི་ (Tseten Chombay) ལགས་ཀྱིས། ཡུལ་སྐོར་སྤྲོ་འཆམ་གྱི་ས་ཚིགས་ཡར་རྒྱས་གོང་སྤེལ་དང་། ཁུལ་དེའི་རིག་གཞུང་དང་ལོ་རྒྱུས་སོགས་ཉར་ཚགས་བྱ་རྒྱུའི་དམ་བཅའ་བརྟན་པོ་ཡོད། ཅེས་གསུངས་འདུག

༧གོང་ས་ཏཱ་ལའི་བླ་མ་མཆོག་གི་ཤུལ་བཞག་ཕེབས་ལམ་གྱི་ལས་གཞིས་༧མགོན་པོ་གང་ཉིད་མཆོག་གི་བཀའ་སློབ་ལམ་སྟོན་བསྩལ་བ་སོགས་ཀྱི་རླབས་ཆེན་གྱི་མཛད་པར་རྗེས་དྲན་ཞུ་ཆེད་དང་། ཁོང་གི་བྱམས་དང་བརྩེ་བའི་མཛད་པ་རྣམས་རྒྱ་ཁྱབ་ཏུ་གཏོང་བར་དམིགས་ཡོད་འདུག་ལ། དེ་བཞིན་༧གོང་ས་ཏཱ་ལའི་བླ་མ་སྐྱེ་དངོས་སྣ་མང་སྤྱི་གླིང་ནི་ཁུལ་དེའི་རང་བྱུང་ཁོར་ཡུག་སྲུང་སྐྱོབ་དང་། རིག་གཞུང་གཅེས་འཛིན། ཞི་བདེ་མཉམ་གནས་སོགས་ལ་དམིགས་པ་ཞིག་ཡིན་འདུག

ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་དབུས་པའི་༧སྐུ་འཁོར་ལྷན་རྒྱས་བོད་ནས་རྒྱ་གར་བཙན་བྱོལ་དུ་བྲོས་བྱོལ་ལ་ཕེབས་སྐབས། ཧིན་བོད་གཉིས་ཀྱི་ས་མཚམས་སྐས་འཛེགས་མ་ཎིར་ཞབས་སོར་འཁོད་དེ། དང་ཐོག་ (Lhasa Dwar) ཞེས་པའི་རྒྱལ་སྒོའི་ཉེ་འཁྲིས་སུ་སྐུ་ངལ་གསོ་གནང་མཛད་སྐབས། ༧གོང་ས་མཆོག་གིས་བསྣམས་པའི་ཕྱག་མཁར་དེ་ས་གནས་དེར་འདེབས་འཛུགས་གནང་སྟེ། ད་ཆ་ལྗོན་ཤིང་དུ་གྱུར་ཡོད་པའི་གནས་ཆེན་ཞིག་ཡིན་ཞིང་། བཞུགས་ཞག་དང་པོ་ཆུ་དྭངས་མོ་དང་། གོར་ཟམ་མཆོད་རྟེན་དུ་བཞུགས་ཞག་གཉིས་པ་མཛད། དེ་ནས་ཤག་ཏི་དང་། རླུང་ལ། མཐོང་ལེགས ། རྟ་དབང་དགོན་པ། ལྗང་། སེང་གེ་རྫོང་། སྡེ་རང་། ར་ཧུང་། འབུམ་སྡེ་ལ་བཅས་སུ་ཉིན་ཞག་རེ་བཞུགས་ཞག་མཛད་ཡོད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།