ཨ་རི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ནས་ཕྱིར་འཐེན་བྱས།

ཊོམ་ཕུས་ཨ་རི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ནས་ཕྱིར་འཐེན་དང་རྒྱལ་ཚོགས་ལ་སྤྲོད་བཞིན་པའི་རོགས་དངུལ་མཚམས་འཇོག་བྱས་ཡོད་འདུག

U.S. President Donald Trump speaks to reporters in the Brady Press Briefing Room at the White House in Washington, U.S., January 30, 2025. REUTERS/Elizabeth Frantz

རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་ཨ་རིའི་སྲིད་འཛིན་ཊོམ་ཕུས་བཀའ་ཁྱབ་ཅིག་ལ་མཚན་རྟགས་བརྒྱབ་སྟེ། ཨ་རི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་དང་། རྒྱལ་ཚོགས་ཀྱི་པ་ལི་སི་ཐན་རོགས་སྐྱོར་ཚོགས་པ། དེ་བཞིན། རྒྱལ་ཚོགས་ཀྱི་ཤེས་ཡོན་དང་ཚན་རིག རིག་གཞུང་བཅས་ཀྱི་ཚོགས་པ་སྟེ། རྒྱལ་ཚོགས་ཀྱི་རིག་དངོས་ཤུལ་བཞག་ཚོགས་ཁོངས་སོགས་ནས་ཕྱིར་ཐོན་བྱ་རྒྱུ་ཡིན་པའི་ཐག་གཅོད་བླངས་ཡོད་པ་མ་ཟད། རྒྱལ་ཚོགས་ལ་སྤྲོད་བཞིན་པའི་ཨ་རིའི་རོགས་དངུལ་ཁག་ཅིག་མཚམས་འཇོག་དང་བསྐྱར་ཞིབ་བྱེད་བཞིན་ཡོད་འདུག

ཨ་རི་རྒྱལ་ཚོགས་ཀྱི་ཚོགས་སྡེ་ཁག་ནས་ཕྱིར་འཐེན་བྱེད་དགོས་དོན་ཐད་སྲིད་འཛིན་ཊོམ་ཕུས། མཉམ་འབྲེལ་རྒྱལ་ཚོགས་ལ་ནུས་སྟོབས་ཧ་ཅང་ཆེན་པོ་ཡོད། འོན་ཀྱང་། དེས་ལས་དོན་ཡག་པོ་གཉེར་ཐུབ་ཀྱི་མེད་ཁར། འཛམ་གླིང་རྒྱལ་ཁབ་ཚང་མས་འདྲ་མཉམ་ཐོག་རྒྱལ་ཚོགས་ལ་རོགས་དངུལ་གཏང་དགོས་མོད། དུས་རྒྱུན་དུ་ཨ་རིས་རོགས་དངུལ་མང་ཤོས་གཏོང་དགོས་པ་དེ་ནི་འདྲ་མཉམ་མིན། ཞེས་བརྗོད་འདུག་ལ། དེ་སྔོན་ཊོམ་ཕུའི་སྲིད་འཛིན་ལས་ཐོག་དང་པོའི་སྐབས་སུའང་། ཊོམ་ཕུས་ཨ་རི་རྒྱལ་ཚོགས་ཀྱི་ཚོགས་སྡེ་ཁག་ནས་ཕྱིར་འཐེན་བྱས་པ་མ་ཟད། རྒྱལ་ཚོགས་ལ་རོགས་དངུལ་གཏོང་མཚམས་བཞག་ཡོད།

གནད་དོན་དེའི་ཐད་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཨན་ཊོ་ནེ་ལགས་ཀྱིས། ཨ་རིས་མཉམ་འབྲེལ་རྒྱལ་ཚོགས་ལ་རྒྱབ་སྐྱོར་བྱེད་བཞིན་པ་དེས་གོ་ལའི་བདེ་འཇགས་དང་ཚེ་སྲོག་མང་པོ་སྲུང་སྐྱོབ་བྱེད་བཞིན་ཡོད། དེར་བརྟེན། རྩོད་རྙོག་ཆེ་བའི་དུས་སྐབས་འདིར་ཨ་རིས་མུ་མཐུད་རྒྱལ་ཚོགས་དང་ལྷན་དུ་འབྲེལ་ལམ་ཤུགས་ཆེ་རུ་གཏོང་བའི་རེ་བ་ཡོད་ཅེས་བརྗོད་འདུག

ཕོ་བྲང་དཀར་པོའི་ལས་དྲུང་ཝིལ་ཆཱར་ཧྥི་ (Will Scharf) ལགས་ཀྱིས། ཨ་རིས་རྒྱལ་ཚོགས་ཀྱི་ལྷན་ཁང་ཁག་ཅིག་གཙོ་བྱས་པའི་རྒྱལ་ཚོགས་ལ་རོགས་དངུལ་གཏོང་བཞིན་པའི་གནས་སྟངས་ལ་བསྐྱར་ཞིབ་བྱ་རྒྱུ་ཡིན་པ་དང་། དམིགས་བསལ་མཉམ་འབྲེལ་རྒྱལ་ཚོགས་ནང་རྒྱལ་ཁབ་མང་པོ་ཡོད་པའི་ཁྲོད། རོགས་དངུལ་གཏོང་བཞིན་པའི་གྲངས་འབོར་ལ་ཧེ་བག་ཆེན་པོ་ཤོར་ཡོད་པའི་ཐོག རྒྱལ་ཚོགས་ནང་འདྲ་མཉམ་གྱི་ལྟ་ཚུལ་མེད་ཅིང་། ཨ་རིར་སྡང་ཕྱོགས་ཀྱི་ལྟ་སྟངས་འཛིན་གྱིན་འདུག་སྟབས། ད་ལན་ཊོམ་ཕུའི་གཞུང་གིས་རྒྱལ་ཚོགས་ནས་ཕྱིར་ཐོན་གྱི་ཐག་གཅོད་དེ་བླངས་ཡོད་པའི་འགྲེལ་བརྗོད་བྱས་འདུག

ཕྱི་ཟླ་ ༡ ཚེས་ ༢༠ ཉིན་ཊོམ་ཕུས་སྐབས་གཉིས་པའི་ཨ་རིའི་སྲིད་འཛིན་གྱི་ལས་ཁུར་མགོ་བརྩམས་པ་དང་། ཉིན་དེར་ཨ་རི་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཚོགས་ཁོངས་དང་། པ་རེ་སི་གོ་ལའི་གནམ་གཤིས་འགྱུར་ལྡོག་གི་ཚོགས་ཁོངས་སོགས་ནས་ཕྱིར་འཐེན་བྱས་ཤིང་། དེ་བཞིན། དེ་རིང་རྒྱལ་ཚོགས་ཀྱི་ཚོགས་སྡེ་གསུམ་ནས་ཕྱིར་འཐེན་བྱེད་བཞིན་པ་སོགས་ཀྱིས། འཛམ་གླིང་ནང་གནམ་གཤིས་འགྱུར་ལྡོག་དང་འཕྲོད་བསྟེན། དམག་འཁྲུག ཤེས་ཡོན་སོགས་ཀྱི་གནས་བབ་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པ་རེད།

གསར་འགོད་པ། སྐལ་བཟང་སྦྱིན་པ།