དབྱིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་གནང་། 

དབྱིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་བྱུང་བའི་ལྷན་ཚོགས་བསྐོངས་ཏེ་སི་ཀོ་ཊ་ལེནྜ་རྒྱལ་ཡོངས་ཚོགས་པའི་གྲོས་ཚོགས་འཐུས་མི་སྐུ་ཞབས་ཀྲི་སི་ལོ་ལགས་ཚོགས་གཙོར་བདམས་ཡོད་འདུག

ཁ་སང་ཕྱི་ཚེས་ ༤ ཉིན་དབྱིན་ཡུལ་རྒྱལ་ས་ལོན་ཏོན་དུ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་གནང་ཐུབ་ཡོད་ཅིང་། ལྷན་ཚོགས་ཐོག་དབྱིན་ཡུལ་ངལ་རྩོལ་ཚོགས་པ་དང་། རྙིང་ཞེན་ཚོགས་པ། སི་ཀོ་ཊ་ལེནྜ་རྒྱལ་ཡོངས་ཚོགས་པ་བཅས་ནས་ཚོགས་མི་བདུན་འཛོམས་ཁྲོད་པའི་ཁྲོད་ནས་སི་ཀོ་ཊ་ལེནྜ་རྒྱལ་ཡོངས་ཚོགས་པའི་གྲོས་ཚོགས་འཐུས་མི་སྐུ་ཞབས་ཀྲི་སི་ལོ་ལགས་ཚོགས་པའི་ཚོགས་གཙོར་འོས་འདེམས་བྱུང་ཡོད་འདུག

ཚོགས་པའི་ལྷན་ཚོགས་ཐོག་དབྱིན་ཡུལ་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་ཀྱིས། དབྱིན་ཡུལ་གྱི་གྲོས་ཚོགས་འཐུས་མི་རྣམས་ཀྱིས་བོད་དོན་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། ཉེ་ལམ་བོད་ནང་དུ་ས་ཡོམ་གྱི་གོད་ཆག་བྱུང་ནས་བོད་མི་རྐྱེན་འདས་དང་སྡོད་ཁང་ལ་རྡིབ་སྐྱོན་བྱུང་བའི་གནས་སྟངས་སོགས་ཀྱིས་མཚོན་པའི་བོད་དོན་ཐད་གླེང་སློང་དང་། རྒྱ་ནག་གཞུང་གིས་དྲང་བདེན་མིན་པའི་ཐོག་ནས་འཁྱོག་བརྗོད་དང་དྲིལ་བསྒྲགས་སྣ་ཚོགས་བྱས་པ་རྣམས་དབྱིན་ཡུལ་གྱི་གྲོས་ཚོགས་འཐུས་མི་རྣམས་ཀྱིས་ཐེར་འདོན་དང་བོད་དོན་ཐད་མུ་མཐུད་རྒྱབ་སྐྱོར་གནང་རྒྱུའི་རེ་སྐུལ་ཞུས་ཡོད་འདུག

ད་ལན་དབྱིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོའི་ཚོགས་འདུའི་ཐོག དབྱིན་ཡུལ་གྲོས་ཚོགས་གོང་མའི་འཐུས་མི་ཌེ་ཝིད་ཨལ་ཊོན་ (David Alton) ལགས་དང་། ངལ་རྩོལ་ཚོགས་པའི་གྲོས་ཚོགས་འཐུས་མི་ལུག་ཨེག་ཧར་སི་ཊི་ (Luke Akehurst) ལགས། ངལ་རྩོལ་ཚོགས་པའི་གྲོས་ཚོགས་འཐུས་མི་བི་ལེར་མེག་ཌོ་གྷལ་ (Blair McDougall) ལགས། ངལ་རྩོལ་ཚོགས་པའི་གྲོས་ཚོགས་འཐུས་མི་ཇེ་སི་ཀ་མོར་ཌན་ (Jessica Morden) ལགས། གྲོས་ཚོགས་འཐུས་མི་ཤི་མ་སི་ལོ་གྷན་ (Seamus Logan) ལགས། རྙིང་ཞེན་ཚོགས་པའི་གྲོས་ཚོགས་འཐུས་མི་ཌེ་ནི་ཀུ་རུ་གྷར་ (Danny Kruger) ལགས་བཅས་མཉམ་ཞུགས་གནང་ཏེ། མུ་མཐུད་བོད་དོན་རྒྱབ་སྐྱོར་གནང་རྒྱུ་ཡིན་སྐོར་སོགས་གསུངས་འདུག

དེ་བཞིན་དབྱིན་ཡུལ་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པ་སླར་གསོའི་ཚོགས་འདུའི་སྟེང་། འདི་ལོར་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་སྲུང་གཙི་དང་། རྒྱ་ནག་གཞུང་གིས་༧ཀུན་གཟིགས་༧པཎ་ཆེན་རིན་པོ་ཆེ་མཆོག་བཙན་འཁྲིད་བྱས་ཏེ་གར་སོང་ཆ་མེད་དུ་གྱུར་ནས་མི་ལོ་ ༣༠ འཁོར་བ་དང་བསྟུན་དབྱིན་ཡུལ་དུ་ངོ་རྒོལ་ལས་འགུལ་སྤེལ་རྒྱུ་ཡིན་པ་སོགས་ཀྱི་ཐད་ལའང་གླེང་སློང་གནང་འདུག་ལ། བོད་དོན་རྒྱབ་སྐྱོར་ཚོགས་པ་དེའི་ནང་གྲོས་ཚོགས་འཐུས་མི་ ༢༡ ཡོད་འདུག

གསར་འགོད་པ་དཔལ་ལྡན་གྱིས་བོད་མིའི་སྒྲིག་འཛུགས་ཀྱི་དྲ་རྒྱ་ལས་བཏུས།