བོད་ཀྱི་དམངས་གླུའི་སྲོག་ཤིང་ལྟ་བུའི་གླུ་བ་ལུ་གུ་རྒྱལ་ལགས་འདས་གྲོངས་སུ་གྱུར་བར་བོད་ཕྱི་ནང་གཉིས་ཀྱི་བོད་མི་རྣམས་ཀྱིས་གདུང་སེམས་མཉམ་སྐྱེད་དང་མྱ་ངན་ཞུ་བཞིན་འདུག
ཟླ་འདིའི་ཕྱི་ཚེས་ ༡༠ ཉིན་གྱི་སྔ་དྲོར་བོད་ཀྱི་གླུ་བ་གྲགས་ཅན་ལུ་གུ་རྒྱལ་ལགས་ནད་གཞི་རྐྱེན་གྱིས་འདས་གྲོངས་སུ་གྱུར་ཡོད་ཅིང་། ཉིན་འདི་དག་གི་རིང་བོད་ཕྱི་ནང་གཉིས་ཀྱི་བོད་མི་རྣམས་ཀྱིས་དྲ་ལམ་ཁག་ཏུ་ཁོང་གིས་གླུ་གཞས་བརྩམས་ཆོས་རྣམས་འགྲེམས་སྤེལ་བྱས་ཏེ་གླུ་བ་ཁོང་ལ་གདུང་སེམས་མཉམ་སྐྱེད་དང་མྱ་ངན་ཞུ་བཞིན་ཡོད་འདུག
དྲ་ལམ་དུ་སྙན་ངག་པ་ཞིག་གིས། རྨ་ཆུའི་རྩྭ་ཐང་གི་ཞོགས་པའི་སྨུག་པ་མ་ཐོར་པར་རྨ་ཁུག་དང་པོའི་རྦ་རླབས་ཀྱིས་ད་དུང་གླུ་དབྱངས་ལེན་བཞིན་པའི་སྐབས་སུ། མཐོ་སྒང་གི་སྙན་ངག་བརྩམས་ཆོས་ལ་ཚེ་སྲོག་དཀྱུས་བའི་གླུ་བས་གཏན་དུ་གླུ་ལེན་མཚམས་བཞག་ཡོད། གླུ་གར་རྒྱལ་བཞུད་སོང་། ཁྱེད་ཀྱི་གླུ་སྐད་ཀྱི་མདོ་དབུས་མཐོ་སྒང་དུ་ཆེས་དྭངས་གཙང་བླ་སྲོག་བསྐོས་ཡོད། ཅེས་བྲིས་འདུག
གླུ་བ་ལུ་གུ་རྒྱལ་ལགས་ནི་ཕྱི་ལོ་ ༡༩༦༣ ལོའི་ཟླ་ ༥ བའི་ནང་བོད་མདོ་སྨད་རྨ་ཆུ་རྫོང་ཉིན་མ་ཡུལ་ཚོ་རུ་སྐྱེས་ཡོད་ཅིང་། ཁོང་ལ་ལྷན་སྐྱེས་ཀྱི་སྐད་ངག་སྙན་མོ་ཞིག་ལྡན་ཞིང་ཆུང་དུས་ནས་གླུ་གཞས་ལེན་པར་སྤྲོ་བ་ཡོད་པ་ཞིག་ཡིན་འདུག རང་ལོ་ ༢༣ ཐོག་ཁོང་གིས་གསར་རྩོམ་བརྩམས་ཆོས་ཨ་ཞང་ལོ་ལོ་ཞེས་པའི་གླུ་དེ་རྒྱ་ནག་རྒྱལ་ཡོངས་ཀྱི་དམངས་ཁྲོད་གླུ་གཞས་དང་ཞབས་བྲོའི་འཁྲབ་སྟོན་ཁྲོད་གཞས་ཚིག་དང་གདངས་དབྱངས་གསར་རྩོམ་གྱི་བྱ་དགའ་ཨང་དང་པོ་དང་རྐྱང་གཞས་ཀྱི་བྱ་དགའ་ཨང་གསུམ་བླངས་ཤིང་། རྒྱ་ནག་རྒྱལ་ཡོངས་སྐབས་གཉིས་པའི་གྲངས་ཉུང་མི་རིགས་ཀྱི་དམངས་གླུ་འགྲན་རིམ་གྱི་པེ་ཅིང་འགྲན་བསྡུར་ཁྲོད་རྒྱ་ནག་རྒྱལ་ཡོངས་ཀྱི་མཐའ་མའི་འགྲན་བསྡུར་ལས་ཕུལ་བྱུང་བུམ་པ་རྟགས་མའི་བྱ་དགའ་ཐོབ་ཡོད། ཁོང་ནི་བོད་ཀྱི་དམངས་གླུ་རྒྱུད་འཛིན་པ་གྲགས་ཅན་ཞིག་ཡིན་པ་མ་ཟད། སྔ་རྗེས་སུ་རྒྱ་ནག་རྒྱལ་ཡོངས་ཀྱི་རིམ་པ་དང་པོའི་འཁྲབ་སྟོན་པ་དང་། རྒྱ་ནག་རྒྱལ་ཡོངས་ཀྱི་རིག་གནས་སྒྱུ་རྩལ་རིག་རྩལ་ལྷན་ཚོགས་ཀྱི་རིམ་པ་དང་པོའི་སྒྱུ་རྩལ་པ། ཀན་སུའུ་ཞིང་ཆེན་རོལ་དབྱངས་ཆེད་མཁས་པའི་མཐུན་ཚོགས་ཀྱི་ཚོགས་མི། ཀན་སུའུ་ཞིང་ཆེན་བོད་ཀྱི་དམངས་གླུ་རྒྱུན་འཛིན་པ། ཀན་ལྷོ་བོད་རིགས་རང་སྐྱོང་ཁུལ་རོལ་དབྱངས་ཆེད་མཁས་མཐུན་ཚོགས་ཀྱི་འགན་འཛིན། རྨ་ཆུ་དམངས་གླུ་མཐུན་ཚོགས་ཀྱི་ཚོགས་གཙོ་བཅས་ཡིན།
ཁོང་གི་ཚབ་མཚོན་བརྩམས་ཆོས་ལ་བཀྲ་ཤིས་པའི་ཁ་བཏགས་དང་། ཨ་ཞང་ལོ་ལོ། རྩྭ་ཐང་གི་འབྲོག་གླུ། གྲོགས་པོ་སོགས་དམངས་གླུ་དང་གླུ་གཞས་འགྲེམས་སྤེལ་བྱས་ཏེ་བོད་གཞིས་བྱེས་བོད་མི་རྣམས་ཀྱི་དགའ་བསུ་ཆེན་པོ་ཐོབ་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
