བོད་རང་སྐྱོང་ལྗོངས་ཟེར་བའི་དམར་ཤོག་ཏང་མི་ཚོས་བོད་ནང་དུ་ཁ་བྲལ་གྱི་ལས་འགུལ་ཐོག་དྲག་གནོན་དོ་ནན་བྱ་རྒྱུ་ཡིན་ཞེས་དམར་ཤོག་ཚོགས་པའི་ཚོགས་ཆེན་གཉིས་ཀྱི་སྟེང་ནས་ཁས་ལེན་བྱས་ཡོད་འདུག
དེ་རིང་ཨེ་ཤ་ཡའི་ (UCA) གསར་ཁང་གིས་གནས་ཚུལ་སྤེལ་བ་ལྟར་ན། ད་ལྟ་འཚོག་བཞིན་པའི་རྒྱ་ནག་རྒྱལ་ཡོངས་མི་དམངས་འཐུས་མི་སྐབས་བཅུ་བཞི་བའི་ཚོགས་ཆེན་སྐབས་བཅུ་པ་དང་མི་དམངས་སྲིད་གྲོས་སྐབས་བཅུ་བཞི་བའི་ཚོགས་ཆེན་ཐེངས་གསུམ་པའི་སྟེང་། བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་འཐུས་མི་ཚོས་ཁ་གཅིག་གྲགས་སུ། ཁ་བྲལ་ལ་གདོང་ལེན་ཚ་འདེད་བྱ་རྒྱུ་ཡིན་ཞེས་བོད་དོན་དང་འབྲེལ་བའི་ལས་འགུལ་གྱི་རིགས་ལ་ཕྱོགས་ཡོངས་ནས་གནོན་ཤུགས་སྤྲོད་རྒྱུ་ཡིན་པའི་ཁས་ལེན་བརྟན་པོ་བྱས་ཡོད་སྐོར་བསྒྲགས་འདུག
ད་དུང་ཚོགས་ཆེན་གཉིས་ཀྱི་སྟེང་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་འཐུས་མི་ཚོས། རྒྱ་ནག་གཞུང་གིས་བོད་བརྒྱུད་ནང་བསྟན་དམར་ཤོག་ཚོགས་པའི་ལྟ་གྲུབ་ཅན་དུ་བསྒྱུར་བཞིན་པར་ཡི་རངས་བསྔགས་བརྗོད་དང་ཞི་ཅིན་ཕིན་གྱིས་མགོ་འཁྲིད་དམར་ཤོག་གི་སྲོག་ཤིང་ལ་གུས་བཀུར་རྒྱུན་སྐྱོང་བྱ་རྒྱུ་ཡིན་ལུགས་ཙམ་དུ་མ་ཟད། བརྟན་བརླིང་ནི་ཡར་རྒྱས་ཡིན་པས། རྒྱ་ནག་གཞུང་དང་ལྟ་བ་མི་མཐུན་པའི་རིགས་ཏེ། ཁ་བྲལ་བར་འབོད་པ་དག་ལ་དོ་དམ་དྲག་གནོན་ཤུགས་ཆེན་བྱ་རྒྱུ་ལུགས་སོགས་བསྒྲགས་འདུག
ཡང་ཚོགས་ཆེན་གྱི་སྟེང་ཕྱི་ལོ་ ༢༠༢༤ ལོའི་བོད་རང་སྐྱོང་ལྗོངས་ཟེར་བའི་ཐོན་སྐྱེད་ཀྱི་སྤྱི་འབོར་བརྒྱ་ཆ་ ༦།༣ ཡར་འཕར་ཡོད་ཅིང་། དེ་ནི་རྒྱ་ནག་རྒྱལ་ཡོངས་ཀྱི་སྤྱི་འབོར་ལས་བརྒལ་ནས་འཕར་ཡོད་སྐོར་བསྒྲགས་འདུག་ནའང་། ཉེ་ལམ་བོད་ལ་སྟོད་དིང་རིའི་ཁུལ་དུ་ས་ཡོམ་བྱུང་སྐབས། རྒྱལ་སྤྱིའི་སྤྱི་ཚོགས་ཀྱིས་བོད་ནང་དུ་ཡར་རྒྱས་ཕྱིན་མེད་པའི་དཔང་རྟགས་གསལ་བོར་མཐོང་ཡོད་པ་ཉམས་ཞིབ་པས་འགྲེལ་བརྗོད་གནང་ཡོད།
དེ་བཞིན། རྒྱ་ནག་གི་སྲིད་བློན་ལི་ཆང་ (Li Qiang) གིས་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྟེང་གཏམ་བཤད་སྤེལ་སྐབས། རྒྱ་ནག་གིས་ཐའེ་ཝན་གྱི་གནད་དོན་ཞི་བའི་ལམ་ནས་སེལ་བར་འདོད་མོས་ཡོད། འོན་ཀྱང་། ཐའེ་ཝན་རང་བཙན་གྱི་ཕྱོགས་སུ་ཁ་བསྒྱུར་མཁན་དང་ཕྱི་ནས་ཐའེ་ཝན་རང་བཙན་ལ་རྒྱབ་སྐྱོར་བྱེད་གྱི་སྟོབས་ཤུགས་ལ་ངོ་རྒོལ་མཐའ་གཅིག་ཏུ་ཡོད་པའི་བསྒྲགས་གཏམ་ཡང་སྤེལ་འདུག་ཁར། འདི་ལོར་རྒྱ་ནག་གི་རྒྱལ་སྲུང་མ་དངུལ་བརྒྱ་ཆ་ ༧།༢ ཙམ་སྤར་ཏེ་མཐའ་མཚམས་སྲུང་རྒྱ་སྐྱེད་གཏོང་རྒྱུ་དང་། དེའི་ཁྲོད་བོད་ནང་དང་དམིགས་བསལ་བོད་དང་ས་འབྲེལ་ཡོད་པའི་ཁྱིམ་མཚེས་རྒྱལ་ཁབ་ཁག་གི་ས་མཚམས་ཕྱོགས་སུ་དམག་དོན་གྱི་འཛུགས་སྐྲུན་རྒྱ་སྐྱེད་ལ་སོགས་པའི་ལས་གཞི་མང་པོ་ཞིག་སྤེལ་རྩིས་ཡིན་པ་ཉམས་ཞིབ་པས་བརྗོད་འདུག་ལ། འདི་ལོའི་ཕྱི་ཟླ་ ༡ པོ་ནས་བཟུང་རྒྱ་ནག་གཞུང་གིས་ལོ་ ༡༨ སོན་པའི་སྐྱེས་པ་ཚང་མས་ངེས་པར་དུ་དམག་ཞབས་ཐོ་འགོད་བྱེད་དགོས་པའི་བཀོད་ཁྱབ་བཏང་བ་གཞིར་བཟུང་། ཕྱི་ཟླ་ ༡ པོ་ནས་བཟུང་རྒྱ་ནག་གཞུང་གིས་འཕགས་བོད་མཐའ་མཚམས་སོགས་སུ་དམག་སྦྱོང་བྱེད་བཞིན་པའི་དྲིལ་བསྒྲགས་ཤུགས་ཆེན་བྱས་སོང་།
ལོ་རེའི་བོད་མིའི་རང་དབང་སྒེར་ལངས་བསླེབ་ལ་ཉེ་མཚམས་སུ། རྒྱ་ནག་གཞུང་གིས་བོད་ནང་དུ་ཉེན་རྟོག་པ་དང་དམག་མི་འབོར་ཆེན་འགྲེམས་འཇོག་བྱས་ཏེ་དམ་དྲག་བྱས་དང་བྱེད་མུས་ཡིན་པ་ལྟར། ད་རེས་ཀྱང་རྒྱ་ནག་གཞུང་གིས་དམར་ཤོག་ཚོགས་པའི་འབྲེལ་ཡོད་དཔོན་རིགས་རྣམས་བོད་ཀྱི་ས་ཁུལ་འདྲ་མིན་དུ་མངགས་གཏོང་བྱས་ཏེ། བོད་ནང་དུ་དམ་དྲག་བྱེད་དགོས་བཙུགས་ཡོད་འདུག
གསར་འགོད་པ། སྐལ་བཟང་སྦྱིན་པ།
