ཕྱི་ལོ་ ༢༠༢༥ ལོའི་ཐའེ་པེ་རྩོམ་རིག་དུས་སྟོན་ཐོག་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་འདས་པོ་པདྨ་ཚེ་བརྟན་ལགས་ཀྱི་གློག་བརྙན་བརྩམས་ཆོས་ཁག་ཅིག་སྟོན་འཆར་འདུག
ཐའེ་པེ་གྲོང་ཁྱེར་ཤེས་རིག་ལས་ཁུངས་དང་ཐའེ་ཝན་གློག་བརྙན་ཤེས་རིག་ལྷན་ཚོགས་སོགས་ཀྱི་གོ་སྒྲིག་འོག འདི་ལོའི་ཕྱི་ཟླ་ ༥ ཚེས་ ༢༣ ནས་ཕྱི་ཟླ་ ༦ ཚེས་ ༥ བར་ཐའེ་ཝན་གྱི་རྒྱལ་ས་ཐའེ་པེ་གློག་བརྙན་ཁང་དུ། ཕྱི་ལོ་ ༢༠༢༥ ལོའི་ཐའེ་ཝན་རྩོམ་རིག་དུས་སྟོན་འཚོགས་གཏན་ཁེལ་ཡོད་ཅིང་། ཐེངས་འདིའི་རྩོམ་རིག་དུས་སྟོན་ཐོག་ཨ་རིའི་རྩོམ་པ་པོ་གྲགས་ཅན་འདས་པོ་པུལ་ཨུ་སི་ཌིར་ (Paul Auster) ལགས་དང་། བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་འདས་པོ་པདྨ་ཚེ་བརྟན་ལགས་རྣམ་གཉིས་ཀྱི་གློག་བརྙན་བརྩམས་ཆོས་ཁག་ཅིག་སྟོན་འཆར་ཡོད་འདུག
རྩོམ་རིག་དུས་སྟོན་སྐོར་ལ་ཐའེ་པེ་རྩོམ་རིག་དུས་སྟོན་དྲ་ལམ་དུ། རྩོམ་རིག་གི་བརྗོད་གཞིའི་ཐོག་ཏུ་ཐའེ་པེ་རྩོམ་རིག་དང་གློག་བརྙན་དུས་སྟོན་གྱིས་ལོ་ངོ་བཅུ་ཕྲག་མང་པོའི་རིང་རྩོམ་རིག་དང་གློག་བརྙན་བར་གྱི་འབྲེལ་ལམ་ཟབ་ཏུ་གཏོང་བའི་རེ་བ་བྱེད་བཞིན་ཡོད། ཕྱི་ལོ་ ༢༠༡༤ ནས་བཟུང་དུས་སྟོན་ནས་རིམ་པ་བཞིན་ཇུ་རཱ་སི་དང་།(Jurass) ཀཱ་ཧྥ་ཀ་ (Kafka) དང་པ་སོ་ལི་ནི།(Pasolini) ཡུ་ཀི་ཨོ་མི་ཤཱི་མ་ (Yukio Mishima)དང་བྷོབ་ཌི་ལན།(Bob Dylan) ཤུ་ཇི་ཊེ་ར་ཡ་མ།(Shuji Terayama) ཕུ་རོ་སི་ཊི་(Proust) དང་ཨན་ཇེ་ལོ་ཕུ་ལོ་སི།(Angelopoulos) སི་མོན་ཌི་བྷོ་ཝུ་ཨར།(Simone de Beauvoir) ཨན་ཨི་ནོལཊ་ (Anne Ainault )དང་ན་གི་ས་ཨོ་ཤི་མ་(Nagisa Oshima)སོགས་ཀྱི་བརྩམས་ཆོས་འགྲེམས་སྟོན་བྱས་ཡོད། རྩོམ་རིག་དང་གཟུགས་བརྙན་གྱི་ཕན་ཚུན་མཚོན་ཐབས་བརྒྱུད་ནས་དུས་སྟོན་གྱི་འགྲེམས་སྟོན་ཁྲོད། བརྩམས་ཆོས་ཀྱི་རྒྱབ་ལྗོངས་གཏིང་ཟབ་པའི་གོ་དོན་ལ་ཞིབ་འཇུག་བྱས་ཡོད་པ་མ་ཟད། ལྟད་མོ་བ་རྣམས་ཀྱི་རྩོམ་རིག་གློག་བརྙན་གྱི་མཐོང་རྒྱ་ཆེ་རུ་བཏང་ཡོད། ཅེས་བཀོད་འདུག
ཡང་དེ་འབྲེལ་ཡོངས་བསྒྲགས་ནང་འཆར་བཀོད་བྱེད་མཁན་ཞིག་གི་ངོས་ནས། འདི་ལོའི་གློག་བརྙན་དུས་སྟོན་འཆར་འགོད་སྐབས་དོན་དངོས་ཐོག་ཧ་ཅང་སེམས་འཚབ་དང་ཐེ་ཚོམ་བྱུང་། ཕྱི་ལོ་ ༢༠༢༤ ནས་ ༢༠༢༥ བར་འཛམ་གླིང་གི་གནས་སྟངས་དེ་མུ་མཐུད་འཁྲུག་ཆ་དོད་པོར་གནས་ཡོད་ཅིང་། ཡུག་ཁུ་རེན་དང་ཨུ་རུ་སུ་བར་གྱི་དམག་འཁྲུག་དང་། དཀྱིལ་ཤར་ཨེ་ཤ་ཡའི་དམག་འཁྲུག མཚོ་འགག་གི་གནད་དོན་བཅས་ཉེན་ཚབས་ཆེ་རུ་འགྲོ་བཞིན་ཡོད་ལ། དེ་བཞིན་ལྷོ་བྱང་ཀོ་རི་ཡ་ཁྱིམ་མཚེས་རྒྱལ་ཁབ་གཉིས་བར་ཆབ་སྲིད་ཀྱི་དཀའ་ངལ་འཕྲད་བཞིན་ཡོད། འདི་ལྟ་བུའི་ཟིང་འཁྲུག་ཆེ་བའི་དུས་སྐབས་སུ། གློག་བརྙན་དུས་སྟོན་ཞིག་གིས་ལྟད་མོ་བ་རྣམས་ལ་ཅི་ཞིག་སྤྲོད་ཐུབ་བམ། རྩོམ་རིག་གློག་བརྙན་གྱིས་ཅི་ཞིག་སྤྲོད་ཐུབ་བམ། ང་ཚོས་ད་ལྟའི་སེམས་འཚབ་ལ་གདོང་ལེན་བྱེད་ཐུབ་པ་ཞིག་རེད། ཅེས་བཀོད་འདུག
དུས་སྟོན་དེའི་ངོ་སྤྲོད་ནང་པདྨ་ཚེ་བརྟན་ལགས་དམ་པ་ཁོང་ནི་བོད་ཀྱི་རྩོམ་པ་པོ་དང་། འཁྲབ་གཞུང་རྩོམ་མཁན། གློག་བརྙན་འཁྲབ་ཁྲིད་པ། དེང་རབས་སྒྱུ་རྩལ་པ་གྲགས་ཅན་ཞིག་ཡིན་ཞིང། ཁོང་གི་གློག་བརྙན་བརྩམས་ཆོས་ལ་རྒྱལ་སྤྱིའི་གློག་བརྙན་དུས་སྟོན་ཁག་ཏུ་གཟེངས་རྟགས་ཐོབ་སྟེ། རྒྱལ་སྤྱིའི་ཐོག་བོད་ཀྱི་རིག་གཞུང་ངོ་སྤྲོད་བྱེད་མཁན་མི་སྣ་གལ་ཆེན་ཞིག་ཏུ་གྱུར་ཡོད། ཅེས་དང་། དམ་པ་ཁོང་གིས་ངས་དངོས་ཡོད་ལ་འགྱུར་བ་གཏོང་འདོད་མེད་ལ། དངོས་ཡོད་ལ་མཛེས་སྤྲས་ཀྱང་བྱེད་འདོད་མེད། ང་ད་ལྟའི་བོད་མིའི་གནས་སྟངས་དང་སྐད་ཡིག་ཐོག་དོ་སྣང་བྱེད་མཁན་རྣམས་ཀྱི་མིག་མདུན་དུ་མངོན་པར་འདོད། ཅེས་བརྗོད་པ་བཞིན། ཁོང་གི་བརྩམས་ཆོས་ཀྱིས་བོད་མིའི་འཚོ་བ་དང་རིག་གཞུང་གི་དངོས་ཡོད་མཚོན་ཐུབ་ཡོད་པས་མིང་གྲགས་ཆེ་ལ། ཁོང་གི་བརྩམས་ཆོས་ནི་བོད་མིའི་སྲོལ་རྒྱུན་ལས་བརྒལ་ཏེ། འཚོ་བ་དཀྱུས་མའི་སྒྲུང་གཏམ་བརྒྱུད་དངོས་ཡོད་ཀྱི་འཚོ་བ་དང་དད་མོས་གསལ་སྟོན་བྱས་ཡོད་ལ། ཁོང་གི་གཏིང་ཟབ་པའི་བརྙན་རིས་ཀྱི་བསམ་གཞིགས་བརྒྱུད་མི་སྣའི་ནང་སེམས་དང་བོད་མིའི་རིག་གཞུང་གི་ངོ་བོ་གསལ་སྟོན་གནང་ཡོད། ཅེས་བཀོད་འདུག
དེ་བཞིན་ཉེ་ལམ་འདས་གྲོངས་ཕྱིན་པའི་ཨ་རིའི་དེང་རབས་རྩོམ་རིག་ནང་ཤུགས་རྐྱེན་ཆེ་ཤོས་ཀྱི་རྩོམ་པ་པོ་ཞིག་ཏུ་ངོས་འཛིན་བྱེད་པའི་པུལ་ཨུ་སི་ཌིར་ནི་སྒྲུང་གཏམ་རྩོམ་མཁན་དང་། སྙན་ངག་པ། འཁྲབ་གཞུང་རྩོམ་པ་པོ། གློག་བརྙན་འཁྲབ་སྟོན་པ་སོགས་ཀྱི་ལས་ཀ་གཉེར་ཡོད་ཅིང་། ཁོང་ལ་ཧྥ་རན་སིའི་མེ་ཌི་སི་རྩོམ་རིག་གཟེངས་རྟགས་ཐོབ་མྱོང་བ་མ་ཟད། ཁོང་གི་ཚབ་མཚོན་བརྩམས་ཆོས་ཟླ་བའི་ཕོ་བྲང་དང་། སྒྱུ་མའི་དཔེ་ཆ། གྲོང་ཁྱེར་མཐའ་མ། མུན་པའི་ཁྲོད་ཀྱི་མི་སོགས་ཡོད། ཁོང་གི་བརྩམས་ཆོས་ཁྲོད་ཁེར་རྐྱང་དང་སྤྱི་ཚོགས། སེམས་ཁམས་དང་དངོས་པོ། རང་ཉིད་དང་གཞན་བཅས་ཀྱི་གོ་དོན་གཏིང་ཟབ་པའི་སྒོ་ནས་འཚོལ་ཞིབ་བྱས་ཡོད། ཅེས་བཀོད་འདུག
ཐེངས་འདིའི་དུས་སྟོན་ཐོག་པདྨ་ཚེ་བརྟན་ལགས་དམ་པའི་གློག་བརྙན་བརྩམས་ཆོས་གསའ་དང་། དབུགས་ལྒང་། སྦྱིན་པ། ཐར་ལོ། གཡང་མདའ། འཚོལ། ཁྱི་རྒན། ལྷིང་འཇགས་ཀྱི་མ་ཎི་རྡོ་འབུམ། དེ་བཞིན་ཁོང་གིས་ཕབ་སྐྲུན་བྱེད་པའི་གློག་བརྙན་གཅིག་དང་བཞི་བཅས་གཟུགས་འབུལ་ཞུ་རྒྱུ་ཡིན་འདུག
ཐའེ་པེ་རྩོམ་རིག་དུས་སྟོན་ནི་ཕྱི་ལོ་ ༢༠༠༨ ལོ་ནས་མགོ་བཙུགས་པའི་ལོ་རེའི་དཔྱིད་ཀའི་རྩོམ་རིག་དུས་སྟོན་ཞིག་ཡིན་ཞིང་། ཕྱི་ལོ་ ༢༠༡༡ ནས་བཟུང་ལས་གཞི་རྒྱ་ཆེ་རུ་ཕྱིན་སྟེ། ཐའེ་པེ་གྲོང་ཁྱེར་གྱི་སྒྱུ་རྩལ་དང་རིག་གཞུང་ཚོགས་པ་མང་པོ་མཉམ་འབྲེལ་གྱིས་བགྲོ་གླེང་དང་། དཔེ་དེབ་ཀློག་འདོན། བརྙན་རིས་འགྲེམས་སྟོན་སྣ་མང་། གློག་བརྙན་ཁྲིད་སྟོན། དེ་བཞིན་རྒྱལ་སྤྱིའི་ཐོག་རྒྱ་ཡིག་རྩོམ་པ་པོ་མཉམ་དུ་བགྲོ་གླེང་སྣ་ཚོགས་གོ་སྒྲིག་ཞུ་བཞིན་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
